ບົດຄວາມສຶກສາທີ 39
ຊື່ຂອງເຈົ້າມີຢູ່ໃນ “ປຶ້ມລາຍຊື່ຂອງຄົນທີ່ຈະໄດ້ຊີວິດ” ບໍ?
“ມີໜັງສືທີ່ລະນຶກຂຽນໄວ້ຕໍ່ໜ້າພະອົງສຳລັບຄົນທັງຫຼາຍທີ່ຢ້ານຢຳພະເຢໂຫວາ.”—ມລກີ. 3:16
ເພງ 61 ພະຍານທັງຫຼາຍກ້າວໜ້າໄປ!
ໃຈຄວາມສຳຄັນa
ນັບຕັ້ງແຕ່ສະໄໝອາເບັນ ພະເຢໂຫວາໄດ້ເພີ່ມຊື່ຂອງຄົນອື່ນໆເຂົ້າໄປໃນ “ປຶ້ມລາຍຊື່ຂອງຄົນທີ່ຈະໄດ້ຊີວິດ” (ເບິ່ງຂໍ້ 1-2)
1. ຕາມມາລາກີ 3:16 ພະເຢໂຫວາໄດ້ຂຽນປຶ້ມຫຍັງ ແລະປຶ້ມນັ້ນບັນທຶກເລື່ອງຫຍັງ?
ເປັນເວລາຫຼາຍພັນປີທີ່ພະເຢໂຫວາໄດ້ຂຽນປຶ້ມທີ່ພິເສດຫົວໜຶ່ງ. ປຶ້ມນີ້ມີຊື່ຂອງພະຍານທີ່ສັດຊື່ຫຼາຍຄົນເຊິ່ງເລີ່ມຕົ້ນດ້ວຍຊື່ຂອງອາເບັນ.b (ລກ. 11:50, 51) ຕັ້ງແຕ່ນັ້ນມາຈົນຮອດທຸກມື້ນີ້ ພະເຢໂຫວາກໍໄດ້ເພີ່ມຊື່ຂອງຫຼາຍລ້ານຄົນລົງໃນປຶ້ມນີ້. ໃນຄຳພີໄບເບິນເອີ້ນປຶ້ມນີ້ໃນຫຼາຍຊື່ ເຊັ່ນ: “ໜັງສືທີ່ລະນຶກ” “ປຶ້ມລາຍຊື່ຂອງຄົນທີ່ຈະໄດ້ຊີວິດ” ແລະ “ມ້ວນໜັງສືແຫ່ງຊີວິດ.” ໃນບົດຄວາມນີ້ເຮົາຈະເອີ້ນປຶ້ມນີ້ວ່າ “ປຶ້ມລາຍຊື່ຂອງຄົນທີ່ຈະໄດ້ຊີວິດ.”—ອ່ານມາລາກີ 3:16; ພນມ. 3:5; 17:8
2. ໃຜແດ່ທີ່ຈະມີຊື່ຢູ່ໃນປຶ້ມລາຍຊື່ຂອງຄົນທີ່ຈະໄດ້ຊີວິດ ແລະເຮົາຈະມີຊື່ຢູ່ໃນປຶ້ມນັ້ນໄດ້ແນວໃດ?
2 ປຶ້ມລາຍຊື່ຂອງຄົນທີ່ຈະໄດ້ຊີວິດຈະມີຊື່ຂອງທຸກຄົນທີ່ນະມັດສະການພະເຢໂຫວາດ້ວຍຄວາມຢ້ານຢຳ ນັບຖື ແລະຮັກເພິ່ນ. ເຂົາເຈົ້າຈະມີໂອກາດໄດ້ຮັບຊີວິດຕະຫຼອດໄປ. ໃນທຸກມື້ນີ້ ຊື່ຂອງເຮົາຈະຖືກຂຽນໄວ້ໃນປຶ້ມນີ້ຖ້າຫາກວ່າເຮົາພະຍາຍາມທີ່ຈະສະໜິດກັບພະເຢໂຫວາໂດຍອາໄສຄ່າໄຖ່ຂອງພະເຢຊູຄລິດ. (ຢຮ. 3:16, 36) ເຮົາທຸກຄົນຢາກມີຊື່ຢູ່ໃນປຶ້ມນັ້ນ ບໍ່ວ່າເຮົາຈະມີຄວາມຫວັງທີ່ຈະຢູ່ໃນສະຫວັນຫຼືຢູ່ໃນໂລກນີ້.
3-4. (ກ) ເຮົາຈະໄດ້ຊີວິດຕະຫຼອດໄປເລີຍບໍຖ້າຕອນນີ້ເຮົາມີຊື່ຢູ່ໃນປຶ້ມລາຍຊື່ຂອງຄົນທີ່ຈະໄດ້ຊີວິດ? ຂໍໃຫ້ອະທິບາຍ. (ຂ) ເຮົາຈະຮຽນຫຍັງໃນບົດຄວາມນີ້ແລະບົດຄວາມຕໍ່ໄປ?
3 ນີ້ໝາຍຄວາມວ່າທຸກຄົນທີ່ມີຊື່ຢູ່ໃນປຶ້ມນັ້ນຈະໄດ້ຊີວິດຕະຫຼອດໄປເລີຍບໍ? ເຮົາຈະຮູ້ຄຳຕອບຈາກສິ່ງທີ່ພະເຢໂຫວາເວົ້າກັບໂມເຊທີ່ຢູ່ໃນອົບພະຍົບ 32:33, ລ.ມ. ທີ່ບອກວ່າ: “ຜູ້ໃດທີ່ເຮັດຜິດຕໍ່ເຮົາ ເຮົາຈະລຶບຊື່ຜູ້ນັ້ນອອກຈາກປຶ້ມຂອງເຮົາ.” ໝາຍຄວາມວ່າເຖິງວ່າຕອນນີ້ເຮົາຈະມີຊື່ຢູ່ໃນປຶ້ມນັ້ນ ແຕ່ມັນກໍສາມາດລຶບອອກໄດ້ເຊິ່ງເປັນຄືກັບວ່າພະເຢໂຫວາຂຽນຊື່ນັ້ນດ້ວຍສໍ. (ພນມ. 3:5) ດັ່ງນັ້ນ ເຮົາຕ້ອງເຮັດໃຫ້ແນ່ໃຈວ່າຊື່ຂອງເຮົາຈະຍັງຢູ່ໃນປຶ້ມນັ້ນຈົນກວ່າມັນຈະຖືກຂຽນໄວ້ດ້ວຍນ້ຳມຶກຢ່າງຖາວອນ.
4 ບາງຄົນອາດສົງໄສວ່າ: ຄຳພີໄບເບິນເວົ້າແນວໃດກ່ຽວກັບຄົນທີ່ມີຊື່ໃນປຶ້ມລາຍຊື່ຂອງຄົນທີ່ຈະໄດ້ຊີວິດ ແລະຄົນທີ່ບໍ່ມີຊື່ໃນປຶ້ມນັ້ນ? ຄົນທີ່ມີຊື່ໃນປຶ້ມນັ້ນຈະໄດ້ຊີວິດຕະຫຼອດໄປຕອນໃດ? ແລ້ວຄົນທີ່ຕາຍໄປກ່ອນທີ່ຈະມີໂອກາດໄດ້ຮູ້ຈັກພະເຢໂຫວາເດ ຈະເປັນແນວໃດ? ຈະເປັນໄປໄດ້ບໍທີ່ຊື່ຂອງເຂົາເຈົ້າຈະຖືກຂຽນໃນປຶ້ມນັ້ນ? ເຮົາຈະມາຕອບຄຳຖາມເຫຼົ່ານີ້ໃນບົດຄວາມນີ້ແລະບົດຄວາມຕໍ່ໄປ.
ໃຜທີ່ມີຊື່ໃນປຶ້ມລາຍຊື່ຂອງຄົນທີ່ຈະໄດ້ຊີວິດ?
5-6. (ກ) ຕາມຟີລິບປອຍ 4:3 ໃຜທີ່ມີຊື່ຢູ່ໃນປຶ້ມລາຍຊື່ຂອງຄົນທີ່ຈະໄດ້ຊີວິດ? (ຂ) ແລ້ວຕອນໃດຊື່ຂອງເຂົາເຈົ້າຈຶ່ງຈະຖືກຂຽນໄວ້ໃນປຶ້ມນັ້ນຢ່າງຖາວອນ?
5 ໃຜທີ່ຈະມີຊື່ຢູ່ໃນປຶ້ມລາຍຊື່ຂອງຄົນທີ່ຈະໄດ້ຊີວິດ? ເພື່ອຈະຕອບຄຳຖາມນີ້ ເຮົາຈະມາເບິ່ງຄົນ 5 ກຸ່ມ ເຊິ່ງບາງກຸ່ມກໍຈະມີຊື່ໃນປຶ້ມລາຍຊື່ຂອງຄົນທີ່ຈະໄດ້ຊີວິດ ສ່ວນບາງກຸ່ມຈະບໍ່ມີຊື່ໃນປຶ້ມນັ້ນ.
6 ກຸ່ມທຳອິດແມ່ນກຸ່ມທີ່ຖືກເລືອກໃຫ້ໄປຮ່ວມປົກຄອງກັບພະເຢຊູໃນສະຫວັນ. ຕອນນີ້ຊື່ຂອງເຂົາເຈົ້າມີຢູ່ໃນປຶ້ມລາຍຊື່ຂອງຄົນທີ່ຈະໄດ້ຊີວິດແລ້ວບໍ? ມີແລ້ວ. ຈາກສິ່ງທີ່ໂປໂລເວົ້າກັບ “ເພື່ອນຮ່ວມງານ” ຂອງລາວໃນເມືອງຟີລິບປອຍ ເຮັດໃຫ້ເຮົາຮູ້ວ່າຕອນນີ້ຊື່ຂອງຜູ້ຖືກເຈີມທີ່ຈະຮ່ວມປົກຄອງກັບພະເຢຊູມີຢູ່ໃນປຶ້ມລາຍຊື່ຂອງຄົນທີ່ຈະໄດ້ຊີວິດແລ້ວ. (ອ່ານຟີລິບປອຍ 4:3) ແຕ່ເພື່ອຊື່ຂອງເຂົາເຈົ້າຈະຍັງຢູ່ໃນປຶ້ມນັ້ນ ເຂົາເຈົ້າຕ້ອງໄດ້ຮັກສາຄວາມສັດຊື່ຕໍ່ໆໄປ. ແລະເມື່ອເຂົາເຈົ້າໄດ້ຮັບການປະທັບກາຄັ້ງສຸດທ້າຍກ່ອນຕາຍຫຼືກ່ອນທີ່ຄວາມທຸກລຳບາກຄັ້ງໃຫຍ່ເລີ່ມຕົ້ນ ຊື່ຂອງເຂົາເຈົ້າກໍຈະຖືກຂຽນໄວ້ຢ່າງຖາວອນໃນປຶ້ມລາຍຊື່ຂອງຄົນທີ່ຈະໄດ້ຊີວິດ.—ພນມ. 7:3
7. ຕາມພະນິມິດ 7:16, 17 ຄົນຝູງໃຫຍ່ຈະມີຊື່ໃນປຶ້ມລາຍຊື່ຂອງຄົນທີ່ຈະໄດ້ຊີວິດຢ່າງຖາວອນຕອນໃດ?
7 ກຸ່ມທີສອງແມ່ນຄົນຝູງໃຫຍ່. ຕອນນີ້ເຂົາເຈົ້າມີຊື່ຢູ່ໃນປຶ້ມລາຍຊື່ຂອງຄົນທີ່ຈະໄດ້ຊີວິດແລ້ວບໍ? ມີແລ້ວ. ຊື່ຂອງເຂົາເຈົ້າຈະຍັງຢູ່ໃນປຶ້ມນັ້ນຫຼັງຈາກທີ່ເຂົາເຈົ້າລອດຜ່ານສົງຄາມອາມາເຄໂດນບໍ? ແມ່ນແລ້ວ. (ພນມ. 7:14) ພະເຢຊູບອກວ່າ ຄົນກຸ່ມນີ້ຈະ “ໄດ້ຮັບຊີວິດຕະຫຼອດໄປ.” (ມທ. 25:46) ແຕ່ຜູ້ທີ່ລອດຜ່ານສົງຄາມອາມາເຄໂດນຈະບໍ່ໄດ້ຮັບຊີວິດຕະຫຼອດໄປທັນທີ ເພາະຊື່ຂອງເຂົາເຈົ້າຍັງບໍ່ໄດ້ຖືກຂຽນໄວ້ໃນປຶ້ມນັ້ນຢ່າງຖາວອນເທື່ອ. ໃນລະຫວ່າງການປົກຄອງ 1.000 ປີ ພະເຢຊູ “ຈະພາເຂົາເຈົ້າໄປບ່ອນທີ່ມີນ້ຳພຸຕ່າງໆເຊິ່ງມີນ້ຳທີ່ໃຫ້ຊີວິດ.” ຜູ້ທີ່ເຮັດຕາມການຊີ້ນຳຂອງພະເຢຊູ ສັດຊື່ຕໍ່ພະເຢໂຫວາ ແລະຜ່ານການທົດສອບຄັ້ງສຸດທ້າຍຈະມີຊື່ຢູ່ໃນປຶ້ມລາຍຊື່ຂອງຄົນທີ່ຈະໄດ້ຊີວິດຢ່າງຖາວອນ.—ອ່ານພະນິມິດ 7:16, 17
8. ໃຜທີ່ບໍ່ມີຊື່ຢູ່ໃນປຶ້ມລາຍຊື່ຂອງຄົນທີ່ຈະໄດ້ຊີວິດ ແລະຈະເກີດຫຍັງຂຶ້ນກັບເຂົາເຈົ້າ?
8 ກຸ່ມທີສາມແມ່ນຄົນທີ່ຖືກເອີ້ນວ່າແບ້ ເຊິ່ງຈະຖືກທຳລາຍໃນສົງຄາມອາມາເຄໂດນ. ຊື່ຂອງເຂົາເຈົ້າຈະບໍ່ມີຢູ່ໃນປຶ້ມລາຍຊື່ຂອງຄົນທີ່ຈະໄດ້ຊີວິດ. ພະເຢຊູບອກວ່າ ເຂົາເຈົ້າ “ຈະຖືກທຳລາຍຕະຫຼອດໄປ.” (ມທ. 25:46) ແລະອັກຄະສາວົກໂປໂລບອກວ່າ “ຄົນພວກນັ້ນຈະຖືກຕັດສິນລົງໂທດໃຫ້ພິນາດຕະຫຼອດໄປ.” (2 ທຊ. 1:9; 2 ປຕ. 2:9) ຄົນກຸ່ມນີ້ຈະຖືກທຳລາຍຕະຫຼອດໄປຄືກັບຄົນທີ່ຈົງໃຈເຮັດບາບຕໍ່ພະລັງບໍລິສຸດຂອງພະເຈົ້າ. ແລະເຂົາເຈົ້າຈະບໍ່ຖືກປຸກໃຫ້ຄືນມາຈາກຕາຍນຳ. (ມທ. 12:32; ມຣກ. 3:28, 29; ຮຣ. 6:4-6) ຕອນນີ້ ໃຫ້ເຮົາມາເບິ່ງຄົນສອງກຸ່ມທີ່ຈະຖືກປຸກໃຫ້ຄືນມາຈາກຕາຍ.
ຜູ້ທີ່ຈະຖືກປຸກໃຫ້ຄືນມາຈາກຕາຍ
9. ຕາມກິດຈະການ 24:15 ຄົນສອງກຸ່ມທີ່ຈະຖືກປຸກໃຫ້ຄືນມາຈາກຕາຍຢູ່ເທິງໂລກນີ້ແມ່ນໃຜ ແລະສອງກຸ່ມນີ້ຕ່າງກັນແນວໃດ?
9 ຄຳພີໄບເບິນເວົ້າເຖິງຄົນສອງກຸ່ມທີ່ຈະຖືກປຸກໃຫ້ຄືນມາຈາກຕາຍແລະມີຄວາມຫວັງທີ່ຈະມີຊີວິດຕະຫຼອດໄປຢູ່ໃນໂລກ ນັ້ນກໍຄື “ຄົນດີແລະຄົນຊົ່ວ.” (ອ່ານກິດຈະການ 24:15) “ຄົນດີ” ແມ່ນຜູ້ທີ່ຮັບໃຊ້ພະເຢໂຫວາຢ່າງສັດຊື່ຕອນທີ່ເຂົາເຈົ້າຍັງມີຊີວິດ. ແຕ່ “ຄົນຊົ່ວ” ແມ່ນຄົນທີ່ບໍ່ໄດ້ຮັບໃຊ້ພະເຢໂຫວາຢ່າງສັດຊື່. ສ່ວນຫຼາຍແລ້ວຄົນກຸ່ມນີ້ບໍ່ໄດ້ເຮັດສິ່ງທີ່ພະເຢໂຫວາເຫັນວ່າຖືກຕ້ອງ. ຍ້ອນວ່າຄົນສອງກຸ່ມນີ້ຈະຖືກປຸກໃຫ້ຄືນມາຈາກຕາຍ ຄັນຊັ້ນເຂົາເຈົ້າມີຊື່ຢູ່ໃນປຶ້ມລາຍຊື່ຂອງຄົນທີ່ຈະໄດ້ຊີວິດບໍ? ໃຫ້ເຮົາມາເບິ່ງລາຍລະອຽດຂອງແຕ່ລະກຸ່ມນຳກັນ.
10. ເປັນຫຍັງ “ຄົນດີ” ຈຶ່ງຈະຖືກປຸກໃຫ້ຄືນມາຈາກຕາຍ ແລະເຂົາເຈົ້າບາງຄົນຈະໄດ້ຮັບສິດທິພິເສດຫຍັງ? (ໃຫ້ເບິ່ງ “ຄຳຖາມຈາກຜູ້ອ່ານ” ທີ່ເວົ້າເຖິງການຄືນມາຈາກຕາຍຢູ່ເທິງໂລກນີ້ ໃນຫໍສັງເກດການ ສະບັບນີ້)
10 ກຸ່ມທີສີ່ແມ່ນ “ຄົນດີ.” ຕອນທີ່ເຂົາເຈົ້າຍັງມີຊີວິດ ເຂົາເຈົ້າມີຊື່ຢູ່ໃນປຶ້ມລາຍຊື່ຂອງຄົນທີ່ຈະໄດ້ຊີວິດ. ແຕ່ເມື່ອເຂົາເຈົ້າຕາຍ ຊື່ຂອງເຂົາເຈົ້າຖືກລຶບອອກຈາກປຶ້ມນັ້ນບໍ? ບໍ່. ຍ້ອນວ່າເຂົາເຈົ້າຍັງ “ມີຊີວິດ” ຢູ່ໃນຄວາມຊົງຈຳຂອງພະເຢໂຫວາ. ພະເຢໂຫວາ “ບໍ່ໄດ້ເປັນພະເຈົ້າຂອງຄົນຕາຍ ແຕ່ເປັນພະເຈົ້າຂອງຄົນເປັນ ເພາະພະອົງເຫັນວ່າພວກເຂົາທຸກຄົນມີຊີວິດຢູ່.” (ລກ. 20:38) ນີ້ໝາຍຄວາມວ່າ ເມື່ອຄົນດີຖືກປຸກໃຫ້ຄືນມາຈາກຕາຍ ເຂົາເຈົ້າຍັງຈະມີຊື່ຢູ່ໃນປຶ້ມນັ້ນຢູ່ ເຖິງວ່າຕອນທຳອິດຊື່ຂອງເຂົາເຈົ້າຈະບໍ່ໄດ້ຖືກຂຽນໄວ້ຢ່າງຖາວອນກໍຕາມ. (ລກ. 14:14) ແລະບາງຄົນໃນກຸ່ມນີ້ຈະໄດ້ຮັບສິດທິພິເສດຮັບໃຊ້ເປັນ “ເຈົ້ານາຍຢູ່ທົ່ວໂລກ.”—ເພງ. 45:16, ລ.ມ.
11. “ຄົນຊົ່ວ” ຈະຕ້ອງເຮັດຫຍັງກ່ອນເພື່ອຊື່ຂອງເຂົາເຈົ້າຈະຢູ່ໃນປຶ້ມລາຍຊື່ຂອງຄົນທີ່ຈະໄດ້ຊີວິດ?
11 ກຸ່ມທີ່ຫ້າແມ່ນ “ຄົນຊົ່ວ.” ອາດເປັນຍ້ອນວ່າເຂົາເຈົ້າບໍ່ໄດ້ຮູ້ຈັກພະເຢໂຫວາ ເຂົາເຈົ້າຈຶ່ງບໍ່ໄດ້ໃຊ້ຊີວິດຕາມສິ່ງທີ່ພະເຢໂຫວາເຫັນວ່າຖືກຕ້ອງກ່ອນຕາຍ. ດັ່ງນັ້ນ ເຂົາເຈົ້າຈຶ່ງບໍ່ມີຊື່ຢູ່ໃນປຶ້ມລາຍຊື່ຂອງຄົນທີ່ຈະໄດ້ຊີວິດ. ແຕ່ເມື່ອເຂົາເຈົ້າຖືກປຸກໃຫ້ຄືນມາຈາກຕາຍ ພະເຢໂຫວາກໍໃຫ້ໂອກາດເຂົາເຈົ້າທີ່ຈະມີຊື່ໃນປຶ້ມນັ້ນ. ຄົນກຸ່ມນີ້ຈະຕ້ອງໄດ້ຮັບການຊ່ວຍເຫຼືອຫຼາຍແທ້ໆ ເພາະແຕ່ກ່ອນບາງຄົນກໍເຮັດສິ່ງທີ່ບໍ່ດີຫຼາຍຢ່າງ. ດັ່ງນັ້ນ ເຂົາເຈົ້າຕ້ອງໄດ້ຮຽນຮູ້ວິທີທີ່ຈະໃຊ້ຊີວິດຕາມມາດຕະຖານຂອງພະເຢໂຫວາ. ແລະເພື່ອຈະຊ່ວຍຄົນເຫຼົ່ານີ້ ການປົກຄອງຂອງພະເຈົ້າຈຶ່ງໄດ້ຈັດໃຫ້ມີໂຄງການການສອນທີ່ໃຫຍ່ທີ່ສຸດໃນໂລກແບບທີ່ບໍ່ເຄີຍມີມາກ່ອນ.
12. (ກ) ໃຜທີ່ຈະສອນເລື່ອງຂອງພະເຢໂຫວາໃຫ້ກັບຄົນຊົ່ວ? (ຂ) ຈະເກີດຫຍັງຂຶ້ນກັບຜູ້ທີ່ບໍ່ເຮັດຕາມສິ່ງທີ່ໄດ້ຮຽນ?
12 ໃຜທີ່ຈະສອນເລື່ອງຂອງພະເຢໂຫວາໃຫ້ກັບຄົນຊົ່ວ? ຜູ້ທີ່ຈະສອນເຂົາເຈົ້າແມ່ນຄົນຝູງໃຫຍ່ແລະຄົນດີທີ່ຖືກປຸກໃຫ້ຄືນມາຈາກຕາຍ. ເພື່ອຄົນຊົ່ວຈະມີຊື່ຢູ່ໃນປຶ້ມລາຍຊື່ຂອງຄົນທີ່ຈະໄດ້ຊີວິດ ເຂົາເຈົ້າຈະຕ້ອງສະໜິດກັບພະເຢໂຫວາແລະອຸທິດຕົວໃຫ້ກັບເພິ່ນ. ໃນລະຫວ່າງທີ່ເຂົາເຈົ້າກຳລັງຮຽນຮູ້ເລື່ອງຂອງພະເຢໂຫວາ ພະເຢຊູແລະຜູ້ທີ່ຈະຮ່ວມປົກຄອງກັບເພິ່ນຈະສັງເກດເບິ່ງການກະທຳຂອງເຂົາເຈົ້າ. (ພນມ. 20:4) ຖ້າເຂົາເຈົ້າບໍ່ເຮັດຕາມສິ່ງທີ່ໄດ້ຮຽນ ເຂົາເຈົ້າກໍຈະຖືກທຳລາຍ ເຖິງວ່າບາງຄົນອາດຈະມີຊີວິດເປັນ 100 ປີແລ້ວກໍຕາມ. (ເອຊາ. 65:20) ພະເຢໂຫວາແລະພະເຢຊູອ່ານຫົວໃຈຂອງທຸກຄົນໄດ້ ແລະຈະບໍ່ຍອມໃຫ້ໃຜກໍຕາມມາສ້າງຄວາມເສຍຫາຍຢູ່ໃນໂລກໃໝ່.—ເອຊາ. 11:9; 60:18; 65:25; ຢຮ. 2:25
ການຄືນມາຈາກຕາຍເພື່ອໄດ້ຊີວິດແລະເພື່ອຖືກຕັດສິນ
13-14. (ກ) ເມື່ອກ່ອນເຮົາເຂົ້າໃຈຄຳເວົ້າຂອງພະເຢຊູທີ່ຢູ່ໃນໂຢຮັນ 5:29 ແນວໃດ? (ຂ) ເຮົາຕ້ອງສັງເກດຫຍັງກ່ຽວກັບຄຳເວົ້າຂອງພະເຢຊູ?
13 ພະເຢຊູກໍໄດ້ເວົ້າເຖິງຄົນທີ່ຈະຖືກປຸກໃຫ້ຄືນມາຈາກຕາຍເພື່ອມີຊີວິດຢູ່ໃນໂລກນີ້ ເຊັ່ນ ເພິ່ນບອກວ່າ: ‘ຈະມີເວລາທີ່ທຸກຄົນເຊິ່ງຢູ່ໃນອຸໂມງຝັງສົບຈະໄດ້ຍິນສຽງເພິ່ນ. ແລະຈະອອກມາ ຄົນທີ່ເຮັດ ດີຈະຄືນມາແລ້ວໄດ້ຊີວິດ ສ່ວນຄົນທີ່ເຮັດ ຊົ່ວຈະຄືນມາແລ້ວຖືກຕັດສິນ.’ (ຢຮ. 5:28, 29) ພະເຢຊູໝາຍຄວາມວ່າແນວໃດ?
14 ເມື່ອກ່ອນເຮົາເຂົ້າໃຈວ່າ ພະເຢຊູໝາຍເຖິງການກະທຳຂອງຄົນທີ່ຄືນມາຈາກຕາຍຫຼັງຈາກ ທີ່ເຂົາເຈົ້າຖືກປຸກໃຫ້ຄືນມາຈາກຕາຍ. ເຊິ່ງໝາຍຄວາມວ່າ ບາງຄົນຈະຄືນມາແລ້ວ “ເຮັດດີ” ສ່ວນບາງຄົນຈະຄືນມາແລ້ວ “ເຮັດຊົ່ວ.” ແຕ່ຂໍໃຫ້ສັງເກດວ່າ ພະເຢຊູບໍ່ໄດ້ບອກວ່າຄົນທີ່ອອກມາຈາກອຸໂມງຝັງສົບຫຼືຄົນທີ່ຄືນມາຈາກຕາຍຈະເຮັດ ດີຫຼືຈະເຮັດ ຊົ່ວ. ເພາະໃນພາສາເດີມ ເພິ່ນໄດ້ເວົ້າເຖິງສິ່ງທີ່ເກີດຂຶ້ນໃນອະດີດ. ດັ່ງນັ້ນ ພະເຢຊູກຳລັງເວົ້າເຖິງການກະທຳຂອງເຂົາເຈົ້າກ່ອນທີ່ເຂົາເຈົ້າຈະຕາຍ. ຄຳອະທິບາຍນີ້ມີເຫດຜົນຫຼາຍກວ່າ ເພາະພະເຢໂຫວາແລະພະເຢຊູຈະບໍ່ຍອມໃຫ້ໃຜກໍຕາມມາເຮັດສິ່ງທີ່ບໍ່ດີໃນໂລກໃໝ່. ນັ້ນໝາຍຄວາມວ່າ ຄົນຊົ່ວໄດ້ເຮັດສິ່ງທີ່ບໍ່ດີກ່ອນຕາຍ. ແລ້ວທີ່ພະເຢຊູບອກວ່າ “ຄືນມາແລ້ວໄດ້ຊີວິດ” ແລະ ‘ຄືນມາແລ້ວຖືກຕັດສິນ’ ເດ ໝາຍຄວາມວ່າແນວໃດ?
15. ໃຜຈະຖືກປຸກໃຫ້ “ຄືນມາແລ້ວໄດ້ຊີວິດ” ແລະຍ້ອນຫຍັງ?
15 ຄົນດີທີ່ເຮັດສິ່ງທີ່ດີກ່ອນຕາຍຈະຖືກປຸກໃຫ້ “ຄືນມາແລ້ວໄດ້ຊີວິດ” ຍ້ອນເຂົາເຈົ້າມີຊື່ຢູ່ໃນປຶ້ມລາຍຊື່ຂອງຄົນທີ່ຈະໄດ້ຊີວິດ. ນີ້ໝາຍຄວາມວ່າ ການຄືນມາຈາກຕາຍຂອງ “ຄົນທີ່ເຮັດດີ” ເຊິ່ງເວົ້າຢູ່ໃນໂຢຮັນ 5:29 ແລະການຄືນມາຈາກຕາຍຂອງ “ຄົນດີ” ທີ່ເວົ້າຢູ່ໃນກິດຈະການ 24:15 ແມ່ນອັນດຽວກັນ. ນີ້ສອດຄ່ອງກັບຄຳເວົ້າທີ່ຢູ່ໃນໂຣມ 6:7 ທີ່ບອກວ່າ: “ຄົນທີ່ຕາຍແລ້ວກໍພົ້ນໂທດຈາກບາບຂອງລາວ.” ເມື່ອຄົນດີຕາຍໄປ ບາບຂອງເຂົາເຈົ້າກໍຈະຖືກລົບລ້າງ. ແຕ່ພະເຢໂຫວາຍັງຈື່ວຽກຮັບໃຊ້ທີ່ສັດຊື່ທີ່ເຂົາເຈົ້າເຮັດ. ຍ້ອນແນວນີ້ ຊື່ຂອງເຂົາເຈົ້າຈຶ່ງຍັງຢູ່ໃນປຶ້ມລາຍຊື່ຂອງຄົນທີ່ຈະໄດ້ຊີວິດ ເຖິງວ່າເຂົາເຈົ້າຈະຕາຍໄປແລ້ວກໍຕາມ. (ຮຣ. 6:10) ແລະເພື່ອທີ່ຊື່ຂອງເຂົາເຈົ້າຈະຢູ່ໃນປຶ້ມນັ້ນຕໍ່ໄປ ເຂົາເຈົ້າຕ້ອງໄດ້ຮັກສາຄວາມສັດຊື່.
16. ການຄືນມາຈາກຕາຍເພື່ອ “ຖືກຕັດສິນ” ໝາຍເຖິງຫຍັງ?
16 ແລ້ວ “ຄົນທີ່ເຮັດຊົ່ວ” ກ່ອນທີ່ເຂົາເຈົ້າຈະຕາຍເດ ຈະເປັນແນວໃດ? ເຖິງວ່າບາບຂອງເຂົາເຈົ້າຈະຖືກລົບລ້າງຕອນທີ່ເຂົາເຈົ້າຕາຍ ແຕ່ເຂົາເຈົ້າກໍບໍ່ໄດ້ຮັບໃຊ້ພະເຢໂຫວາຢ່າງສັດຊື່. ເຂົາເຈົ້າຈຶ່ງບໍ່ມີ ຊື່ຢູ່ໃນປຶ້ມລາຍຊື່ຂອງຄົນທີ່ຈະໄດ້ຊີວິດ. ດັ່ງນັ້ນ ການຄືນມາຈາກຕາຍຂອງ “ຄົນທີ່ເຮັດຊົ່ວ” ທີ່ເວົ້າຢູ່ໃນໂຢຮັນ 5:29 ກັບການຄືນມາຈາກຕາຍຂອງ “ຄົນຊົ່ວ” ທີ່ເວົ້າຢູ່ໃນກິດຈະການ 24:15 ແມ່ນອັນດຽວກັນ. ເຂົາເຈົ້າຈະຖືກປຸກໃຫ້ຄືນມາຈາກຕາຍ “ແລ້ວຖືກຕັດສິນ.”c ຄົນຊົ່ວຈະຖືກຕັດສິນໃນແງ່ທີ່ວ່າພະເຢຊູຈະສັງເກດເບິ່ງການກະທຳຂອງເຂົາເຈົ້າ ແລະຈະໃຫ້ເຂົາເຈົ້າມີເວລາພິສູດຕົວເອງວ່າເຂົາເຈົ້າສົມຄວນທີ່ຈະມີຊື່ຢູ່ໃນປຶ້ມລາຍຊື່ຂອງຄົນທີ່ຈະໄດ້ຊີວິດຫຼືບໍ່. (ລກ. 22:30) ຖ້າເຂົາເຈົ້າປ່ຽນແປງຕົວເອງແລະອຸທິດຕົວໃຫ້ພະເຢໂຫວາ ເຂົາເຈົ້າກໍຈະມີຊື່ຢູ່ໃນປຶ້ມນັ້ນ.
17-18. ທຸກຄົນທີ່ຄືນມາຈາກຕາຍຈະຕ້ອງເຮັດຫຍັງ ແລະ “ການກະທຳ” ທີ່ເວົ້າໃນພະນິມິດ 20:12, 13 ໝາຍເຖິງຫຍັງ?
17 ທຸກຄົນທີ່ຄືນມາຈາກຕາຍບໍ່ວ່າຈະເປັນຄົນດີຫຼືຄົນຊົ່ວ ກໍຕ້ອງໄດ້ເຊື່ອຟັງກົດໝາຍທີ່ຢູ່ໃນມ້ວນໜັງສືໃໝ່ເຊິ່ງຈະຖືກມາຍອອກໃນລະຫວ່າງ 1.000 ປີ. ອັກຄະສາວົກໂຢຮັນເວົ້າເຖິງສິ່ງທີ່ລາວເຫັນໃນນິມິດວ່າ: “ແລ້ວຂ້ອຍກໍເຫັນຄົນຕາຍທັງຄົນທຳມະດາແລະຄົນທີ່ມີອຳນາດຢືນຢູ່ຕໍ່ໜ້າບັນລັງນັ້ນ ແລະມ້ວນໜັງສືຕ່າງໆຖືກມາຍອອກ. ມີມ້ວນໜັງສືອີກມ້ວນໜຶ່ງກໍຖືກມາຍອອກຄືກັນ ນັ້ນແມ່ນມ້ວນໜັງສືແຫ່ງຊີວິດ. ແລ້ວຄົນຕາຍກໍຖືກພິພາກສາຕາມການກະທຳຂອງຕົວເອງໂດຍອາໄສສິ່ງທີ່ຂຽນໄວ້ໃນມ້ວນໜັງສືຕ່າງໆນັ້ນ. ທະເລໄດ້ປ່ອຍຄົນທີ່ຕາຍໃນທະເລ ຄວາມຕາຍແລະຫຼຸມຝັງສົບກໍປ່ອຍຄົນຕາຍທີ່ຢູ່ໃນນັ້ນ ແລ້ວພວກເຂົາແຕ່ລະຄົນກໍຖືກພິພາກສາຕາມການກະທຳຂອງຕົວເອງ.”—ພນມ. 20:12, 13
18 ຄົນທີ່ຖືກປຸກໃຫ້ຄືນມາຈາກຕາຍຈະຖືກຕັດສິນຕາມ “ການກະທຳ” ຕອນໃດ? ຈະເປັນສິ່ງທີ່ເຂົາເຈົ້າເຮັດກ່ອນ ຕາຍບໍ? ບໍ່. ຂໍໃຫ້ຈື່ວ່າເມື່ອເຂົາເຈົ້າຕາຍ ບາບຂອງເຂົາເຈົ້າກໍຖືກລົບລ້າງໄປແລ້ວ ດັ່ງນັ້ນ ເຂົາເຈົ້າຈະບໍ່ໄດ້ຖືກຕັດສິນຕາມ “ການກະທຳ” ໃນເມື່ອກ່ອນ ແຕ່ເຂົາເຈົ້າຈະຖືກຕັດສິນຕາມການກະທຳຕອນທີ່ຢູ່ໃນໂລກໃໝ່. ແມ່ນແຕ່ຜູ້ຮັບໃຊ້ທີ່ສັດຊື່ ເຊັ່ນ: ໂນອາ ຊາມູເອນ ດາວິດ ແລະດານີເອນກໍຍັງຕ້ອງຮຽນຮູ້ເລື່ອງຂອງພະເຢຊູແລະສະແດງຄວາມເຊື່ອໃນຄ່າໄຖ່. ດັ່ງນັ້ນ ຄົນຊົ່ວກໍແຮ່ງຕ້ອງຮຽນຮູ້ຫຼາຍກວ່ານີ້ອີກ.
19. ໃນທີ່ສຸດຜູ້ທີ່ໄດ້ຮັບໂອກາດໃຫ້ຮຽນຮູ້ເລື່ອງຂອງພະເຢໂຫວາແຕ່ພັດບໍ່ຍອມເຮັດຕາມສິ່ງທີ່ໄດ້ຮຽນຈະເປັນແນວໃດ?
19 ໃນທີ່ສຸດ ຜູ້ທີ່ໄດ້ຮັບໂອກາດໃຫ້ຮຽນຮູ້ເລື່ອງຂອງພະເຢໂຫວາແຕ່ພັດບໍ່ຍອມເຮັດຕາມສິ່ງທີ່ໄດ້ຮຽນຈະເປັນແນວໃດ? ພະນິມິດ 20:15 ບອກວ່າ: “ຜູ້ໃດທີ່ບໍ່ມີຊື່ຢູ່ໃນປຶ້ມລາຍຊື່ຂອງຄົນທີ່ຈະໄດ້ຊີວິດກໍຖືກໂຍນລົງໃນບຶງໄຟ.” ນີ້ໝາຍຄວາມວ່າ ເຂົາເຈົ້າຈະຖືກທຳລາຍຕະຫຼອດໄປ. ດັ່ງນັ້ນ ເປັນເລື່ອງສຳຄັນຫຼາຍທີ່ເຮົາຈະເຮັດໃຫ້ແນ່ໃຈວ່າເຮົາມີຊື່ຢູ່ໃນປຶ້ມນັ້ນ ແລະຊື່ຂອງເຮົາຈະບໍ່ຖືກລຶບອອກໄປ!
ພີ່ນ້ອງຊາຍຄົນໜຶ່ງມີສ່ວນຮ່ວມໃນໂຄງການການສອນທີ່ໃຫຍ່ທີ່ສຸດໃນໄລຍະການປົກຄອງຂອງພະເຢຊູ 1.000 ປີ (ເບິ່ງຂໍ້ 20)
20. ໃນລະຫວ່າງການປົກຄອງ 1.000 ປີຈະມີວຽກຫຍັງທີ່ໜ້າຕື່ນເຕັ້ນ? (ເບິ່ງຮູບໜ້າປົກ)
20 ໃນໄລຍະການປົກຄອງຂອງພະເຢຊູ 1.000 ປີ ຈະເປັນເວລາທີ່ໜ້າຕື່ນເຕັ້ນຫຼາຍແທ້ໆ! ເພາະຈະມີໂຄງການການສອນທີ່ໃຫຍ່ທີ່ສຸດໃນໂລກແບບທີ່ບໍ່ເຄີຍມີມາກ່ອນ. ແຕ່ນັ້ນຍັງຈະເປັນເວລາທີ່ທັງຄົນດີແລະຄົນຊົ່ວຈະພິສູດວ່າເຂົາເຈົ້າເຕັມໃຈເຊື່ອຟັງກົດໝາຍຂອງພະເຢໂຫວາຫຼືບໍ່. (ເອຊາ. 26:9; ກຈກ. 17:31) ແລ້ວໃນຕອນນັ້ນ ໂຄງການການສອນຈະເປັນແນວໃດ? ໃນບົດຄວາມຕໍ່ໄປຈະຊ່ວຍເຮົາໃຫ້ເຂົ້າໃຈແລະເຫັນຄ່າການຈັດກຽມທີ່ພິເສດນີ້.
ເພງ 147 ຄຳສັນຍາເລື່ອງຊີວິດຕະຫຼອດໄປ
a ໃນບົດຄວາມນີ້ຈະປັບປ່ຽນຄວາມເຂົ້າໃຈຄຳເວົ້າຂອງພະເຢຊູທີ່ຢູ່ໃນໂຢຮັນ 5:28, 29 ທີ່ບອກວ່າ ‘ຄົນທີ່ເຮັດດີຈະຄືນມາແລ້ວໄດ້ຊີວິດ ສ່ວນຄົນທີ່ເຮັດຊົ່ວຈະຄືນມາແລ້ວຖືກຕັດສິນ.’ ແລະເຮົາຍັງຈະໄດ້ຮຽນວ່າ ການຄືນມາຈາກຕາຍສອງແບບນີ້ໝາຍເຖິງຫຍັງ ແລະມີໃຜແດ່ທີ່ຢູ່ໃນສອງກຸ່ມນີ້.
b ພະເຢໂຫວາເລີ່ມຂຽນປຶ້ມນີ້ “ຕັ້ງແຕ່ເລີ່ມມີໂລກນີ້” ເຊິ່ງກໍຄືຕອນທີ່ມະນຸດມີໂອກາດຈະໄດ້ຮັບປະໂຫຍດຈາກຄ່າໄຖ່ຂອງພະເຢຊູ. (ມທ. 25:34; ພນມ. 17:8) ດັ່ງນັ້ນ ອາເບັນທີ່ເປັນຄົນດີຈຶ່ງເປັນຜູ້ທຳອິດທີ່ມີຊື່ຢູ່ໃນປຶ້ມລາຍຊື່ຂອງຄົນທີ່ຈະໄດ້ຊີວິດ.
c ແຕ່ກ່ອນເຮົາເຄີຍອະທິບາຍຄຳວ່າ “ຕັດສິນ” ໝາຍເຖິງການລົງໂທດ ທີ່ຈິງແລ້ວຄຳວ່າ “ຕັດສິນ” ອາດມີຄວາມໝາຍແບບນັ້ນແທ້. ແຕ່ຕາມແວດບົດນີ້ເບິ່ງຄືວ່າພະເຢຊູໃຊ້ຄຳວ່າ “ຕັດສິນ” ໃນຄວາມໝາຍແບບກວ້າງໆ ເຊິ່ງໝາຍເຖິງການສັງເກດບາງຄົນແລະປະເມີນວ່າຄົນນັ້ນເປັນແນວໃດ. ວັດຈະນານຸກົມພາສາກຣີກເຫຼັ້ມໜຶ່ງກໍອະທິບາຍຄຳນີ້ວ່າ “ການກວດສອບຢ່າງລະອຽດ.”