ບົດທີ 102
ເລື່ອງທີ່ພະເຈົ້າເປີດເຜີຍກັບໂຢຮັນ
ຕອນທີ່ອັກຄະສາວົກໂຢຮັນເປັນນັກໂທດຢູ່ເກາະປັດໂມ ພະເຢຊູໃຫ້ລາວເຫັນນິມິດຫຼືພາບເຫດການ 16 ເລື່ອງທີ່ຈະເກີດຂຶ້ນໃນອະນາຄົດ. ນິມິດທັງໝົດນີ້ເຮັດໃຫ້ຮູ້ວ່າພະເຢໂຫວາຈະເຮັດໃຫ້ຊື່ຂອງເພິ່ນໄດ້ຮັບຄວາມນັບຖືຫຼາຍທີ່ສຸດ ເພິ່ນຈະມາປົກຄອງ ແລະເພິ່ນຈະເຮັດໃຫ້ທຸກຢ່າງໃນໂລກແລະໃນສະຫວັນເປັນໄປຕາມທີ່ເພິ່ນຕ້ອງການໃຫ້ເປັນ.
ໃນນິມິດໜຶ່ງ ໂຢຮັນເຫັນພະເຢໂຫວານັ່ງຢູ່ເທິງບັນລັງທີ່ສະຫງ່າງາມ. ຢູ່ອ້ອມບັນລັງນັ້ນມີຜູ້ປົກຄອງ 24 ຄົນໃສ່ເສື້ອຄຸມສີຂາວແລະໃສ່ມົງກຸດຄຳ. ມີຟ້າແມບແລະສຽງຟ້າຮ້ອງອອກມາຈາກບັນລັງຂອງພະເຈົ້າ. ຜູ້ປົກຄອງ 24 ຄົນໝູບລົງນະມັດສະການພະເຢໂຫວາ. ໃນອີກນິມິດໜຶ່ງ ໂຢຮັນເຫັນຄົນກຸ່ມໃຫຍ່ຈາກທຸກປະເທດ ທຸກຊົນຊາດ ແລະທຸກພາສາມານະມັດສະການພະເຢໂຫວາ. ແກະນ້ອຍຂອງພະເຈົ້າເຊິ່ງກໍຄືພະເຢຊູ ເພິ່ນຈະເບິ່ງແຍງເຂົາເຈົ້າແລະຈະພາເຂົາເຈົ້າໄປບ່ອນທີ່ມີນ້ຳພຸຕ່າງໆທີ່ໃຫ້ຊີວິດ. ຫຼັງຈາກນັ້ນ ໂຢຮັນກໍເຫັນອີກນິມິດໜຶ່ງທີ່ພະເຢຊູເລີ່ມປົກຄອງເປັນກະສັດໃນສະຫວັນພ້ອມກັບຜູ້ປົກຄອງ 24 ຄົນ ແລະນິມິດຕໍ່ມາ ໂຢຮັນເຫັນພະເຢຊູຕໍ່ສູ້ກັບພະຍານາກເຊິ່ງກໍຄືຊາຕານແລະຕໍ່ສູ້ກັບປີສາດພັກພວກຂອງມັນ ແລ້ວພະເຢຊູກໍຖິ້ມຊາຕານກັບພັກພວກຂອງມັນອອກຈາກສະຫວັນລົງມາເທິງໂລກ.
ຫຼັງຈາກນັ້ນ ໂຢຮັນໄດ້ເຫັນພາບທີ່ໜ້າປະທັບໃຈ ລາວເຫັນແກະນ້ອຍຂອງພະເຈົ້າຢືນຢູ່ເທິງພູຊີໂອນພ້ອມກັບຄົນ 144.000 ຄົນ ແລະເຫັນທູດສະຫວັນອົງໜຶ່ງບິນໄປທົ່ວໂລກເພື່ອປະກາດໃຫ້ຄົນຢ້ານຢຳພະເຈົ້າແລະຍ້ອງຍໍສັນລະເສີນເພິ່ນ.
ນິມິດຕໍ່ໄປ ໂຢຮັນເຫັນການສູ້ຮົບກັນໃນສົງຄາມອາມາເຄໂດນ. ພະເຢຊູກັບກອງທັບຂອງເພິ່ນເອົາຊະນະຊາຕານແລະທຳລາຍລະບົບຊົ່ວຂອງມັນ. ໃນນິມິດສຸດທ້າຍ ໂຢຮັນເຫັນສະຫວັນແລະໂລກມີສັນຕິສຸກແທ້ໆ. ຊາຕານກັບຜູ້ທີ່ຕິດຕາມມັນຖືກທຳລາຍຕະຫຼອດໄປ. ສິ່ງທີ່ມີຊິວິດໃນສະຫວັນແລະມະນຸດທຸກຄົນໃນໂລກຍົກຍ້ອງແລະນັບຖືຊື່ທີ່ບໍລິສຸດຂອງພະເຢໂຫວາແລະນະມັດສະການເພິ່ນອົງດຽວ.
“ເຮົາຈະໃຫ້ເຈົ້າກັບຜູ້ຍິງເປັນສັດຕູກັນ ແລະເຊື້ອສາຍຂອງເຈົ້າກັບເຊື້ອສາຍຂອງຜູ້ຍິງຈະເປັນສັດຕູກັນ. ເຊື້ອສາຍຂອງຜູ້ຍິງຈະຢຽບຫົວຂອງເຈົ້າຈົນມຸ່ນ ແລະເຈົ້າຈະເຮັດໃຫ້ສົ້ນຕີນຂອງເຊື້ອສາຍຂອງຜູ້ຍິງບວມຊ້ຳ.”—ປະຖົມມະການ 3:15