ບົດຄວາມສຶກສາທີ 9
ພີ່ນ້ອງຊາຍທີ່ຍັງໜຸ່ມຈະໄດ້ຮັບຄວາມນັບຖືຈາກຄົນອື່ນໄດ້ແນວໃດ?
“ພວກຄົນໜຸ່ມຂອງພະອົງມາຫາພະອົງເໝືອນດັ່ງນ້ຳໝອກເວລາຮຸ່ງເຊົ້າ.”—ເພງ. 110:3
ເພງ 39 ສ້າງຊື່ສຽງດີກັບພະເຈົ້າ
ໃຈຄວາມສຳຄັນa
1. ພີ່ນ້ອງຊາຍທີ່ຍັງໜຸ່ມສາມາດເຮັດຫຍັງໄດ້ແດ່?
ພີ່ນ້ອງຊາຍທີ່ຍັງໜຸ່ມ ເຈົ້າສາມາດຊ່ອຍວຽກໃນປະຊາຄົມໄດ້ຫຼາຍຍ້ອນວ່າເຈົ້າຍັງໜຸ່ມແລະມີເຫື່ອແຮງຫຼາຍ. (ສຸພາ. 20:29) ເຈົ້າສາມາດເຮັດຫຼາຍຢ່າງເພື່ອຊ່ອຍພີ່ນ້ອງໃນປະຊາຄົມ ແລະເຈົ້າອາດຢາກເປັນຜູ້ຊ່ວຍວຽກຮັບໃຊ້. ແຕ່ເຈົ້າອາດຈະຮູ້ສຶກວ່າ ຄົນອື່ນຄິດວ່າເຈົ້າຍັງນ້ອຍໂພດແລະບໍ່ພ້ອມທີ່ຈະຮັບເອົາວຽກມອບໝາຍທີ່ສຳຄັນເທື່ອ. ເຖິງເຈົ້າຈະເບິ່ງຄືວ່າຍັງນ້ອຍ ແຕ່ກໍມີບາງຢ່າງທີ່ເຈົ້າສາມາດເຮັດໄດ້ໃນຕອນນີ້ເພື່ອໃຫ້ພີ່ນ້ອງໄວ້ວາງໃຈແລະນັບຖືເຈົ້າ.
2. ເຮົາຈະຮຽນຫຍັງໃນບົດຄວາມນີ້?
2 ໃນບົດຄວາມນີ້ເຮົາຈະມາຮຽນເລື່ອງຂອງກະສັດດາວິດ ແລະຈະມາຮຽນບາງເລື່ອງກ່ຽວກັບກະສັດອົງອື່ນໆຂອງຢູດາຄື: ອາຊາແລະເຢໂຮຊາຟັດ. ເຮົາຈະມາເບິ່ງວ່າສາມຄົນນີ້ມີບັນຫາຫຍັງແດ່ ແລະເຂົາເຈົ້າຮັບມືກັບບັນຫານັ້ນແນວໃດ. ແລະພີ່ນ້ອງຊາຍທີ່ຍັງໜຸ່ມໄດ້ບົດຮຽນຫຍັງຈາກເລື່ອງຂອງເຂົາເຈົ້າ.
ຮຽນຈາກກະສັດດາວິດ
3. ວິທີໜຶ່ງທີ່ພີ່ນ້ອງຊາຍທີ່ຍັງໜຸ່ມສາມາດຊ່ອຍພີ່ນ້ອງທີ່ສູງອາຍຸໃນປະຊາຄົມໄດ້ແມ່ນຫຍັງ?
3 ຕອນທີ່ດາວິດຍັງໜຸ່ມລາວໄດ້ຮຽນຮູ້ບາງຢ່າງທີ່ເປັນປະໂຫຍດ. ລາວມີສາຍສຳພັນທີ່ໃກ້ຊິດກັບພະເຢໂຫວາ. ແລະລາວຍັງເປັນນັກດົນຕີທີ່ເກັ່ງແລະໃຊ້ຄວາມສາມາດນັ້ນເພື່ອເຮັດໃຫ້ກະສັດຊາອູນພໍໃຈ. (1 ຊາມ. 16:16, 23) ພີ່ນ້ອງຊາຍທີ່ຍັງໜຸ່ມເດ ເຈົ້າຈະຊ່ອຍພີ່ນ້ອງໃນປະຊາຄົມໄດ້ບໍ? ໄດ້ແທ້! ຕົວຢ່າງເຊັ່ນ: ເຈົ້າອາດຈະຊ່ອຍພີ່ນ້ອງທີ່ສູງອາຍຸບາງຄົນໃຫ້ຮູ້ຈັກໃຊ້ແທັບເລັດຫຼືເຄື່ອງເອເລັກໂຕຣນິກຕ່າງໆໃນການປະຊຸມແລະການສຶກສາສ່ວນຕົວ. ການທີ່ເຈົ້າຮູ້ຈັກໃຊ້ເຄື່ອງເອເລັກໂຕຣນິກສາມາດຊ່ອຍພີ່ນ້ອງທີ່ສູງອາຍຸໄດ້ຫຼາຍແທ້ໆ.
ດາວິດເປັນຄົນທີ່ມີຄວາມຮັບຜິດຊອບແລະໄວ້ໃຈໄດ້ ຕອນທີ່ເບິ່ງແຍງຝູງແກະຂອງພໍ່ ລາວໄດ້ປົກປ້ອງຝູງແກະຈາກໂຕໝີ (ເບິ່ງຂໍ້ 4)
4. ຄືກັບດາວິດ ພີ່ນ້ອງຊາຍຕ້ອງມີຄຸນລັກສະນະຫຍັງແດ່? (ເບິ່ງຮູບໜ້າປົກ)
4 ດາວິດສະແດງໃຫ້ເຫັນວ່າລາວເປັນຄົນທີ່ມີຄວາມຮັບຜິດຊອບແລະໄວ້ໃຈໄດ້. ຕົວຢ່າງເຊັ່ນ: ຕອນທີ່ດາວິດຍັງໜຸ່ມລາວຕັ້ງໃຈເບິ່ງແຍງຝູງແກະຂອງພໍ່. ວຽກນີ້ເປັນວຽກທີ່ສ່ຽງອັນຕະລາຍ ເພາະຕໍ່ມາດາວິດໄດ້ອະທິບາຍກັບກະສັດຊາອູນວ່າ: “ນາຍທ່ານ ຂ້ອຍເປັນຄົນລ້ຽງຝູງແກະຂອງພໍ່ ແລະເມື່ອມີສິງຫຼືໝີມາຄາບແກະໃນຝູງໄປ ຂ້ອຍກໍນຳໄປຈັດການແລະຊ່ອຍແກະໄວ້ໄດ້ກ່ອນຈະຖືກກິນ.” (1 ຊາມ. 17:34, 35, ລ.ມ.) ດາວິດຮູ້ວ່າເປັນຄວາມຮັບຜິດຊອບຂອງລາວທີ່ຕ້ອງເບິ່ງແຍງຝູງແກະແລະຕໍ່ສູ້ຢ່າງກ້າຫານເພື່ອປົກປ້ອງພວກມັນ. ພີ່ນ້ອງຊາຍທີ່ຍັງໜຸ່ມກໍສາມາດຮຽນແບບດາວິດໄດ້ໂດຍຕັ້ງໃຈເຮັດວຽກມອບໝາຍທີ່ໄດ້ຮັບ.
5. ຕາມຄຳເພງ 25:14 ສິ່ງສຳຄັນທີ່ສຸດທີ່ພີ່ນ້ອງຊາຍທີ່ຍັງໜຸ່ມຕ້ອງເຮັດແມ່ນຫຍັງ?
5 ຕອນທີ່ດາວິດຍັງໜຸ່ມ ລາວມີສາຍສຳພັນທີ່ໃກ້ຊິດກັບພະເຢໂຫວາ. ສາຍສຳພັນທີ່ລາວມີຕໍ່ພະເຢໂຫວານັ້ນສຳຄັນຫຼາຍກວ່າຄວາມກ້າຫານຫຼືຄວາມສາມາດອື່ນໆທີ່ລາວມີ. ພະເຢໂຫວາເປັນທັງພະເຈົ້າແລະໝູ່ສະໜິດຂອງດາວິດ. (ອ່ານຄຳເພງ 25:14) ພີ່ນ້ອງຊາຍທີ່ຍັງໜຸ່ມ ສິ່ງທີ່ສຳຄັນທີ່ສຸດທີ່ເຈົ້າຕ້ອງເຮັດກໍຄືເສີມສ້າງສາຍສຳພັນທີ່ໃກ້ຊິດກັບພະເຢໂຫວາ. ເມື່ອເຈົ້າເຮັດແບບນັ້ນເຈົ້າອາດຈະໄດ້ຮັບວຽກມອບໝາຍໃນປະຊາຄົມຫຼາຍຂຶ້ນ.
6. ບາງຄົນຄິດວ່າດາວິດເປັນຄົນແບບໃດ?
6 ບັນຫາຢ່າງໜຶ່ງທີ່ດາວິດມີກໍຄື ຫຼາຍຄົນຄິດວ່າລາວຍັງນ້ອຍໂພດແລະບໍ່ມີຄວາມຮັບຜິດຊອບ. ຕົວຢ່າງເຊັ່ນ: ຕອນທີ່ດາວິດສະເໜີຕົວຕໍ່ສູ້ກັບໂຄລີອາດ ກະສັດຊາອູນເວົ້າໃນແບບທີ່ເຮັດໃຫ້ດາວິດທໍ້ໃຈໂດຍບອກວ່າ: “ເຈົ້າຍັງນ້ອຍຢູ່.” (1 ຊາມ. 17:31-33, ລ.ມ.) ແລະກ່ອນໜ້ານັ້ນອ້າຍຂອງດາວິດກໍໄດ້ເວົ້າໃຫ້ດາວິດວ່າ ລາວເປັນຄົນບໍ່ມີຄວາມຮັບຜິດຊອບ. (1 ຊາມ. 17:26-30) ແຕ່ພະເຢໂຫວາບໍ່ໄດ້ຄິດວ່າດາວິດຍັງນ້ອຍຫຼືເປັນຄົນບໍ່ມີຄວາມຮັບຜິດຊອບ ຍ້ອນເພິ່ນຮູ້ຈັກດາວິດດີ. ແລະດາວິດກໍສາມາດຂ້າໂຄລີອາດໄດ້ຍ້ອນລາວໝາຍເພິ່ງພະເຢໂຫວາໝູ່ຂອງລາວ.—1 ຊາມ. 17:45, 48-51
7. ເຈົ້າໄດ້ບົດຮຽນຫຍັງຈາກເຫດການໜຶ່ງໃນຊີວິດຂອງດາວິດ?
7 ເຮົາໄດ້ບົດຮຽນຫຍັງຈາກເລື່ອງຂອງດາວິດ? ເຮົາຕ້ອງເປັນຄົນອົດທົນ. ມັນຕ້ອງໃຊ້ເວລາເພື່ອໃຫ້ຄົນທີ່ຮູ້ຈັກເຮົາຕັ້ງແຕ່ຍັງນ້ອຍເບິ່ງວ່າເຮົາເປັນຜູ້ໃຫຍ່. ແຕ່ເຮົາໝັ້ນໃຈວ່າພະເຢໂຫວາບໍ່ໄດ້ເບິ່ງເຮົາພຽງຮູບຮ່າງໜ້າຕາພາຍນອກ ແຕ່ເພິ່ນເບິ່ງທີ່ໃຈຂອງເຮົາແລະຮູ້ວ່າເຮົາສາມາດເຮັດຫຍັງໄດ້ແດ່. (1 ຊາມ. 16:7) ໃຫ້ມີສາຍສຳພັນທີ່ໃກ້ຊິດກັບພະເຢໂຫວາ. ດາວິດໄດ້ເຮັດແບບນັ້ນໂດຍເບິ່ງຈາກສິ່ງທີ່ພະເຢໂຫວາສ້າງແລະຄິດຕຶກຕອງວ່າ ສິ່ງເຫຼົ່ານັ້ນສອນໃຫ້ລາວຮູ້ຫຍັງກ່ຽວກັບພະເຢໂຫວາ. (ເພງ. 8:3, 4; 139:14; ຣມ. 1:20) ແລະອີກສິ່ງໜຶ່ງທີ່ເຈົ້າເຮັດໄດ້ກໍຄື ຂໍກຳລັງຈາກພະເຢໂຫວາ. ຕົວຢ່າງເຊັ່ນ: ໝູ່ຢູ່ໂຮງຮຽນໄດ້ເຍາະເຍີ້ຍທີ່ເຈົ້າເປັນພະຍານພະເຢໂຫວາບໍ? ຖ້າເປັນແນວນັ້ນ ຂໍໃຫ້ອະທິດຖານເຖິງພະເຢໂຫວາໃຫ້ຊ່ອຍເຈົ້າສາມາດອົດທົນກັບບັນຫານີ້ໄດ້ ແລະເຮັດຕາມຄຳແນະນຳທີ່ຢູ່ໃນຄຳພີໄບເບິນ ວິດີໂອ ແລະປຶ້ມຕ່າງໆຂອງອົງການ. ທຸກຄັ້ງທີ່ເຈົ້າເຫັນວ່າພະເຢໂຫວາຊ່ວຍເຫຼືອເຈົ້າໃຫ້ອົດທົນກັບບັນຫາ ເຈົ້າກໍຈະໝັ້ນໃຈເພິ່ນຫຼາຍຂຶ້ນ. ແລະອີກຢ່າງໜຶ່ງ ເມື່ອຄົນອື່ນເຫັນວ່າເຈົ້າໄວ້ວາງໃຈພະເຢໂຫວາ ເຂົາເຈົ້າກໍຈະໄວ້ໃຈເຈົ້າຫຼາຍຂຶ້ນ.
ພີ່ນ້ອງຊາຍທີ່ຍັງໜຸ່ມສາມາດຊ່ອຍຄົນອື່ນໄດ້ໃນຫຼາຍໆທາງ (ເບິ່ງຂໍ້ 8-9)
8-9. ສິ່ງໃດຊ່ອຍດາວິດໃຫ້ລໍຖ້າຢ່າງອົດທົນກ່ອນທີ່ຈະໄດ້ເປັນກະສັດ? ແລະພີ່ນ້ອງຊາຍທີ່ຍັງໜຸ່ມໄດ້ບົດຮຽນຫຍັງຈາກເລື່ອງຂອງລາວ?
8 ຂໍໃຫ້ມາເບິ່ງບັນຫາອີກຢ່າງໜຶ່ງທີ່ດາວິດເຈິ. ຫຼັງຈາກທີ່ລາວຖືກເຈີມໃຫ້ເປັນກະສັດ ລາວຍັງຕ້ອງໄດ້ຖ້າອີກຫຼາຍປີເພື່ອຈະໄດ້ຖືກແຕ່ງຕັ້ງເປັນກະສັດຂອງຢູດາຢ່າງເປັນທາງການ. (1 ຊາມ. 16:13; 2 ຊາມ. 2:3, 4) ໃນຕອນນັ້ນສິ່ງໃດຊ່ອຍລາວໃຫ້ລໍຖ້າຢ່າງອົດທົນ? ລາວພະຍາຍາມເຮັດໃນສິ່ງທີ່ລາວເຮັດໄດ້ແທນທີ່ຈະທໍ້ໃຈ. ຕົວຢ່າງເຊັ່ນ: ຕອນທີ່ລາວຫຼົບໜີຈາກຊາອູນໄປຢູ່ໃນເຂດແດນຂອງພວກຟີລິດສະຕິນ ລາວໄດ້ໃຊ້ເວລານັ້ນເພື່ອປົກປ້ອງເຂດແດນຂອງອານາຈັກຢູດາໂດຍຕໍ່ສູ້ກັບພວກສັດຕູຂອງອິດສະຣາເອນ.—1 ຊາມ. 27:1-12
9 ພີ່ນ້ອງຊາຍທີ່ຍັງໜຸ່ມ ເຈົ້າໄດ້ບົດຮຽນຫຍັງຈາກເລື່ອງຂອງດາວິດ? ຂໍໃຫ້ໃຊ້ທຸກໂອກາດເພື່ອຮັບໃຊ້ພີ່ນ້ອງ. ໃຫ້ເຮົາມາເບິ່ງຕົວຢ່າງຂອງພີ່ນ້ອງຊາຍທີ່ຊື່ຣີກາໂດ.b ຕອນທີ່ເລີ່ມເປັນໄວລຸ້ນລາວຢາກເປັນໄພໂອເນຍປະຈຳ ແຕ່ຜູ້ດູແລບອກວ່າລາວຍັງບໍ່ທັນພ້ອມເທື່ອ. ແທນທີ່ລາວຈະຄຽດຫຼືທໍ້ໃຈ ລາວພັດໃຊ້ເວລາທີ່ຈະປະກາດຫຼາຍຂຶ້ນກວ່າເກົ່າ. ລາວບອກວ່າ: “ເມື່ອເບິ່ງຄືນຫຼັງ ຂ້ອຍເຫັນວ່າການປະກາດຊ່ອຍໃຫ້ຂ້ອຍກ້າວໜ້າຫຼາຍຂຶ້ນ. ຂ້ອຍຈະກັບໄປຢາມທຸກຄົນທີ່ສະແດງຄວາມສົນໃຈ ແລະຂ້ອຍຈະກຽມຕົວທຸກຄັ້ງກ່ອນທີ່ຈະໄປຢາມເຂົາເຈົ້າ. ການເຮັດແບບນີ້ເຮັດໃຫ້ຂ້ອຍມີນັກສຶກສາຄົນທຳອິດ. ເມື່ອຂ້ອຍມີປະສົບການຫຼາຍຂຶ້ນກໍເຮັດໃຫ້ຂ້ອຍໝັ້ນໃຈຫຼາຍຂຶ້ນ.” ຕອນນີ້ຣີກາໂດກໍໄດ້ເປັນໄພໂອເນຍປະຈຳທີ່ດີແລະເປັນຜູ້ຊ່ອຍວຽກຮັບໃຊ້.
10. ໃນຕອນໜຶ່ງຂອງຊີວິດ ດາວິດໄດ້ເຮັດຫຍັງກ່ອນທີ່ຈະຕັດສິນໃຈເລື່ອງທີ່ສຳຄັນ?
10 ຂໍໃຫ້ມາເບິ່ງອີກເຫດການໜຶ່ງທີ່ເກີດຂຶ້ນກັບດາວິດ. ຕອນທີ່ລາວຫຼົບໜີຈາກກະສັດຊາອູນຢູ່ໃນເຂດແດນຂອງພວກຟີລິດສະຕິນ ລາວແລະພວກທະຫານກໍໄດ້ປະລູກເມຍໄວ້ຢູ່ບ້ານ ແລ້ວອອກໄປສູ້ຮົບ. ໃນຕອນນັ້ນກໍມີສັດຕູມາບຸກບ້ານແລະຈັບເອົາລູກເມຍຂອງເຂົາເຈົ້າໄປ. ດາວິດອາດຈະຄິດວ່າລາວມີປະສົບການໃນການຕໍ່ສູ້ ດັ່ງນັ້ນລາວອາດຈະວາງແຜນເພື່ອໄປຊ່ອຍລູກເມຍຂອງລາວກໍໄດ້. ແຕ່ລາວບໍ່ໄດ້ເຮັດແບບນັ້ນ ລາວຂໍການຊີ້ນຳຈາກພະເຢໂຫວາ. ລາວໄດ້ຖາມພະເຢໂຫວາຜ່ານທາງປະໂລຫິດອາເບຍທາວ່າ “ຂ້ອຍຄວນຈະໄລ່ຕາມໂຈນພວກນັ້ນບໍ?” ພະເຢໂຫວາບອກລາວວ່າ ລາວຄວນໄລ່ຕາມເຂົາເຈົ້າໄປແລະລາວຈະສາມາດຊ່ອຍລູກເມຍໃຫ້ກັບຄືນມາໄດ້. (1 ຊາມ. 30:7-10, ລ.ມ.) ເຈົ້າສາມາດຮຽນຫຍັງໄດ້ຈາກເລື່ອງນີ້?
ພີ່ນ້ອງຊາຍທີ່ຍັງໜຸ່ມຄວນຂໍຄຳແນະນຳຈາກຜູ້ດູແລ (ເບິ່ງຂໍ້ 11)
11. ເຮົາຈະເຮັດຫຍັງກ່ອນຕັດສິນໃຈເລື່ອງຕ່າງໆ?
11 ໃຫ້ຂໍຄຳແນະນຳກ່ອນທີ່ຈະຕັດສິນໃຈເລື່ອງຕ່າງໆ. ເຈົ້າອາດຈະຂໍຄຳແນະນຳຈາກພໍ່ແມ່ຫຼືຈາກຜູ້ດູແລທີ່ມີປະສົບການ. ພະເຢໂຫວາໄວ້ໃຈຜູ້ດູແລເຫຼົ່ານີ້ ດັ່ງນັ້ນເຈົ້າກໍຄວນໄວ້ໃຈເຂົາເຈົ້າຄືກັນ. ພະເຢໂຫວາຖືວ່າເຂົາເຈົ້າເປັນ “ຂອງຂວັນ” ສຳລັບປະຊາຄົມ. (ອຟຊ. 4:8) ເຈົ້າຈະໄດ້ຮັບປະໂຫຍດຖ້າເຈົ້າຮຽນແບບຄວາມເຊື່ອຂອງເຂົາເຈົ້າ ແລະຟັງຄຳແນະນຳທີ່ມາຈາກເຂົາເຈົ້າ. ຕອນນີ້ໃຫ້ເຮົາມາເບິ່ງວ່າ ເຮົາຈະໄດ້ບົດຮຽນຫຍັງຈາກກະສັດອາຊາ.
ຮຽນຈາກກະສັດອາຊາ
12. ກະສັດອາຊາເປັນຄົນແບບໃດຕອນທີ່ລາວເລີ່ມປົກຄອງ?
12 ຕອນທີ່ກະສັດອາຊາຍັງໜຸ່ມລາວເປັນຄົນຖ່ອມແລະກ້າຫານ. ຕົວຢ່າງເຊັ່ນ: ຫຼັງຈາກທີ່ລາວໄດ້ສືບຕຳແໜ່ງກະສັດຈາກອາເບຍພໍ່ຂອງລາວ ລາວກໍໄດ້ເລີ່ມກຳຈັດຮູບບູຊາ. ລາວຍັງ “ບອກໃຫ້ຄົນຢູດາຮັບໃຊ້ພະເຢໂຫວາພະເຈົ້າຂອງປູ່ຍ່າຕານາຍ ແລະເຮັດຕາມກົດໝາຍແລະຄຳສັ່ງຂອງພະອົງ.” (2 ຂ່າວ. 14:1-7, ລ.ມ.) ໃນຕອນທີ່ເຊຣາກຄົນເອທິໂອເປຍພ້ອມກັບທະຫານໜຶ່ງລ້ານຄົນມາໂຈມຕີຢູດາ ອາຊາໄດ້ຂໍຄວາມຊ່ວຍເຫຼືອຈາກພະເຢໂຫວາໂດຍເວົ້າວ່າ: “ພະເຢໂຫວາ ບໍ່ວ່າຄົນທີ່ພະອົງຊ່ອຍຈະມີຈຳນວນຫຼາຍຫຼືໜ້ອຍ ເຂັ້ມແຂງຫຼືອ່ອນແອ ພະອົງກໍຊ່ອຍໄດ້. ພະເຢໂຫວາພະເຈົ້າຂອງພວກເຮົາ ຂໍຊ່ອຍພວກເຮົາແດ່ ເພາະພວກເຮົາເພິ່ງພະອົງ.” ຄຳເວົ້ານີ້ສະແດງໃຫ້ເຫັນວ່າ ອາຊາໝັ້ນໃຈວ່າພະເຢໂຫວາຈະປົກປ້ອງລາວແລະປະຊາຊົນໃຫ້ປອດໄພ. ຍ້ອນອາຊາໄວ້ວາງໃຈພະເຢໂຫວາ “ພະເຢໂຫວາຈຶ່ງເຮັດໃຫ້ຄົນເອທິໂອເປຍບໍ່ຊະນະອາຊາ.”—2 ຂ່າວ. 14:8-12, ລ.ມ.
13. ເກີດຫຍັງຂຶ້ນກັບອາຊາ ແລະຍ້ອນຫຍັງ?
13 ລອງຄິດເບິ່ງວ່າ ຈະເປັນຕາຢ້ານຫຼາຍສ່ຳໃດທີ່ມີທະຫານເປັນລ້ານຄົນມາໂຈມຕີ. ແຕ່ອາຊາກໍສາມາດເອົາຊະນະໄດ້ຍ້ອນລາວໝາຍເພິ່ງພະເຢໂຫວາ. ແຕ່ໜ້າເສົ້າທີ່ອາຊາບໍ່ໄດ້ໝາຍເພິ່ງພະເຢໂຫວາຕອນທີ່ລາວມີບັນຫາອີກແບບໜຶ່ງ. ຕອນທີ່ບາເອຊາກະສັດຂອງອິດສະຣາເອນຈະມາໂຈມຕີຢູດາ ອາຊາໄດ້ໄປຂໍຄວາມຊ່ວຍເຫຼືອຈາກກະສັດຊີເຣຍ. ນັ້ນເປັນການຕັດສິນໃຈທີ່ຜິດພາດຫຼາຍ. ພະເຢໂຫວາຈຶ່ງສົ່ງຜູ້ພະຍາກອນຫານານີມາເວົ້າກັບອາຊາວ່າ: “ເພາະທ່ານໄດ້ເພິ່ງກະສັດຊີເຣຍ ແລະບໍ່ໄດ້ເພິ່ງພະເຢໂຫວາພະເຈົ້າຂອງທ່ານ ທ່ານຈະເອົາຊະນະກອງທັບຊີເຣຍບໍ່ໄດ້.” ນັບຕັ້ງແຕ່ນັ້ນມາ ອາຊາກໍບໍ່ມີຄວາມສະຫງົບ ລາວໄດ້ເຮັດສົງຄາມຕະຫຼອດ. (2 ຂ່າວ. 16:7, 9, ລ.ມ.; 1 ກະ. 15:32) ເຮົາໄດ້ບົດຮຽນຫຍັງ?
14. ເຈົ້າຈະໄວ້ວາງໃຈພະເຢໂຫວາໄດ້ແນວໃດ ແລະຖ້າເຈົ້າເຮັດຕາມ 1 ຕີໂມທຽວ 4:12 ເຈົ້າຈະໄດ້ຫຍັງ?
14 ໃຫ້ເປັນຄົນຖ່ອມແລະເພິ່ງພະເຢໂຫວາຕໍ່ໆໄປ. ຕອນທີ່ເຈົ້າຮັບບັບເຕມາເຈົ້າສະແດງໃຫ້ເຫັນວ່າເຈົ້າເຊື່ອແລະໄວ້ວາງໃຈພະເຢໂຫວາ ແລະພະເຢໂຫວາກໍໃຫ້ກຽດເຈົ້າທີ່ຈະມາເປັນສ່ວນໜຶ່ງໃນຄອບຄົວຂອງເພິ່ນ. ແຕ່ສິ່ງທີ່ເຈົ້າຕ້ອງເຮັດຕອນນີ້ກໍຄື ໄວ້ວາງໃຈພະເຢໂຫວາຕໍ່ໆໄປ. ເບິ່ງຄືວ່າເປັນເລື່ອງງ່າຍທີ່ຈະໄວ້ວາງໃຈພະເຢໂຫວາເມື່ອຕັດສິນໃຈເລື່ອງທີ່ສຳຄັນ. ແຕ່ເລື່ອງອື່ນໆເດ? ເປັນເລື່ອງສຳຄັນຫຼາຍທີ່ຈະໄວ້ວາງໃຈພະເຢໂຫວາເມື່ອຕັດສິນໃຈເລື່ອງຕ່າງໆເຊິ່ງລວມເຖິງ ການເລືອກຄວາມບັນເທີງ ວຽກອາຊີບ ແລະເປົ້າໝາຍອື່ນໆໃນຊີວິດ. ແທນທີ່ຈະເພິ່ງຕົວເອງ ໃຫ້ຊອກຫາຄຳແນະນຳຈາກຄຳພີໄບເບິນເພື່ອຊ່ອຍໃນການຕັດສິນໃຈແລະເຮັດຕາມຄຳແນະນຳນັ້ນ. (ສຸພາ. 3:5, 6) ເມື່ອເຈົ້າເຮັດແບບນີ້ກໍຈະເຮັດໃຫ້ພະເຢໂຫວາດີໃຈ ແລະເຈົ້າເອງກໍຈະໄດ້ຮັບຄວາມນັບຖືຈາກພີ່ນ້ອງໃນປະຊາຄົມ.—ອ່ານ 1 ຕີໂມທຽວ 4:12
ຮຽນຈາກກະສັດເຢໂຮຊາຟັດ
15. ຕາມ 2 ຂ່າວຄາວ 18:1-3; 19:2 ກະສັດເຢໂຮຊາຟັດໄດ້ເຮັດຜິດພາດຫຍັງແດ່?
15 ເຮົາທຸກຄົນເປັນຄົນບໍ່ສົມບູນແບບ ດັ່ງນັ້ນເຈົ້າເອງຈຶ່ງເຮັດຜິດໄດ້ໃນບາງຄັ້ງ. ແຕ່ຢ່າໃຫ້ຄວາມຜິດນັ້ນມາເຮັດໃຫ້ເຈົ້າບໍ່ຢາກຮັບໃຊ້ພະເຢໂຫວາ. ຂໍໃຫ້ເຮົາມາເບິ່ງຕົວຢ່າງຂອງກະສັດເຢໂຮຊາຟັດ. ລາວມີຄຸນລັກສະນະທີ່ດີຫຼາຍຢ່າງ. ຕອນທີ່ລາວຍັງໜຸ່ມລາວໄດ້ “ຮັບໃຊ້ພະເຈົ້າຂອງປູ່ຍ່າຕານາຍຂອງລາວແລະເຊື່ອຟັງຄຳສັ່ງຂອງພະອົງ.” ແລະນອກຈາກນັ້ນລາວຍັງໄດ້ສົ່ງພວກເຈົ້ານາຍໄປເມືອງຕ່າງໆຂອງຢູດາເພື່ອສອນປະຊາຊົນໃຫ້ຮູ້ກ່ຽວກັບພະເຢໂຫວາ. (2 ຂ່າວ. 17:4, 7, ລ.ມ.) ແຕ່ບາງເທື່ອເຢໂຮຊາຟັດກໍຕັດສິນໃຈຜິດພາດ. ມີເທື່ອໜຶ່ງລາວຕັດສິນໃຈບໍ່ຖືກຕ້ອງ ສະນັ້ນພະເຢໂຫວາຈຶ່ງສັ່ງສອນແລະໃຫ້ຄຳແນະນຳລາວໂດຍທາງຕົວແທນຂອງເພິ່ນ. (ອ່ານ 2 ຂ່າວຄາວ 18:1-3; 19:2) ເຮົາໄດ້ບົດຮຽນຫຍັງຈາກເລື່ອງນີ້?
ພີ່ນ້ອງຊາຍທີ່ຍັງໜຸ່ມທີ່ເປັນຄົນດຸໝັ່ນແລະມີຄວາມຮັບຜິດຊອບຈະມີຊື່ສຽງທີ່ດີ (ເບິ່ງຂໍ້ 16)
16. ເຮົາໄດ້ບົດຮຽນຫຍັງຈາກເລື່ອງຂອງຣາຈີບ?
16 ຍອມຮັບແລະເຮັດຕາມຄຳແນະນຳທີ່ເຈົ້າໄດ້ຮັບ. ບາງເທື່ອເຈົ້າອາດຈະເປັນຄືກັບຄົນໜຸ່ມຄົນອື່ນໆທີ່ເບິ່ງບໍ່ອອກວ່າສິ່ງໃດສຳຄັນກວ່າ. ແຕ່ຢ່າຟ້າວທໍ້ໃຈ. ຂໍໃຫ້ເຮົາມາເບິ່ງປະສົບການຂອງພີ່ນ້ອງຊາຍທີ່ຊື່ຣາຈີບ. ລາວໄດ້ເວົ້າເຖິງຕອນທີ່ລາວເປັນໄວລຸ້ນວ່າ: “ບາງເທື່ອຂ້ອຍກໍບໍ່ຮູ້ວ່າຕົວເອງຢາກເຮັດຫຍັງ. ຄືກັບໄວລຸ້ນຄົນອື່ນໆຂ້ອຍມັກຫຼິ້ນກິລາແລະເຮັດສິ່ງທີ່ມ່ວນໆຫຼາຍກວ່າການໄປປະຊຸມແລະໄປປະກາດ.” ແຕ່ອັນໃດຊ່ອຍຣາຈີບ? ມີຜູ້ດູແລຄົນໜຶ່ງໄດ້ໃຫ້ຄຳແນະນຳກັບລາວ. ຣາຈີບເວົ້າວ່າ: “ຜູ້ດູແລຊ່ອຍຂ້ອຍໃຫ້ເຂົ້າໃຈຫຼັກການທີ່ຢູ່ໃນ 1 ຕີໂມທຽວ 4:8.” ຣາຈີບເຮັດຕາມຄຳແນະນຳນັ້ນແລະເຂົ້າໃຈວ່າສິ່ງໃດສຳຄັນທີ່ສຸດໃນຊີວິດ. ລາວເວົ້າວ່າ: “ຂ້ອຍຕັດສິນໃຈແລ້ວວ່າຈະໃຫ້ການຮັບໃຊ້ພະເຢໂຫວາເປັນສິ່ງສຳຄັນທີ່ສຸດໃນຊີວິດ.” ຜົນເປັນແນວໃດ? ຣາຈີບບອກວ່າ: “ຫຼັງຈາກໄດ້ຮັບຄຳແນະນຳນັ້ນບໍ່ເທົ່າໃດປີ ຂ້ອຍກໍມີຄຸນສົມບັດເປັນຜູ້ຊ່ວຍວຽກຮັບໃຊ້.”
ເຮັດໃຫ້ພະເຢໂຫວາພູມໃຈ
17. ພີ່ນ້ອງທີ່ສູງອາຍຸຮູ້ສຶກແນວໃດຕໍ່ພີ່ນ້ອງຊາຍທີ່ຍັງໜຸ່ມເຊິ່ງຮັບໃຊ້ພະເຢໂຫວາ?
17 ພີ່ນ້ອງທີ່ສູງອາຍຸເຫັນຄ່າພີ່ນ້ອງຊາຍທີ່ຍັງໜຸ່ມເຊິ່ງຮັບໃຊ້ພະເຢໂຫວາ “ຄຽງບ່າຄຽງໄຫຼ່” ກັບເຂົາເຈົ້າ. (ຊໂຟ. 3:9, ລ.ມ.) ເຂົາເຈົ້າມັກທີ່ເຈົ້າເຮັດວຽກມອບໝາຍດ້ວຍຄວາມຫ້າວຫັນແລະມີກຳລັງວັງຊາ ແລະເຂົາເຈົ້າພູມໃຈຫຼາຍໃນຕົວເຈົ້າ.—1 ຢຮ. 2:14
18. ຕາມສຸພາສິດ 27:11 ພະເຢໂຫວາຮູ້ສຶກແນວໃດກັບພີ່ນ້ອງຊາຍທີ່ຍັງໜຸ່ມທີ່ຮັບໃຊ້ເພິ່ນ?
18 ພີ່ນ້ອງຊາຍທີ່ຍັງໜຸ່ມ ຂໍໃຫ້ຈື່ໄວ້ວ່າພະເຢໂຫວາຮັກເຈົ້າແລະໄວ້ໃຈເຈົ້າ. ພະເຢໂຫວາບອກລ່ວງໜ້າວ່າ ໃນສະໄໝສຸດທ້າຍຈະມີຄົນໜຸ່ມຫຼາຍຄືກອງທັບເຕັມໃຈມາຮັບໃຊ້ເພິ່ນ. (ເພງ. 110:1-3) ພະເຢໂຫວາຮູ້ວ່າເຈົ້າຮັກເພິ່ນແລະຢາກຮັບໃຊ້ເພິ່ນສຸດຄວາມສາມາດ. ດັ່ງນັ້ນ ຂໍໃຫ້ອົດທົນກັບຄົນອື່ນແລະອົດທົນກັບຕົວເອງ. ເມື່ອເຈົ້າເຮັດຜິດ ຂໍໃຫ້ຍອມຮັບເອົາຄຳແນະນຳແລະຖືວ່າຄຳແນະນຳນັ້ນມາຈາກພະເຢໂຫວາ. (ຮຣ. 12:6) ຂໍໃຫ້ຕັ້ງໃຈເຮັດວຽກມອບໝາຍທຸກຢ່າງທີ່ເຈົ້າໄດ້ຮັບ ແລະສຳຄັນທີ່ສຸດ ຂໍໃຫ້ທຸກສິ່ງທີ່ເຈົ້າເຮັດເປັນສິ່ງທີ່ເຮັດໃຫ້ພະເຢໂຫວາພໍໃຈ.—ອ່ານສຸພາສິດ 27:11
ເພງ 135 ພະເຢໂຫວາເຊີນຢ່າງອົບອຸ່ນວ່າ ລູກຂອງເຮົາຈົ່ງມີປັນຍາເຖີດ
a ເມື່ອພີ່ນ້ອງຊາຍທີ່ຍັງໜຸ່ມມີຄວາມເຊື່ອທີ່ເຂັ້ມແຂງ ເຂົາເຈົ້າກໍຢາກຈະຮັບໃຊ້ພະເຢໂຫວາຫຼາຍຂຶ້ນ ແລະເພື່ອຈະມີຄຸນສົມບັດເປັນຜູ້ຊ່ວຍວຽກຮັບໃຊ້ ເຂົາເຈົ້າກໍຕ້ອງໄດ້ຮັບຄວາມນັບຖືຈາກພີ່ນ້ອງຄົນອື່ນໆໃນປະຊາຄົມ. ແລ້ວເຂົາເຈົ້າຕ້ອງເຮັດຫຍັງແດ່ເພື່ອຈະໄດ້ຮັບຄວາມນັບຖືຈາກຄົນອື່ນ?
b ບາງຊື່ເປັນຊື່ສົມມຸດ.