ບົດທີ 3
ພະເຈົ້າຢາກໃຫ້ມະນຸດມີຊີວິດແບບໃດ?
1. ພະເຈົ້າຢາກໃຫ້ມະນຸດມີຊີວິດແບບໃດ?
ພະເຈົ້າມີຈຸດປະສົງທີ່ດີເລີດສຳລັບມະນຸດ. ພະອົງຢາກໃຫ້ມະນຸດມີຊີວິດທີ່ດີສົມບູນແບບແລະມີຄວາມສຸກ ບໍ່ເຈັບປ່ວຍ ບໍ່ເຖົ້າ ແລະບໍ່ຕາຍ. ພະອົງສ້າງຜູ້ຊາຍຄົນທຳອິດຊື່ອາດາມແລະຜູ້ຍິງຄົນທຳອິດຊື່ເອວາ ແລ້ວໃຫ້ພວກເຂົາຢູ່ໃນສວນທີ່ສວຍງາມຊື່ເອເດນ. ພະອົງຢາກໃຫ້ພວກເຂົາມີລູກມີຫຼານເພື່ອຈະຊ່ວຍກັນເຮັດໃຫ້ທົ່ວໂລກເປັນສວນອຸທິຍານ ລວມທັງເບິ່ງແຍງສັດຕ່າງໆນຳ.—ຕົ້ນເດີມ 1:28; 2:8, 9, 15; ເບິ່ງຄຳອະທິບາຍເພີ່ມເຕີມ 6
2. (ກ) ເຮົາຮູ້ໄດ້ແນວໃດວ່າພະເຈົ້າຈະເຮັດຕາມທີ່ພະອົງຕັ້ງໃຈໄວ້? (ຂ) ຄົນແບບໃດທີ່ພະເຈົ້າຢາກໃຫ້ຢູ່ໃນໂລກ ແລະຈະຢູ່ດົນປານໃດ?
2 ເຈົ້າຄິດວ່າເຮົາຈະມີໂອກາດໄດ້ຢູ່ໃນໂລກທີ່ເປັນສວນອຸທິຍານແບບທີ່ພະເຈົ້າຕັ້ງໃຈໄວ້ບໍ? ພະເຢໂຫວາບອກວ່າ: “ທຸກຢ່າງຈະຕ້ອງເກີດຂຶ້ນຕາມທີ່ເຮົາຕ້ອງການ ເຮົາເວົ້າໄວ້ຢ່າງໃດກໍຈະເກີດຂຶ້ນຢ່າງນັ້ນ.” (ເອຊາອີ 46:9-11; 55:11, ລ.ມ.) ພະເຢໂຫວາເປັນພະເຈົ້າທີ່ເວົ້າແນວໃດກໍເຮັດຕາມນັ້ນ. ເມື່ອພະອົງຕັ້ງໃຈຈະເຮັດຫຍັງ ທຸກຢ່າງກໍຕ້ອງເປັນໄປຕາມນັ້ນ ບໍ່ມີສິ່ງໃດມາຂັດຂວາງພະອົງໄດ້. ພະເຢໂຫວາບອກວ່າ ພະອົງສ້າງໂລກແບບມີຈຸດປະສົງ ພະອົງ “ບໍ່ໄດ້ສ້າງໂລກໄວ້ເສີຍໆ ໂດຍບໍ່ມີຈຸດປະສົງອັນໃດ ແຕ່ພະອົງສ້າງໄວ້ເພື່ອໃຫ້ຄົນຢູ່ອາໄສ.” (ເອຊາອີ 45:18, ລ.ມ.) ຄົນແບບໃດທີ່ພະອົງຢາກໃຫ້ຢູ່ໃນໂລກ ແລະຈະຢູ່ດົນປານໃດ? ຄຳພີໄບເບິນບອກວ່າ: “ຄົນຊອບທຳ [ຫຼືຄົນທີ່ເຊື່ອຟັງ] ຈະມີແຜ່ນດິນໄວ້ແລະເຂົາຈະຕັ້ງຢູ່ທີ່ນັ້ນສືບໆໄປເປັນນິດ.”—ຄຳເພງ 37:29; ພະນິມິດ 21:3, 4
3. ເມື່ອເຫັນສະພາບທີ່ເກີດຂຶ້ນກັບມະນຸດ ເຮົາອາດສົງໄສໃນເລື່ອງໃດ?
3 ແຕ່ຕອນນີ້ ເຮົາທຸກຄົນເກີດມາກໍຕ້ອງເຈັບປ່ວຍແລະຕາຍ. ເຮົາເຫັນຄົນຈຳນວນຫຼາຍຜິດຖຽງກັນ ຕໍ່ສູ້ກັນ ຂ້າກັນ ເຊິ່ງບໍ່ແມ່ນສິ່ງທີ່ພະເຈົ້າຢາກໃຫ້ເປັນຕັ້ງແຕ່ຕອນທຳອິດ. ດັ່ງນັ້ນ ຫຼາຍຄົນຈຶ່ງສົງໄສວ່າ ເປັນຫຍັງໂລກຈຶ່ງເປັນແນວນີ້ ຄືບໍ່ເປັນແບບທີ່ພະເຈົ້າບອກໄວ້? ຄຳພີໄບເບິນເທົ່ານັ້ນທີ່ມີຄຳຕອບ.
ສັດຕູຂອງພະເຈົ້າເປັນຕົ້ນເຫດ
4, 5. (ກ) ທີ່ຈິງແລ້ວໃຜເວົ້າກັບເອວາໃນສວນເອເດນ? (ຂ) ຄົນຜູ້ໜຶ່ງທີ່ເຄີຍສັດຊື່ກາຍເປັນຄົນຂີ້ລັກໄດ້ແນວໃດ?
4 ຄຳພີໄບເບິນບອກເຮົາວ່າພະເຈົ້າມີສັດຕູ ມັນເປັນທູດສະຫວັນທີ່ “ຖືກເອີ້ນວ່າມານຮ້າຍແລະຊາຕານ.” ຊາຕານເວົ້າກັບເອວາໃນສວນເອເດນໂດຍໃຊ້ງູ ມັນເຮັດໃຫ້ເອວາຄິດວ່າແມ່ນງູທີ່ກຳລັງເວົ້າກັບລາວ.—ພະນິມິດ 12:9; ຕົ້ນເດີມ 3:1; ເບິ່ງຄຳອະທິບາຍເພີ່ມເຕີມ 7
5 ມານຊາຕານທີ່ຊົ່ວຮ້າຍນີ້ມາຈາກໃສ? ພະເຈົ້າສ້າງມັນຂຶ້ນມາບໍ? ບໍ່ແມ່ນ! ເຖິງວ່າພະເຈົ້າສ້າງທຸກສິ່ງດີໝົດ ລວມທັງທູດສະຫວັນນຳ ແຕ່ພະອົງບໍ່ໄດ້ສ້າງຊາຕານ. ຊາຕານເປັນທູດສະຫວັນອົງໜຶ່ງທີ່ຖືກສ້າງກ່ອນທີ່ພະເຈົ້າກຽມໂລກໃຫ້ອາດາມກັບເອວາ ແຕ່ຕໍ່ມາມັນໄດ້ເຮັດໃຫ້ຕົວເອງກາຍເປັນຊາຕານ. (ໂຢບ 38:4, 7) ເລື່ອງແບບນີ້ເກີດຂຶ້ນໄດ້ແນວໃດ? ລອງຄິດເບິ່ງ ຄົນຜູ້ໜຶ່ງທີ່ເຄີຍສັດຊື່ກາຍເປັນຄົນຂີ້ລັກໄດ້ແນວໃດ? ລາວບໍ່ໄດ້ເປັນຂີ້ລັກມາຕັ້ງແຕ່ເກີດ ແຕ່ລາວຢາກໄດ້ເຄື່ອງຂອງຄົນອື່ນ ແລະຄິດເຖິງແຕ່ເລື່ອງນັ້ນຢູ່ເລື້ອຍໆຈົນຢາກໄດ້ເຄື່ອງນັ້ນຫຼາຍຂຶ້ນໆ ເມື່ອໄດ້ໂອກາດກໍລົງມືເຮັດ. ສຸດທ້າຍຄົນທີ່ສັດຊື່ຜູ້ນີ້ກໍກາຍເປັນຄົນຂີ້ລັກ.—ອ່ານຢາໂກໂບ 1:14-15; ເບິ່ງຄຳອະທິບາຍເພີ່ມເຕີມ 8
6. ທູດສະຫວັນອົງໜຶ່ງກາຍເປັນສັດຕູຂອງພະເຈົ້າໄດ້ແນວໃດ?
6 ນີ້ແມ່ນສິ່ງທີ່ເກີດຂຶ້ນກັບທູດສະຫວັນອົງນັ້ນຄືກັນ. ຫຼັງຈາກພະເຢໂຫວາສ້າງອາດາມກັບເອວາ ພະອົງບອກໃຫ້ພວກເຂົາມີລູກຫຼານ “[ເຕັມ] ແຜ່ນດິນ.” (ຕົ້ນເດີມ 1:27, 28) ທູດສະຫວັນອົງນັ້ນອາດຄິດວ່າ ‘ຖ້າຄົນໝົດໂລກຂາບໄຫວ້ນະມັດສະການຂ້ອຍແທນທີ່ຈະນະມັດສະການພະເຢໂຫວາກໍຄືຊິດີ.’ ເມື່ອຄິດເຖິງເລື່ອງນີ້ຫຼາຍເທົ່າໃດ ມັນກໍແຮ່ງຢາກໃຫ້ມະນຸດທຸກຄົນນະມັດສະການມັນຫຼາຍເທົ່ານັ້ນ. ດັ່ງນັ້ນ ມັນຈຶ່ງຕົວະແລະລໍ້ລວງເອວາໃຫ້ເຂົ້າໃຈພະເຈົ້າຜິດ. (ອ່ານຕົ້ນເດີມ 3:1-5) ການເຮັດແບບນີ້ເຮັດໃຫ້ມັນກາຍເປັນຊາຕານ ສັດຕູຂອງພະເຈົ້າ.
7. (ກ) ເປັນຫຍັງອາດາມກັບເອວາຈຶ່ງຕາຍ? (ຂ) ເປັນຫຍັງເຮົາຕ້ອງເຖົ້າລົງແລະຕາຍ?
7 ອາດາມແລະເອວາບໍ່ເຊື່ອຟັງພະເຢໂຫວາແລະກິນໝາກໄມ້ທີ່ພະອົງຫ້າມ. (ຕົ້ນເດີມ 2:17; 3:6) ການບໍ່ເຊື່ອຟັງນີ້ແຫຼະເປັນການເຮັດບາບຕໍ່ພະເຢໂຫວາ ພວກເຂົາຈຶ່ງເຖົ້າລົງແລະຕາຍຄືກັບທີ່ພະອົງບອກໄວ້. (ຕົ້ນເດີມ 3:17-19) ບາບທີ່ອາດາມກັບເອວາເຮັດກໍຕົກທອດມາເຖິງລູກຫຼານນຳ ນີ້ຈຶ່ງເຮັດໃຫ້ພວກເຂົາຕ້ອງຕາຍຄືກັນ. (ອ່ານໂຣມ 5:12) ເພື່ອຊ່ວຍເຮົາໃຫ້ເຂົ້າໃຈວ່າເປັນຫຍັງລູກຫຼານຂອງອາດາມກັບເອວາຈຶ່ງເກີດມາເປັນຄົນບາບ ໃຫ້ເຮົາມາເບິ່ງຕົວຢ່າງນີ້. ສົມມຸດວ່າເຈົ້າເຮັດເຂົ້າໜົມຄົກໂດຍໃຊ້ໝໍ້ເຂົ້າໜົມທີ່ບຸ້ມ ເຂົ້າໜົມຄົກແຕ່ລະອັນກໍຈະມີຮອຍບຸ້ມຫຼືມີຕຳໜິ. ຄ້າຍຄືກັນ ເມື່ອອາດາມບໍ່ເຊື່ອຟັງພະເຈົ້າ ລາວກາຍເປັນຄົນບາບຫຼືມີຮອຍຕຳໜິ. ເຮົາທຸກຄົນເປັນລູກຫຼານຂອງອາດາມ ເຮົາຈຶ່ງມີຮອຍຕຳໜິຫຼືມີບາບທີ່ຕິດຕົວມາຕັ້ງແຕ່ເກີດ ແລະຍ້ອນບາບນີ້ເອງທີ່ເຮັດໃຫ້ເຮົາຕ້ອງເຖົ້າລົງແລະຕາຍ.—ໂຣມ 3:23; ເບິ່ງຄຳອະທິບາຍເພີ່ມເຕີມ 9
8, 9. (ກ) ຊາຕານຢາກໃຫ້ອາດາມກັບເອວາເຊື່ອວ່າພະເຢໂຫວາເປັນພະເຈົ້າແບບໃດ? (ຂ) ເປັນຫຍັງພະເຢໂຫວາບໍ່ຂ້າພວກກະບົດທັນທີ?
8 ນອກຈາກນັ້ນ ເມື່ອຊາຕານຊັກຈູງອາດາມກັບເອວາບໍ່ໃຫ້ເຊື່ອຟັງພະເຈົ້າ ມັນກຳລັງກໍ່ກະບົດ. ມັນຢາກໃຫ້ອາດາມກັບເອວາເຊື່ອວ່າພະເຢໂຫວາເວົ້າຕົວະແລະເປັນຜູ້ປົກຄອງທີ່ບໍ່ດີ ເພາະບໍ່ຍອມໃຫ້ມະນຸດໄດ້ຮັບສິ່ງດີໆ. ຊາຕານຍັງບອກວ່າມະນຸດບໍ່ຕ້ອງໃຫ້ພະເຈົ້າມາບອກວ່າຄວນເຮັດຫຍັງ ແລະອາດາມກັບເອວາຕັດສິນໃຈເອງໄດ້ວ່າສິ່ງໃດຖືກສິ່ງໃດຜິດ. ຖ້າເປັນແນວນັ້ນ ພະເຢໂຫວາຈະເຮັດແນວໃດກັບເລື່ອງນີ້? ພະອົງຈະຂ້າພວກກະບົດແລະເຮັດໃຫ້ເລື່ອງນີ້ຈົບໄປເລີຍກໍໄດ້ ແຕ່ການເຮັດແບບນັ້ນຈະພິສູດໄດ້ບໍວ່າຊາຕານເວົ້າຕົວະ? ບໍ່ໄດ້ດອກ.
9 ດັ່ງນັ້ນ ພະເຢໂຫວາຈຶ່ງບໍ່ຂ້າພວກກະບົດທັນທີ. ແຕ່ພະອົງໃຫ້ໂອກາດມະນຸດໄດ້ປົກຄອງຕົວເອງເພື່ອໃຫ້ເຫັນແຈ້ງໄປເລີຍວ່າຊາຕານເວົ້າຕົວະ ແລະເຮັດໃຫ້ເຫັນວ່າພະເຢໂຫວາເທົ່ານັ້ນທີ່ຮູ້ວ່າສິ່ງໃດດີທີ່ສຸດສຳລັບມະນຸດ. ເຮົາຈະຮູ້ເລື່ອງນີ້ຫຼາຍຂຶ້ນໃນບົດທີ 11. ແຕ່ເຈົ້າຄິດແນວໃດກ່ຽວກັບການຕັດສິນໃຈຂອງອາດາມກັບເອວາ? ເຈົ້າຄິດວ່າຖືກບໍທີ່ພວກເຂົາໄປເຊື່ອຊາຕານແທນທີ່ຈະເຊື່ອພະເຢໂຫວາ? ພະອົງໃຫ້ທຸກສິ່ງທຸກຢ່າງແກ່ພວກເຂົາ. ພະອົງໃຫ້ພວກເຂົາມີຊີວິດທີ່ດີພ້ອມທຸກຢ່າງ ຢູ່ໃນສວນທີ່ສວຍງາມ ແລະມີວຽກທີ່ເຮັດໃຫ້ພວກເຂົາມີຄວາມສຸກ. ແຕ່ຊາຕານບໍ່ເຄີຍເຮັດສິ່ງດີໆໃຫ້ພວກເຂົາເລີຍ. ຖ້າເປັນເຈົ້າ ເຈົ້າຈະເຊື່ອໃຜ?
10. ເຮົາແຕ່ລະຄົນມີເລື່ອງສຳຄັນຫຍັງທີ່ຕ້ອງຕັດສິນໃຈ?
10 ທຸກມື້ນີ້ ເຮົາແຕ່ລະຄົນຕ້ອງຕັດສິນໃຈຄືກັນວ່າຈະເຊື່ອຟັງຜູ້ໃດ ພະເຈົ້າຫຼືຊາຕານ ແລະການຕັດສິນໃຈນັ້ນມີຜົນຕໍ່ຊີວິດຂອງເຮົາ. ຖ້າເຮົາເລືອກເຊື່ອຟັງພະເຢໂຫວາທັງໆທີ່ບໍ່ມີຫຼາຍຄົນທີ່ເຮັດແບບນັ້ນ ກໍເທົ່າກັບວ່າເຮົາໃຫ້ພະອົງເປັນຜູ້ປົກຄອງເຮົາແລະພິສູດວ່າຊາຕານເວົ້າຕົວະ. ແຕ່ຖ້າເຮົາບໍ່ເຊື່ອຟັງພະເຈົ້າກໍເທົ່າກັບວ່າເຮົາໃຫ້ຊາຕານເປັນຜູ້ປົກຄອງເຮົາ. (ຄຳເພງ 73:28; ອ່ານສຸພາສິດ 27:11) ແຕ່ເຈົ້າຮູ້ບໍວ່າພະເຢໂຫວາບໍ່ໄດ້ປົກຄອງໂລກໃນຕອນນີ້. ຄັນຊັ້ນໃຜປົກຄອງໂລກນີ້?
ໃຜປົກຄອງໂລກນີ້?
ຖ້າປະເທດທັງໝົດໃນໂລກບໍ່ໄດ້ເປັນຂອງຊາຕານ ມັນຈະມີສິດເອົາມາສະເໜີໃຫ້ພະເຢຊູບໍ?
11, 12. (ກ) ການທີ່ຊາຕານກ້າສະເໜີປະເທດທັງໝົດໃນໂລກນີ້ໃຫ້ພະເຢຊູເຮັດໃຫ້ເຮົາຮູ້ຫຍັງ? (ຂ) ພະຄຳພີຂໍ້ໃດແດ່ທີ່ບອກວ່າຊາຕານເປັນຜູ້ປົກຄອງໂລກ?
11 ພະເຢຊູຮູ້ວ່າແທ້ໆແລ້ວໃຜປົກຄອງໂລກນີ້. ມີຢູ່ເທື່ອໜຶ່ງ ຊາຕານ “ໃຫ້ເພິ່ນເຫັນປະເທດທັງໝົດໃນໂລກແລະຄວາມຍິ່ງໃຫຍ່ຂອງປະເທດເຫຼົ່ານັ້ນ.” ແລ້ວຊາຕານກໍສັນຍາກັບພະເຢຊູວ່າ: “ຂ້ອຍຈະຍົກທັງໝົດນີ້ໃຫ້ເຈົ້າ ຖ້າເຈົ້າໝອບລົງຂາບໄຫວ້ຂ້ອຍພຽງເທື່ອດຽວ.” (ມັດທາຍ 4:8, 9; ລູກາ 4:5, 6) ລອງຄິດເບິ່ງແມ້ ‘ຖ້າປະເທດທັງໝົດໃນໂລກບໍ່ໄດ້ເປັນຂອງຊາຕານ ມັນຈະມີສິດເອົາມາສະເໜີໃຫ້ພະເຢຊູບໍ?’ ແນ່ນອນວ່າມັນບໍ່ມີສິດເຮັດແບບນັ້ນ. ການທີ່ຊາຕານກ້າສະເໜີໃຫ້ພະເຢຊູແບບນີ້ກໍສະແດງວ່າປະເທດທັງໝົດໃນໂລກເປັນຂອງມັນ.
12 ເຈົ້າອາດສົງໄສວ່າ: ‘ເປັນໄປໄດ້ແນວໃດທີ່ຊາຕານປົກຄອງໂລກ? ພະເຢໂຫວາມີລິດເດດສູງສຸດແລະເປັນຜູ້ສ້າງເອກະພົບ ພະອົງຄວນຈະເປັນຜູ້ປົກຄອງໂລກບໍ່ແມ່ນບໍ?’ (ພະນິມິດ 4:11) ກໍແມ່ນ ພະອົງເປັນຜູ້ສ້າງ ແຕ່ພະເຢຊູເອີ້ນຊາຕານວ່າ “ຜູ້ປົກຄອງໂລກ.” (ໂຢຮັນ 12:31; 14:30; 16:11) ໂປໂລກໍເອີ້ນມັນວ່າ “ພະເຈົ້າຂອງໂລກນີ້.” (2 ໂກຣິນໂທ 4:3, 4) ແລະໂຢຮັນຍັງຂຽນວ່າ “ໂລກທັງໝົດຢູ່ໃນອຳນາດຊາຕານຕົວຊົ່ວຮ້າຍ.”—1 ໂຢຮັນ 5:19
ໂລກຂອງຊາຕານຈະຖືກທຳລາຍແນວໃດ?
13. ເປັນຫຍັງເຮົາຢາກໃຫ້ມີໂລກໃໝ່?
13 ໂລກນີ້ອັນຕະລາຍຫຼາຍຂຶ້ນເລື້ອຍໆ. ບໍ່ວ່າຢູ່ບ່ອນໃດກໍມີແຕ່ສົງຄາມ ການສໍ້ໂກງ ການຕົ້ມຕຸນຫຼອກລວງ ແລະຄວາມຮຸນແຮງ. ມະນຸດບໍ່ສາມາດເຮັດໃຫ້ບັນຫາເຫຼົ່ານີ້ໝົດໄປໄດ້ເຖິງວ່າພວກເຂົາຈະພະຍາຍາມຫຼາຍສ່ຳໃດກໍຕາມ. ແຕ່ພະເຢໂຫວາເຮັດໄດ້ ພະອົງຈະທຳລາຍໂລກຊົ່ວໃນສົງຄາມອາມາເຄໂດນ ແລ້ວຈະໃຫ້ມີໂລກໃໝ່ມາແທນ.—ພະນິມິດ 16:14-16; ເບິ່ງຄຳອະທິບາຍເພີ່ມເຕີມ 10
14. ພະເຈົ້າເລືອກໃຜໃຫ້ເປັນກະສັດໃນການປົກຄອງຂອງພະອົງ? ແລະຄຳພີໄບເບິນບອກລ່ວງໜ້າແນວໃດກ່ຽວກັບພະເຢຊູ?
14 ພະເຢໂຫວາເລືອກພະເຢຊູຄລິດໃຫ້ເປັນກະສັດໃນການປົກຄອງຂອງພະອົງທີ່ຢູ່ໃນສະຫວັນ. ຄຳພີໄບເບິນບອກລ່ວງໜ້າມາດົນຫຼາຍພັນປີແລ້ວວ່າ ພະເຢຊູຈະປົກຄອງເປັນ “ເຈົ້າຊາຍແຫ່ງສັນຕິສຸກ” ແລະລັດຖະບານຂອງເພິ່ນຈະຢູ່ຕະຫຼອດໄປ. (ເອຊາອີ 9:6, 7, ລ.ມ.) ພະເຢຊູສອນພວກລູກສິດຂອງເພິ່ນໃຫ້ອະທິດຖານວ່າ: “ຂໍໃຫ້ການປົກຄອງຂອງພະອົງມາທີ່ໂລກນີ້ ແລະຂໍໃຫ້ທຸກຢ່າງໃນໂລກແລະໃນສະຫວັນເປັນໄປຕາມທີ່ພະອົງຕ້ອງການໃຫ້ເປັນ.” (ມັດທາຍ 6:10) ໃນບົດທີ 8 ເຮົາຈະຮຽນຮູ້ວ່າການປົກຄອງຂອງພະເຈົ້າຈະມາແທນລັດຖະບານຕ່າງໆໃນໂລກນີ້ແນວໃດ. (ອ່ານດານຽນ 2:44) ພະເຈົ້າຈະໃຊ້ການປົກຄອງນີ້ຂອງພະອົງເຮັດໃຫ້ທົ່ວໂລກເປັນສວນທີ່ສວຍງາມ.—ເບິ່ງຄຳອະທິບາຍເພີ່ມເຕີມ 11
ໂລກໃໝ່ໃກ້ເຂົ້າມາແລ້ວ!
15. “ໂລກໃໝ່” ໝາຍເຖິງຫຍັງ?
15 ມີຄຳສັນຍາໃນຄຳພີໄບເບິນວ່າ: “ມີຟ້າສະຫວັນໃໝ່ແລະໂລກໃໝ່ທີ່ພວກເຮົາລໍຖ້າ” ແລະ “ຢູ່ຫັ້ນຈະມີຄວາມຍຸຕິທຳຕະຫຼອດໄປ.” (2 ເປໂຕ 3:13; ເອຊາອີ 65:17) ຫຼາຍຄັ້ງຄຳວ່າ “ໂລກ” ໃນຄຳພີໄບເບິນບໍ່ໄດ້ໝາຍເຖິງໜ່ວຍໂລກ ແຕ່ໝາຍເຖິງຄົນທີ່ຢູ່ໃນໂລກ. (1 ຂ່າວຄາວ 16:31) ດັ່ງນັ້ນ “ໂລກໃໝ່” ຈຶ່ງໝາຍເຖິງຜູ້ຄົນທັງໝົດທີ່ເຊື່ອຟັງພະເຈົ້າແລະໄດ້ຮັບພອນຈາກພະອົງ.
16. ພະເຈົ້າຈະໃຫ້ຄົນທີ່ຢູ່ໃນໂລກໃໝ່ໄດ້ຂອງຂວັນທີ່ດີເລີດຫຍັງ? ແລະເຮົາຕ້ອງເຮັດຫຍັງຖ້າຢາກໄດ້ຂອງຂວັນນີ້?
16 ພະເຢຊູສັນຍາວ່າຄົນທີ່ຢູ່ໃນໂລກໃໝ່ຈະໄດ້ “ຊີວິດຕະຫຼອດໄປ” ເປັນຂອງຂວັນ. (ມາຣະໂກ 10:30) ເຮົາຕ້ອງເຮັດຫຍັງຈຶ່ງຈະໄດ້ຂອງຂວັນນີ້? ເພື່ອຈະໄດ້ຄຳຕອບຂໍໃຫ້ອ່ານໂຢຮັນ 3:16 ແລະ 17:3. ຕອນນີ້ໃຫ້ມາເບິ່ງວ່າຄຳພີໄບເບິນບອກແນວໃດກ່ຽວກັບຊີວິດໃນສວນອຸທິຍານເທິງໂລກ.
17, 18. ເປັນຫຍັງໂລກໃໝ່ຈະສະຫງົບສຸກແລະປອດໄພ?
17 ຄວາມຊົ່ວ ສົງຄາມ ອາດຊະຍາກຳ ແລະຄວາມຮຸນແຮງຈະໝົດໄປ. ຈະບໍ່ມີຄົນຊົ່ວແມ່ນແຕ່ຄົນດຽວເຫຼືອຢູ່ໃນໂລກ. (ຄຳເພງ 37:10, 11) ພະເຈົ້າຈະ “ເຮັດໃຫ້ທົ່ວໂລກບໍ່ມີສົງຄາມອີກເລີຍ.” (ຄຳເພງ 46:9, ລ.ມ.; ເອຊາອີ 2:4) ໃນຕອນນັ້ນ ໂລກໃໝ່ຈະມີແຕ່ຄົນທີ່ຮັກພະເຈົ້າແລະເຊື່ອຟັງພະອົງເທົ່ານັ້ນ ແລະຈະມີຄວາມສະຫງົບສຸກຕະຫຼອດໄປ.—ຄຳເພງ 72:7
18 ປະຊາຊົນຂອງພະເຢໂຫວາຮູ້ສຶກປອດໄພ. ໃນສະໄໝບູຮານ ເມື່ອພວກອິດສະຣາເອນທີ່ເປັນປະຊາຊົນຂອງພະເຈົ້າເຊື່ອຟັງພະອົງ ພວກເຂົາກໍຢູ່ຢ່າງປອດໄພຍ້ອນມີພະເຈົ້າປົກປ້ອງດູແລສະເໝີ. (ພວກເລວີ 25:18, 19) ໃນສວນອຸທິຍານຈະບໍ່ມີສິ່ງໃດຫຼືຜູ້ໃດເຮັດໃຫ້ເຮົາຢ້ານ. ເຮົາຈະຮູ້ສຶກປອດໄພແທ້ໆ!—ອ່ານເອຊາອີ 32:18; ມີເກ 4:4
19. ເຮົາຮູ້ໄດ້ແນວໃດວ່າໃນໂລກໃໝ່ຈະມີອາຫານອຸດົມສົມບູນ?
19 ຈະມີອາຫານອຸດົມສົມບູນ. ພະເຢໂຫວາ “ພະເຈົ້າຂອງພວກເຮົາຈະອວຍພອນໃຫ້ພວກເຮົາ” ແລະ “ແຜ່ນດິນຈະເກີດຜົນລະປູກ.” (ຄຳເພງ 67:6) ໃນໂລກໃໝ່ “ຈະມີເຂົ້າມາກມາຍໃນແຜ່ນດິນ ເທິງຍອດພູທັງຫຼາຍຈະມີເຂົ້າອຸດົມສົມບູນ.”—ຄຳເພງ 72:16, ລ.ມ.
20. ເປັນຫຍັງເຮົາຈຶ່ງບອກໄດ້ວ່າທົ່ວໂລກຈະກາຍເປັນສວນອຸທິຍານ?
20 ທົ່ວໂລກຈະກາຍເປັນສວນອຸທິຍານ. ເຮົາຈະມີເຮືອນທີ່ເປັນຕາຢູ່ແລະມີສວນທີ່ສວຍງາມ. (ອ່ານເອຊາອີ 65:21-24; ພະນິມິດ 11:18) ທົ່ວໂລກຈະກາຍເປັນສວນອຸທິຍານຄືກັບສວນເອເດນ. ພະເຢໂຫວາຈະໃຫ້ທຸກຢ່າງທີ່ເຮົາຈຳເປັນຕ້ອງມີ. ຄຳພີໄບເບິນບອກວ່າ: “ພະອົງແບມືອອກແລະໃຫ້ສິ່ງທັງປວງທີ່ມີຊີວິດຢູ່ກິນອີ່ມບໍລິບູນ.”—ຄຳເພງ 145:16
21. ເຮົາຮູ້ໄດ້ແນວໃດວ່າໃນໂລກໃໝ່ຄົນກັບສັດຈະບໍ່ທຳຮ້າຍກັນ?
21 ຄົນກັບສັດຈະບໍ່ທຳຮ້າຍກັນ. ສັດຈະບໍ່ເຮັດອັນຕະລາຍໃຫ້ຄົນອີກຕໍ່ໄປ. ເດັກນ້ອຍກໍບໍ່ຕ້ອງຢ້ານເຖິງວ່າຈະຢູ່ໃກ້ໆສັດທີ່ຕອນນີ້ເປັນສັດຮ້າຍ.—ອ່ານເອຊາອີ 11:6-9; 65:25
22. ພະເຢຊູຈະເຮັດຫຍັງໃຫ້ຄົນເຈັບປ່ວຍ?
22 ຈະບໍ່ມີຜູ້ໃດເຈັບປ່ວຍ. ຕອນທີ່ພະເຢຊູຢູ່ໃນໂລກ ເພິ່ນປິ່ນປົວຄົນເຈັບປ່ວຍຫຼາຍຄົນ. (ມັດທາຍ 9:35; ມາຣະໂກ 1:40-42; ໂຢຮັນ 5:5-9) ແຕ່ໃນໂລກໃໝ່ ພະເຢຊູເຊິ່ງເປັນກະສັດໃນການປົກຄອງຂອງພະເຈົ້າ ເພິ່ນຈະປິ່ນປົວທຸກຄົນ. ຢູ່ທີ່ນັ້ນຈະບໍ່ມີຜູ້ໃດເວົ້າວ່າ: “ຂ້ອຍບໍ່ສຳບາຍ.”—ເອຊາອີ 33:24; 35:5, 6
23. ພະເຈົ້າສັນຍາຫຍັງກ່ຽວກັບຄົນທີ່ຕາຍໄປແລ້ວ?
23 ຄົນຕາຍຈະມີຊີວິດອີກ. ພະເຈົ້າສັນຍາວ່າພະອົງຈະເຮັດໃຫ້ຫຼາຍລ້ານຄົນທີ່ຕາຍໄປແລ້ວຟື້ນຄືນມາອີກ. ຄຳພີໄບເບິນບອກວ່າ “ຄົນດີແລະຄົນຊົ່ວຈະຄືນມາຈາກຕາຍ.”—ອ່ານໂຢຮັນ 5:28, 29; ກິດຈະການ 24:15
24. ເຈົ້າຮູ້ສຶກແນວໃດຖ້າໄດ້ຢູ່ໃນໂລກໃໝ່ທີ່ເປັນອຸທິຍານ? ແລະເຈົ້າຢາກເຮັດຫຍັງໃນໂລກໃໝ່?
24 ພວກເຮົາທຸກຄົນມີທາງເລືອກ. ເຮົາເລືອກໄດ້ວ່າຈະຮຽນຮູ້ກ່ຽວກັບພະເຢໂຫວາແລະເຮັດຕາມສິ່ງທີ່ພະອົງບອກ ຫຼືເຮົາຈະບໍ່ສົນໃຈພະເຈົ້າແລະເລືອກເຮັດແຕ່ສິ່ງທີ່ຕົວເອງຢາກເຮັດ. ຖ້າເຮົາເຮັດຕາມສິ່ງທີ່ພະເຢໂຫວາບອກ ເຮົາກໍຈະມີອະນາຄົດທີ່ສົດໃສ. ພະເຢຊູເຄີຍສັນຍາກັບຜູ້ຊາຍຄົນໜຶ່ງທີ່ກຳລັງຈະຕາຍວ່າ: “ເຈົ້າຈະໄດ້ຢູ່ກັບຂ້ອຍໃນອຸທິຍານແນ່ນອນ.” (ລູກາ 23:43) ດັ່ງນັ້ນ ຂໍໃຫ້ຮຽນເລື່ອງພະເຢຊູຄລິດຫຼາຍຂຶ້ນ ແລ້ວເຮົາຈະຮູ້ວ່າເພິ່ນຈະເຮັດໃຫ້ຄຳສັນຍາທີ່ດີເລີດຂອງພະເຈົ້າເປັນຈິງໄດ້ແນວໃດ.