ບົດທີ 42
ໂຢນາທານກ້າຫານແລະພັກດີ
ໂຢນາທານເປັນລູກຊາຍກົກຂອງກະສັດຊາອູນແລະລາວກໍເປັນນັກຮົບທີ່ກ້າຫານຫຼາຍ. ດາວິດເຄີຍເວົ້າວ່າໂຢນາທານວ່ອງໄວກວ່ານົກອິນຊີແລະແຂງແຮງກວ່າໂຕສິງ. ມີມື້ໜຶ່ງໂຢນາທານເຫັນທະຫານຟີລິດສະຕີນ 20 ຄົນຢູ່ເທິງໂນນພູ ລາວຈຶ່ງເວົ້າກັບຜູ້ທີ່ຖືອາວຸດໃຫ້ລາວວ່າ: ‘ເຮົາຈະໂຈມຕີພວກຟີລິດສະຕີນກໍຕໍ່ເມື່ອພະເຢໂຫວາໃຫ້ສັນຍານກັບເຮົາ. ຖ້າພວກຟີລິດສະຕີນບອກເຮົາຂຶ້ນໄປ ກໍສະແດງວ່າເພິ່ນຢາກໃຫ້ເຮົາໂຈມຕີເຂົາເຈົ້າ.’ ແລ້ວພວກຟີລິດສະຕີນກໍຮ້ອງວ່າ: ‘ຂຶ້ນມາສູ້ກັນຢູ່ພີ້!’ ທັງສອງຄົນຈຶ່ງຂຶ້ນໄປສູ້ກັບເຂົາເຈົ້າແລະໄດ້ໄຊຊະນະ.
ໂຢນາທານຄວນຈະໄດ້ເປັນກະສັດອົງຕໍ່ໄປຍ້ອນລາວເປັນລູກຊາຍກົກຂອງກະສັດຊາອູນ. ເຖິງວ່າໂຢນາທານຮູ້ແລ້ວວ່າພະເຢໂຫວາເລືອກດາວິດໃຫ້ເປັນກະສັດອົງຕໍ່ໄປຂອງອິດສະຣາເອນ ແຕ່ລາວກໍບໍ່ໄດ້ອິດສາດາວິດເລີຍ. ໂຢນາທານກັບດາວິດເປັນໝູ່ສະໜິດກັນ. ເຂົາເຈົ້າສັນຍາຕໍ່ກັນວ່າຈະປົກປ້ອງແລະຊ່ວຍເຫຼືອກັນ. ໂຢນາທານເອົາເສື້ອຄຸມ ດາບ ທະນູ ແລະສາຍແອວໃຫ້ດາວິດເພື່ອຢືນຢັນວ່າເຂົາເຈົ້າເປັນໝູ່ກັນ.
ຕອນທີ່ດາວິດກຳລັງໜີຈາກຊາອູນ ໂຢນາທານກໍໄປຫາດາວິດແລະເວົ້າວ່າ: ‘ໃຫ້ເຈົ້າເຂັ້ມແຂງແລະກ້າຫານເດີ້. ພະເຢໂຫວາເລືອກເຈົ້າເປັນກະສັດແລ້ວ ແມ່ນແຕ່ພໍ່ຂ້ອຍກໍຮູ້ເລື່ອງນີ້.’ ເຈົ້າຢາກມີໝູ່ທີ່ດີຄືກັບໂຢນາທານບໍ?
ໂຢນາທານສ່ຽງຊີວິດຊ່ວຍດາວິດຫຼາຍເທື່ອ. ລາວຮູ້ວ່າກະສັດຊາອູນພໍ່ຂອງລາວຢາກຂ້າດາວິດ ລາວຈຶ່ງເວົ້າກັບພໍ່ວ່າ: ‘ຖ້າພໍ່ຂ້າດາວິດ ພໍ່ກໍຈະເຮັດບາບ ເພາະລາວບໍ່ໄດ້ເຮັດຫຍັງຜິດເລີຍ.’ ຊາອູນໃຈຮ້າຍໃຫ້ໂຢນາທານຫຼາຍ. ຫຼາຍປີຕໍ່ມາຊາອູນກັບໂຢນາທານກໍຕາຍຢູ່ສະໜາມຮົບ.
ຫຼັງຈາກໂຢນາທານຕາຍ ດາວິດກໍຊອກຫາເມຟີໂບເຊັດ. ເມື່ອເຈິແລ້ວ ລາວກໍບອກເມຟີໂບເຊັດວ່າ: ‘ຍ້ອນພໍ່ຂອງເຈົ້າເປັນໝູ່ຮັກຂອງຂ້ອຍ ຂ້ອຍຈະເບິ່ງແຍງເຈົ້າຕະຫຼອດຊີວິດ. ເຈົ້າຈະໄດ້ຢູ່ໃນວັງຂອງຂ້ອຍແລະນັ່ງກິນເຂົ້ານຳຂ້ອຍ.’ ດາວິດບໍ່ເຄີຍລືມໂຢນາທານໝູ່ຂອງລາວເລີຍ.
“ໃຫ້ພວກເຈົ້າຮັກກັນຄືກັບທີ່ຂ້ອຍຮັກພວກເຈົ້າ. ບໍ່ມີຜູ້ໃດມີຄວາມຮັກທີ່ຍິ່ງໃຫຍ່ກວ່າຜູ້ທີ່ຍອມຕາຍເພື່ອໝູ່ຂອງລາວ.”—ໂຢຮັນ 15:12, 13