ສິນສອດຫຼືຄ່າດອງອາດຈະໃຫ້ເປັນສັດກໍໄດ້
ເຈົ້າຮູ້ບໍ?
ເປັນຫຍັງຄົນອິດສະຣາເອນບູຮານຈຶ່ງຈ່າຍຄ່າສິນສອດຫຼືຄ່າດອງ?
ໃນສະໄໝທີ່ຂຽນຄຳພີໄບເບິນ ສິນສອດເປັນສິ່ງທີ່ຕ້ອງຈ່າຍໃຫ້ຄອບຄົວຂອງເຈົ້າສາວ. ສິນສອດອາດຈະລວມເຖິງເງິນຕາ ສັດ ຫຼືສິ່ງອື່ນໆທີ່ມີຄ່າ. ບາງເທື່ອອາດຈະຈ່າຍສິນສອດເປັນແຮງງານກໍໄດ້ ເຊັ່ນ ກໍລະນີຂອງຢາໂຄບ. ລາວຕ້ອງເຮັດວຽກໃຫ້ພໍ່ຂອງຣາເຊັນ 7 ປີເພື່ອຈະໄດ້ແຕ່ງດອງກັບຣາເຊັນ. (ຕົ້ນ. 29:17, 18, 20) ແລ້ວຈຸດປະສົງຂອງການຈ່າຍຄ່າສິນສອດແມ່ນຫຍັງແທ້ໆ?
ແຄຣໍເມເຢີຜູ້ຊ່ຽວຊານດ້ານຄຳພີໄບເບິນບອກວ່າ: “ສິນສອດອາດເປັນສິ່ງທົດແທນແຮງງານທີ່ຕ້ອງຈ່າຍໃຫ້ຄອບຄົວຂອງເຈົ້າສາວ ເພາະແຮງງານເປັນສິ່ງທີ່ສຳຄັນຫຼາຍສຳລັບຄອບຄົວທີ່ເຮັດໄຮ່ເຮັດນາ.” ແລະສິນສອດອາດຍັງຈະເຮັດໃຫ້ສອງຄອບຄົວໃກ້ຊິດກັນຫຼາຍຂຶ້ນແລະພ້ອມທີ່ຈະຊ່ວຍເຫຼືອກັນເມື່ອຄອບຄົວໃດຄອບຄົວໜຶ່ງລຳບາກ. ນອກຈາກນັ້ນ ສິນສອດຍັງເປັນຫຼັກຖານທີ່ສະແດງໃຫ້ເຫັນວ່າຜູ້ຍິງຄົນນີ້ໝັ້ນໝາຍແລ້ວແລະພ້ອມທີ່ຈະອອກຈາກການດູແລຂອງພໍ່ ແລ້ວໄປຢູ່ພາຍໃຕ້ການດູແລຂອງຜົວ.
ການຈ່າຍສິນສອດບໍ່ໄດ້ໝາຍຄວາມວ່າຜູ້ຍິງເປັນວັດຖຸສິ່ງຂອງທີ່ສາມາດຊື້ຂາຍໄດ້. ປຶ້ມຊີວິດແລະສະຖາບັນຕ່າງໆຂອງອິດສະຣາເອນບູຮານ (Ancient Israel—Its Life and Institutions) ບອກວ່າ: “ການຈ່າຍສິນສອດໃຫ້ຄອບຄົວຂອງເຈົ້າສາວບໍ່ວ່າຈະເປັນເງິນຫຼືວັດຖຸສິ່ງຂອງອື່ນໆທີ່ມີຄ່າ ອາດເບິ່ງຄືວ່າການແຕ່ງດອງຂອງຊາວອິດສະຣາເອນເປັນການຊື້ຂາຍຜູ້ຍິງ ແຕ່ຄວາມຈິງແລ້ວບໍ່ໄດ້ເປັນແບບນັ້ນ. ເພາະການຈ່າຍຄ່າສິນສອດເປັນການຈ່າຍຄ່າຊົດເຊີຍໃຫ້ຄອບຄົວຂອງຜູ້ຍິງ ບໍ່ແມ່ນການຊື້ຜູ້ຍິງ.”
ໃນທຸກມື້ນີ້ບາງປະເທດຍັງເຮັດຕາມທຳນຽມເລື່ອງການຈ່າຍຄ່າດອງຫຼືສິນສອດຢູ່. ເມື່ອພໍ່ແມ່ທີ່ເປັນຄລິດສະຕຽນເອີ້ນເອົາຄ່າດອງຫຼືສິນສອດ ເຂົາເຈົ້າຕ້ອງເຮັດໃຫ້ຄົນອື່ນເຫັນວ່າ “ເປັນຄົນມີເຫດຜົນ” ໂດຍບໍ່ເອີ້ນເອົາຄ່າດອງຫຼາຍເກີນໄປ. (ຟລປ. 4:5; 1 ກຣ. 10:32, 33) ເມື່ອເຂົາເຈົ້າເຮັດແບບນີ້ ກໍສະແດງໃຫ້ເຫັນວ່າ ເຂົາເຈົ້າບໍ່ໄດ້ເປັນຄົນ “ເຫັນແກ່ເງິນ” ຫຼືເປັນຄົນໂລບ. (2 ຕມ. 3:2) ນອກຈາກນັ້ນ ການທີ່ພໍ່ແມ່ຄລິດສະຕຽນບໍ່ໄດ້ເອີ້ນເອົາຄ່າດອງຫຼາຍເກີນໄປຍັງຈະເຮັດໃຫ້ຝ່າຍຊາຍບໍ່ຕ້ອງເລື່ອນການແຕ່ງດອງອອກໄປຍ້ອນວ່າເງິນຄ່າດອງບໍ່ພໍ. ຫຼືຝ່າຍຊາຍບໍ່ຈຳເປັນຕ້ອງຢຸດວຽກໄພໂອເນຍເພາະຕ້ອງເຮັດວຽກອາຊີບຫຼາຍຂຶ້ນເພື່ອຫາເງິນມາຈ່າຍຄ່າດອງ.
ໃນບາງປະເທດ ມີກົດໝາຍກຳນົດວ່າຕ້ອງຈ່າຍສິນສອດຫຼືຄ່າດອງ. ໃນກໍລະນີນີ້ ພໍ່ແມ່ທີ່ເປັນຄລິດສະຕຽນກໍຕ້ອງໄດ້ເຮັດຕາມກົດໝາຍນັ້ນ. ຍ້ອນຫຍັງ? ຍ້ອນຄຳພີໄບເບິນບອກໃຫ້ຄລິດສະຕຽນ “ເຊື່ອຟັງຄົນທີ່ມີອຳນາດປົກຄອງ” ແລະເຊື່ອຟັງກົດໝາຍຕ່າງໆທີ່ບໍ່ໄດ້ຂັດກັບຫຼັກການຂອງພະເຈົ້າ.—ຣມ. 13:1; ກຈກ. 5:29