-
ເປັນຫຍັງເຈົ້າໜ້າຈະອ່ານຄຳພີໄບເບິນ?ຫໍສັງເກດການ (ສາທາລະນະ)—2017 | ສະບັບທີ 1
-
-
ຈາກປົກ | ອ່ານຄຳພີໄບເບິນໃຫ້ມ່ວນແລະໄດ້ຮັບປະໂຫຍດ
ເປັນຫຍັງເຈົ້າໜ້າຈະອ່ານຄຳພີໄບເບິນ?
“ຂ້ອຍຄິດວ່າຄຳພີໄບເບິນໜ້າຈະເຂົ້າໃຈຍາກໄດ໋.”—ຈູວີ
“ຂ້ອຍຮູ້ສຶກວ່າຄຳພີໄບເບິນໜ້າເບື່ອ.”—ຄວີນນີ
“ພຽງແຕ່ເຫັນຄວາມໜາຂອງຄຳພີໄບເບິນ ຂ້ອຍກໍບໍ່ຢາກອ່ານແລ້ວ.”—ເອເຊຄຽວ
ເຈົ້າເຄີຍຢາກລອງອ່ານຄຳພີໄບເບິນ ແຕ່ສຸດທ້າຍກໍຕ້ອງລົ້ມເລີກຄວາມຕັ້ງໃຈຍ້ອນຮູ້ສຶກຄືຄົນເຫຼົ່ານີ້ບໍ? ແມ່ນຢູ່ວ່າຫຼາຍຄົນບໍ່ຢາກອ່ານຄຳພີໄບເບິນ. ແຕ່ຖ້າເຈົ້າຮູ້ວ່າຄຳພີໄບເບິນຊ່ວຍໃຫ້ເຈົ້າມີຊີວິດທີ່ດີແລະມີຄວາມສຸກຫຼາຍຂຶ້ນໄດ້ເດ? ແລະຖ້າມີວິທີທີ່ເຮັດໃຫ້ການອ່ານຄຳພີໄບເບິນມ່ວນຂຶ້ນເດ? ເຈົ້າຢາກຈະລອງອ່ານເບິ່ງບໍວ່າຄຳພີໄບເບິນເປັນປະໂຫຍດກັບເຈົ້າແນວໃດ?
ລອງມາເບິ່ງຄວາມເຫັນຂອງບາງຄົນທີ່ພົບວ່າການອ່ານຄຳພີໄບເບິນເປັນປະໂຫຍດແທ້ໆ.
ຊາຍໜຸ່ມອາຍຸ 20 ປີຕົ້ນໆ ຊື່ເອເຊຄຽວບອກວ່າ: “ແຕ່ກ່ອນ ຂ້ອຍເປັນຄືກັບຄົນຂັບລົດທີ່ຂັບໄປເລື້ອຍໆບໍ່ມີຈຸດມຸ່ງໝາຍ. ແຕ່ເມື່ອອ່ານຄຳພີໄບເບິນແລ້ວຊີວິດຂ້ອຍກໍມີຄວາມໝາຍ. ຍ້ອນໃນນັ້ນມີຄຳແນະນຳທີ່ຂ້ອຍເອົາໄປໃຊ້ໄດ້ແທ້ໃນຊີວິດປະຈຳວັນ.”
ຟຣີດາອາຍຸປະມານ 20 ປີປາຍເລົ່າວ່າ: “ແຕ່ກ່ອນຂ້ອຍເປັນຄົນໃຈຮ້າຍງ່າຍ. ແຕ່ເມື່ອອ່ານຄຳພີໄບເບິນ ຂ້ອຍກໍຄວບຄຸມອາລົມໄດ້ດີຂຶ້ນ. ຕອນນີ້ໃຜໆກໍຢາກລົມກັບຂ້ອຍ ເຮັດໃຫ້ຂ້ອຍມີໝູ່ຫຼາຍຂຶ້ນ.”
ຢູນິດສ໌ອາຍຸ 50 ປີປາຍເວົ້າເຖິງຄຳພີໄບເບິນວ່າ “ຄຳພີໄບເບິນຊ່ວຍໃຫ້ຂ້ອຍເຊົານິດໄສທີ່ບໍ່ດີແລະເປັນຄົນທີ່ດີຂຶ້ນ.”
ຖ້າເຈົ້າອ່ານຄຳພີໄບເບິນ ຊີວິດເຈົ້າຈະມີຄວາມສຸກຫຼາຍຂຶ້ນຄືກັບເຂົາເຈົ້າແລະຄືກັບຜູ້ອ່ານອີກຫຼາຍລ້ານຄົນ. (ເອຊາອີ 48:17, 18) ນອກຈາກນັ້ນ ຄຳພີໄບເບິນຍັງຊ່ວຍໃຫ້ເຈົ້າ (1) ຕັດສິນໃຈໄດ້ດີຂຶ້ນ (2) ມີໝູ່ແທ້ (3) ຫຼຸດຄວາມເຄັ່ງຕຶງ ແລະ (4) ໄດ້ຮຽນຄວາມຈິງເລື່ອງພະເຈົ້າເຊິ່ງເປັນສິ່ງທີ່ດີທີ່ສຸດ. ຄຳແນະນຳໃນຄຳພີໄບເບິນມາຈາກພະເຈົ້າ ດັ່ງນັ້ນ ຖ້າເຈົ້າເຮັດຕາມຊີວິດເຈົ້າຈະບໍ່ມີວັນລົ້ມເຫຼວ ຍ້ອນວ່າພະເຈົ້າໃຫ້ຄຳແນະນຳທີ່ດີສະເໝີ.
ສິ່ງສຳຄັນແມ່ນການເລີ່ມຕົ້ນ. ແລ້ວມີວິທີຫຍັງທີ່ຊ່ວຍໃຫ້ການເລີ່ມອ່ານຄຳພີໄບເບິນເປັນເລື່ອງງ່າຍຂຶ້ນແລະມ່ວນນຳ?
-
-
ເຈົ້າຈະເລີ່ມແນວໃດ?ຫໍສັງເກດການ (ສາທາລະນະ)—2017 | ສະບັບທີ 1
-
-
ຈາກປົກ | ອ່ານຄຳພີໄບເບິນໃຫ້ມ່ວນແລະໄດ້ຮັບປະໂຫຍດ
ເຈົ້າຈະເລີ່ມແນວໃດ?
ມີຫຍັງແດ່ທີ່ຊ່ວຍເຈົ້າໃຫ້ມ່ວນກັບການອ່ານຄຳພີໄບເບິນແລະໄດ້ປະໂຫຍດຫຼາຍຂຶ້ນ? ລອງເບິ່ງຄຳແນະນຳ 5 ຢ່າງຕໍ່ໄປນີ້ທີ່ຊ່ວຍຫຼາຍຄົນມາແລ້ວ.
ສ້າງບັນຍາກາດທີ່ດີ. ເລືອກສະຖານທີ່ງຽບໆ ບໍ່ມີສິ່ງລົບກວນເພື່ອເຈົ້າຈະຈົດຈໍ່ກັບເລື່ອງທີ່ອ່ານໄດ້ເຕັມທີ. ການອ່ານຢູ່ບ່ອນທີ່ມີແສງສະຫວ່າງພຽງພໍແລະອາກາດຖ່າຍເທສະດວກຈະເຮັດໃຫ້ໄດ້ຮັບປະໂຫຍດຈາກການອ່ານຫຼາຍທີ່ສຸດ.
ມີມຸມມອງທີ່ຖືກຕ້ອງ. ເນື່ອງຈາກຄຳພີໄບເບິນເປັນປຶ້ມທີ່ມາຈາກພະເຈົ້າຜູ້ເປັນພໍ່ຂອງເຮົາໃນສະຫວັນ ເຈົ້າຈະໄດ້ຮັບປະໂຫຍດຫຼາຍທີ່ສຸດຖ້າເຈົ້າມີມຸມມອງຄືກັບລູກທີ່ຢາກຮຽນຮູ້ຈາກພໍ່ທີ່ຮັກ. ແຕ່ຖ້າເຈົ້າມີຄວາມຄິດໃນແງ່ລົບ ຫຼືມີຄວາມຮູ້ສຶກທີ່ບໍ່ດີກັບຄຳພີໄບເບິນ ຂໍໃຫ້ວາງສິ່ງເຫຼົ່ານັ້ນໄວ້ກ່ອນແລ້ວຍອມໃຫ້ພະເຈົ້າສອນເຈົ້າ.—ຄຳເພງ 25:4
ອະທິດຖານກ່ອນຈະເລີ່ມອ່ານ. ຄຳພີໄບເບິນບັນທຶກຄວາມຄິດຂອງພະເຈົ້າ ດັ່ງນັ້ນ ບໍ່ແປກທີ່ເຈົ້າຕ້ອງຂໍຄວາມຊ່ວຍເຫຼືອຈາກເພິ່ນເພື່ອຈະເຂົ້າໃຈສິ່ງທີ່ອ່ານ. ພະເຈົ້າສັນຍາວ່າເພິ່ນຈະ “ໃຫ້ພະລັງບໍລິສຸດກັບຄົນທີ່ຂໍ.” (ລູກາ 11:13) ພະລັງບໍລິສຸດຈະຊ່ວຍເຈົ້າໃຫ້ເຂົ້າໃຈຄວາມຄິດຂອງພະເຈົ້າ. ແລ້ວໃນທີ່ສຸດເຈົ້າຈະເຂົ້າໃຈແມ່ນແຕ່ “ສິ່ງທີ່ເລິກເຊິ່ງຂອງພະເຈົ້າ.”—1 ໂກຣິນໂທ 2:10
ອ່ານເພື່ອຄວາມເຂົ້າໃຈ. ຢ່າຟ້າວອ່ານຜ່ານໆ. ແຕ່ໃຫ້ຄິດຢ່າງຈິງຈັງກັບສິ່ງທີ່ກຳລັງອ່ານ. ຖາມໂຕເອງວ່າ: ‘ຂ້ອຍເຫັນລັກສະນະນິດໄສຫຍັງຂອງບຸກຄົນໃນຄຳພີໄບເບິນທີ່ຂ້ອຍກຳລັງອ່ານ? ຂ້ອຍຈະເອົາເລື່ອງທີ່ອ່ານໄປໃຊ້ໃນຊີວິດໄດ້ແນວໃດ?’
ຕັ້ງເປົ້າໝາຍແບບເຈາະຈົງ. ເພື່ອຈະໄດ້ປະໂຫຍດຈາກການອ່ານຄຳພີໄບເບິນ ລອງຕັ້ງເປົ້າໝາຍວ່າຈະຮຽນຮູ້ບາງສິ່ງທີ່ຊ່ວຍໃຫ້ຊີວິດຂອງເຈົ້າດີຂຶ້ນ. ເຈົ້າອາດຕັ້ງເປົ້າໝາຍແບບນີ້ເຊັ່ນ: ‘ຂ້ອຍຢາກຮຽນຮູ້ຫຼາຍຂຶ້ນກ່ຽວກັບພະເຈົ້າ.’ ‘ຂ້ອຍຢາກຈະເປັນຄົນທີ່ດີຂຶ້ນ ຢາກເປັນຜົວຫຼືເມຍທີ່ດີຂຶ້ນ.’ ແລ້ວເລືອກອ່ານບາງສ່ວນໃນຄຳພີໄບເບິນທີ່ຈະຊ່ວຍເຈົ້າໃຫ້ບັນລຸເປົ້າໝາຍເຫຼົ່ານັ້ນ.a
ການເລີ່ມອ່ານຄຳພີໄບເບິນຈະເປັນເລື່ອງງ່າຍຂຶ້ນຖ້າເຈົ້າເຮັດຕາມຄຳແນະນຳທັງ 5 ຢ່າງນີ້. ແຕ່ເຈົ້າຈະເຮັດໃຫ້ການອ່ານໜ້າສົນໃຈຫຼາຍຂຶ້ນໄດ້ແນວໃດ? ບົດຄວາມຕໍ່ໄປມີຄຳແນະນຳບາງຢ່າງທີ່ຊ່ວຍເຈົ້າໄດ້.
a ຖ້າເຈົ້າບໍ່ແນ່ໃຈວ່າເລື່ອງທີ່ເຈົ້າສົນໃຈຢູ່ບ່ອນໃດໃນຄຳພີໄບເບິນ ພະຍານພະເຢໂຫວາຍິນດີຊ່ວຍເຈົ້າ.
-
-
ອ່ານແນວໃດໃຫ້ມ່ວນ?ຫໍສັງເກດການ (ສາທາລະນະ)—2017 | ສະບັບທີ 1
-
-
ຈາກປົກ | ອ່ານຄຳພີໄບເບິນໃຫ້ມ່ວນແລະໄດ້ຮັບປະໂຫຍດ
ອ່ານແນວໃດໃຫ້ມ່ວນ?
ເຈົ້າອ່ານຄຳພີໄບເບິນແລ້ວຮູ້ສຶກແນວໃດ? ເບື່ອບໍ? ຫຼືມັກຫຼາຍ? ສ່ວນຫຼາຍກໍຂຶ້ນຢູ່ກັບວ່າເຈົ້າອ່ານແບບໃດ. ມາເບິ່ງນຳກັນວ່າມີຫຍັງແດ່ທີ່ຈະຊ່ວຍໃຫ້ເຈົ້າມ່ວນກັບການອ່ານແລະເຮັດໃຫ້ຄຳພີໄບເບິນໜ້າສົນໃຈຫຼາຍຂຶ້ນສຳລັບເຈົ້າ.
ເລືອກສະບັບແປທີ່ເຊື່ອຖືໄດ້ ແລະແປດ້ວຍພາສາທັນສະໄໝ. ຖ້າເຈົ້າອ່ານເລື່ອງທີ່ມີແຕ່ຄຳຍາກໆຫຼືໃຊ້ພາສາບູຮານທີ່ເຈົ້າບໍ່ຄ່ອຍເຂົ້າໃຈ ເຈົ້າຄືຊິອ່ານເລື່ອງນັ້ນບໍ່ຄ່ອຍມ່ວນປານໃດ. ດັ່ງນັ້ນ ເຈົ້າຕ້ອງເລືອກຄຳພີໄບເບິນທີ່ໃຊ້ພາສາເຂົ້າໃຈງ່າຍ. ແຕ່ກໍຕ້ອງແປຢ່າງຖືກຕ້ອງແລະເຊື່ອຖືໄດ້ນຳ.a
ໃຊ້ເຕັກໂນໂລຊີທີ່ທັນສະໄໝ. ທຸກມື້ນີ້ຄຳພີໄບເບິນບໍ່ໄດ້ມີແຕ່ແບບທີ່ພິມເປັນຫົວເທົ່ານັ້ນ ແຕ່ຍັງມີໃນຮູບແບບດິຈິຕໍນຳ. ຄຳພີໄບເບິນບາງສະບັບແປສາມາດອ່ານອອນລາຍຫຼືດາວໂຫຼດໄວ້ໃນຄອມພິວເຕີ ແທັບເລັດ ຫຼືໂທລະສັບມືຖືໄດ້ນຳ. ບາງສະບັບຍັງມີເຄື່ອງມືເພີ່ມເຕີມສຳລັບຄົ້ນຫາຂໍ້ຄຳພີໄດ້ຢ່າງໄວວາຫຼືສາມາດທຽບກັບຂໍ້ດຽວກັນຈາກສະບັບແປອື່ນໆໄດ້. ຖ້າເຈົ້າມັກຟັງຫຼາຍກວ່າອ່ານ ຄຳພີໄບເບິນໃນບາງພາສາຍັງມີໃນຮູບແບບຟາຍສຽງນຳ. ບາງຄົນມັກຟັງເມື່ອເດີນທາງ ລີດເຄື່ອງ ຫຼືເຮັດວຽກອື່ນໆຢູ່. ເຈົ້າຢາກລອງເບິ່ງຈັກວິທີໜຶ່ງບໍ?
ໃຊ້ເຄື່ອງມືຄົ້ນຄວ້າ. ເຄື່ອງມືຄົ້ນຄວ້າຄຳພີໄບເບິນຈະຊ່ວຍໃຫ້ເຈົ້າໄດ້ປະໂຫຍດຈາກການອ່ານຫຼາຍຂຶ້ນ. ແຜນທີ່ສະແດງດິນແດນຕ່າງໆໃນຄຳພີໄບເບິນຈະຊ່ວຍເຈົ້າໃຫ້ຮູ້ວ່າສະຖານທີ່ທີ່ເຈົ້າອ່ານເຈິນັ້ນຢູ່ບ່ອນໃດ ແລ້ວເຈົ້າຈະເຫັນພາບໄດ້ແຈ້ງຂຶ້ນ. ເຈົ້າຈະເຂົ້າໃຈຄວາມໝາຍຂອງເລື່ອງຕ່າງໆໃນຄຳພີໄບເບິນຫຼາຍຂຶ້ນນຳຖ້າເຈົ້າອ່ານບົດຄວາມທີ່ຢູ່ໃນວາລະສານນີ້ຫຼືໃນເວັບໄຊ jw.org/lo ໃນຫົວຂໍ້ “ຄຳສອນໃນຄຳພີໄບເບິນ.”
ໃຊ້ວິທີການອ່ານທີ່ຫຼາກຫຼາຍ. ຖ້າເຈົ້າຄິດວ່າຕ້ອງອ່ານຄຳພີໄບເບິນຕັ້ງແຕ່ຕົ້ນຈົນຈົບເຈົ້າອາດຈະຮູ້ສຶກທໍ້ກໍໄດ້ ຄັນຊັ້ນເປັນຫຍັງຄືບໍ່ລອງເລີ່ມອ່ານຈາກບາງເລື່ອງທີ່ເຈົ້າມັກກ່ອນ? ຫຼືຖ້າເຈົ້າຢາກຮູ້ເລື່ອງຂອງບາງຄົນໃນຄຳພີໄບເບິນທີ່ເຈົ້າເຄີຍໄດ້ຍິນ ເຈົ້າກໍອາດຈະອ່ານເລື່ອງລາວຂອງເຂົາເຈົ້າເປັນແຕ່ລະຄົນໄປ. ຕົວຢ່າງການອ່ານແບບນີ້ມີຢູ່ໃນຂອບ “ມາຮູ້ຈັກກັບບາງຄົນໃນຄຳພີໄບເບິນ.” ນອກຈາກນັ້ນ ເຈົ້າອາດຈະເລືອກອ່ານຕາມຫົວເລື່ອງ ຫຼືຕາມລຳດັບເຫດການທີ່ເກີດຂຶ້ນໃນຄຳພີໄບເບິນກໍໄດ້. ເຈົ້າໜ້າຈະລອງເບິ່ງຈັກວິທີໜຶ່ງທີ່ເໝາະກັບເຈົ້າ.
a ຫຼາຍຄົນເຫັນວ່າພະຄຳພີສະບັບແປໂລກໃໝ່ ຖືກຕ້ອງແມ່ນຢຳ ເຊື່ອຖືໄດ້ ແລະອ່ານເຂົ້າໃຈງ່າຍນຳ. ຄຳພີໄບເບິນສະບັບແປນີ້ຈັດພິມໂດຍພະຍານພະເຢໂຫວາ ເຊິ່ງຫາອ່ານໄດ້ຫຼາຍກວ່າ 130 ພາສາ. ເຈົ້າສາມາດດາວໂຫຼດໄດ້ໃນເວັບໄຊ jw.org/lo ຫຼືດາວໂຫຼດແອັບ JW Library. ຫຼືຖ້າເຈົ້າຕ້ອງການຄຳພີໄບເບິນແບບເປັນຫົວ ພະຍານພະເຢໂຫວາຍິນດີເອົາໄປໃຫ້ເຈົ້າຢູ່ເຮືອນ.
-
-
ຄຳພີໄບເບິນເຮັດໃຫ້ຊີວິດເຈົ້າດີຂຶ້ນໄດ້ແນວໃດ?ຫໍສັງເກດການ (ສາທາລະນະ)—2017 | ສະບັບທີ 1
-
-
ຈາກປົກ | ອ່ານຄຳພີໄບເບິນໃຫ້ມ່ວນແລະໄດ້ຮັບປະໂຫຍດ
ຄຳພີໄບເບິນເຮັດໃຫ້ຊີວິດເຈົ້າດີຂຶ້ນໄດ້ແນວໃດ?
ຄຳພີໄບເບິນບໍ່ແມ່ນປຶ້ມທຳມະດາທົ່ວໄປ. ແຕ່ເປັນປຶ້ມທີ່ມີຄຳແນະນຳຈາກພະເຈົ້າຜູ້ສ້າງໂຕເຮົາ. (2 ຕີໂມທຽວ 3:16) ຂໍ້ຄວາມໃນຄຳພີໄບເບິນເປັນແຮງກະຕຸ້ນໃຫ້ເຮົາປ່ຽນໄປໃນທາງທີ່ດີຂຶ້ນ. ຍ້ອນຄຳພີໄບເບິນບອກວ່າ: “ຖ້ອຍຄຳຂອງພະເຈົ້າມີຊີວິດ ມີພະລັງຫຼາຍ.” (ເຮັບເຣີ 4:12) ຄຳພີໄບເບິນມີພະລັງໃນການຊ່ວຍໃຫ້ຊີວິດຂອງເຮົາດີຂຶ້ນໃນ 2 ດ້ານຫຼັກໆຄື ໃຫ້ຄຳແນະນຳທີ່ເອົາໄປໃຊ້ໄດ້ໃນຊີວິດປະຈຳວັນ ແລະຍັງຊ່ວຍໃຫ້ເຮົາໄດ້ຮູ້ຈັກພະເຈົ້າແລະຄຳສັນຍາຂອງເພິ່ນນຳ.—1 ຕີໂມທຽວ 4:8; ຢາໂກໂບ 4:8
ຄຳແນະນຳທີ່ເອົາໄປໃຊ້ໄດ້ໃນຊີວິດປະຈຳວັນ. ຄຳພີໄບເບິນຊ່ວຍເຮົາໃຫ້ຮູ້ວິທີຈັດການກັບເລື່ອງຕ່າງໆໃນຊີວິດ. ໂດຍມີຄຳແນະນຳທີ່ເອົາໄປໃຊ້ໄດ້ແທ້ກ່ຽວກັບເລື່ອງຕໍ່ໄປນີ້.
ຄວາມສຳພັນກັບຄົນອື່ນ.—ເອເຟໂຊ 4:31, 32; 5:22, 25, 28, 33
ສຸຂະພາບກາຍແລະສຸຂະພາບຈິດ.—ຄຳເພງ 37:8; ສຸພາສິດ 17:22
ມາດຕະຖານທາງດ້ານສິນລະທຳ.—1 ໂກຣິນໂທ 6:9, 10
ການຫາລ້ຽງຊີບ.—ສຸພາສິດ 10:4; 28:19; ເອເຟໂຊ 4:28a
ຜົວເມຍໜຸ່ມສາວຄູ່ໜຶ່ງໃນອາຊີເຫັນຄຸນຄ່າຄຳແນະນຳໃນຄຳພີໄບເບິນຫຼາຍ. ເຂົາເຈົ້າເຄີຍມີບັນຫາແບບດຽວກັນກັບຄົນອື່ນໆທີ່ຫາກໍແຕ່ງດອງໃໝ່ ຄືການປັບໂຕເຂົ້າຫາກັນແລະບໍ່ລົມກັນແບບເປີດໃຈ. ແຕ່ເຂົາເຈົ້າເລີ່ມເຮັດຕາມຄຳແນະນຳໃນຄຳພີໄບເບິນ. ຜົນເປັນແນວໃດ? ວີເຊນທີ່ເປັນຜົວບອກວ່າ: “ສິ່ງທີ່ຂ້ອຍອ່ານໃນຄຳພີໄບເບິນຊ່ວຍຂ້ອຍໃຫ້ແກ້ບັນຫາໃນຊີວິດຄູ່ໂດຍວິທີທີ່ອ່ອນໂຍນ. ນອກຈາກນັ້ນ ການໃຊ້ຊີວິດຕາມຫຼັກການໃນຄຳພີໄບເບິນຊ່ວຍໃຫ້ຊີວິດຄູ່ຂອງເຮົາມີຄວາມສຸກຫຼາຍຂຶ້ນ.” ເມຍຂອງລາວທີ່ຊື່ແອນນາລູເຫັນດີນຳ ລາວບອກວ່າ: “ການອ່ານຕົວຢ່າງຕ່າງໆໃນຄຳພີໄບເບິນຊ່ວຍເຮົາໄດ້. ຕອນນີ້ຂ້ອຍມີຄວາມສຸກ ຂ້ອຍພໍໃຈກັບຊີວິດຄູ່ແລະເປົ້າໝາຍໃນຊີວິດຂອງເຮົາ.”
ໄດ້ຮູ້ຈັກພະເຈົ້າ. ນອກຈາກຄຳຄິດເຫັນເລື່ອງຊີວິດຄູ່ແລ້ວ ວີເຊນຍັງບອກອີກວ່າ: “ການອ່ານຄຳພີໄບເບິນຊ່ວຍໃຫ້ຂ້ອຍສະໜິດກັບພະເຢໂຫວາຫຼາຍຂຶ້ນກວ່າເກົ່າ.” ສິ່ງທີ່ວີເຊນເວົ້າເນັ້ນຈຸດສຳຄັນທີ່ວ່າ ຄຳພີໄບເບິນຊ່ວຍເຈົ້າໃຫ້ສະໜິດກັບພະເຈົ້າໄດ້. ເຈົ້າຈະບໍ່ພຽງແຕ່ໄດ້ປະໂຫຍດຈາກຄຳແນະນຳຂອງເພິ່ນເທົ່ານັ້ນ ແຕ່ເຈົ້າຈະໄດ້ຮູ້ຈັກແລະເປັນໝູ່ກັບເພິ່ນ. ແລະເຈົ້າຍັງຈະໄດ້ຮູ້ວ່າເພິ່ນບອກລາຍລະອຽດກ່ຽວກັບອະນາຄົດທີ່ດີໄວ້ນຳ ເຊິ່ງໃນຕອນນັ້ນເຈົ້າຈະມີຄວາມສຸກກັບ “ຊີວິດແທ້” ໄດ້ຕະຫຼອດໄປ. (1 ຕີໂມທຽວ 6:19) ນີ້ເປັນສິ່ງທີ່ປຶ້ມຫົວອື່ນບໍ່ສາມາດໃຫ້ເຈົ້າໄດ້.
ຖ້າເຈົ້າເລີ່ມອ່ານຄຳພີໄບເບິນແລະອ່ານຕໍ່ໄປເລື້ອຍໆໂດຍບໍ່ເຊົາ ເຈົ້າກໍຈະໄດ້ຮັບປະໂຫຍດຄືກັນ ທັງການເຮັດໃຫ້ຊີວິດດີຂຶ້ນໃນຕອນນີ້ແລະໄດ້ຮູ້ຈັກກັບພະເຈົ້າ. ແຕ່ເມື່ອເຈົ້າອ່ານຄຳພີໄບເບິນເຈົ້າອາດມີຂໍ້ສົງໄສຫຼາຍຢ່າງ. ຖ້າເປັນແບບນັ້ນ ຂໍໃຫ້ເຮັດຄືກັບຂ້າລາຊະການຄົນເອທິໂອເປຍທີ່ມີຊີວິດຢູ່ເມື່ອ 2000 ປີກ່ອນ. ລາວກໍມີຂໍ້ສົງໄສກ່ຽວກັບຄຳພີໄບເບິນ. ເມື່ອມີຄົນຖາມລາວວ່າເຂົ້າໃຈເລື່ອງທີ່ອ່ານບໍ ລາວຕອບວ່າ: “ຖ້າບໍ່ມີໃຜອະທິບາຍ ຂ້ອຍຈະເຂົ້າໃຈໄດ້ແນວໃດ?”b ຈາກນັ້ນ ລາວກະຕືລືລົ້ນທີ່ຈະຮັບຄວາມຊ່ວຍເຫຼືອຈາກຄົນທີ່ມີຄຸນສົມບັດໃນການສອນຄຳພີໄບເບິນເຊິ່ງກໍຄື ຟີລິບລູກສິດຂອງພະເຢຊູ. (ກິດຈະການ 8:30, 31, 34) ຄ້າຍຄືກັນ ຖ້າເຈົ້າມີຂໍ້ສົງໄສກ່ຽວກັບຄຳພີໄບເບິນ ເຮົາຂໍເຊີນເຈົ້າໃຫ້ຂຽນແບບຟອມຂໍຮຽນຄຳພີໄບເບິນໃນເວັບໄຊ www.pr418.com/lo ຫຼືຂຽນຈົດໝາຍເຖິງທີ່ຢູ່ເຊິ່ງຢູ່ໃກ້ເຈົ້າຫຼາຍທີ່ສຸດ ຕາມທີ່ບອກໄວ້ໃນວາລະສານນີ້. ເຈົ້າອາດຕິດຕໍ່ພະຍານພະເຢໂຫວາທີ່ຢູ່ໃກ້ເຈົ້າຫຼືໄປຫໍປະຊຸມລາຊະອານາຈັກທີ່ຢູ່ໃກ້ເຮືອນ. ເຈົ້າໜ້າຈະລອງເອົາຄຳພີໄບເບິນຂຶ້ນມາອ່ານຕັ້ງແຕ່ຕອນນີ້ ແລ້ວໃຫ້ປຶ້ມນີ້ຊ່ວຍໃຫ້ຊີວິດເຈົ້າມີຄວາມສຸກຫຼາຍຂຶ້ນ.
ຖ້າເຈົ້າສົງໄສວ່າເຈົ້າຈະເຊື່ອຖືຄຳພີໄບເບິນໄດ້ບໍ ໃຫ້ເຂົ້າໄປທີ່ລິ້ງນີ້ເພື່ອເບິ່ງວິດີໂອສັ້ນໆເລື່ອງເຮົາໝັ້ນໃຈໄດ້ແນວໃດວ່າຄຳພີໄບເບິນເປັນຄວາມຈິງ? ເຈົ້າສາມາດເບິ່ງໄດ້ໂດຍສະແກນຄິວອາໂຄ໊ດຫຼືເຂົ້າໄປໃນ jw.org/lo ກົດປ່ອງຊອກຫາແລະໃສ່ຊື່ເລື່ອງ.
a ເບິ່ງຄຳແນະນຳເພີ່ມເຕີມຈາກຄຳພີໄບເບິນໄດ້ໃນເວັບໄຊ jw.org/lo. ຫົວຂໍ້ ຄຳສອນໃນຄຳພີໄບເບິນ > ຖາມ-ຕອບເລື່ອງຄຳພີໄບເບິນ.
b ອ່ານບົດຄວາມ “ເປັນພຽງຄວາມເຂົ້າໃຈຜິດເລັກໆນ້ອຍໆແທ້ບໍ?” ໃນວາລະສານນີ້ນຳ.
-