ບົດຄວາມສຶກສາທີ 42
ເພງທີ 103 ຜູ້ບຳລຸງລ້ຽງຂອງຂວັນທີ່ເປັນມະນຸດ
ເຫັນຄ່າ “ຂອງຂວັນທີ່ເປັນມະນຸດ”
“ເມື່ອເພິ່ນຂຶ້ນໄປບ່ອນສູງໆ . . . ເພິ່ນໃຫ້ຂອງຂວັນທີ່ເປັນມະນຸດ.”—ອຟຊ. 4:8
ຈຸດສຳຄັນ
ຜູ້ຊ່ວຍວຽກຮັບໃຊ້ ຜູ້ເບິ່ງແຍງ ແລະຜູ້ເບິ່ງແຍງໝວດຊ່ວຍເຮົາແນວໃດ ແລະເຮົາຈະສະແດງໃຫ້ເຫັນແນວໃດວ່າເຮົາເຫັນຄ່າສິ່ງທີ່ເຂົາເຈົ້າເຮັດ?
1. ພະເຢຊູໃຫ້ຂອງຂວັນຫຍັງແດ່ກັບເຮົາ?
ບໍ່ມີມະນຸດຄົນໃດໃນໂລກທີ່ຈະຊ່ວຍຄົນອື່ນໄດ້ຫຼາຍສ່ຳກັບພະເຢຊູ. ຕອນທີ່ຢູ່ໂລກນີ້ ເພິ່ນເຮັດການອັດສະຈັນເພື່ອຊ່ວຍຫຼາຍຄົນ. (ລກ. 9:12-17) ເພິ່ນໃຫ້ຂອງຂວັນທີ່ມີຄ່າຫຼາຍທີ່ສຸດກັບມະນຸດໂດຍສະລະຊີວິດເພື່ອເຮົາ. (ຢຮ. 15:13) ຫຼັງຈາກຟື້ນຄືນມາຈາກຕາຍ ເພິ່ນກໍຍັງຊ່ວຍເຮົາຕໍ່ໄປ. ພະເຢຊູສັນຍາວ່າຈະຂໍໃຫ້ພະເຢໂຫວາໃຫ້ພະລັງບໍລິສຸດເພື່ອສອນແລະປອບໃຈເຮົາ. (ຢຮ. 14:16, 17, ໄຂເງື່ອນ; 16:13) ນອກຈາກນັ້ນ ໂດຍທາງການປະຊຸມປະຊາຄົມ ພະເຢຊູຍັງຝຶກເຮົາຕໍ່ໆໄປໃຫ້ສອນຄົນໃຫ້ເຂົ້າມາເປັນລູກສິດ.—ມທ. 28:18-20
2. “ຂອງຂວັນທີ່ເປັນມະນຸດ” ທີ່ເວົ້າເຖິງໃນເອເຟໂຊ 4:7, 8 ໝາຍເຖິງໃຜ?
2 ມີຂອງຂວັນອີກຢ່າງໜຶ່ງທີ່ພະເຢຊູໃຫ້ເຮົາ. ໂປໂລຂຽນວ່າ ຫຼັງຈາກທີ່ພະເຢຊູຂຶ້ນໄປສະຫວັນແລ້ວ “ເພິ່ນໃຫ້ຂອງຂວັນທີ່ເປັນມະນຸດ” ກັບເຮົາ. (ອ່ານເອເຟໂຊ 4:7, 8) ໂປໂລອະທິບາຍວ່າພະເຢຊູໃຫ້ຂອງຂວັນນີ້ເພື່ອຊ່ວຍປະຊາຄົມໃນຫຼາຍວິທີ. (ອຟຊ. 1:22, 23; 4:11-13) ໃນທຸກມື້ນີ້ “ຂອງຂວັນທີ່ເປັນມະນຸດ” ລວມເຖິງຜູ້ຊ່ວຍວຽກຮັບໃຊ້ ຜູ້ເບິ່ງແຍງໃນປະຊາຄົມ ແລະຜູ້ເບິ່ງແຍງໝວດ.a ພີ່ນ້ອງຊາຍເຫຼົ່ານີ້ບໍ່ສົມບູນແບບ ເຂົາເຈົ້າອາດເຮັດຜິດພາດໄດ້. (ຢກບ. 3:2) ແຕ່ພະເຢຊູນາຍຂອງເຮົາກໍໃຊ້ເຂົາເຈົ້າເພື່ອຊ່ວຍເຫຼືອເຮົາ. ເຂົາເຈົ້າເປັນຂອງຂວັນທີ່ພະເຢຊູໃຫ້ເຮົາ.
3. ເຮົາທຸກຄົນຈະສະໜັບສະໜູນວຽກຂອງພີ່ນ້ອງຊາຍເຊິ່ງເປັນ “ຂອງຂວັນທີ່ເປັນມະນຸດ” ໄດ້ແນວໃດ? ຂໍໃຫ້ຍົກຕົວຢ່າງ.
3 ພະເຢຊູມອບໝາຍພີ່ນ້ອງຊາຍເຊິ່ງເປັນ “ຂອງຂວັນທີ່ເປັນມະນຸດ” ໃຫ້ຊ່ວຍພີ່ນ້ອງໃນປະຊາຄົມໃຫ້ເຂັ້ມແຂງ. (ອຟຊ. 4:12) ເຮົາທຸກຄົນສາມາດສະໜັບສະໜູນວຽກຂອງພີ່ນ້ອງຊາຍເຫຼົ່ານີ້ໄດ້. ຕົວຢ່າງເຊັ່ນ: ຕອນທີ່ມີການກໍ່ສ້າງຫໍປະຊຸມ ພີ່ນ້ອງບາງຄົນອາດໄປຊ່ວຍກໍ່ສ້າງ. ສ່ວນບາງຄົນກໍສະໜັບສະໜູນວຽກນີ້ໄດ້ໂດຍເອົາຂອງກິນໄປໃຫ້ເຂົາເຈົ້າ ຂັບລົດຮັບສົ່ງ ຫຼືຊ່ວຍວຽກອື່ນໆ. ຄ້າຍຄືກັນ ເຮົາທຸກຄົນສາມາດສະໜັບສະໜູນວຽກຂອງຜູ້ຊ່ວຍວຽກຮັບໃຊ້ ຜູ້ເບິ່ງແຍງ ແລະຜູ້ເບິ່ງແຍງໝວດໄດ້ໂດຍທາງຄຳເວົ້າແລະການກະທຳຂອງເຮົາ. ໃຫ້ເຮົາມາເບິ່ງວ່າເຮົາໄດ້ປະໂຫຍດຫຍັງແດ່ຈາກການເຮັດວຽກໜັກຂອງພີ່ນ້ອງຊາຍເຫຼົ່ານີ້ ແລະເຮົາຈະສະແດງໃຫ້ເຂົາເຈົ້າແລະພະເຢຊູເຫັນໄດ້ແນວໃດວ່າເຮົາເຫັນຄ່າເຂົາເຈົ້າ.
ຜູ້ຊ່ວຍວຽກຮັບໃຊ້ “ຊ່ວຍເຫຼືອໃນຮູບແບບຕ່າງໆ”
4. ຜູ້ຊ່ວຍວຽກຮັບໃຊ້ໃນສະຕະວັດທຳອິດຊ່ວຍວຽກຫຍັງແດ່?
4 ໃນສະຕະວັດທຳອິດ ພີ່ນ້ອງຊາຍບາງຄົນຖືກແຕ່ງຕັ້ງໃຫ້ເປັນຜູ້ຊ່ວຍວຽກຮັບໃຊ້. (1ຕມ. 3:8) ເບິ່ງຄືວ່າເຂົາເຈົ້າເປັນຜູ້ທີ່ “ຊ່ວຍເຫຼືອໃນຮູບແບບຕ່າງໆ” ທີ່ໂປໂລເວົ້າເຖິງ. (1ກຣ. 12:28) ຜູ້ຊ່ວຍວຽກຮັບໃຊ້ອາດເຮັດວຽກທີ່ສຳຄັນຫຼາຍຢ່າງເພື່ອຜູ້ເບິ່ງແຍງຈະເອົາໃຈໃສ່ໃນການສອນແລະການບຳລຸງລ້ຽງ. ຕົວຢ່າງເຊັ່ນ: ຜູ້ຊ່ວຍວຽກຮັບໃຊ້ອາດຊ່ວຍຄັດລອກສຳເນົາພະຄຳພີ ຫຼືອາດໄປຊື້ເຄື່ອງສຳລັບການຄັດລອກພະຄຳພີ.
5. ຜູ້ຊ່ວຍວຽກຮັບໃຊ້ໃນທຸກມື້ນີ້ຊ່ວຍວຽກຫຍັງແດ່?
5 ໃນທຸກມື້ນີ້ ຜູ້ຊ່ວຍວຽກຮັບໃຊ້ກໍເຮັດວຽກຫຼາຍຢ່າງໃນປະຊາຄົມ. (1ປຕ. 4:10) ຕົວຢ່າງເຊັ່ນ: ເຂົາເຈົ້າອາດຖືກມອບໝາຍໃຫ້ເບິ່ງແຍງບັນຊີຫຼືເຂດປະກາດຂອງປະຊາຄົມ ສັ່ງປຶ້ມໃຫ້ພີ່ນ້ອງ ຄຸມເຄື່ອງສຽງຫຼືວິດີໂອ ຕ້ອນຮັບຄົນທີ່ມາປະຊຸມ ຫຼືຊ່ວຍເບິ່ງແຍງຮັກສາຫໍປະຊຸມ. ວຽກເຫຼົ່ານີ້ຈຳເປັນແທ້ໆເພື່ອປະຊາຄົມຈະເປັນລະບຽບຮຽບຮ້ອຍແລະດຳເນີນໄປໄດ້ດີ. (1ກຣ. 14:40) ນອກຈາກນັ້ນ ຜູ້ຊ່ວຍວຽກຮັບໃຊ້ບາງຄົນຍັງເຮັດສ່ວນໃນການປະຊຸມຊີວິດຄລິດສະຕຽນແລະວຽກຮັບໃຊ້ ລວມທັງບັນລະຍາຍສາທາລະນະນຳ. ຜູ້ຊ່ວຍວຽກຮັບໃຊ້ອາດຖືກມອບໝາຍໃຫ້ເປັນຜູ້ຊ່ວຍຜູ້ເບິ່ງແຍງກຸ່ມປະກາດ ແລະບາງເທື່ອຜູ້ເບິ່ງແຍງອາດຂໍໃຫ້ຜູ້ຊ່ວຍວຽກຮັບໃຊ້ໄປນຳຕອນທີ່ໄປໃຫ້ກຳລັງໃຈພີ່ນ້ອງໃນປະຊາຄົມ.
6. ເປັນຫຍັງເຮົາຈຶ່ງເຫັນຄ່າຜູ້ຊ່ວຍວຽກຮັບໃຊ້ທີ່ເຮັດວຽກໜັກ?
6 ວຽກທີ່ຜູ້ຊ່ວຍວຽກຮັບໃຊ້ເຮັດເປັນປະໂຫຍດຕໍ່ປະຊາຄົມແນວໃດ? ພີ່ນ້ອງຍິງຊື່ເບເບີລີ້bຈາກປະເທດໂບລີວີເວົ້າວ່າ: “ຂ້ອຍຂອບໃຈຜູ້ຊ່ວຍວຽກຮັບໃຊ້ໃນປະຊາຄົມຂອງເຮົາຫຼາຍແທ້ໆ. ຂ້ອຍໄດ້ປະໂຫຍດຫຼາຍຈາກການປະຊຸມຍ້ອນຂ້ອຍສາມາດຮ້ອງເພງ ອອກຄຳຄິດເຫັນ ແລະຟັງຄຳບັນລະຍາຍ ແລະໄດ້ປະໂຫຍດຈາກວິດີໂອແລະຮູບຕ່າງໆ. ເຂົາເຈົ້າເບິ່ງແຍງຜູ້ທີ່ເຂົ້າຮ່ວມປະຊຸມໃຫ້ປອດໄພ ແລະເຂົາເຈົ້າຍັງຊ່ວຍຄົນທີ່ມາປະຊຸມບໍ່ໄດ້ໃຫ້ເຂົ້າຮ່ວມປະຊຸມທາງຊູມ. ຫຼັງຈາກປະຊຸມແລ້ວ ເຂົາເຈົ້າຍັງຊ່ວຍອະນາໄມ ຊ່ວຍເລື່ອງບັນຊີປະຊາຄົມ ແລະຈັດໃຫ້ມີປຶ້ມຕ່າງໆທີ່ເຮົາຕ້ອງການ. ຂ້ອຍເຫັນຄ່າເຂົາເຈົ້າຫຼາຍແທ້ໆ!” ເລຊະລີ້ທີ່ຢູ່ປະເທດໂກລົມບີເຊິ່ງຜົວຂອງລາວເປັນຜູ້ເບິ່ງແຍງເວົ້າວ່າ: “ຜູ້ຊ່ວຍວຽກຮັບໃຊ້ໃນປະຊາຄົມຂອງເຮົາເຮັດວຽກຫຼາຍຢ່າງອີ່ຫຼີ. ຖ້າບໍ່ມີເຂົາເຈົ້າ ຜົວຂອງຂ້ອຍຄືຊິຫຍຸ້ງຫຼາຍແທ້ໆ! ຂ້ອຍຂອບໃຈແທ້ໆທີ່ເຂົາເຈົ້າກະຕືລືລົ້ນແລະເຕັມໃຈຊ່ວຍເຫຼືອພີ່ນ້ອງ.” ເຈົ້າຮູ້ສຶກແບບນີ້ຄືກັນບໍກັບຜູ້ຊ່ວຍວຽກຮັບໃຊ້ໃນປະຊາຄົມຂອງເຈົ້າ?—1ຕມ. 3:13
7. ເຮົາຈະສະແດງຄວາມຂອບໃຈຜູ້ຊ່ວຍວຽກຮັບໃຊ້ໄດ້ແນວໃດ? (ເບິ່ງຮູບນຳ)
7 ເຖິງວ່າເຮົາອາດຮູ້ສຶກຂອບໃຈຜູ້ຊ່ວຍວຽກຮັບໃຊ້ ແຕ່ຄຳພີໄບເບິນກະຕຸ້ນເຮົາໃຫ້ “ສະແດງຄວາມຂອບໃຈ” ນຳ. (ກລຊ. 3:15) ຄຣິດສະຕ໋ອບທີ່ເປັນຜູ້ເບິ່ງແຍງຢູ່ປະເທດຟິນແລນເວົ້າວ່າ: “ຂ້ອຍຂຽນກ໋າດໄປຂອບໃຈ ຫຼືສົ່ງຂໍ້ຄວາມທີ່ມີຂໍ້ຄຳພີໄປໃຫ້ຜູ້ຊ່ວຍວຽກຮັບໃຊ້ແລະບອກລາວວ່າຂ້ອຍໄດ້ກຳລັງໃຈແທ້ໆຈາກສິ່ງທີ່ລາວເວົ້າແລະເຮັດ ຫຼືບອກວ່າເປັນຫຍັງຂ້ອຍຈຶ່ງຮູ້ສຶກຂອບໃຈໃນວຽກທີ່ລາວເຮັດ.” ປັດສ໌ການກັບຢາເອວທີ່ຢູ່ນິວຄາລິໂດເນຍອະທິດຖານເພື່ອຜູ້ຊ່ວຍວຽກຮັບໃຊ້ໂດຍສະເພາະ. ປັດສ໌ການເວົ້າວ່າ: “ໄລຍະນີ້ເຮົາອະທິດຖານຫຼາຍແທ້ໆເພື່ອຜູ້ຊ່ວຍວຽກຮັບໃຊ້ໃນປະຊາຄົມຂອງເຮົາ. ເຮົາຂອບໃຈພະເຢໂຫວາທີ່ໃຫ້ມີເຂົາເຈົ້າ ແລະຂໍໃຫ້ເພິ່ນຢູ່ກັບເຂົາເຈົ້າແລະຊ່ວຍເຂົາເຈົ້າ.” ພະເຢໂຫວາຟັງຄຳອະທິດຖານແບບນີ້ແລະໝົດປະຊາຄົມກໍໄດ້ຮັບປະໂຫຍດ.—2ກຣ. 1:11
ຜູ້ເບິ່ງແຍງໃນປະຊາຄົມ “ເຮັດວຽກໜັກ”
8. ເປັນຫຍັງໂປໂລຈຶ່ງເວົ້າວ່າຜູ້ເບິ່ງແຍງໃນສະຕະວັດທຳອິດ “ເຮັດວຽກໜັກ”? (1 ເທຊະໂລນິກ 5:12, 13)
8 ໃນສະຕະວັດທຳອິດ ຜູ້ເບິ່ງແຍງເຮັດວຽກໜັກເພື່ອພີ່ນ້ອງໃນປະຊາຄົມ. (ອ່ານ 1 ເທຊະໂລນິກ 5:12, 13; 1ຕມ. 5:17) ເຂົາເຈົ້າ “ນຳໜ້າ” ປະຊາຄົມໂດຍຈັດການປະຊຸມແລະຕັດສິນໃຈເລື່ອງຕ່າງໆຮ່ວມກັນໃນຄະນະຜູ້ເບິ່ງແຍງ. ເຂົາເຈົ້າ “ເຕືອນສະຕິ” ພີ່ນ້ອງໂດຍໃຫ້ຄຳແນະນຳໃນແບບທີ່ສະແດງຄວາມຮັກເພື່ອພີ່ນ້ອງຈະມີຄວາມເຊື່ອເຂັ້ມແຂງ. (1ທຊ. 2:11, 12; 2ຕມ. 4:2) ພີ່ນ້ອງຊາຍເຫຼົ່ານີ້ຍັງຕ້ອງເຮັດວຽກເພື່ອຫາລ້ຽງຄອບຄົວແລະຮັກສາຄວາມເຊື່ອຂອງໂຕເອງໃຫ້ເຂັ້ມແຂງນຳ.—1ຕມ. 3:2, 4; ຕຕ. 1:6-9
9. ຜູ້ເບິ່ງແຍງໃນທຸກມື້ນີ້ມີໜ້າທີ່ຮັບຜິດຊອບຫຍັງແດ່?
9 ຜູ້ເບິ່ງແຍງໃນທຸກມື້ນີ້ຫຍຸ້ງຫຼາຍແທ້ໆ. ເຂົາເຈົ້າເປັນຜູ້ປະກາດຂ່າວດີ. (2ຕມ. 4:5) ເຂົາເຈົ້າເປັນຕົວຢ່າງທີ່ດີໃນການປະກາດຢ່າງຫ້າວຫັນ ຈັດເຂດປະກາດຂອງປະຊາຄົມ ແລະຝຶກພີ່ນ້ອງໃຫ້ປະກາດແລະສອນໄດ້ດີ. ເຂົາເຈົ້າຍັງເຮັດໜ້າທີ່ຕັດສິນເລື່ອງໃນປະຊາຄົມໃນແບບທີ່ສະແດງຄວາມເມດຕາແລະບໍ່ລຳອຽງ. ເມື່ອມີພີ່ນ້ອງເຮັດຜິດຮ້າຍແຮງ ຜູ້ເບິ່ງແຍງຈະພະຍາຍາມຊ່ວຍພີ່ນ້ອງຜູ້ນັ້ນໃຫ້ຟື້ນຟູສາຍສຳພັນຂອງລາວກັບພະເຢໂຫວາ ແລະໃນເວລາດຽວກັນເຂົາເຈົ້າກໍຕ້ອງຮັກສາປະຊາຄົມໃຫ້ສະອາດ. (1ກຣ. 5:12, 13; ຄລຕ. 6:1) ໜ້າທີ່ຫຼັກຂອງຜູ້ເບິ່ງແຍງແມ່ນເອົາໃຈໃສ່ຝູງແກະຂອງພະເຈົ້າທີ່ເຂົາເຈົ້າເບິ່ງແຍງ. (1ປຕ. 5:1-3) ຜູ້ເບິ່ງແຍງຍັງຕ້ອງກຽມຄຳບັນລະຍາຍຢ່າງດີເພື່ອຈະບັນລະຍາຍຢູ່ປະຊາຄົມ ພະຍາຍາມຮູ້ຈັກພີ່ນ້ອງທຸກຄົນໃນປະຊາຄົມ ແລະໄປຢາມເພື່ອໃຫ້ກຳລັງໃຈພີ່ນ້ອງ. ນອກຈາກນັ້ນ ຜູ້ເບິ່ງແຍງບາງຄົນຍັງຊ່ວຍວຽກກໍ່ສ້າງແລະເບິ່ງແຍງຮັກສາຫໍປະຊຸມ ມີສ່ວນຮ່ວມໃນການຈັດການປະຊຸມໃຫຍ່ ເຮັດວຽກໃນຄະນະກຳມະການປະສານງານກັບໂຮງໝໍ ແລະເຮັດວຽກໃນກຸ່ມທີ່ໄປຢາມຄົນເຈັບ ແລະຍັງມີວຽກອື່ນໆອີກຫຼາຍຢ່າງ. ຜູ້ເບິ່ງແຍງເຮັດວຽກໜັກແທ້ໆ!
10. ເປັນຫຍັງເຮົາຈຶ່ງເຫັນຄ່າຜູ້ເບິ່ງແຍງທີ່ເຮັດວຽກໜັກ?
10 ພະເຢໂຫວາບອກໄວ້ລ່ວງໜ້າວ່າ ຜູ້ລ້ຽງແກະຈະເບິ່ງແຍງເຮົາຢ່າງດີແລະເຮົາ “ບໍ່ຕ້ອງຢ້ານອີກຕໍ່ໄປ.” (ຢຣມ. 23:4) ພີ່ນ້ອງຍິງຊື່ໂຢຮັນນາຈາກປະເທດຟິນແລນໄດ້ເຫັນວ່າຄຳເວົ້ານີ້ເປັນຈິງຕອນທີ່ແມ່ຂອງລາວບໍ່ສະບາຍແຮງ. ລາວເວົ້າວ່າ: “ເຖິງວ່າຂ້ອຍເລົ່າຄວາມຮູ້ສຶກຂອງໂຕເອງບໍ່ເກັ່ງ ແຕ່ຜູ້ເບິ່ງແຍງຄົນໜຶ່ງທີ່ຂ້ອຍບໍ່ສະໜິດປານໃດກໍອົດທົນຟັງຕອນທີ່ຂ້ອຍລະບາຍຄວາມຮູ້ສຶກອອກມາ. ລາວອະທິດຖານກັບຂ້ອຍແລະເຮັດໃຫ້ຂ້ອຍໝັ້ນໃຈວ່າພະເຢໂຫວາຮັກຂ້ອຍ. ຂ້ອຍຈື່ບໍ່ໄດ້ປານໃດວ່າລາວເວົ້າຫຍັງ ແຕ່ຂ້ອຍຈື່ໄດ້ວ່າຂ້ອຍຮູ້ສຶກປອດໄພແລະສະບາຍໃຈທີ່ໄດ້ລົມກັບລາວ. ຂ້ອຍເຊື່ອວ່າພະເຢໂຫວາສົ່ງລາວມາຊ່ວຍຂ້ອຍໃນເວລາທີ່ຂ້ອຍຕ້ອງການແທ້ໆ.” ຜູ້ເບິ່ງແຍງໃນປະຊາຄົມຂອງເຈົ້າຊ່ວຍເຈົ້າແນວໃດ?
11. ເຮົາຈະສະແດງຄວາມຂອບໃຈຕໍ່ຜູ້ເບິ່ງແຍງໄດ້ແນວໃດ? (ເບິ່ງຮູບນຳ)
11 ພະເຢໂຫວາຢາກໃຫ້ເຮົາສະແດງຄວາມຂອບໃຈຜູ້ເບິ່ງແຍງຈາກໃຈຈິງ “ຍ້ອນວຽກທີ່ເຂົາເຈົ້າເຮັດ.” (1ທຊ. 5:12, 13) ເຮັນຣຽດຕ້າທີ່ຢູ່ຟິນແລນເວົ້າວ່າ: “ຜູ້ເບິ່ງແຍງຊ່ວຍເຫຼືອຄົນອື່ນດ້ວຍຄວາມເຕັມໃຈ ແຕ່ກໍບໍ່ໄດ້ໝາຍຄວາມວ່າເຂົາເຈົ້າມີເວລາຫຼືກຳລັງຫຼາຍກວ່າຄົນອື່ນ ຫຼືເຂົາເຈົ້າບໍ່ມີບັນຫາໃນຊີວິດເລີຍ. ບາງເທື່ອຂ້ອຍບອກເຂົາເຈົ້າວ່າ ‘ເຈົ້າຮູ້ບໍ ເຈົ້າເປັນຜູ້ເບິ່ງແຍງທີ່ດີຫຼາຍແທ້ໆ.’” ພີ່ນ້ອງຍິງຊື່ເຊຣາທີ່ຢູ່ປະເທດຕວກກີເວົ້າວ່າ: “ຜູ້ເບິ່ງແຍງຕ້ອງການກຳລັງໃຈເພື່ອຈະເຮັດວຽກຕໍ່ໆໄປໄດ້. ດັ່ງນັ້ນ ເຮົາສາມາດຂຽນກ໋າດເພື່ອໃຫ້ກຳລັງໃຈເຂົາເຈົ້າ ຊວນເຂົາເຈົ້າມາກິນເຂົ້ານຳກັນ ຫຼືໄປປະກາດກັບເຂົາເຈົ້າ.” ໃນປະຊາຄົມຂອງເຈົ້າມີຜູ້ເບິ່ງແຍງຄົນໃດບໍທີ່ເຈົ້າຢາກຂອບໃຈເປັນພິເສດ? ໃຫ້ເຈົ້າຊອກຫາວິທີທີ່ຈະສະແດງຄວາມຂອບໃຈລາວ.—1ກຣ. 16:18
ເຈົ້າສາມາດໃຫ້ກຳລັງໃຈພີ່ນ້ອງຊາຍທີ່ມີໜ້າທີ່ຮັບຜິດຊອບໃນປະຊາຄົມເພື່ອເຂົາເຈົ້າຈະເຮັດວຽກຕໍ່ໆໄປໄດ້ (ເບິ່ງຂໍ້ 7, 11, 15)
ຜູ້ເບິ່ງແຍງໝວດຊ່ວຍປະຊາຄົມຕ່າງໆໃຫ້ເຂັ້ມແຂງ
12. ໃນສະຕະວັດທຳອິດມີການຈັດກຽມຫຍັງເພື່ອຊ່ວຍປະຊາຄົມຕ່າງໆໃຫ້ເຂັ້ມແຂງ? (1 ເທຊະໂລນິກ 2:7, 8)
12 ພະເຢຊູຍັງໃຫ້ພີ່ນ້ອງຊາຍເຊິ່ງເປັນ “ຂອງຂວັນທີ່ເປັນມະນຸດ” ເຮັດວຽກຮັບໃຊ້ອີກແບບໜຶ່ງ. ພະເຢຊູຊີ້ນຳຜູ້ເບິ່ງແຍງໃນເມືອງເຢຣູຊາເລັມໃຫ້ສົ່ງໂປໂລ ບາຣະນາບາ ແລະຄົນອື່ນໆໄປເຮັດວຽກເປັນຜູ້ເບິ່ງແຍງໝວດ. (ກຈກ. 11:22) ສົ່ງໄປເພື່ອຫຍັງ? ເພື່ອຊ່ວຍປະຊາຄົມຕ່າງໆໃຫ້ເຂັ້ມແຂງຄືກັບທີ່ຜູ້ຊ່ວຍວຽກຮັບໃຊ້ແລະຜູ້ເບິ່ງແຍງຊ່ວຍປະຊາຄົມໃຫ້ເຂັ້ມແຂງ. (ກຈກ. 15:40, 41) ພີ່ນ້ອງເຫຼົ່ານີ້ເສຍສະລະຄວາມສະດວກສະບາຍຂອງໂຕເອງແລະຍັງສ່ຽງຊີວິດເພື່ອສອນແລະໃຫ້ກຳລັງໃຈພີ່ນ້ອງ.—ອ່ານ 1 ເທຊະໂລນິກ 2:7, 8
13. ຜູ້ເບິ່ງແຍງໝວດມີໜ້າທີ່ຮັບຜິດຊອບຫຍັງແດ່?
13 ຜູ້ເບິ່ງແຍງໝວດຕ້ອງເດີນທາງຕະຫຼອດ. ບາງເທື່ອເຂົາເຈົ້າເດີນທາງຫຼາຍຮ້ອຍກິໂລແມັດເພື່ອໄປຢາມປະຊາຄົມຕ່າງໆ. ທຸກອາທິດ ຜູ້ເບິ່ງແຍງໝວດຈະບັນລະຍາຍຫຼາຍເທື່ອ ໄປຢາມເພື່ອໃຫ້ກຳລັງໃຈພີ່ນ້ອງ ປະຊຸມກັບໄພໂອເນຍ ປະຊຸມກັບຜູ້ເບິ່ງແຍງໃນປະຊາຄົມ ແລະປະຊຸມເພື່ອການປະກາດ. ເຂົາເຈົ້າຍັງຕ້ອງກຽມຄຳບັນລະຍາຍ ແລະຈັດການປະຊຸມໝວດແລະການປະຊຸມພາກ. ເຂົາເຈົ້າຍັງຕ້ອງສອນໃນໂຮງຮຽນໄພໂອເນຍແລະຈັດການປະຊຸມກັບໄພໂອເນຍໃນໝວດ. ນອກຈາກນັ້ນ ເຂົາເຈົ້າຍັງມີວຽກທີ່ສຳຄັນອື່ນໆອີກ ແລະບາງເທື່ອເຂົາເຈົ້າກໍໄດ້ຮັບວຽກມອບໝາຍດ່ວນຈາກສຳນັກງານສາຂານຳ.
14. ເປັນຫຍັງເຮົາຈຶ່ງເຫັນຄ່າຜູ້ເບິ່ງແຍງໝວດທີ່ເຮັດວຽກໜັກ?
14 ປະຊາຄົມໄດ້ຮັບປະໂຫຍດແນວໃດຈາກວຽກທີ່ຜູ້ເບິ່ງແຍງໝວດເຮັດ? ພີ່ນ້ອງຊາຍຄົນໜຶ່ງຢູ່ປະເທດຕວກກີເວົ້າວ່າ: “ທຸກເທື່ອທີ່ຜູ້ເບິ່ງແຍງໝວດມາຢາມ ຂ້ອຍຖືກກະຕຸ້ນໃຫ້ໃຊ້ເວລາຫຼາຍຂຶ້ນເພື່ອຊ່ວຍເຫຼືອພີ່ນ້ອງ. ຕອນທີ່ຜູ້ເບິ່ງແຍງໝວດແຕ່ລະຄົນມາຢາມ ເຂົາເຈົ້າບໍ່ເຄີຍເຮັດໃຫ້ຂ້ອຍຮູ້ສຶກວ່າເຂົາເຈົ້າຫຍຸ້ງຫຼາຍຫຼືບໍ່ມີເວລາລົມກັບຂ້ອຍ.” ໂຢຮັນນາທີ່ເວົ້າເຖິງກ່ອນໜ້ານີ້ໄດ້ໄປປະກາດກັບຜູ້ເບິ່ງແຍງໝວດ ແຕ່ບໍ່ເຈິໃຜຢູ່ເຮືອນເລີຍ. ລາວເວົ້າວ່າ: “ຂ້ອຍບໍ່ລືມມື້ທີ່ໄປປະກາດກັບຜູ້ເບິ່ງແຍງໝວດ. ຕອນນັ້ນຂ້ອຍເລົ່າໃຫ້ລາວຟັງວ່າເອື້ອຍຂອງຂ້ອຍ 2 ຄົນຫາກໍຍ້າຍໄປຢູ່ບ່ອນອື່ນແລະຂ້ອຍຄິດຮອດເຂົາເຈົ້າຫຼາຍ. ຜູ້ເບິ່ງແຍງໝວດໃຫ້ກຳລັງໃຈຂ້ອຍວ່າຕອນນີ້ເຮົາອາດບໍ່ໄດ້ຢູ່ນຳກັນກັບຄອບຄົວຫຼືໝູ່ ແຕ່ໃນໂລກໃໝ່ເຮົາຈະມີໂອກາດໄດ້ໃຊ້ເວລາກັບເຂົາເຈົ້າຕະຫຼອດໄປ.” ເຈົ້າເຄີຍໄດ້ຮັບກຳລັງໃຈຈາກຜູ້ເບິ່ງແຍງໝວດແບບນີ້ຄືກັນບໍ?—ກຈກ. 20:37–21:1
15. (ກ) ຕາມ 3 ໂຢຮັນ 5-8 ເຮົາຈະສະແດງຄວາມຂອບໃຈຜູ້ເບິ່ງແຍງໝວດໄດ້ແນວໃດ? (ເບິ່ງຮູບນຳ) (ຂ) ເປັນຫຍັງເຮົາຄວນຄິດເຖິງເມຍຂອງພີ່ນ້ອງຊາຍທີ່ມີໜ້າທີ່ຮັບຜິດຊອບໃນປະຊາຄົມ ແລະເຮົາຈະເຮັດແບບນັ້ນໄດ້ແນວໃດ? (ເບິ່ງຂອບ “ໃຫ້ຄິດເຖິງເມຍຂອງເຂົາເຈົ້າ”)
15 ອັກຄະສາວົກໂຢຮັນກະຕຸ້ນຄາໂຢໃຫ້ສະແດງນ້ຳໃຈຕ້ອນຮັບພີ່ນ້ອງທີ່ມາຢາມແລະ “ຊ່ວຍເຫຼືອເຂົາເຈົ້າໃນການເດີນທາງຕາມທີ່ພະເຈົ້າຢາກໃຫ້ເຮັດ.” (ອ່ານ 3 ໂຢຮັນ 5-8) ວິທີໜຶ່ງທີ່ເຮົາຈະເຮັດແບບນັ້ນໄດ້ແມ່ນຊວນຜູ້ເບິ່ງແຍງໝວດມາກິນເຂົ້ານຳກັນ. ອີກວິທີໜຶ່ງແມ່ນເຂົ້າຮ່ວມການປະກາດໃນອາທິດທີ່ຜູ້ເບິ່ງແຍງໝວດມາຢາມ. ເລຊະລີ້ທີ່ເວົ້າເຖິງກ່ອນໜ້ານີ້ໄດ້ສະແດງຄວາມຂອບໃຈຜູ້ເບິ່ງແຍງໝວດໃນອີກວິທີໜຶ່ງ. ລາວເວົ້າວ່າ: “ຂ້ອຍອະທິດຖານຂໍພະເຢໂຫວາຊ່ວຍຜູ້ເບິ່ງແຍງໝວດໃຫ້ມີສິ່ງຈຳເປັນ. ຂ້ອຍກັບຜົວຍັງຂຽນຈົດໝາຍໄປຫາເຂົາເຈົ້າແລະບອກວ່າ ການມາຢາມຂອງເຂົາເຈົ້າຊ່ວຍເຮົາໄດ້ຫຼາຍແທ້ໆ.” ຂໍໃຫ້ຈື່ໄວ້ວ່າຜູ້ເບິ່ງແຍງໝວດກໍເປັນຄົນທຳມະດາຄືກັນກັບເຮົາ. ບາງເທື່ອເຂົາເຈົ້າກໍມີບັນຫາສຸຂະພາບ ມີເລື່ອງທີ່ເຮັດໃຫ້ອຸກໃຈ ແລະເຖິງຂັ້ນທໍ້ໃຈ. ບາງທີຄຳເວົ້າດີໆຫຼືຂອງຂວັນເລັກໆນ້ອຍໆຈາກເຈົ້າອາດເປັນສິ່ງທີ່ພະເຢໂຫວາຕອບຄຳອະທິດຖານຂອງຜູ້ເບິ່ງແຍງໝວດກໍໄດ້.—ສພສ. 12:25
ເຮົາຈຳເປັນຕ້ອງມີ “ຂອງຂວັນທີ່ເປັນມະນຸດ”
16. ຕາມສຸພາສິດ 3:27 ພີ່ນ້ອງຊາຍຄວນຖາມໂຕເອງແນວໃດ?
16 ຢູ່ທົ່ວໂລກ ເຮົາຕ້ອງການພີ່ນ້ອງຊາຍຫຼາຍຂຶ້ນເພື່ອຈະຮັບໃຊ້ເປັນ “ຂອງຂວັນທີ່ເປັນມະນຸດ.” ຖ້າເຈົ້າເປັນພີ່ນ້ອງຊາຍທີ່ຮັບບັບເຕມາແລ້ວ ເຈົ້າສາມາດຊ່ວຍໄດ້ບໍ? (ອ່ານສຸພາສິດ 3:27) ເຈົ້າພະຍາຍາມທີ່ຈະມີຄຸນສົມບັດເພື່ອຈະເປັນຜູ້ຊ່ວຍວຽກຮັບໃຊ້ບໍ? ຖ້າເຈົ້າເປັນຜູ້ຊ່ວຍວຽກຮັບໃຊ້ແລ້ວ ເຈົ້າພະຍາຍາມທີ່ຈະມີຄຸນສົມບັດເພື່ອຈະເປັນຜູ້ເບິ່ງແຍງບໍ?c ເຈົ້າສາມາດປັບປ່ຽນຊີວິດເພື່ອຈະເຂົ້າໂຮງຮຽນຜູ້ປະກາດລາຊະອານາຈັກບໍ? ໂຮງຮຽນນີ້ຈະຝຶກແລະຊ່ວຍເຈົ້າໃຫ້ເຮັດວຽກຮັບໃຊ້ທີ່ພະເຢຊູມອບໝາຍໃຫ້ໄດ້ຫຼາຍຂຶ້ນ. ຖ້າເຈົ້າຮູ້ສຶກວ່າໂຕເອງຍັງບໍ່ມີຄຸນສົມບັດ ໃຫ້ອະທິດຖານຫາພະເຢໂຫວາແລະຂໍພະລັງບໍລິສຸດຈາກເພິ່ນເພື່ອຊ່ວຍເຈົ້າໃຫ້ເຮັດວຽກມອບໝາຍທີ່ໄດ້ຮັບໃຫ້ສຳເລັດ.—ລກ. 11:13; ກຈກ. 20:28
17. “ຂອງຂວັນທີ່ເປັນມະນຸດ” ສະແດງໃຫ້ເຫັນວ່າພະເຢຊູກະສັດຂອງເຮົາກຳລັງເຮັດຫຍັງ?
17 ພີ່ນ້ອງຊາຍທີ່ພະເຢຊູແຕ່ງຕັ້ງໃຫ້ເປັນ “ຂອງຂວັນທີ່ເປັນມະນຸດ” ສະແດງໃຫ້ເຫັນວ່າເພິ່ນກຳລັງນຳໜ້າເຮົາໃນສະໄໝສຸດທ້າຍນີ້. (ມທ. 28:20) ເຮົາຮູ້ສຶກຂອບໃຈແທ້ໆທີ່ມີກະສັດທີ່ຮັກເຮົາ ໃຈກວ້າງ ເອົາໃຈໃສ່ເຮົາ ແລະໃຫ້ມີພີ່ນ້ອງຊາຍເບິ່ງແຍງເຮົາ. ດັ່ງນັ້ນ ຂໍໃຫ້ເຮົາຊອກຫາໂອກາດທີ່ຈະສະແດງຄວາມຂອບໃຈພີ່ນ້ອງຊາຍເຫຼົ່ານີ້ທີ່ເຮັດວຽກໜັກ ແລະໃຫ້ເຮົາຂອບໃຈພະເຢໂຫວາຍ້ອນເພິ່ນເປັນຜູ້ໃຫ້ “ສິ່ງດີໆແລະຂອງຂວັນພິເສດທຸກຢ່າງ.”—ຢກບ. 1:17
ເພງທີ 99 ພີ່ນ້ອງເປັນແສນເປັນລ້ານຄົນ
a ຜູ້ເບິ່ງແຍງທີ່ເປັນຄະນະກຳມະການປົກຄອງ ຜູ້ຊ່ວຍຄະນະກຳມະການປົກຄອງ ຄະນະກຳມະການສາຂາ ແລະພີ່ນ້ອງຊາຍທີ່ເຮັດໜ້າທີ່ອື່ນໆກໍເປັນ “ຂອງຂວັນທີ່ເປັນມະນຸດ” ຄືກັນ.
b ຊື່ສົມມຸດ.
c ສຳລັບຂໍ້ມູນເພີ່ມເຕີມທີ່ວ່າຄວນເຮັດແນວໃດຈຶ່ງຈະໄດ້ເປັນຜູ້ຊ່ວຍວຽກຮັບໃຊ້ຫຼືຜູ້ເບິ່ງແຍງ ໃຫ້ເບິ່ງບົດຄວາມ “ພີ່ນ້ອງຊາຍ ເຈົ້າມີເປົ້າໝາຍທີ່ຈະເປັນຜູ້ຊ່ວຍວຽກຮັບໃຊ້ບໍ? ແລະ “ພີ່ນ້ອງຊາຍ ເຈົ້າມີເປົ້າໝາຍທີ່ຈະເປັນຜູ້ເບິ່ງແຍງບໍ?” ໃນຫໍສັງເກດການເດືອນພະຈິກ ປີ 2024