ຊີວິດຄລິດສະຕຽນ

ຊີວິດຄູ່—ຄວາມຜູກພັນຕະຫຼອດຊີວິດ

ຄລິດສະຕຽນທີ່ປະສົບຄວາມສຳເລັດໃນຊີວິດຄູ່ຈະເຮັດໃຫ້ພະເຢໂຫວາໄດ້ຮັບການຍົກຍ້ອງແລະເຮັດໃຫ້ທັງຜົວແລະເມຍມີຄວາມສຸກ. (ມຣກ 10:9) ເພື່ອຈະມີຄວາມສຸກ ແລະມີຊີວິດຄູ່ທີ່ຍືນຍາວ ເຂົາເຈົ້າຕ້ອງເຮັດຕາມຫຼັກການໃນຄຳພີໄບເບິນຕອນເລືອກຄົນທີ່ຈະແຕ່ງດອງນຳ.

ດີກວ່າທີ່ເຈົ້າຈະເລີ່ມຄົບຫາເປັນແຟນກັບໃຜຕອນທີ່ “ກາຍໄວໜຸ່ມສາວໄປແລ້ວ” ເພາະຊ່ວງໄວລຸ້ນເຈົ້າຈະມີອາລົມຄວາມຮູ້ສຶກທາງເພດຫຼາຍກວ່າປົກກະຕິເຊິ່ງຈະສົ່ງຜົນຕໍ່ການຕັດສິນໃຈຂອງເຈົ້າ. (1ກຣ 7:36) ໃຫ້ໃຊ້ຊ່ວງທີ່ເປັນໂສດເພື່ອສະໜິດກັບພະເຈົ້າແລະພັດທະນາຄຸນລັກສະນະແບບຄລິດສະຕຽນ. ຖ້າເຮັດແບບນີ້ ເຈົ້າກໍຈະມີໂອກາດມີຊີວິດຄູ່ທີ່ມີຄວາມສຸກໄດ້ຫຼາຍກວ່າ.

ກ່ອນຈະຕົກລົງແຕ່ງດອງກັບໃຜ ໃຫ້ໃຊ້ເວລາຫຼາຍພໍທີ່ເຈົ້າຈະຮູ້ຈັກ ‘ຄວາມງາມພາຍໃນ’ ຂອງລາວ. (1ປຕ 3:4) ຖ້າເຈົ້າຮູ້ສຶກວ່າມີເລື່ອງສຳຄັນບາງຢ່າງທີ່ຍັງບໍ່ແນ່ໃຈ ກໍໃຫ້ລົມກັບລາວ. ໃນຊີວິດແຕ່ງດອງ ຖ້າຢາກເປັນຜົວຫຼືເມຍທີ່ດີເຮົາຕ້ອງເປັນຝາຍໃຫ້ ບໍ່ແມ່ນເປັນຝ່າຍຮັບຢ່າງດຽວ. (ຟລປ 2:3, 4) ຖ້າເຈົ້າເຮັດຕາມຫຼັກການໃນຄຳພີໄບເບິນກ່ອນທີ່ຈະແຕ່ງດອງ ເຈົ້າກໍໄດ້ວາງຮາກຖານທີ່ໝັ້ນຄົງໃຫ້ກັບຊີວິດຄູ່ຂອງເຈົ້າ.

ເບິ່ງວິດີໂອກຽມພ້ອມກ່ອນແຕ່ງດອງ—ຕອນ 3: “ຄິດໄລ່ຄ່າໃຊ້ຈ່າຍກ່ອນ” ແລ້ວຕອບຄຳຖາມຕໍ່ໄປນີ້:

ຄວາມສຳພັນຂອງພີ່ນ້ອງຍິງກັບເຊນເປັນແນວໃດແດ່?
ລາວເລີ່ມສັງເກດເຫັນຫຍັງໃນໂຕເຊນຫຼັງຈາກທີ່ຄົບກັນໄປໄດ້ໄລຍະໜຶ່ງ?
ພໍ່ແມ່ຊ່ວຍລາວແນວໃດ ແລະລາວຕັດສິນໃຈແນວໃດ?

ພີ່ນ້ອງຊາຍທີ່ກຳລັງຄົບຫາກັບພີ່ນ້ອງຍິງໜ້າຈະຄິດເຖິງຄຳຖາມຕໍ່ໄປນີ້:

ລາວມີຄຸນລັກສະນະແບບຄລິດສະຕຽນຫຍັງແດ່? ລາວເຮັດໃຫ້ເຫັນແນວໃດວ່າລາວໃຫ້ຄວາມສຳຄັນກັບການປົກຄອງຂອງພະເຈົ້າ? ລາວເຊື່ອຟັງຄຳແນະນຳຈາກຄຳພີໄບເບິນແລະອົງການບໍ? ລາວສົນໃຈແລະເປັນຫ່ວງຄົນອື່ນບໍ?

ພີ່ນ້ອງຍິງທີ່ກຳລັງຄົບຫາກັບພີ່ນ້ອງຊາຍໜ້າຈະຄິດເຖິງຄຳຖາມຕໍ່ໄປນີ້:

ລາວມີຄຸນລັກສະນະແບບຄລິດສະຕຽນຫຍັງແດ່? ລາວໃຫ້ການນະມັດສະການພະເຈົ້າແລະວຽກມອບໝາຍໃນປະຊາຄົມສຳຄັນກວ່າວຽກອາຊີບ ການຫາເງິນ ກິລາ ແລະການພັກຜ່ອນຢ່ອນໃຈບໍ? ລາວເປັນແນວໃດເມື່ອຢູ່ກັບຄອບຄົວ? ລາວສົນໃຈແລະເປັນຫ່ວງຄົນອື່ນບໍ?