ອະທິບາຍຂໍ້ຄຳພີ
ພະເຢຊູ “ຮຽນຮູ້ທີ່ຈະເຊື່ອຟັງ”
ພະເຢຊູເຊື່ອຟັງພະເຢໂຫວາສະເໝີ. (ຢຮ. 8:29) ແຕ່ເປັນຫຍັງຄຳພີໄບເບິນຈຶ່ງເວົ້າວ່າ: “ເພິ່ນກໍຮຽນຮູ້ທີ່ຈະເຊື່ອຟັງເມື່ອຕ້ອງທົນທຸກທໍລະມານ”?—ຮຣ. 5:8
ຕອນທີ່ມີຊີວິດຢູ່ໃນໂລກນີ້ ພະເຢຊູເຈິກັບສິ່ງທີ່ບໍ່ເຄີຍເຈິມາກ່ອນຕອນທີ່ເພິ່ນຢູ່ໃນສະຫວັນ. ຕົວຢ່າງເຊັ່ນ: ເພິ່ນຖືກລ້ຽງໂດຍພໍ່ແມ່ທີ່ຮັກພະເຢໂຫວາ ແຕ່ເຂົາເຈົ້າເປັນຄົນບໍ່ສົມບູນແບບ. (ລກ. 2:51) ເພິ່ນຕ້ອງອົດທົນກັບການປະຕິບັດທີ່ບໍ່ດີຈາກພວກຫົວໜ້າສາສະໜາທີ່ຊົ່ວຮ້າຍແລະຜູ້ປົກຄອງທີ່ບໍ່ຍຸຕິທຳ. (ມທ. 26:59; ມຣກ. 15:15) ນອກຈາກນັ້ນ ເພິ່ນຕາຍແບບເຈັບປວດທໍລະມານຫຼາຍ. ຄຳພີໄບເບິນບອກວ່າ: “ເພິ່ນຖ່ອມໂຕແລະເຊື່ອຟັງພະເຈົ້າທຸກຢ່າງຈົນເຖິງກັບຍອມຕາຍ.”—ຟລປ. 2:8
ປະສົບການເຫຼົ່ານີ້ສອນພະເຢຊູໃຫ້ເຊື່ອຟັງໃນແບບທີ່ເພິ່ນບໍ່ເຄີຍໄດ້ຮຽນຮູ້ມາກ່ອນຕອນທີ່ຢູ່ໃນສະຫວັນ. ຍ້ອນແນວນີ້ ເພິ່ນຈຶ່ງສາມາດເປັນກະສັດແລະປະໂລຫິດໃຫຍ່ທີ່ດີຄົບຖ້ວນເຊິ່ງເຫັນອົກເຫັນໃຈເຮົາແທ້ໆ. (ຮຣ. 4:15; 5:9) ພະເຢຊູມີຄ່າຕໍ່ພະເຢໂຫວາຫຼາຍຂຶ້ນຫຼັງຈາກຮຽນຮູ້ທີ່ຈະເຊື່ອຟັງຈາກສິ່ງຕ່າງໆທີ່ເພິ່ນທົນທຸກທໍລະມານ. ຖ້າເຮົາຮຽນຮູ້ທີ່ຈະເຊື່ອຟັງພະເຢໂຫວາຕໍ່ໆໄປເມື່ອເຈິກັບບັນຫາຫຍຸ້ງຍາກຕ່າງໆ ເຮົາກໍມີຄ່າແລະເປັນປະໂຫຍດຕໍ່ພະເຢໂຫວາຫຼາຍຂຶ້ນໄດ້ຄືກັນສຳລັບວຽກມອບໝາຍຕ່າງໆທີ່ເພິ່ນໃຫ້ເຮົາເຮັດ.—ຢກບ. 1:4