ບົດທີ 45
ອິດສະຣາເອນຖືກແບ່ງແຍກ
ໃນໄລຍະທີ່ໂຊໂລໂມນນະມັດສະການພະເຢໂຫວາ ແຜ່ນດິນອິດສະຣາເອນກໍມີແຕ່ຄວາມສະຫງົບສຸກ. ແຕ່ເມື່ອໂຊໂລໂມນແຕ່ງດອງກັບຜູ້ຍິງຕ່າງຊາດຫຼາຍຄົນທີ່ຂາບໄຫວ້ຮູບບູຊາ ລາວກໍຄ່ອຍໆປ່ຽນໄປແລະເລີ່ມຂາບໄຫວ້ຮູບບູຊາຄືກັນກັບເຂົາເຈົ້າ. ພະເຢໂຫວາໃຈຮ້າຍໃຫ້ໂຊໂລໂມນຫຼາຍແລະບອກລາວວ່າ: ‘ເຮົາຈະຍຶດແຜ່ນດິນອິດສະຣາເອນໄປຈາກຄອບຄົວຂອງເຈົ້າແລະແບ່ງອອກເປັນ 2 ສ່ວນ. ເຮົາຈະເອົາແຜ່ນດິນສ່ວນໃຫຍ່ໃຫ້ຜູ້ໜຶ່ງທີ່ເປັນຄົນຮັບໃຊ້ຂອງເຈົ້າ ແລະຈະໃຫ້ຄອບຄົວຂອງເຈົ້າປົກຄອງແຕ່ສ່ວນນ້ອຍໆເທົ່ານັ້ນ.’
ພະເຢໂຫວາບອກເລື່ອງນີ້ໃຫ້ຄົນຮັບໃຊ້ຂອງໂຊໂລໂມນທີ່ຊື່ເຢໂຣໂບອາມຮູ້ນຳ. ຕອນທີ່ເຢໂຣໂບອາມກຳລັງຍ່າງຢູ່ຫົນທາງ ລາວໄດ້ເຈິກັບຜູ້ພະຍາກອນອາຮີຢາ. ອາຮີຢາຈີກເສື້ອຂອງໂຕເອງອອກເປັນ 12 ຕ່ອນ ແລ້ວບອກເຢໂຣໂບອາມວ່າ: ‘ພະເຢໂຫວາຈະຍຶດເອົາແຜ່ນດິນອິດສະຣາເອນຈາກຄອບຄົວຂອງໂຊໂລໂມນ ແລະຈະແບ່ງອອກເປັນ 2 ສ່ວນ. ໃຫ້ເຈົ້າເອົາເສື້ອນີ້ໄປ 10 ຕ່ອນ ຍ້ອນເຈົ້າຈະໄດ້ເປັນກະສັດປົກຄອງອິດສະຣາເອນ 10 ຕະກູນ.’ ເມື່ອກະສັດໂຊໂລໂມນຮູ້ເລື່ອງນີ້ ລາວກໍພະຍາຍາມຂ້າເຢໂຣໂບອາມ! ແຕ່ເຢໂຣໂບອາມໄດ້ໜີໄປຢູ່ເອຢິບ. ຕໍ່ມາ ໂຊໂລໂມນກໍຕາຍແລະເຣໂຮໂບອາມລູກຊາຍຂອງລາວກໍເປັນກະສັດແທນ. ເມື່ອເຢໂຣໂບອາມເຫັນວ່າປອດໄພແລ້ວ ລາວກໍກັບມາອິດສະຣາເອນ.
ພວກຜູ້ເຖົ້າຄົນອິດສະຣາເອນບອກເຣໂຮໂບອາມວ່າ: ‘ຖ້າທ່ານເຮັດດີກັບປະຊາຊົນ ເຂົາເຈົ້າຈະພັກດີຕໍ່ທ່ານ.’ ແຕ່ພວກຄົນໜຸ່ມທີ່ເປັນໝູ່ຂອງເຣໂຮໂບອາມພັດບອກວ່າ: ‘ຢ່າຊູໄປອີ່ຕົນປະຊາຊົນ! ທ່ານຕ້ອງໃຫ້ເຂົາເຈົ້າເຮັດວຽກໜັກຂຶ້ນອີກ!’ ເຣໂຮໂບອາມເຮັດຕາມຄຳແນະນຳທີ່ໝູ່ບອກ. ລາວເຮັດກັບປະຊາຊົນແບບໂຫດຮ້າຍ ປະຊາຊົນຈຶ່ງກະບົດຕໍ່ລາວແລະຕັ້ງເຢໂຣໂບອາມເປັນກະສັດປົກຄອງ 10 ຕະກູນ ເຊິ່ງຖືກເອີ້ນວ່າອານາຈັກອິດສະຣາເອນ. ສ່ວນອີກ 2 ຕະກູນທີ່ຖືກເອີ້ນວ່າອານາຈັກຢູດາຍັງພັກດີຕໍ່ເຣໂຮໂບອາມ. ຕັ້ງແຕ່ນັ້ນມາ ອິດສະຣາເອນ 12 ຕະກູນກໍຖືກແບ່ງແຍກ.
ເຢໂຣໂບອາມບໍ່ຢາກໃຫ້ປະຊາຊົນໄປນະມັດສະການພະເຢໂຫວາຢູ່ວິຫານໃນເມືອງເຢຣູຊາເລັມ ເຊິ່ງເປັນບ່ອນທີ່ເຣໂຮໂບອາມປົກຄອງຢູ່. ເຈົ້າຮູ້ບໍວ່າຍ້ອນຫຍັງ? ຍ້ອນເຢໂຣໂບອາມຢ້ານວ່າປະຊາຊົນຈະຖິ້ມລາວແລະກັບໄປຫາເຣໂຮໂບອາມ. ລາວເລີຍສ້າງຮູບງົວນ້ອຍຄຳ 2 ໂຕ ແລ້ວບອກປະຊາຊົນວ່າ: ‘ເຢຣູຊາເລັມຢູ່ໄກໂພດ ພວກເຈົ້ານະມັດສະການພະເຈົ້າຢູ່ນີ້ກໍໄດ້.’ ປະຊາຊົນກໍເລີ່ມນະມັດສະການຮູບງົວນ້ອຍຄຳແລະຖິ້ມພະເຢໂຫວາອີກເທື່ອໜຶ່ງ.
“ຢ່າມີສ່ວນຮ່ວມຫຍັງກັບຄົນທີ່ບໍ່ເຊື່ອ ຍ້ອນຄວາມດີຈະມີສ່ວນຮ່ວມກັບຄວາມຊົ່ວໄດ້ແນວໃດ? . . . ຄົນທີ່ເຊື່ອຈະມີຫຍັງຄືກັບຄົນທີ່ບໍ່ເຊື່ອບໍ?”—2 ໂກຣິນໂທ 6:14, 15