ເລື່ອງຊີວິດຈິງ
ມໍລະດົກຄລິດສະຕຽນຢ່າງຫຼວງຫຼາຍເຮັດໃຫ້ຂ້ອຍມີຄວາມສຸກແລະປະສົບຄວາມສຳເລັດ
ໃນຄືນທີ່ງຽບສະຫງົບ ພວກເຮົາຢືນຢູ່ຕໍ່ໜ້າແມ່ນ້ຳນີເຈີທີ່ໄຫຼແຮງແລະກວ້າງ 1.6 ກິໂລແມັດ. ຕອນນັ້ນນີຊີເລຍໄດ້ມີສົງຄາມກາງເມືອງເກີດຂຶ້ນ ດັ່ງນັ້ນ ການຂ້າມແມ່ນ້ຳນີເຈີອາດເຮັດໃຫ້ຈົມນ້ຳຕາຍໄດ້. ແຕ່ເຮົາກໍຕ້ອງສ່ຽງ ເຊິ່ງນີ້ບໍ່ແມ່ນເທື່ອດຽວ. ຂ້ອຍມາຢູ່ໃນສະຖານະການນີ້ໄດ້ແນວໃດ? ຂໍເຮົາຫວນຄືນໄປຕອນກ່ອນທີ່ຂ້ອຍເກີດ.
ໃນປີ 1913 ຈອນ ມິວ ພໍ່ຂອງຂ້ອຍຮັບບັບເຕມາຕອນອາຍຸ 25 ປີ ໃນເມືອງນິວຢອກ. ພີ່ນ້ອງຣັດເຊວເປັນຄົນບັນລະຍາຍບັບເຕມາ. ບໍ່ດົນພໍ່ຍ້າຍໄປທຣິນິແດດແລະໄດ້ແຕ່ງດອງກັບຄອນສະແຕນ ຟາມເມີເຊິ່ງເປັນຄົນໜຶ່ງໃນກຸ່ມນັກສຶກສາຄຳພີໄບເບິນທີ່ກະຕືລືລົ້ນ. ພໍ່ໄດ້ຊ່ວຍໝູ່ທີ່ຊື່ ວິນລຽມ ໂຣແລນ ບຣາວ ສາຍ “ພາບພະຍົນເລື່ອງການສ້າງ.” ເຂົາເຈົ້າຊ່ວຍກັນເຮັດວຽກນີ້ຈົນພີ່ນ້ອງວິນລຽມໄດ້ຮັບມອບໝາຍໃຫ້ໄປອາຝຼິກກາຕາເວັນຕົກໃນປີ 1923. ພໍ່ແລະແມ່ຂ້ອຍມີຄວາມຫວັງຈະໄປສະຫວັນຄືກັນ ພວກເພິ່ນກໍຍັງຮັບໃຊ້ຢູ່ທຣິນິແດດຕໍ່ໄປ.
ພໍ່ແມ່ທີ່ຮັກເຮົາ
ພໍ່ແມ່ຂ້ອຍມີລູກ 9 ຄົນ ຊາຍ 5 ແລະຍິງ 4. ຄົນທຳອິດຊື່ຣັດເທີຝອດເຊິ່ງໄດ້ຕັ້ງຕາມຊື່ຂອງປະທານສະມາຄົມວັອດທາວເວີ ໄບເບິນ ແອນ ແທຣັກໃນຕອນນັ້ນ. ຂ້ອຍເປັນຜູ້ທີສອງເກີດວັນທີ 30 ທັນວາ 1922 ພໍ່ແມ່ຕັ້ງຊື່ຂ້ອຍວ່າວູດເວີດຕາມຊື່ຂອງເຄຣຕັນ ເຈມ ວູດເວີດເຊິ່ງເປັນບັນນາທິການຂອງວາລະສານເດິ ໂກເດິນ ເອຈ (ປັດຈຸບັນແມ່ນຕື່ນເຖີດ!). ພໍ່ກັບແມ່ໄດ້ສອນໜັງສືຂັ້ນພື້ນຖານໃຫ້ກັບລູກທຸກຄົນ ແຕ່ຈະເນັ້ນເລື່ອງເປົ້າໝາຍຂອງຄລິດສະຕຽນເປັນຫຼັກ. ແມ່ຫາເຫດຜົນເລື່ອງໃນຄຳພີໄບເບິນເກັ່ງຫຼາຍ. ພໍ່ກໍມັກເລົ່າເລື່ອງໃນຄຳພີໄບເບິນໃຫ້ພວກເຮົາຟັງ ໂດຍໃຊ້ທ່າທາງເພື່ອເຮັດໃຫ້ມັນສົມຈິງ.
ຄວາມພະຍາຍາມຂອງເຂົາເຈົ້າກໍເກີດຜົນທີ່ດີ ໃນລູກຊາຍ 5 ຄົນມີ 3 ຄົນໄດ້ເຂົ້າໂຮງຮຽນກິລຽດ ແລະລູກສາວ 3 ຄົນເປັນໄພໂອເນຍຫຼາຍປີໃນທຣິນິແດດແລະໂທແບໂກ. ການທີ່ພໍ່ແມ່ສອນແລະເປັນຕົວຢ່າງທີ່ດີເປັນການປູກເຮົາໃຫ້ໄວ້ໃນ “ວິຫານຂອງພະເຢໂຫວາ.” ພໍ່ແມ່ໃຫ້ກຳລັງໃຈເຮົາເຊິ່ງຊ່ວຍເຮົາຮັບໃຊ້ຕໍ່ໆໄປແລະ “ເຕີບໂຕຢູ່ໃນລານວິຫານຂອງພະເຈົ້າຂອງພວກເຮົາ.”—ເພງ. 92:13
ເຮືອນຂອງເຮົາເປັນບ່ອນຝຶກການປະກາດ. ໄພໂອເນຍຈະມາລວມຕົວກັນຢູ່ຫັ້ນແລະມັກລົມກັນເລື່ອງຂອງພີ່ນ້ອງຈອດສ ຢັງ ເຊິ່ງເປັນມິດຊັນນາລີຊາວການາດາທີ່ເຄີຍມາຮັບໃຊ້ໃນທຣິນິແດດ. ພໍ່ແມ່ຂອງຂ້ອຍຍັງມັກເລົ່າເລື່ອງຂອງພີ່ນ້ອງບຣາວທີ່ເຄີຍຮັບໃຊ້ນຳກັນເຊິ່ງຕອນນັ້ນລາວຮັບໃຊ້ຢູ່ອາຝຼິກກາຕາເວັນຕົກ. ສິ່ງທັງໝົດນີ້ກະຕຸ້ນຂ້ອຍໃຫ້ເລີ່ມຮັບໃຊ້ຕັ້ງແຕ່ອາຍຸ 10 ປີ.
ໄລຍະທຳອິດຂອງວຽກຮັບໃຊ້
ສະໄໝນັ້ນວາລະສານຂອງເຮົາມີເນື້ອໃນທີ່ແຮງພໍສົມຄວນ ເພາະເປີດໂປງສາສະໜາປອມ ການຄ້າທີ່ໂລບມາກ ແລະການເມືອງທີ່ສົກກະປົກ. ໃນປີ 1936 ພວກນັກເທດນັກບວດໄດ້ຍຸແຍ່ຜູ້ຮັກສາການແທນນາຍົກລັດທຣິນິແດດໃຫ້ສັ່ງຫ້າມປຶ້ມທຸກຢ່າງທີ່ເປັນຂອງວັອດທາວເວີ. ເຮົາຕ້ອງເຊື່ອງປຶ້ມເຫຼົ່ານັ້ນໄວ້ ແຕ່ກໍທະຍອຍເອົາມາໃຊ້ຈົນໝົດ. ເຮົາຍັງຍ່າງປະກາດເປັນຂະບວນ ຂີ່ລົດຖີບໃສ່ປ້າຍຄວບໜ້າແລະຫຼັງ ແລະແຈກໃບປິວ. ນອກຈາກນັ້ນ ເຮົາຍັງມີກຸ່ມທີ່ໃຊ້ລົດກະຈາຍສຽງຈາກເມືອງທູນາພູນາ ເຮົາປະກາດໄປຈົນຮອດເຂດທີ່ຫ່າງໄກຂອງລັດທຣິນິແດດ. ໜ້າຕື່ນເຕັ້ນແທ້ໆ! ບັນຍາກາດທີ່ມີແຕ່ສັນຕິສຸກເຮັດໃຫ້ຂ້ອຍຮັບບັບເຕມາຕອນທີ່ອາຍຸ 16 ປີ.
ລົດກະຈາຍສຽງຢູ່ເມືອງທູນາພູນາ
ມໍລະດົກດ້ານຄວາມເຊື່ອທີ່ໄດ້ຮັບຈາກຄອບຄົວແລະປະສົບການທີ່ໜ້າຕື່ນເຕັ້ນຕອນຍັງນ້ອຍເຮັດໃຫ້ຂ້ອຍຢາກເປັນມິດຊັນນາລີ. ຂ້ອຍກໍຍັງຮູ້ສຶກແບບນັ້ນຕອນທີ່ຂ້ອຍໄປເກາະອາຣູບາໃນປີ 1944 ແລະເຮັດວຽກຮັບໃຊ້ກັບພີ່ນ້ອງເອດມັນ ວິດຟຽວ ຄຳມິງ. ເຮົາຕື່ນເຕັ້ນຫຼາຍທີ່ມີຄົນມາປະຊຸມອະນຸສອນ 10 ຄົນໃນປີ 1945 ແລະປີຕໍ່ມາກໍມີການຕັ້ງປະຊາຄົມທຳອິດຂຶ້ນໃນເກາະນັ້ນ.
ກັບໂອຣິດທີ່ເຮັດໃຫ້ຊີວິດຂ້ອຍມີຄວາມສຸກ
ບໍ່ດົນຫຼັງຈາກນັ້ນ ຂ້ອຍປະກາດແບບບໍ່ເປັນທາງການກັບໝູ່ຄົນໜຶ່ງຊື່ໂອຣິດ ວິນລຽມທີ່ເຮັດວຽກນຳກັນ. ລາວຖຽງແທ້ຖຽງວ່າເພື່ອປົກປ້ອງຄຳສອນທີ່ລາວຖືກສອນມາ. ເມື່ອລາວໄດ້ສຶກສາຄຳພີໄບເບິນ ລາວກໍຮູ້ວ່າຄຳພີໄບເບິນສອນແນວໃດແທ້ໆ ແລະໄດ້ຮັບບັບເຕມາວັນທີ 5 ມັງກອນ 1947. ຕໍ່ມາເຮົາກໍຮັກກັນແລະແຕ່ງດອງກັນ. ລາວເລີ່ມເປັນໄພໂອເນຍເດືອນພະຈິກ ປີ 1950. ໂອຣິດເຮັດໃຫ້ຊີວິດຂ້ອຍມີຄວາມສຸກຫຼາຍ.
ວຽກຮັບໃຊ້ທີ່ໜ້າຍິນດີໃນນີຊີເລຍ
ປີ 1955 ເຮົາຖືກເຊີນເຂົ້າໂຮງຮຽນກິລຽດ. ເພື່ອກຽມຕົວຮັບສິດທິພິເສດນີ້ ໂອຣິດແລະຂ້ອຍລາອອກຈາກວຽກ ຂາຍເຮືອນແລະເຄື່ອງໃຊ້ຕ່າງໆ ແລ້ວກໍບອກລາພີ່ນ້ອງໃນເກາະອາຣູບາ. ວັນທີ 29 ກໍລະກົດ 1956 ເຮົາຮຽນຈົບໂຮງຮຽນກິລຽດຊັ້ນຮຽນທີ 27 ແລະຖືກມອບໝາຍໄປນີຊີເລຍ.
ກັບສະມາຊິກຄອບຄົວເບເທນຢູ່ລາໂກດ ປະເທດນີຊີເລຍໃນປີ 1957
ເມື່ອເບິ່ງຄືນຫຼັງ ໂອຣິດສັງເກດເຫັນວ່າ: “ພະລັງບໍລິສຸດຂອງພະເຢໂຫວາຊ່ວຍຄົນໜຶ່ງໃຫ້ປັບຕົວເຂົ້າກັບຊີວິດມິດຊັນນາລີໄດ້. ຂ້ອຍບໍ່ຄືກັບຜົວ ຂ້ອຍບໍ່ຢາກເປັນມິດຊັນນາລີ ຂ້ອຍຢາກມີເຮືອນຈັກຫຼັງແລະກໍມີລູກ. ແຕ່ຂ້ອຍກໍປ່ຽນຄວາມຄິດເມື່ອຂ້ອຍຮູ້ວ່າວຽກປະກາດຂ່າວດີຮີບດ່ວນສ່ຳໃດ. ເມື່ອເຮົາຈົບຈາກກິລຽດ ຂ້ອຍກໍພ້ອມແລ້ວທີ່ຈະເປັນມິດຊັນນາລີ. ຕອນທີ່ເຮົາກຳລັງຂຶ້ນເຮືອຄີນ ແມຣີ ພີ່ນ້ອງເວີດ ທອນເຕິນເຊິ່ງເຮັດວຽກຢູ່ສຳນັກງານຂອງພີ່ນ້ອງນໍກໍມາລາພວກເຮົາແລະບອກວ່າ: ‘ເດີນທາງປອດໄພເດີ້!’ ລາວບອກວ່າເຮົາຈະຕ້ອງໄປຮັບໃຊ້ຢູ່ເບເທນ. ຂ້ອຍຖອນຫາຍໃຈແລ້ວເວົ້າໃນໃຈວ່າ ‘ບໍ່.. ບໍ່ແມ່ນ!’ ແຕ່ຂ້ອຍກໍປັບຕົວໄດ້ໄວ ຂ້ອຍມັກວຽກຕ່າງໆທີ່ໄດ້ຮັບມອບໝາຍໃນເບເທນ. ວຽກໜຶ່ງທີ່ຂ້ອຍມັກຫຼາຍຄືວຽກຝ່າຍຕ້ອນຮັບ. ຂ້ອຍມັກພົບປະກັບຜູ້ຄົນແລະວຽກນີ້ກໍເຮັດໃຫ້ຂ້ອຍຕິດຕໍ່ກັບພີ່ນ້ອງນີຊີເລຍຫຼາຍຄົນ. ພີ່ນ້ອງຫຼາຍຄົນທີ່ເຂົ້າມາເບເທນຕົນຕົວມີແຕ່ຂີ້ຝຸ່ນ ຮູ້ສຶກເມື່ອຍ ບາງຄົນກໍຫິວເຂົ້າຫິວນ້ຳ. ຂ້ອຍມີຄວາມສຸກທີ່ໄດ້ຊ່ວຍເບິ່ງແຍງເຂົາເຈົ້າເຊິ່ງເຮັດໃຫ້ເຂົາເຈົ້າສົດຊື່ນແລະເຊົາເມື່ອຍ. ວຽກທັງໝົດນີ້ເປັນວຽກຮັບໃຊ້ອັນສັກສິດເພື່ອພະເຢໂຫວາ ແລະເຮັດໃຫ້ຂ້ອຍມີຄວາມສຸກຄວາມຍິນດີຫຼາຍ.” ແມ່ນແລ້ວທຸກວຽກມອບໝາຍເຮັດໃຫ້ຊີວິດເຮົາມີຄວາມສຸກແລະປະສົບຄວາມສຳເລັດ.
ຕອນທີ່ຄອບຄົວເຮົານັດລວມຕົວກັນໃນທຣິນິແດດປີ 1961 ພີ່ນ້ອງບຣາວໄດ້ເລົ່າບາງປະສົບການທີ່ໜ້າຕື່ນເຕັ້ນຕອນທີ່ລາວຢູ່ອາຝຼິກກາ. ຈາກນັ້ນ ຂ້ອຍກໍໄດ້ລາຍງານຄວາມກ້າວໜ້າໃນນີຊີເລຍ. ພີ່ນ້ອງບຣາວກອດຂ້ອຍແລະເວົ້າກັບພໍ່ວ່າ: “ຈອນນີ້ ເຈົ້າບໍ່ເຄີຍໄດ້ໄປຮັບໃຊ້ຢູ່ອາຝຼິກກາ ແຕ່ວູດເວີດໄດ້ໄປໄດ໋!” ພໍ່ກໍຕອບຄືນວ່າ: “ດີຫຼາຍ ເຮັດຕໍ່ໄປເດີ້ລູກ!” ກຳລັງໃຈຈາກຄົນທີ່ມີຄວາມເຊື່ອທີ່ເຂັ້ມແຂງທັງສອງຄົນເຮັດໃຫ້ຂ້ອຍຢາກເຮັດວຽກຮັບໃຊ້ໃຫ້ສຳເລັດ.
ວິນລຽມ “ໄບເບິນ” ບຣາວກັບອັນໂຕເນຍເມຍຂອງລາວທີ່ໃຫ້ກຳລັງໃຈເຮົາຫຼາຍແທ້ໆ
ໃນປີ 1962 ຂ້ອຍໄດ້ຮັບສິດທິພິເສດໃຫ້ເປັນຄູຝຶກນັກຮຽນກິລຽດຊັ້ນທີ 37 ຫຼັກສູດ 10 ເດືອນ. ພີ່ນ້ອງວິນເຟຣດ ກູດ ເຊິ່ງຕອນນີ້ເປັນຜູ້ດູແລສາຂາໃນນີຊີເລຍໄດ້ເຂົ້າຊັ້ນຮຽນທີ 38 ລາວຖືກມອບໝາຍໄປອັງກິດ ຂ້ອຍຈຶ່ງໄດ້ຮັບການແຕ່ງຕັ້ງໃຫ້ເປັນຜູ້ດູແລສາຂານີຊີເລຍແທນ. ການເຮັດຕາມຕົວຢ່າງຂອງພີ່ນ້ອງບຣາວໂດຍເດີນທາງໄປທົ່ວນີຊີເລຍເຮັດໃຫ້ຂ້ອຍຮູ້ຈັກແລະຮັກພີ່ນ້ອງນີຊີເລຍຫຼາຍຂຶ້ນ. ເຖິງວ່າເຂົາເຈົ້າບໍ່ມີວັດຖຸສິ່ງຂອງຫຼາຍຢ່າງຄືກັບຄົນໃນປະເທດທີ່ພັດທະນາແລ້ວມີ ແຕ່ເຂົາເຈົ້າກໍເຮັດໃຫ້ເຫັນແຈ້ງວ່າຄວາມອີ່ມໃຈພໍໃຈແລະຊີວິດທີ່ມີຈຸດມຸ່ງໝາຍບໍ່ໄດ້ຂຶ້ນກັບການມີເງິນຄຳຫຼືຊັບສົມບັດວັດຖຸ. ເມື່ອຄິດເຖິງສະພາບການຂອງເຂົາເຈົ້າ ເປັນຕາງຶດຫຼາຍທີ່ເຫັນວ່າເຂົາເຈົ້າແຕ່ງໂຕສະອາດຮຽບຮ້ອຍແລະມີສະຫງ່າເມື່ອໄປຫໍປະຊຸມ. ເມື່ອເຂົາເຈົ້າໄປການປະຊຸມໃຫຍ່ ເຂົາເຈົ້າຈະຂີ່ລົດບັນທຸກຫຼືບໍ່ກໍລົດໂບເລຄາຈັດa (ລົດບັນທຸກທີ່ດັດແປງເອງ). ຫຼາຍເທື່ອລົດເຫຼົ່ານີ້ມີຄຳຂວັນທີ່ໜ້າສົນໃຈ. ຄຳຂວັນໜຶ່ງຄື: “ນ້ຳຢອດນ້ອຍໆເມື່ອລວມກັນເຮັດໃຫ້ເປັນມະຫາສະໝຸດອັນກວ້າງໃຫຍ່.”
ຄຳຂວັນນີ້ເປັນຈິງອີ່ຫຼີ! ຄວາມພະຍາຍາມຂອງເຮົາທຸກຄົນມີສ່ວນເຮັດໃຫ້ຄຳຂວັນນີ້ເປັນຈິງ. ນີຊີເລຍເປັນປະເທດທຳອິດນອກຈາກປະເທດສະຫະລັດທີ່ມີຜູ້ປະກາດເຖິງ 1 ແສນຄົນໃນປີ 1974. ວຽກນີ້ເຕີບໃຫຍ່ຂະຫຍາຍຕົວແທ້ໆ!
ໃນຂະນະທີ່ວຽກນີ້ກຳລັງເຕີບໃຫຍ່ກໍເກີດສົງຄາມກາງເມືອງຂຶ້ນຢູ່ນີຊີເລຍຕັ້ງແຕ່ປີ 1967-1970. ພີ່ນ້ອງຂອງເຮົາທີ່ຢູ່ແຄມແມ່ນ້ຳນີເຈີຟາກສາທາລະນະລັດເບຍຟຣານຕິດຕໍ່ສຳນັກງານສາຂາບໍ່ໄດ້ຫຼາຍເດືອນ. ເຮົາຈຶ່ງຕ້ອງເອົາອາຫານບຳລຸງລ້ຽງຄວາມເຊື່ອໄປໃຫ້ເຂົາເຈົ້າ. ດັ່ງທີ່ໄດ້ບອກໃນຕອນຕົ້ນຂອງບົດຄວາມ ເຮົາໄດ້ອະທິດຖານແລະໄວ້ວາງໃຈພະເຢໂຫວາ ແລະໄດ້ຂ້າມແມ່ນ້ຳໄປຫາເຂົາເຈົ້າຫຼາຍເທື່ອ.
ຂ້ອຍຈື່ໄດ້ດີຕອນທີ່ເຮົາຕ້ອງເດີນທາງຜ່ານອັນຕະລາຍເພື່ອຂ້າມແມ່ນ້ຳນີເຈີ ເຮົາຕ້ອງສ່ຽງຕາຍຈາກທະຫານທີ່ຈະພ້ອມຍິງ ໂລກລະບາດ ແລະອັນຕະລາຍອື່ນໆອີກ. ການເດີນທາງຜ່ານກອງກຳລັງທະຫານຂອງລັດຖະບານກາງທີ່ມັກລະແວງສົງໄສກໍເປັນຕາຢ້ານແລ້ວ ແຕ່ການເດີນທາງຜ່ານເຂດເບຍຟຣານກໍແຮ່ງເປັນຕາຢ້ານກວ່າອີກ. ມີເທື່ອໜຶ່ງທີ່ຂ້ອຍຂ້າມແມ່ນ້ຳນີເຈີທີ່ໄຫຼແຮງຕອນກາງຄືນໂດຍພາຍເຮືອຄານູຈາກເມືອງອາຊາບາໄປເມືອງໂອນິດຊາ ແລະໄປໃຫ້ກຳລັງໃຈຜູ້ດູແລຢູ່ເມືອງເອນູກູ. ຂ້ອຍຍັງຕ້ອງໄປໃຫ້ກຳລັງໃຈພວກຜູ້ດູແລຢູ່ເມືອງອາບາທີ່ຖືກຕັດໄຟ. ມີຢູ່ເທື່ອໜຶ່ງການປະຊຸມຂອງເຮົາໃນເມືອງຜອດຮາຂອດຕ້ອງຟ້າວອະທິດຖານປິດກ່ອນ ຕອນທີ່ກອງກຳລັງຂອງລັດຖະບານກາງບຸກເຂົ້າໄປໃນເຂດເບຍຟຣານທີ່ຢູ່ນອກເມືອງ.
ການປະຊຸມເຫຼົ່ານັ້ນເປັນສິ່ງທີ່ສຳຄັນຫຼາຍເພື່ອຊ່ວຍໃຫ້ພີ່ນ້ອງທີ່ຮັກຂອງເຮົາໝັ້ນໃຈວ່າພະເຢໂຫວາຮັກແລະເປັນຫ່ວງເຂົາເຈົ້າ ແລະຍັງໃຫ້ຄຳແນະນຳທີ່ຈຳເປັນໃນເລື່ອງຄວາມເປັນກາງແລະຄວາມເປັນໜຶ່ງດຽວກັນ. ພີ່ນ້ອງນີຊີເລຍບໍ່ມີບັນຫາໃນເລື່ອງການຂັດແຍ່ງແບ່ງຝ່າຍທີ່ເກີດຂຶ້ນໃນປະເທດ. ເຂົາເຈົ້າສະແດງຄວາມຮັກທີ່ເໜືອຄວາມກຽດຊັງລະຫວ່າງຊົນເຜົ່າ. ເຂົາເຈົ້າຮັກສາຄວາມເປັນໜຶ່ງດຽວກັນແບບຄລິດສະຕຽນ. ເປັນສິດທິພິເສດຫຼາຍແທ້ໆທີ່ໄດ້ຢູ່ຄຽງຂ້າງເຂົາເຈົ້າໃນໄລຍະການທົດສອບນີ້!
ໃນປີ 1969 ພີ່ນ້ອງມິວຕັນ ເຮັນເຊວເປັນປະທານການປະຊຸມ “ສັນຕິພາບໃນໂລກ” ເຊິ່ງເປັນການປະຊຸມນານາຊາດຢູ່ສະໜາມກິລາແຢງກີ ນິວຢອກ ແລະຂ້ອຍໄດ້ຮຽນຮູ້ຫຼາຍຢ່າງຕອນທີ່ເປັນຜູ້ຊ່ວຍ. ນີ້ເປັນເວລາເໝາະສົມ ເພາະໃນປີ 1970 ບໍ່ດົນຫຼັງຈາກສົງຄາມກາງເມືອງຈົບລົງ ເຮົາໄດ້ຈັດການປະຊຸມນານາຊາດທີ່ຊື່ວ່າ: “ປະຊາຊົນທີ່ພະເຈົ້າຍອມຮັບ” ໃນເມືອງລາໂກດ ປະເທດນີຊີເລຍ. ການປະຊຸມຄັ້ງນີ້ປະສົບຄວາມສຳເລັດໄດ້ຍ້ອນພະເຢໂຫວາອວຍພອນ. ການປະຊຸມນີ້ຈັດຂຶ້ນທັງໝົດ 17 ພາສາ ແລະມີຜູ້ເຂົ້າຮ່ວມປະຊຸມ 121.128 ຄົນ. ພີ່ນ້ອງນໍແລະພີ່ນ້ອງເຮັນເຊວລວມທັງແຂກຄົນອື່ນໆທີ່ຂີ່ຍົນມາຈາກສະຫະລັດອາເມຣິກາແລະອັງກິດໄດ້ມີໂອກາດເຫັນການຮັບບັບເຕມາຄັ້ງຍິ່ງໃຫຍ່ທີ່ສຸດນັບຕັ້ງແຕ່ວັນເພນເຕກອດຄື ມີຄົນຮັບບັບເຕມາເຖິງ 3.775 ຄົນ! ການຊ່ວຍຈັດການປະຊຸມໃນຄັ້ງນັ້ນເປັນຊ່ວງເວລາທີ່ຫຍຸ້ງທີ່ສຸດໃນຊີວິດຂອງຂ້ອຍ. ການເຕີບໂຕຂອງຜູ້ປະກາດຢູ່ນີຊີເລຍບໍ່ໄດ້ເປັນການຂະຫຍາຍ ແຕ່ເປັນການລະເບີດເລີຍ!
ການປະຊຸມນານາຊາດ “ປະຊາຊົນທີ່ພະເຈົ້າຍອມຮັບ” ມີຜູ້ເຂົ້າຮ່ວມປະຊຸມເຖິງ 121.128 ຄົນ ໃນ 17 ພາສາ ລວມທັງພາສາອີໂບ
ໃນໄລຍະເວລາຫຼາຍກວ່າ 30 ປີຢູ່ນີຊີເລຍ ຂ້ອຍມີຄວາມສຸກທີ່ໄດ້ຮັບໃຊ້ເປັນຜູ້ດູແລເດີນທາງ ແລະຜູ້ດູແລໂຊນໃນອາຝຼິກກາຕາເວັນຕົກ. ມິດຊັນນາລີຫຼາຍຄົນໄດ້ຮັບການເບິ່ງແຍງເອົາໃຈໃສ່ແລະກຳລັງໃຈຫຼາຍແທ້ໆ! ຂ້ອຍດີໃຈຫຼາຍທີ່ໄດ້ຮັບຮອງກັບເຂົາເຈົ້າວ່າເຂົາເຈົ້າບໍ່ໄດ້ຖືກລືມ! ວຽກນີ້ສອນຂ້ອຍວ່າການສະແດງຄວາມສົນໃຈເປັນສ່ວນຕົວເປັນສິ່ງສຳຄັນທີ່ຊ່ວຍໃຫ້ເຂົາເຈົ້າກ້າວໜ້າແລະເຂັ້ມແຂງສະເໝີ ແລະເປັນນ້ຳໜຶ່ງໃຈດຽວກັບອົງການຂອງພະເຢໂຫວາ.
ມີແຕ່ຄວາມຊ່ວຍເຫຼືອຈາກພະເຢໂຫວາເທົ່ານັ້ນທີ່ຈະຊ່ວຍເຮົາໃຫ້ຮັບມືກັບບັນຫາຕ່າງໆທີ່ເກີດຈາກກຸ່ມຄົນທີ່ເຮັດສົງຄາມກາງເມືອງແລະຄວາມເຈັບໄຂ້ໄດ້ປ່ວຍ. ພະເຢໂຫວາກໍອວຍພອນເຮົາຢ່າງເຫັນໄດ້ແຈ້ງ. ໂອຣິດບອກວ່າ:
“ເຮົາທັງສອງເປັນໄຂ້ມາລາເລຍຫຼາຍເທື່ອ. ມີເທື່ອໜຶ່ງ ເວີດລົ້ມລົງໝົດສະຕິໃນໂຮງໝໍລາໂກດ. ຂ້ອຍເວົ້າວ່າລາວຄືຊິບໍ່ລອດ ແຕ່ລາວກໍລອດ! ເມື່ອຟື້ນໄດ້ສະຕິຄືນມາ ລາວກໍເວົ້າເລື່ອງລາຊະອານາຈັກຂອງພະເຈົ້າກັບພະຍາບານຊາຍຄົນໜຶ່ງທີ່ເບິ່ງແຍງລາວ. ຕໍ່ມາຂ້ອຍກັບເວີດກັບໄປຢາມພະຍາບານຄົນນັ້ນ ລາວຊື່ແວມບີວີ ເຮົາລົມເລື່ອງຄຳພີໄບເບິນກັບລາວ. ລາວຮັບເອົາຄວາມຈິງແລະຕໍ່ມາກໍເປັນຜູ້ເຖົ້າແກ່ຢູ່ເມືອງອາບາ. ຂ້ອຍເອງກໍມີໂອກາດໄດ້ຊ່ວຍຫຼາຍຄົນໃຫ້ມາຮຽນຄວາມຈິງ ແມ່ນແຕ່ຄົນມຸດສະລິມທີ່ເຄັ່ງສາສະໜາກໍກາຍມາເປັນຜູ້ຮັບໃຊ້ສັດຊື່ຕໍ່ພະເຢໂຫວາ. ເຮົາມີຄວາມສຸກຫຼາຍທີ່ໄດ້ຮູ້ຈັກແລະຮັກຄົນນີຊີເລຍ ລວມທັງວັດທະນາທຳ ປະເພນີ ແລະພາສາຂອງເຂົາເຈົ້າ.”
ອີກບົດຮຽນໜຶ່ງ: ເພື່ອວຽກມອບໝາຍໃນຕ່າງປະເທດຂອງເຮົາຈະກ້າວໜ້າໄປໄດ້ ເຮົາຕ້ອງຮັກພີ່ນ້ອງຂອງເຮົາ ບໍ່ວ່າວັດທະນາທຳຂອງເຂົາເຈົ້າຈະແຕກຕ່າງຈາກເຮົາກໍຕາມ.
ວຽກມອບໝາຍໃໝ່
ຫຼັງຈາກຮັບໃຊ້ຢູ່ເບເທນນີຊີເລຍ ໃນປີ 1987 ເຮົາໄດ້ຮັບມອບໝາຍໃຫ້ເປັນມິດຊັນນາລີໃນເຂດປະກາດທີ່ສວຍງາມເທິງໝູ່ເກາະແຊັງລູຍຊີ ທະເລຄາເລບຽນ. ເປັນວຽກທີ່ໜ້າຍິນດີຫຼາຍ ແຕ່ກໍມີຂໍ້ທ້າທາຍ. ໃນອາຝຼິກກາເປັນເລື່ອງທຳມະດາທີ່ຜູ້ຊາຍຈະແຕ່ງດອງເອົາເມຍຫຼາຍຄົນ ແຕ່ຢູ່ເກາະແຊັງລູຍຊີ ຜົວເມຍຈະຢູ່ກິນນຳກັນໂດຍບໍ່ໄດ້ແຕ່ງດອງກັນ. ພະລັງຂອງຄຳພີໄບເບິນໄດ້ກະຕຸ້ນໃຫ້ນັກສຶກສາຫຼາຍຄົນຂອງເຮົາຕ້ອງປ່ຽນແປງຕົວເອງ.
ຂ້ອຍຮັກໂອຣິດສຸດທີ່ຮັກຕະຫຼອດ 68 ປີທີ່ເຮົາແຕ່ງດອງກັນ
ເມື່ອເຮົາອາຍຸຫຼາຍຂຶ້ນກຳລັງເຫື່ອແຮງກໍຫຼຸດລົງ ຄະນະກຳມະການປົກຄອງໄດ້ສະແດງຄວາມຮັກຕໍ່ເຮົາໂດຍສົ່ງເຮົາໄປຢູ່ສຳນັກງານໃຫຍ່ບຸກລິນ ລັດນິວຢອກ ສະຫະລັດອາເມຣິກາໃນປີ 2005. ທຸກໆມື້ຂ້ອຍຂອບໃຈພະເຢໂຫວາທີ່ໄດ້ມີໂອຣິດ ລາວເສຍຊີວິດປີ 2015 ແລະຄວາມຮູ້ສຶກຂອງການສູນເສຍເປັນສິ່ງທີ່ອະທິບາຍບໍ່ໄດ້. ລາວເປັນເພື່ອນທີ່ດີທີ່ສຸດແລະເປັນເມຍທີ່ໜ້າຮັກຫຼາຍ. ຂ້ອຍຮັກລາວສຸດຫົວໃຈຕະຫຼອດ 68 ປີທີ່ເຮົາໃຊ້ຊີວິດຮ່ວມກັນ. ເຮົາພົບວ່າເຄັດລັບສຳລັບຄວາມສຸກທັງໃນຊີວິດຄູ່ແລະໃນປະຊາຄົມຄື: ການນັບຖືຫົວໜ້າຄອບຄົວ ໃຫ້ອະໄພຢ່າງໃຈກວ້າງ ຖ່ອມຕົວສະເໝີ ແລະສະແດງຜົນຂອງພະລັງບໍລິສຸດ.
ເມື່ອເຮົາຜິດຫວັງຫຼືທໍ້ໃຈ ເຮົາຈະເພິ່ງພະເຢໂຫວາໃຫ້ຊ່ວຍເຮົາຮັກສານ້ຳໃຈເສຍສະລະຕໍ່ໆໄປ. ໃນຂະນະທີ່ເຮົາປັບປ່ຽນຕໍ່ໄປ ເຮົາກໍເຫັນວ່າທຸກຢ່າງກໍດີຂຶ້ນເລື້ອຍໆ ແລະຍັງຈະມີສິ່ງທີ່ດີທີ່ສຸດລໍຖ້າໃນອະນາຄົດ!—ເອຊາ. 60:17; 2 ໂກ. 13:11
ໃນທຣິນິແດດແລະໂທແບໂກ ພະເຢໂຫວາອວຍພອນວຽກທີ່ພໍ່ແມ່ຂອງຂ້ອຍແລະພີ່ນ້ອງຄົນອື່ນເຮັດ ຕາມລາຍງານຫຼ້າສຸດມີ 9.892 ຄົນທີ່ເປັນພະຍານພະເຢໂຫວາ. ໃນອາຣູບາມີຫຼາຍຄົນເຮັດວຽກຮັບໃຊ້ເພື່ອເສີມສ້າງປະຊາຄົມເກົ່າທີ່ຂ້ອຍເຄີຍສົມທົບ. ຕອນນີ້ເກາະນີ້ມີ 14 ປະຊາຄົມທີ່ກຳລັງກ້າວໜ້າຫຼາຍ. ໃນນີຊີເລຍມີຜູ້ປະກາດເພີ່ມຂຶ້ນເປັນ 381.398 ຄົນ ແລະໃນແຊັງລູຍຊີມີພີ່ນ້ອງ 783 ຄົນສະໜັບສະໜູນລາຊະອານາຈັກຂອງພະເຢໂຫວາ.
ຕອນນີ້ຂ້ອຍອາຍຸ 90 ປາຍປີແລ້ວ ຄຳເພງ 92:14 ເວົ້າເຖິງຄົນທີ່ຖືກປູກໄວ້ໃນວິຫານຂອງພະເຢໂຫວາວ່າ: “ເຂົາຈະຍັງເກີດໝາກເວລາອາຍຸສູງເຖົ້າແລ້ວ ເຂົາຈະອ້ວນພີແລະຂຽວສົດ.” ຂ້ອຍຮູ້ສຶກຂອບໃຈແທ້ໆທີ່ຂ້ອຍໄດ້ໃຊ້ຊີວິດເພື່ອຮັບໃຊ້ພະເຢໂຫວາ. ມໍລະດົກຄລິດສະຕຽນຢ່າງຫຼວງຫຼາຍທີ່ໄດ້ຮັບເຮັດໃຫ້ຂ້ອຍມີໂອກາດຮັບໃຊ້ພະອົງຢ່າງເຕັມທີ. ພະເຢໂຫວາຮັກຂ້ອຍຢ່າງໝັ້ນຄົງແລະເຮັດໃຫ້ຂ້ອຍ “ເຕີບໂຕໃນລານວິຫານຂອງພະເຈົ້າ [ຂອງຂ້ອຍ].”—ເພງ. 92:13, ລ.ມ.
a ເບິ່ງຕື່ນເຖີດ! 8 ມີນາ 1972 (ພາສາອັງກິດ) ໜ້າ 24-26