ບົດຄວາມສຶກສາທີ 34
“ໃຊ້ຊີວິດຕາມຄວາມຈິງ”
“ໃຊ້ຊີວິດຕາມຄວາມຈິງ.”—3 ຢຮ. 4
ເພງ 111 ສິ່ງທີ່ເຮັດໃຫ້ພວກເຮົາມີຄວາມຍິນດີ
ໃຈຄວາມສຳຄັນa
1. ເຮົາໄດ້ປະໂຫຍດຫຍັງຈາກການລົມກັນວ່າເຮົາເຂົ້າມາໃນ “ຄວາມຈິງ” ໄດ້ແນວໃດ?
“ເຈົ້າເຂົ້າມາໃນຄວາມຈິງແນວໃດ?” ເຮົາອາດຈະຖືກຖາມຄຳຖາມນີ້ຫຼາຍເທື່ອແລ້ວ ແລະມັນກໍເປັນຄຳຖາມທຳອິດທີ່ເຮົາມັກຈະຖາມພີ່ນ້ອງເມື່ອເຮົາຢາກຮູ້ຈັກເຂົາເຈົ້າຫຼາຍຂຶ້ນ. ເຮົາຢາກຟັງປະສົບການຂອງພີ່ນ້ອງວ່າເຂົາເຈົ້າມາຮູ້ຈັກແລະຮັກພະເຢໂຫວາໄດ້ແນວໃດ. ແລະເຮົາເອງກໍດີໃຈທີ່ໄດ້ເລົ່າປະສົບການຂອງຕົວເອງໃຫ້ເຂົາເຈົ້າຟັງ. (ໂຣມ 1:11) ການລົມກັນແບບນີ້ຊ່ວຍເຮົາໃຫ້ຄິດສະເໝີວ່າ ການຮູ້ຈັກຄວາມຈິງຫຼືການເຂົ້າມາເປັນພະຍານພະເຢໂຫວາມີຄ່າຫຼາຍ ແລະຊ່ວຍເຮົາໃຫ້ຢາກ “ໃຊ້ຊີວິດຕາມຄວາມຈິງ” ເຊິ່ງການເຮັດແບບນີ້ຈະເຮັດໃຫ້ພະເຢໂຫວາພໍໃຈແລະເພິ່ນກໍຈະອວຍພອນເຮົາ.—3 ຢຮ. 4
2. ເຮົາຈະຮຽນຫຍັງໃນບົດຄວາມນີ້?
2 ໃນບົດຄວາມນີ້ ເຮົາຈະມາເບິ່ງບາງເຫດຜົນວ່າເປັນຫຍັງເຮົາຈຶ່ງຮັກຄວາມຈິງ ແລະເຮົາຈະສະແດງໃຫ້ເຫັນແນວໃດວ່າເຮົາຮັກແລະເຫັນຄ່າຄວາມຈິງ. ການຮຽນເລື່ອງນີ້ຈະຊ່ວຍເຮົາໃຫ້ເຫັນຄ່າພະເຢໂຫວາຫຼາຍຂຶ້ນທີ່ຊ່ວຍເຮົາໃຫ້ເຂົ້າມາໃນຄວາມຈິງ. (ຢຮ. 6:44) ແລະຍັງຊ່ວຍເຮົາໃຫ້ຢາກສອນຄວາມຈິງໃນຄຳພີໄບເບິນໃຫ້ກັບຄົນອື່ນ.
ເປັນຫຍັງເຮົາຈຶ່ງຮັກ “ຄວາມຈິງ”?
3. ເຫດຜົນສຳຄັນທີ່ສຸດທີ່ເຮົາຮັກຄວາມຈິງແມ່ນຫຍັງ?
3 ມີຫຼາຍເຫດຜົນທີ່ເຮົາຮັກຄວາມຈິງ. ແຕ່ເຫດຜົນທີ່ສຳຄັນທີ່ສຸດທີ່ເຮົາຮັກຄວາມຈິງກໍຍ້ອນເຮົາຮັກພະເຢໂຫວາຜູ້ທີ່ເປັນແຫຼ່ງຂອງຄວາມຈິງ. ເມື່ອເຮົາອ່ານຄຳພີໄບເບິນ ເຮົາບໍ່ພຽງແຕ່ຮູ້ວ່າພະເຢໂຫວາເປັນພະເຈົ້າທີ່ມີລິດອຳນາດສູງສຸດທີ່ສ້າງຟ້າສະຫວັນແລະໂລກນີ້ ແຕ່ເຮົາຍັງຮູ້ວ່າພະເຢໂຫວາເປັນພໍ່ທີ່ຮັກແລະເປັນຫ່ວງເຮົາ. (1 ປຕ. 5:7) ນອກຈາກນັ້ນ ພະເຢໂຫວາຍັງ “ເມດຕາ ໃຈດີ ບໍ່ໃຈຮ້າຍງ່າຍ ມີຄວາມຮັກທີ່ໝັ້ນຄົງຫຼາຍທີ່ສຸດ ແລະເວົ້າແຕ່ຄວາມຈິງ.” (ອພຍ. 34:6, ລ.ມ.) ແລະເພິ່ນກໍຮັກຄວາມຍຸຕິທຳນຳ. (ເອຊາ. 61:8) ດັ່ງນັ້ນ ເພິ່ນຈຶ່ງຮູ້ສຶກເຈັບປວດໃຈຫຼາຍເມື່ອເຫັນເຮົາເຈິຄວາມທຸກແລະເພິ່ນກໍຢາກຊ່ວຍເຫຼືອເຮົາແລະລໍຖ້າທີ່ຈະກຳຈັດຄວາມທຸກທັງໝົດອອກໄປ. (ຢເຣ. 29:11) ຈັ່ງແມ່ນເປັນຄວາມຫວັງທີ່ດີແທ້ໆ! ນີ້ຈຶ່ງເຮັດໃຫ້ເຮົາຮັກພະເຢໂຫວາຫຼາຍ.
ຄວາມຈິງໃນຄຳພີໄບເບິນປຽບຄືກັບ . . . ສະໝໍເຮືອ
ຄືກັບສະໝໍເຮືອທີ່ຊ່ວຍຍຶດເຮືອບໍ່ໃຫ້ໄຫຼໄປຕາມກະແສລົມແຮງ ຄວາມຫວັງກໍຊ່ວຍເຮົາບໍ່ໃຫ້ກັງວົນຫຼືອຸກໃຈຫຼາຍເກີນໄປເມື່ອມີບັນຫາ. ຄວາມຈິງໃນຄຳພີໄບເບິນຍັງກະຕຸ້ນເຮົາໃຫ້ຢາກບອກຄວາມຫວັງນີ້ກັບຄົນອື່ນໆ. (ເບິ່ງຂໍ້ 4-7)
4-5. ເປັນຫຍັງອັກຄະສາວົກໂປໂລຈຶ່ງປຽບທຽບຄວາມຫວັງເປັນຄືກັບສະໝໍເຮືອ?
4 ອີກເຫດຜົນໜຶ່ງທີ່ເຮົາຮັກຄວາມຈິງແມ່ນຫຍັງ? ຍ້ອນຄວາມຈິງຈະເຮັດໃຫ້ເຮົາໄດ້ຮັບປະໂຫຍດຫຼາຍຢ່າງ ເຊັ່ນ ຄວາມຈິງໃນຄຳພີໄບເບິນຊ່ວຍໃຫ້ເຮົາມີຄວາມຫວັງໃນອະນາຄົດ. ແລະຄວາມຫວັງກໍສຳຄັນຕໍ່ເຮົາຫຼາຍ ເພາະອັກຄະສາວົກໂປໂລບອກວ່າ: “ຄວາມຫວັງນີ້ເປັນຄືກັບສະໝໍເຮືອຂອງຊີວິດທີ່ໝັ້ນຄົງແນ່ນອນ.” (ຮຣ. 6:19) ຄືກັບທີ່ສະໝໍເຮືອຊ່ວຍຍຶດເຮືອບໍ່ໃຫ້ໄຫຼໄປຕາມກະແສລົມແຮງ ຄວາມຫວັງກໍຊ່ວຍເຮົາບໍ່ໃຫ້ກັງວົນຫຼືອຸກໃຈຫຼາຍເກີນໄປເມື່ອມີບັນຫາ.
5 ທີ່ຈິງ ໂປໂລກຳລັງເວົ້າເຖິງຄວາມຫວັງໃນສະຫວັນທີ່ຄລິດສະຕຽນຜູ້ຖືກເຈີມຈະໄດ້ຮັບ. ແຕ່ຄຳເວົ້ານີ້ກໍຍັງໃຊ້ໄດ້ກັບຄລິດສະຕຽນທີ່ມີຄວາມຫວັງຈະມີຊີວິດຕະຫຼອດໄປຢູ່ໃນອຸທິຍານນຳ. (ຢຮ. 3:16) ດັ່ງນັ້ນ ການຮຽນຮູ້ກ່ຽວກັບຄວາມຫວັງເລື່ອງຊີວິດຕະຫຼອດໄປຈຶ່ງສຳຄັນຕໍ່ເຮົາຫຼາຍ.
6-7. ອີວອນໄດ້ຮັບປະໂຫຍດແນວໃດຈາກການຮຽນຮູ້ຄວາມຈິງກ່ຽວກັບອະນາຄົດ?
6 ໃຫ້ເຮົາມາເບິ່ງປະສົບການຂອງພີ່ນ້ອງຍິງຄົນໜຶ່ງທີ່ຊື່ອີວອນ. ລາວບໍ່ໄດ້ຮູ້ຈັກຄວາມຈິງຕັ້ງແຕ່ເກີດ ແລະຕອນຍັງນ້ອຍລາວຢ້ານຄວາມຕາຍຫຼາຍ. ລາວໄດ້ອ່ານສຳນວນໜຶ່ງທີ່ບອກວ່າ: “ມື້ໃດມື້ໜຶ່ງເຮົາທຸກຄົນກໍຕ້ອງຕາຍ” ລາວບໍ່ເຄີຍລືມສຳນວນນີ້ເລີຍ. ລາວບອກວ່າ: “ສຳນວນນີ້ເຮັດໃຫ້ຂ້ອຍຄິດແຕ່ເລື່ອງອະນາຄົດຈົນນອນບໍ່ຫຼັບ. ຂ້ອຍຄິດວ່າ ‘ຊີວິດຂອງເຮົາມີແຕ່ເທົ່ານີ້ຫວາ? ຂ້ອຍເກີດມາເຮັດຫຍັງ?’ ຂ້ອຍບໍ່ຢາກຕາຍເລີຍ!”
7 ເມື່ອອີວອນເປັນໄວລຸ້ນ ລາວກໍໄດ້ມາຮູ້ຈັກກັບພະຍານພະເຢໂຫວາ. ລາວບອກວ່າ: “ຂ້ອຍເລີ່ມມີຄວາມຫວັງແລະເຊື່ອວ່າຂ້ອຍສາມາດມີຊີວິດຕະຫຼອດໄປຢູ່ໃນອຸທິຍານ.” ອີວອນໄດ້ຮັບປະໂຫຍດແນວໃດຈາກການຮຽນຄວາມຈິງ? ລາວບອກວ່າ: “ຕອນນີ້ຂ້ອຍນອນຫຼັບໄດ້ແລ້ວເພາະຂ້ອຍບໍ່ໄດ້ກັງວົນເລື່ອງອະນາຄົດແລະຄວາມຕາຍອີກຕໍ່ໄປ.” ເຮົາເຫັນໄດ້ວ່າຄວາມຈິງມີຄ່າຕໍ່ອີວອນຫຼາຍແທ້ໆ! ແລະລາວກໍມີຄວາມສຸກຫຼາຍທີ່ໄດ້ບອກຄົນອື່ນໃຫ້ຮູ້ຈັກຄວາມຫວັງນີ້.—1 ຕມ. 4:16
ຄວາມຈິງໃນຄຳພີໄບເບິນປຽບຄືກັບ . . . ສົມບັດ
ການຮັບໃຊ້ພະເຢໂຫວາໃນຕອນນີ້ແລະການມີຄວາມຫວັງທີ່ຈະມີຊີວິດຕະຫຼອດໄປພາຍໃຕ້ການປົກຄອງຂອງພະເຈົ້າເປັນຄືກັບສົມບັດ. ສົມບັດນີ້ມີຄ່າຫຼາຍກວ່າສິ່ງຕ່າງໆທີ່ເຮົາໄດ້ສະລະໄປ. (ເບິ່ງຂໍ້ 8-11)
8-9. (ກ) ໃນຕົວຢ່າງປຽບທຽບຂອງພະເຢຊູ ຜູ້ຊາຍຄົນໜຶ່ງໄດ້ເຮັດຫຍັງເຊິ່ງສະແດງວ່າລາວເຫັນຄ່າສົມບັດທີ່ລາວພົບ? (ຂ) ເຈົ້າຈະສະແດງໃຫ້ເຫັນແນວໃດວ່າເຈົ້າເຫັນຄ່າຄວາມຈິງ?
8 ຄວາມຈິງໃນຄຳພີໄບເບິນຍັງລວມເຖິງຂ່າວດີເລື່ອງການປົກຄອງຂອງພະເຈົ້າ. ພະເຢຊູປຽບທຽບຄວາມຈິງເລື່ອງການປົກຄອງຂອງພະເຈົ້າເປັນຄືກັບສົມບັດທີ່ເຊື່ອງໄວ້. ໃນມັດທາຍ 13:44 ພະເຢຊູບອກວ່າ: “ການປົກຄອງທີ່ຢູ່ໃນສະຫວັນປຽບຄືກັບສົມບັດທີ່ເຊື່ອງໄວ້ໃນທົ່ງນາ ເມື່ອຜູ້ຊາຍຄົນໜຶ່ງມາພົບ ລາວກໍເຊື່ອງໄວ້ຄືເກົ່າ ແລະລາວໄດ້ໄປຂາຍທຸກສິ່ງທຸກຢ່າງທີ່ລາວມີ ແລ້ວໄປຊື້ນາທົ່ງນັ້ນ ຍ້ອນລາວດີໃຈຫຼາຍທີ່ໄດ້ພົບສົມບັດນັ້ນ.” ເຮົາເຫັນໄດ້ວ່າຜູ້ຊາຍຄົນນັ້ນບໍ່ໄດ້ຕັ້ງໃຈຊອກຫາສົມບັດ ແຕ່ເມື່ອລາວພົບສົມບັດແລ້ວ ລາວກໍໄດ້ສະລະຫຼາຍຢ່າງໂດຍຂາຍທຸກຢ່າງທີ່ລາວມີເພື່ອຈະໄດ້ສົມບັດນັ້ນ. ທີ່ລາວເຮັດແບບນີ້ກໍຍ້ອນລາວຮູ້ວ່າສົມບັດນັ້ນມີຄ່າຫຼາຍແທ້ໆ! ມັນມີຄ່າຫຼາຍກວ່າທຸກສິ່ງທີ່ລາວຂາຍໄປ.
9 ເມື່ອເຈົ້າພົບຄວາມຈິງ ເຈົ້າຮູ້ສຶກຄືກັບຜູ້ຊາຍຄົນນັ້ນບໍ? ເຈົ້າຄືຊິຮູ້ສຶກຄືກັບຜູ້ຊາຍຄົນນັ້ນແທ້! ເຮົາຮູ້ວ່າບໍ່ມີຫຍັງໃນໂລກນີ້ທີ່ຈະມີຄ່າເທົ່າກັບຄວາມສຸກຈາກການຮັບໃຊ້ພະເຢໂຫວາໃນຕອນນີ້ ແລະມີຄວາມຫວັງທີ່ຈະມີຊີວິດຕະຫຼອດໄປໃນອະນາຄົດພາຍໃຕ້ການປົກຄອງຂອງພະເຈົ້າ. ການທີ່ເຮົາເສຍສະລະສິ່ງຕ່າງໆເພື່ອທີ່ຈະມີສາຍສຳພັນທີ່ໃກ້ຊິດກັບພະເຢໂຫວາມັນຄຸ້ມຄ່າຫຼາຍແທ້ໆ ເພາະສິ່ງທີ່ເຮັດໃຫ້ເຮົາມີຄວາມສຸກຫຼາຍທີ່ສຸດກໍຄື ການເຮັດໃຫ້ພະເຢໂຫວາ “ພໍໃຈສະເໝີ.”—ກລຊ. 1:10
10-11. ສິ່ງໃດກະຕຸ້ນໄມເຄິນໃຫ້ຢາກປ່ຽນແປງຕົວເອງ?
10 ພວກເຮົາຫຼາຍຄົນໄດ້ເສຍສະລະຫຼາຍຢ່າງເພື່ອຈະເຮັດໃຫ້ພະເຢໂຫວາພໍໃຈ. ບາງຄົນຍອມອອກຈາກວຽກທີ່ມີໜ້າມີຕາໃນສັງຄົມ. ບາງຄົນຍອມສະລະໂອກາດທີ່ຈະໄດ້ເງິນຫຼາຍໆ. ສ່ວນບາງຄົນກໍໄດ້ປ່ຽນແປງຊີວິດຂອງຕົວເອງເມື່ອໄດ້ມາຮຽນຮູ້ກ່ຽວກັບພະເຢໂຫວາ. ນີ້ເປັນສິ່ງທີ່ໄມເຄິນໄດ້ເຮັດ. ລາວບໍ່ໄດ້ຮູ້ຈັກຄວາມຈິງມາຕັ້ງແຕ່ເກີດ. ຕອນຍັງໜຸ່ມລາວໄດ້ຮຽນຄາລາເຕ້ເຊິ່ງເປັນສິລະປະການຕໍ່ສູ້ຮູບແບບໜຶ່ງ. ລາວບອກວ່າ: “ຂ້ອຍພູມໃຈທີ່ຕົວເອງມີຮ່າງກາຍທີ່ແຂງແຮງ. ບາງເທື່ອຂ້ອຍກໍຄິດວ່າບໍ່ມີໃຜເອົາຊະນະຂ້ອຍໄດ້.” ແຕ່ເມື່ອລາວເລີ່ມຮຽນຄຳພີໄບເບິນ ລາວກໍໄດ້ຮູ້ວ່າພະເຢໂຫວາບໍ່ມັກຄວາມຮຸນແຮງ. (ເພງ. 11:5) ໄມເຄິນເວົ້າເຖິງພະຍານພະເຢໂຫວາຄູ່ໜຶ່ງທີ່ມາສອນຄຳພີໄບເບິນໃຫ້ລາວວ່າ: “ເຂົາເຈົ້າບໍ່ເຄີຍບອກໃຫ້ຂ້ອຍເຊົາຫຼິ້ນຄາລາເຕ້ ມີແຕ່ສອນຄວາມຈິງໃນຄຳພີໄບເບິນໃຫ້ຂ້ອຍຕໍ່ໆໄປ.”
11 ເມື່ອໄມເຄິນໄດ້ຮຽນຮູ້ກ່ຽວກັບພະເຢໂຫວາຫຼາຍເທົ່າໃດ ລາວກໍແຮ່ງຮັກພະເຢໂຫວາຫຼາຍຂຶ້ນ. ລາວຮູ້ສຶກປະທັບໃຈທີ່ພະເຢໂຫວາໄດ້ສະແດງຄວາມເຫັນອົກເຫັນໃຈຕໍ່ຜູ້ທີ່ຮັບໃຊ້ເພິ່ນ. ໃນທີ່ສຸດ ໄມເຄິນກໍຮູ້ວ່າລາວຕ້ອງປ່ຽນແປງຕົວເອງ. ລາວບອກວ່າ: “ການເຊົາຫຼິ້ນຄາລາເຕ້ເປັນສິ່ງທີ່ຍາກທີ່ສຸດທີ່ຂ້ອຍເຄີຍເຮັດມາ. ແຕ່ມັນເປັນສິ່ງທີ່ເຮັດໃຫ້ພະເຢໂຫວາພໍໃຈ ແລະຂ້ອຍກໍໝັ້ນໃຈວ່າການຮັບໃຊ້ພະເຢໂຫວາມີຄ່າຫຼາຍກວ່າສິ່ງຕ່າງໆທີ່ຂ້ອຍສະລະໄປ.” ໄມເຄິນຮູ້ວ່າຄວາມຈິງໃນຄຳພີໄບເບິນມີຄ່າຫຼາຍ. ນີ້ຈຶ່ງກະຕຸ້ນລາວໃຫ້ຢາກປ່ຽນແປງຕົວເອງ.—ຢກບ. 1:25
ຄວາມຈິງໃນຄຳພີໄບເບິນປຽບຄືກັບ . . . ຕະກຽງ
ຕະກຽງຊ່ວຍເຮົາໃຫ້ເຫັນທາງໃນບ່ອນທີ່ມືດ. ຄຳພີໄບເບິນກໍຊ່ວຍເຮົາໃຫ້ຮູ້ວິທີໃຊ້ຊີວິດໃນໂລກມືດຂອງຊາຕານ. (ເບິ່ງຂໍ້ 12-13)
12-13. ຄວາມຈິງໃນຄຳພີໄບເບິນຊ່ວຍເມລີແນວໃດ?
12 ເພື່ອຈະເຫັນຄ່າຄວາມຈິງຫຼາຍຂຶ້ນ ຄຳພີໄບເບິນໄດ້ປຽບທຽບຄວາມຈິງເປັນຄືກັບຕະກຽງທີ່ເຍືອງທາງໃນບ່ອນມືດ. (ເພງ. 119:105; ອຟຊ. 5:8) ເມລີຈາກປະເທດອາແຊັກໄບຊານໄດ້ເຫັນຄ່າຄວາມຈິງໃນຄຳພີໄບເບິນ. ລາວໃຫຍ່ມາໃນຄອບຄົວທີ່ນັບຖືສາສະໜາແຕກຕ່າງກັນ. ພໍ່ຂອງລາວນັບຖືສາສະໜາອິດສະລາມ ສ່ວນແມ່ຂອງລາວນັບຖືສາສະໜາຢິວ. ລາວບອກວ່າ: “ເຖິງຂ້ອຍຈະເຊື່ອວ່າມີພະເຈົ້າ ແຕ່ຂ້ອຍກໍຍັງມີຫຼາຍຄຳຖາມທີ່ຍັງຄາໃຈຢູ່. ຂ້ອຍສົງໄສວ່າ ‘ພະເຈົ້າສ້າງມະນຸດມາເຮັດຫຍັງ? ເປັນຫຍັງຈຶ່ງສ້າງມະນຸດໃຫ້ມາເຈິກັບຄວາມທຸກ ແຖມເມື່ອຕາຍໄປແລ້ວກໍຍັງຕ້ອງຖືກທໍລະມານຕະຫຼອດໄປໃນນະລົກອີກ?’ ຫຼາຍຄົນມັກເວົ້າວ່າສິ່ງຕ່າງໆທີ່ເກີດຂຶ້ນເປັນໄປຕາມຄວາມຕ້ອງການຂອງພະເຈົ້າ. ຂ້ອຍກໍເລີຍຄິດວ່າ ຖ້າເປັນແບບນັ້ນພະເຈົ້າກໍຄືຊິແມ່ນຕົ້ນເຫດຂອງບັນຫາແລະດີໃຈທີ່ເຫັນມະນຸດເຈິຄວາມທຸກ.”
13 ເມລີໄດ້ພະຍາຍາມຊອກຫາຄຳຕອບຂອງຄຳຖາມທີ່ລາວຄາໃຈຕໍ່ໆໄປ. ໃນທີ່ສຸດ ລາວກໍໄດ້ສຶກສາຄຳພີໄບເບິນແລະເຂົ້າມາເປັນພະຍານພະເຢໂຫວາ. ລາວບອກວ່າ: “ການຫາເຫດຜົນໃນຄຳພີໄບເບິນຊ່ວຍຂ້ອຍໃຫ້ເບິ່ງຊີວິດໃນແບບທີ່ດີຂຶ້ນ. ແລະຄຳອະທິບາຍທີ່ໜ້າເຊື່ອຖືຈາກຄຳພີໄບເບິນຊ່ວຍຂ້ອຍໃຫ້ມີໃຈສະຫງົບ.” ຄືກັບເມລີ ເຮົາທຸກຄົນຢາກຈະສັນລະເສີນພະເຢໂຫວາຜູ້ທີ່ “ເອີ້ນ [ພວກເຮົາ] ອອກຈາກຄວາມມືດມາຫາຄວາມສະຫວ່າງທີ່ມະຫັດສະຈັນຂອງພະອົງ.”—1 ປຕ. 2:9
14. ເຮົາຈະຮັກຄວາມຈິງຫຼາຍຂຶ້ນໄດ້ແນວໃດ? (ເບິ່ງຂອບ “ການປຽບທຽບເພີ່ມເຕີມ”)
14 ນີ້ເປັນພຽງບາງຕົວຢ່າງທີ່ສະແດງໃຫ້ເຫັນວ່າຄວາມຈິງມີຄ່າຫຼາຍ. ເຈົ້າອາດຈະຄິດເຖິງເຫດຜົນອື່ນໆອີກທີ່ເຮັດໃຫ້ເຈົ້າຮັກຄວາມຈິງ. ຄັນຊັ້ນ ເຈົ້າໜ້າຈະລອງຕັ້ງເປົ້າໝາຍສຶກສາສ່ວນຕົວເພື່ອຈະເຫັນວ່າມີເຫດຜົນຫຍັງຕື່ມອີກທີ່ເຮັດໃຫ້ເຈົ້າຮັກຄວາມຈິງ. ເມື່ອເຮົາຮັກຄວາມຈິງຫຼາຍຂຶ້ນ ເຮົາກໍແຮ່ງຢາກຈະສະແດງໃຫ້ເຫັນວ່າເຮົາຮັກຄວາມຈິງ.
ເຮົາຈະສະແດງແນວໃດວ່າເຮົາຮັກຄວາມຈິງ?
15. ວິທີໜຶ່ງທີ່ສະແດງວ່າເຮົາຮັກຄວາມຈິງແມ່ນຫຍັງ?
15 ເຮົາສະແດງໃຫ້ເຫັນວ່າເຮົາຮັກຄວາມຈິງໂດຍການສຶກສາຄຳພີໄບເບິນແລະປຶ້ມຕ່າງໆຂອງອົງການ. ບໍ່ວ່າເຮົາຈະຢູ່ໃນຄວາມຈິງມາດົນປານໃດແລ້ວ ແຕ່ເຮົາກໍຍັງຕ້ອງຮຽນຮູ້ຕໍ່ໆໄປ. ໃນຫໍສັງເກດການ ສະບັບທຳອິດບອກວ່າ: “ຄວາມຈິງປຽບຄືກັບດອກໄມ້ນ້ອຍໆທີ່ຢູ່ໃນບ່ອນທຸລະກັນດານທີ່ອ້ອມຮອບດ້ວຍຫຍ້າເຊິ່ງກໍຄືຄຳສອນປອມ. ເພື່ອຈະພົບຄວາມຈິງ ເຈົ້າຕ້ອງອອກຄວາມພະຍາຍາມຊອກເບິ່ງດີໆ . . . ຖ້າເຮົາຢາກໄດ້ຄວາມຈິງຫຼືດອກໄມ້ນັ້ນ ເຮົາກໍຕ້ອງໄດ້ກົ້ມໂຕລົງໄປເພື່ອເດັດເອົາມັນ. ຢ່າພໍໃຈກັບດອກໄມ້ດອກດຽວຫຼືຄວາມຈິງເລື່ອງດຽວ ແຕ່ໃຫ້ຊອກຫາຄວາມຈິງເລື່ອງອື່ນໆຕໍ່ໆໄປ.” ການສຶກສາຄົ້ນຄວ້າຫາຄວາມຈິງບໍ່ແມ່ນເລື່ອງງ່າຍ ແຕ່ເມື່ອເຮັດແບບນັ້ນມັນກໍຄຸ້ມຄ່າຫຼາຍແທ້ໆ.
16. ເຈົ້າມັກສຶກສາຄົ້ນຄວ້າແບບໃດ? (ສຸພາສິດ 2:4-6)
16 ບໍ່ແມ່ນວ່າເຮົາທຸກຄົນຈະມັກອ່ານແລະມັກສຶກສາຄົ້ນຄວ້າ. ແຕ່ພະເຢໂຫວາໄດ້ເຊີນເຮົາໃຫ້ “ຊອກຫາ” ແລະ “ຄົ້ນຫາຕໍ່ໆໄປ” ເພື່ອຈະເຂົ້າໃຈຄວາມຈິງຫຼາຍຂຶ້ນ. (ອ່ານສຸພາສິດ 2:4-6, ລ.ມ.) ເມື່ອເຮົາເຮັດແບບນັ້ນ ເຮົາກໍຈະໄດ້ຮັບປະໂຫຍດຫຼາຍ. ພີ່ນ້ອງໂຄຣີເວົ້າວ່າ ເມື່ອລາວອ່ານຄຳພີໄບເບິນລາວມັກຈະຄົ້ນຄວ້າໄປເທື່ອລະຂໍ້. ລາວບອກວ່າ: “ຂ້ອຍຈະອ່ານທຸກໄຂເງື່ອນແລະທຸກຂໍ້ມູນອ້າງອີງຂອງຂໍ້ນັ້ນແລະຄົ້ນຄວ້າເພີ່ມເຕີມອີກ . . . ການເຮັດແບບນີ້ຊ່ວຍຂ້ອຍໃຫ້ໄດ້ຮັບປະໂຫຍດຫຼາຍແທ້ໆ.” ບໍ່ວ່າເຮົາຈະໃຊ້ວິທີແບບດຽວກັບພີ່ນ້ອງໂຄຣີຫຼືວິທີອື່ນໆ ເມື່ອເຮົາໃຊ້ເວລາແລະຄວາມພະຍາຍາມໃນການສຶກສາຄົ້ນຄວ້າ ເຮົາກໍສະແດງໃຫ້ເຫັນວ່າເຮົາເຫັນຄ່າຄວາມຈິງ.—ເພງ. 1:1-3
17. ການໃຊ້ຊີວິດຕາມຄວາມຈິງໝາຍຄວາມວ່າແນວໃດ? (ຢາໂກໂບ 1:25)
17 ການສຶກສາຮຽນຮູ້ຄວາມຈິງພຽງຢ່າງດຽວຍັງບໍ່ພໍ. ເຮົາຕ້ອງໃຊ້ຊີວິດຕາມຄວາມຈິງເຊິ່ງກໍຄື ການເອົາສິ່ງທີ່ໄດ້ຮຽນມາໃຊ້ໃນຊີວິດ. ເມື່ອເຮັດແບບນັ້ນ ເຮົາກໍຈະມີຄວາມສຸກ. (ອ່ານຢາໂກໂບ 1:25) ແລ້ວເຈົ້າຈະໝັ້ນໃຈໄດ້ແນວໃດວ່າເຈົ້າໃຊ້ຊີວິດຕາມຄວາມຈິງ? ພີ່ນ້ອງຊາຍຄົນໜຶ່ງແນະນຳ ເຮົາໃຫ້ກວດເບິ່ງຕົວເອງວ່າ ມີເລື່ອງໃດແດ່ທີ່ເຮົາໄດ້ເຮັດຕາມສິ່ງທີ່ຮຽນແລ້ວ ແລະຍັງມີເລື່ອງໃດອີກທີ່ເຮົາຕ້ອງປັບປຸງໃຫ້ດີຂຶ້ນ. ອັກຄະສາວົກໂປໂລບອກວ່າ: “ບໍ່ວ່າພວກເຮົາກ້າວໜ້າເຖິງຂັ້ນໃດ ກໍໃຫ້ພວກເຮົາກ້າວໜ້າແບບນັ້ນຕໍ່ໄປເລື້ອຍໆຄືກັບທີ່ເຄີຍເຮັດຜ່ານມາ.”—ຟລປ. 3:16
18. ເປັນຫຍັງເຮົາຕ້ອງພະຍາຍາມທີ່ຈະ “ໃຊ້ຊີວິດຕາມຄວາມຈິງ”?
18 ໃຫ້ເຮົາຄິດເຖິງປະໂຫຍດຫຼາຍຢ່າງທີ່ເຮົາໄດ້ຮັບຈາກການ “ໃຊ້ຊີວິດຕາມຄວາມຈິງ.” ການເຮັດແບບນີ້ບໍ່ພຽງແຕ່ຊ່ວຍເຮົາໃຫ້ປັບປຸງຊີວິດຂອງເຮົາໃຫ້ດີຂຶ້ນເທົ່ານັ້ນ ແຕ່ເຮົາຍັງເຮັດໃຫ້ພະເຢໂຫວາແລະພີ່ນ້ອງມີຄວາມສຸກນຳ. (ສຸພາ. 27:11; 3 ຢຮ. 4) ເຫັນໄດ້ວ່າ ມີຫຼາຍເຫດຜົນທີ່ເຮົາຈະຮັກ ຄວາມຈິງແລະໃຊ້ຊີວິດ ຕາມຄວາມຈິງ.
ເພງ 144 ຈ້ອງເບິ່ງທີ່ລາງວັນ
a ເຮົາມັກເອີ້ນຄວາມເຊື່ອແລະວິທີໃຊ້ຊີວິດຂອງເຮົາວ່າ “ຄວາມຈິງ.” ບໍ່ວ່າເຮົາຈະຮູ້ຈັກຄວາມຈິງມາຕັ້ງແຕ່ເກີດຫຼືຫາກໍຮູ້ຈັກຄວາມຈິງ ເຮົາຈະໄດ້ຮັບປະໂຫຍດຈາກການຮຽນຮູ້ເຫດຜົນທີ່ເຮົາຮັກຄວາມຈິງ. ນີ້ຈະຊ່ວຍເຮົາໃຫ້ຕັ້ງໃຈເຮັດໃນສິ່ງທີ່ພະເຢໂຫວາພໍໃຈ.