ບົດຄວາມສຶກສາທີ 13
ໃຊ້ສິ່ງທີ່ຢູ່ໃນທຳມະຊາດເພື່ອສອນລູກກ່ຽວກັບພະເຢໂຫວາ
“ໃຜເປັນຜູ້ສ້າງດວງດາວເຫຼົ່ານີ້?”—ອຊຢ. 40:26
ເພງ 11 ສິ່ງທີ່ສ້າງສັນລະເສີນພະເຈົ້າ
ໃຈຄວາມສຳຄັນa
1. ພໍ່ແມ່ຢາກຊ່ວຍລູກໃນເລື່ອງຫຍັງ?
ພໍ່ແມ່ຢາກຊ່ວຍລູກຫຼາຍແທ້ໆໃຫ້ຮູ້ຈັກແລະຮັກພະເຢໂຫວາ. ແຕ່ເຮົາເບິ່ງບໍ່ເຫັນພະເຈົ້າ. ແລ້ວເຈົ້າຈະຊ່ວຍລູກແນວໃດໃຫ້ຮູ້ວ່າ ພະເຈົ້າມີຕົວຕົນແທ້ໆແລະຊ່ວຍເຂົາເຈົ້າໃຫ້ສະໜິດກັບພະເຢໂຫວາ?—ຢກບ. 4:8
2. ພໍ່ແມ່ຈະເຮັດແນວໃດເພື່ອຊ່ວຍລູກໃຫ້ຮູ້ຈັກພະເຢໂຫວາ?
2 ວິທີທີ່ສຳຄັນຢ່າງໜຶ່ງທີ່ຈະຊ່ວຍລູກໃຫ້ສະໜິດກັບພະເຢໂຫວາກໍຄື ສຶກສາຄຳພີໄບເບິນກັບລູກ. (2ຕມ. 3:14-17) ນອກຈາກນັ້ນ ຍັງມີອີກວິທີໜຶ່ງທີ່ຈະຊ່ວຍລູກໃຫ້ຮູ້ຈັກພະເຢໂຫວາ ເຊິ່ງຄຳພີໄບເບິນບອກເລື່ອງນີ້ໄວ້ໃນປຶ້ມສຸພາສິດ. ໃນນັ້ນເວົ້າເຖິງພໍ່ຄົນໜຶ່ງໄດ້ບອກໃຫ້ລູກຊາຍສັງເກດເບິ່ງຄຸນລັກສະນະຕ່າງໆຂອງພະເຢໂຫວາຈາກສິ່ງທີ່ພະເຢໂຫວາສ້າງ. (ສຸພາ. 3:19-21) ຕອນນີ້ໃຫ້ເຮົາມາເບິ່ງວ່າ ພໍ່ແມ່ຈະໃຊ້ສິ່ງທີ່ພະເຢໂຫວາສ້າງເພື່ອສອນລູກກ່ຽວກັບຄຸນລັກສະນະຂອງພະເຢໂຫວາແນວໃດ.
ເຈົ້າຈະໃຊ້ສິ່ງທີ່ພະເຈົ້າສ້າງສອນລູກແນວໃດ?
3. ພໍ່ແມ່ຄວນຈະຊ່ວຍລູກໃນເລື່ອງຫຍັງ?
3 ຄຳພີໄບເບິນບອກວ່າ “ເຖິງວ່າມະນຸດບໍ່ສາມາດເຫັນພະເຈົ້າໄດ້ ແຕ່ເມື່ອພວກເຂົາສັງເກດເບິ່ງສິ່ງທີ່ພະອົງສ້າງໄວ້ກໍຈະເຫັນຄຸນລັກສະນະຕ່າງໆຂອງພະອົງຢ່າງຈະແຈ້ງ ຕັ້ງແຕ່ການສ້າງໂລກເປັນຕົ້ນມາ.” (ຣມ. 1:20) ຜູ້ທີ່ເປັນພໍ່ແມ່ ເຈົ້າມັກພາລູກໄປທ່ຽວຊົມທຳມະຊາດບໍ? ຂໍໃຫ້ເຈົ້າໃຊ້ເວລານັ້ນເພື່ອຊ່ວຍລູກໃຫ້ເຫັນວ່າ “ສິ່ງທີ່ພະອົງສ້າງໄວ້” ເຮັດໃຫ້ເຫັນຄຸນລັກສະນະຕ່າງໆທີ່ດີຂອງເພິ່ນແນວໃດ. ຕອນນີ້ເຮົາຈະມາເບິ່ງວ່າ ພໍ່ແມ່ຈະໄດ້ບົດຮຽນຫຍັງຈາກຕົວຢ່າງທີ່ພະເຢຊູໃຊ້ກ່ຽວກັບເລື່ອງນີ້.
4. ພະເຢຊູໃຊ້ສິ່ງທີ່ພະເຢໂຫວາສ້າງສອນພວກລູກສິດຂອງເພິ່ນແນວໃດ? (ລູກາ 12:24, 27-30)
4 ໃຫ້ເຮົາມາເບິ່ງວ່າ ພະເຢຊູໃຊ້ສິ່ງທີ່ພະເຢໂຫວາສ້າງໃນການສອນຂອງເພິ່ນແນວໃດ. ມີເທື່ອໜຶ່ງພະເຢຊູໄດ້ບອກໃຫ້ພວກລູກສິດເບິ່ງຝູງກາແລະດອກໄມ້. (ອ່ານລູກາ 12:24, 27-30) ທີ່ຈິງ ພະເຢຊູສາມາດໃຊ້ຕົວຢ່າງຂອງສິ່ງມີຊີວິດຊະນິດອື່ນໆກໍໄດ້ ແຕ່ເພິ່ນເລືອກໃຊ້ຕົວຢ່າງຂອງນົກແລະດອກໄມ້ ເຊິ່ງເປັນສິ່ງທີ່ພວກລູກສິດຄຸ້ນເຄີຍດີ. ເຂົາເຈົ້າຕ້ອງເຄີຍເຫັນກາບິນຢູ່ເທິງທ້ອງຟ້າແລະເຫັນດອກໄມ້ບານຢູ່ໃນທົ່ງຫຍ້າ. ຕອນທີ່ພະເຢຊູຍົກຕົວຢ່າງໃນເລື່ອງນີ້ ເພິ່ນຄືຊິຊີ້ໄປໃສ່ໂຕກາແລະດອກໄມ້ໃນທົ່ງຫຍ້າ. ແລ້ວພະເຢຊູເຮັດຫຍັງຫຼັງຈາກຍົກສອງຕົວຢ່າງນີ້? ເພິ່ນໄດ້ສອນພວກລູກສິດວ່າ ພະເຢໂຫວາພໍ່ຂອງເພິ່ນໃຈກວ້າງແລະໃຈດີຫຼາຍ. ຖ້າພະເຢໂຫວາເບິ່ງແຍງໂຕກາແລະດອກໄມ້ໃນທົ່ງຫຍ້າ ເພິ່ນກໍຈະເບິ່ງແຍງຜູ້ຮັບໃຊ້ທີ່ສັດຊື່ຂອງເພິ່ນຄືກັນ.
5. ພໍ່ແມ່ຈະໃຊ້ສິ່ງທີ່ພະເຢໂຫວາສ້າງສອນລູກກ່ຽວກັບເພິ່ນແນວໃດ?
5 ຜູ້ທີ່ເປັນພໍ່ແມ່ ເຈົ້າຈະຮຽນແບບວິທີສອນຂອງພະເຢຊູແນວໃດ? ເຈົ້າອາດຈະເວົ້າເຖິງຕົ້ນໄມ້ແລະສັດທີ່ເຈົ້າມັກ ແລະບອກວ່າມັນສອນຫຍັງເຈົ້າກ່ຽວກັບພະເຢໂຫວາ. ແລ້ວຈາກນັ້ນ ເຈົ້າອາດຈະຖາມລູກວ່າ ລູກມັກສັດຫຍັງຫຼືຕົ້ນໄມ້ຫຍັງ? ຖ້າເຈົ້າໃຊ້ສິ່ງທີ່ລູກມັກ ລູກກໍຈະຕັ້ງໃຈຟັງຫຼາຍຂຶ້ນເມື່ອເຈົ້າສອນກ່ຽວກັບພະເຢໂຫວາ.
6. ເຮົາໄດ້ບົດຮຽນຫຍັງຈາກແມ່ຂອງຄລິດສະໂຕເຟີ?
6 ພໍ່ແມ່ຕ້ອງໃຊ້ເວລາຫຼາຍເພື່ອຄົ້ນຄວ້າກ່ຽວກັບສັດແລະຕົ້ນໄມ້ກ່ອນຈະລົມກັບລູກເລື່ອງພະເຢໂຫວາບໍ? ເຈົ້າບໍ່ຈຳເປັນຕ້ອງເຮັດຂະໜາດນັ້ນ ເພາະພະເຢຊູເອງກໍບໍ່ໄດ້ອະທິບາຍລະອຽດຍາວໆວ່າ ໂຕກາກິນຫຍັງຫຼືກິນໜ້ອຍຫຼາຍສ່ຳໃດ ຫຼືຈຸລັງຂອງດອກໄມ້ເປັນແນວໃດ. ເຖິງວ່າລູກຂອງເຈົ້າອາດຈະມັກໃຫ້ເຈົ້າອະທິບາຍລະອຽດກ່ຽວກັບສິ່ງທີ່ພະເຢໂຫວາສ້າງ ແຕ່ບາງເທື່ອເຈົ້າພຽງແຕ່ເວົ້າຫຼືຖາມງ່າຍໆກໍຊ່ວຍໃຫ້ລູກເຂົ້າໃຈສິ່ງທີ່ເຈົ້າຢາກບອກແລ້ວ. ພີ່ນ້ອງຊາຍຄົນໜຶ່ງຊື່ຄລິດສະໂຕເຟີໄດ້ເວົ້າເຖິງຕອນທີ່ລາວຍັງເປັນເດັກນ້ອຍວ່າ “ແມ່ຈະໃຊ້ຄຳເວົ້າງ່າຍໆເພື່ອຊ່ວຍເຮົາໃຫ້ເຫັນຄ່າສິ່ງທີ່ພະເຢໂຫວາສ້າງ ເຊັ່ນ: ເມື່ອເຮົາຢູ່ໃກ້ພູແມ່ກໍຈະເວົ້າວ່າ ‘ເບິ່ງພູນັ້ນແມ້ລູກ ມັນໃຫຍ່ແລະງາມຫຼາຍແມ່ນບໍ? ພະເຢໂຫວາເຮັດສິ່ງທີ່ເປັນຕາງຶດງໍ້ແທ້ໆເນາະ!’ ຫຼືເມື່ອເຮົາຢູ່ໃກ້ທະເລແມ່ກໍຈະເວົ້າວ່າ ‘ເບິ່ງຄື້ນທະເລແມ້ລູກ ພະເຢໂຫວາຜູ້ທີ່ສ້າງສິ່ງນີ້ມີພະລັງອຳນາດຫຼາຍແທ້ໆແມ່ນບໍ?’” ຄລິດສະໂຕເຟີບອກວ່າ “ແມ່ໃຊ້ຄຳເວົ້າທີ່ງ່າຍໆແຕ່ກະຕຸ້ນໃຫ້ພວກເຮົາຄິດແລະມັນສົ່ງຜົນຕໍ່ເຮົາຫຼາຍ.”
7. ເຈົ້າຈະຝຶກລູກແນວໃດໃຫ້ຄິດກ່ຽວກັບສິ່ງທີ່ພະເຢໂຫວາສ້າງ?
7 ເມື່ອລູກເລີ່ມໃຫຍ່ ເຈົ້າອາດຈະຝຶກເຂົາເຈົ້າໃຫ້ຄິດກ່ຽວກັບສິ່ງທີ່ພະເຢໂຫວາສ້າງຫຼາຍຂຶ້ນແລະຄິດວ່າ ສິ່ງນັ້ນສອນເຂົາເຈົ້າແນວໃດກ່ຽວກັບພະເຢໂຫວາ? ເຈົ້າອາດຈະເວົ້າເຖິງສິ່ງໃດສິ່ງໜຶ່ງຈາກທຳມະຊາດແລ້ວຖາມລູກວ່າ “ສິ່ງນີ້ສອນຫຍັງລູກກ່ຽວກັບພະເຢໂຫວາ?” ເຈົ້າອາດຈະແປກໃຈແລະດີໃຈກໍໄດ້ເມື່ອໄດ້ຍິນຄຳຕອບຂອງລູກ.—ມທ. 21:16
ເຈົ້າຈະໃຊ້ສິ່ງທີ່ພະເຈົ້າສ້າງສອນລູກຕອນໃດ?
8. ຕອນທີ່ພໍ່ແມ່ຄົນອິດສະຣາເອນຍ່າງຢູ່ “ຫົນທາງ” ເຂົາເຈົ້າມີໂອກາດທີ່ຈະເຮັດຫຍັງ?
8 ຄຳພີໄບເບິນບອກໃຫ້ພໍ່ແມ່ຄົນອິດສະຣາເອນສອນລູກເລື່ອງກົດໝາຍຂອງພະເຢໂຫວາເມື່ອຍ່າງຢູ່ “ຫົນທາງ.” (ພບຍ. 11:19, ລ.ມ.) ຫົນທາງຂອງຄົນອິດສະຣາເອນຈະຕັດຜ່ານທົ່ງຫຍ້າ ແລະເຂົາເຈົ້າຈະໄດ້ເຫັນສັດຕ່າງໆ ນົກແລະດອກໄມ້ຫຼາຍຊະນິດ. ຕອນທີ່ເຂົາເຈົ້າຍ່າງຢູ່ຫົນທາງ ເຂົາເຈົ້າຄືຊິມີໂອກາດໄດ້ສອນລູກກ່ຽວກັບສິ່ງຕ່າງໆທີ່ພະເຢໂຫວາສ້າງ. ເຈົ້າທີ່ເປັນພໍ່ແມ່ກໍເຮັດແບບນັ້ນໄດ້ຄືກັນ. ໃຫ້ເຮົາມາເບິ່ງວ່າ ພໍ່ແມ່ບາງຄົນໃນທຸກມື້ນີ້ໄດ້ເຮັດແນວໃດ.
9. ເຈົ້າໄດ້ບົດຮຽນຫຍັງຈາກພູນິທາແລະຄັດຢາ?
9 ແມ່ຄົນໜຶ່ງທີ່ຊື່ພູນິທາທີ່ອາໄສຢູ່ໃນຕົວເມືອງໃຫຍ່ຂອງປະເທດອິນເດຍເວົ້າວ່າ: “ຕອນທີ່ເຮົາໄປຢາມຄອບຄົວຢູ່ຕ່າງແຂວງ ເຮົາມັກຈະໃຊ້ໂອກາດນັ້ນສອນລູກກ່ຽວກັບສິ່ງຕ່າງໆທີ່ເປັນຕາງຶດງໍ້ທີ່ພະເຢໂຫວາສ້າງ. ຂ້ອຍຮູ້ສຶກວ່າລູກເຂົ້າໃຈສິ່ງທີ່ຢູ່ໃນທຳມະຊາດດີກວ່າຕອນທີ່ຢູ່ໃນເມືອງທີ່ແອອັດແລະວຸ່ນວາຍ.” ພວກເຈົ້າທີ່ເປັນພໍ່ແມ່ ລູກຂອງພວກເຈົ້າຄົງຈະບໍ່ມີວັນລືມຊ່ວງເວລາທີ່ດີທີ່ພວກເຈົ້າພາເຂົາເຈົ້າໄປທ່ຽວຊົມທຳມະຊາດທີ່ສວຍງາມ. ພີ່ນ້ອງຍິງທີ່ຊື່ຄັດຢາຈາກປະເທດໂມນດາວີບອກວ່າ: “ສິ່ງທີ່ຂ້ອຍຈື່ໄດ້ດີທີ່ສຸດຕອນຂ້ອຍຍັງນ້ອຍແມ່ນ ພໍ່ແມ່ໄດ້ພາຂ້ອຍອອກໄປທ່ຽວຢູ່ນອກເມືອງ. ຂ້ອຍຮູ້ສຶກຂອບໃຈຫຼາຍແທ້ໆທີ່ພໍ່ແມ່ສອນຂ້ອຍຕັ້ງແຕ່ຍັງນ້ອຍໃຫ້ຮູ້ຈັກສັງເກດເບິ່ງສິ່ງທີ່ພະເຢໂຫວາສ້າງ ເຊິ່ງເຮັດໃຫ້ຂ້ອຍຮູ້ຈັກພະເຢໂຫວາຫຼາຍຂຶ້ນ.”
ເຖິງວ່າຈະຢູ່ໃນຕົວເມືອງ ເຈົ້າກໍສາມາດໃຊ້ສິ່ງທີ່ພະເຢໂຫວາສ້າງເພື່ອສອນລູກກ່ຽວກັບພະເຢໂຫວາໄດ້ (ເບິ່ງຂໍ້ 10)
10. ຖ້າພໍ່ແມ່ພາລູກໄປທ່ຽວນອກເມືອງບໍ່ໄດ້ ເຂົາເຈົ້າຈະເຮັດຫຍັງໄດ້ແດ່ເພື່ອຊ່ວຍລູກໃຫ້ຮຽນຮູ້ກ່ຽວກັບພະເຢໂຫວາ? (ເບິ່ງຂອບ “ສິ່ງທີ່ຊ່ວຍພໍ່ແມ່ໄດ້”)
10 ແຕ່ຖ້າໄປທ່ຽວຢູ່ນອກເມືອງບໍ່ໄດ້ເດ ເຈົ້າຈະເຮັດແນວໃດ? ອາໂມນເຊິ່ງຢູ່ໃນປະເທດອິນເດຍບອກວ່າ: “ແຖວທີ່ຂ້ອຍຢູ່ ຜູ້ທີ່ເປັນພໍ່ແມ່ຕ້ອງເຮັດວຽກໜັກຫຼາຍຊົ່ວໂມງແລະການທີ່ຈະອອກໄປທ່ຽວຢູ່ນອກເມືອງບ່ອນໄກໆກໍມີຄ່າໃຊ້ຈ່າຍສູງ. ແຕ່ເຈົ້າສາມາດເຫັນສິ່ງທີ່ພະເຢໂຫວາສ້າງແລະລົມກັນກ່ຽວກັບຄຸນລັກສະນະຕ່າງໆຂອງເພິ່ນໄດ້ເມື່ອເຈົ້າໄປສວນສາທາລະນະທີ່ຢູ່ໃກ້ບ້ານຫຼືຢູ່ລະບຽງຊັ້ນດາດຟ້າ.” ດັ່ງນັ້ນ ຖ້າເຈົ້າພະຍາຍາມສັງເກດ ເຈົ້າກໍຈະເຫັນທຳມະຊາດຫຼາຍຢ່າງທີ່ເຈົ້າສາມາດສອນລູກກ່ຽວກັບສິ່ງທີ່ພະເຢໂຫວາສ້າງໄດ້. (ເພງ. 104:24) ເຈົ້າອາດຈະໃຊ້ຕົວຢ່າງຂອງນົກ ແມງໄມ້ ຕົ້ນໄມ້ ຫຼືສິ່ງອື່ນໆກໍໄດ້ເພື່ອສອນລູກກ່ຽວກັບພະເຢໂຫວາ. ຄາຣີນາຈາກປະເທດເຢຍລະມັນບອກວ່າ “ແມ່ຂ້ອຍມັກດອກໄມ້ຫຼາຍ. ຕອນທີ່ຂ້ອຍຍັງນ້ອຍ ແມ່ມັກຈະຊີ້ໃຫ້ເບິ່ງດອກໄມ້ງາມໆຕະຫຼອດເມື່ອເຮົາຍ່າງຫຼິ້ນນຳກັນ.” ພວກເຈົ້າທີ່ເປັນພໍ່ແມ່ ເຈົ້າສາມາດໃຊ້ວິດີໂອແລະປຶ້ມຕ່າງໆຂອງອົງການທີ່ເວົ້າກ່ຽວກັບສິ່ງທີ່ພະເຈົ້າສ້າງເພື່ອສອນລູກຂອງເຈົ້າ. ບໍ່ວ່າເຈົ້າຈະຢູ່ໃສ ເຈົ້າກໍສາມາດຊ່ວຍລູກໃຫ້ສັງເກດເບິ່ງສິ່ງທີ່ພະເຢໂຫວາສ້າງໄດ້. ຕອນນີ້ໃຫ້ມາເບິ່ງວ່າ ພໍ່ແມ່ຈະຊ່ວຍລູກແນວໃດໃຫ້ເຫັນຄຸນລັກສະນະບາງຢ່າງຂອງພະເຢໂຫວາ.
“ເຫັນຄຸນລະສະນະຕ່າງໆຂອງພະອົງຢ່າງຈະແຈ້ງ”
11. ພໍ່ແມ່ຈະຊ່ວຍລູກໃຫ້ເຫັນຄວາມຮັກຂອງພະເຢໂຫວາແນວໃດ?
11 ເພື່ອຈະຊ່ວຍລູກໃຫ້ເຫັນຄວາມຮັກຂອງພະເຢໂຫວາ ເຈົ້າອາດຈະໃຫ້ລູກສັງເກດເບິ່ງສັດຕ່າງໆວ່າພວກມັນເບິ່ງແຍງແລະຮັກລູກຂອງມັນແນວໃດ. (ມທ. 23:37) ຫຼືເຈົ້າອາດຈະໃຫ້ລູກສັງເກດເບິ່ງວ່າ ພະເຢໂຫວາສ້າງສິ່ງຕ່າງໆຫຼາກຫຼາຍຂະໜາດໃດ. ຄາຣີນາທີ່ເວົ້າເຖິງກ່ອນໜ້ານີ້ບອກວ່າ: “ຕອນທີ່ເຮົາຍ່າງຫຼິ້ນນຳກັນ ແມ່ມັກຈະບອກໃຫ້ຂ້ອຍຢຸດແລະສັງເກດເບິ່ງດອກໄມ້ແຕ່ລະດອກວ່າ ມັນມີຄວາມພິເສດແລະສວຍງາມຂະໜາດໃດ ເຊິ່ງເຮັດໃຫ້ເຫັນວ່າພະເຢໂຫວາຮັກເຮົາຫຼາຍ. ເຖິງວ່າຈະຜ່ານໄປຫຼາຍປີ ຂ້ອຍກໍຍັງມັກສັງເກດເບິ່ງດອກໄມ້ຢູ່ ບໍ່ວ່າຈະເປັນສີສັນແລະຄວາມຫຼາກຫຼາຍຂອງມັນ. ແລະທຸກເທື່ອທີ່ຂ້ອຍເບິ່ງດອກໄມ້ກໍເຮັດໃຫ້ຂ້ອຍຮູ້ສຶກວ່າ ພະເຢໂຫວາຮັກພວກເຮົາຫຼາຍແທ້ໆ.”
ເຈົ້າສາມາດສອນລູກກ່ຽວກັບສະຕິປັນຍາຂອງພະເຈົ້າໄດ້ໂດຍເວົ້າເຖິງຮ່າງກາຍຂອງເຮົາທີ່ຖືກສ້າງຢ່າງໜ້າອັດສະຈັນ (ເບິ່ງຂໍ້ 12)
12. ພໍ່ແມ່ຈະຊ່ວຍລູກໃຫ້ເຫັນສະຕິປັນຍາຂອງພະເຢໂຫວາໄດ້ແນວໃດ? (ຄຳເພງ 139:14) (ເບິ່ງຮູບພາບ)
12 ນອກຈາກນັ້ນ ໃຫ້ເຈົ້າຊ່ວຍລູກໃຫ້ເຫັນວ່າພະເຢໂຫວາເປັນພະເຈົ້າທີ່ມີສະຕິປັນຍາ. ເພິ່ນມີສະຕິປັນຍາຫຼາຍກວ່າເຮົາຫຼາຍເທົ່າ. (ຣມ. 11:33) ຕົວຢ່າງເຊັ່ນ: ເຈົ້າອາດຈະອະທິບາຍໃຫ້ລູກຮູ້ວ່າ ນ້ຳກາຍເປັນເມກແນວໃດແລະເມກເຮັດໃຫ້ນ້ຳຍ້າຍຈາກບ່ອນໜຶ່ງໄປຢູ່ອີກບ່ອນໜຶ່ງໄດ້ຢ່າງງ່າຍໆແນວໃດ. (ໂຢບ 38:36, 37) ຫຼືເຈົ້າອາດຈະອະທິບາຍວິທີທີ່ຮ່າງກາຍຂອງຄົນເຮົາຖືກສ້າງຢ່າງໜ້າອັດສະຈັນ. (ອ່ານຄຳເພງ 139:14) ໃຫ້ເຮົາມາເບິ່ງວ່າ ພໍ່ຄົນໜຶ່ງທີ່ຊື່ວະລາດິເມຍໄດ້ເຮັດຄ້າຍໆກັນນີ້ແນວໃດ. ລາວບອກວ່າ: “ມື້ໜຶ່ງ ລູກຊາຍຂອງເຮົາຂີ່ລົດຖີບລົ້ມ ແລະຫົວເຂົ່າເຫຼີ້ນ. ແຕ່ຫຼັງຈາກນັ້ນບໍ່ເທົ່າໃດມື້ແຜກໍເຊົາ. ຂ້ອຍກັບເມຍຈະອະທິບາຍໃຫ້ລູກເຂົ້າໃຈວ່າ ພະເຢໂຫວາສ້າງຮ່າງກາຍຂອງເຮົາໃຫ້ສາມາດສ້ອມແຊມໂຕເອງໄດ້. ແຕ່ເຮົາບໍ່ຄ່ອຍເຫັນວ່າສິ່ງທີ່ມະນຸດສ້າງຈະເຮັດແບບນີ້ໄດ້ ເຊັ່ນ: ຖ້າລົດເພມັນກໍບໍ່ສາມາດສ້ອມແປງໂຕເອງໄດ້. ເລື່ອງນີ້ຊ່ວຍລູກໃຫ້ເຫັນວ່າພະເຢໂຫວາເປັນພະເຈົ້າທີ່ມີສະຕິປັນຍາຫຼາຍແທ້ໆ.”
13. ພໍ່ແມ່ຈະຊ່ວຍລູກໃຫ້ເຫັນພະລັງອຳນາດຂອງພະເຢໂຫວາໄດ້ແນວໃດ? (ເອຊາຢາ 40:26)
13 ພະເຢໂຫວາຊວນເຮົາໃຫ້ແຫງນໜ້າເບິ່ງທ້ອງຟ້າແລະໃຫ້ຄິດເບິ່ງວ່າເພິ່ນມີພະລັງອຳນາດຫຼາຍຂະໜາດໃດທີ່ສາມາດຄວບຄຸມດວງດາວຕ່າງໆໃຫ້ຢູ່ໃນບ່ອນຂອງມັນ. (ອ່ານເອຊາຢາ 40:26) ໃຫ້ເຈົ້າຊວນລູກແນມເບິ່ງທ້ອງຟ້າແລະຄິດກ່ຽວກັບເລື່ອງນັ້ນເບິ່ງ. ພີ່ນ້ອງທິງໆເຊິ່ງຢູ່ໄຕ້ຫວັນໄດ້ເລົ່າເຖິງສະໄໝທີ່ລາວຍັງນ້ອຍວ່າ: “ມີເທື່ອໜຶ່ງແມ່ໄດ້ພາຂ້ອຍໄປທ່ຽວແລະກາງເຕັ້ນຢູ່ນອກເມືອງ. ຍ້ອນບໍ່ມີແສງໄຟລົບກວນ ເຮົາຈຶ່ງສາມາດເຫັນດາວເຕັມທ້ອງຟ້າເລີຍ. ໃນຕອນນັ້ນຂ້ອຍຮູ້ສຶກກັງວົນແລະຢ້ານວ່າຂ້ອຍຈະຮັກສາຄວາມສັດຊື່ຕໍ່ພະເຢໂຫວາບໍ່ໄດ້ ຍ້ອນໝູ່ຢູ່ໃນໂຮງຮຽນພະຍາຍາມກົດດັນຂ້ອຍແລະເຮັດໃຫ້ຍາກທີ່ຈະເຊື່ອຟັງພະເຢໂຫວາ. ແຕ່ແມ່ໄດ້ຊ່ວຍຂ້ອຍໃຫ້ຄິດເຖິງພະລັງອຳນາດຂອງພະເຢໂຫວາທີ່ໃຊ້ສ້າງສິ່ງຕ່າງໆລວມທັງດວງດາວເຫຼົ່ານີ້ ແລະຊ່ວຍຂ້ອຍໃຫ້ຈື່ວ່າພະເຢໂຫວາຈະໃຊ້ພະລັງອຳນາດຂອງເພິ່ນຊ່ວຍຂ້ອຍໃຫ້ຜ່ານບັນຫາຕ່າງໆໄປໄດ້. ຫຼັງຈາກທີ່ໄດ້ເບິ່ງສິ່ງທີ່ພະເຢໂຫວາສ້າງຕອນທີ່ໄປທ່ຽວໃນຄັ້ງນັ້ນ ກໍເຮັດໃຫ້ຂ້ອຍຢາກຮູ້ຈັກພະເຢໂຫວາຫຼາຍຂຶ້ນແລະຕັ້ງໃຈຫຼາຍຂຶ້ນທີ່ຈະຮັບໃຊ້ເພິ່ນ.”
14. ພໍ່ແມ່ຈະໃຊ້ສິ່ງທີ່ພະເຢໂຫວາສ້າງຊ່ວຍລູກແນວໃດໃຫ້ເຫັນວ່າ ພະເຢໂຫວາເປັນພະເຈົ້າທີ່ມີຄວາມສຸກ?
14 ສິ່ງຕ່າງໆທີ່ພະເຢໂຫວາສ້າງສະແດງໃຫ້ເຫັນວ່າເພິ່ນເປັນພະເຈົ້າທີ່ມີຄວາມສຸກ ແລະເພິ່ນຢາກໃຫ້ເຮົາມີຄວາມສຸກຄືກັນ. ນັກວິທະຍາສາດສັງເກດວ່າ ສັດສ່ວນຫຼາຍແມ່ນແຕ່ນົກແລະປາກໍມັກຫຼິ້ນມັກຢອກກັນ. (ໂຢບ 40:20) ເຈົ້າເຄີຍເຫັນລູກຫົວຍ້ອນເຫັນສັດຢອກຫຼິ້ນກັນບໍ? ເຊັ່ນ ຕອນທີ່ແມວນ້ອຍຫຼິ້ນນຳກັນຫຼືຕອນທີ່ໝານ້ອຍໄລ່ຢອກກັນ. ຖ້າເທື່ອໜ້າເຈົ້າເຫັນລູກຫົວຍ້ອນສັດເຮັດສິ່ງທີ່ຕະຫຼົກໆກໍໃຫ້ບອກລູກວ່າ ‘ເຫັນບໍລູກ ພະເຢໂຫວາຄືຊິເປັນພະເຈົ້າທີ່ມັກມ່ວນແລະມີຄວາມສຸກເນາະ!’—1ຕມ. 1:11
ມີຄວາມສຸກກັບທຳມະຊາດນຳກັນເປັນຄອບຄົວ
ຕອນທີ່ລູກຢູ່ກັບທຳມະຊາດ ເຂົາເຈົ້າອາດຈະຮູ້ສຶກຜ່ອນຄາຍຫຼາຍຂຶ້ນແລະຢາກລະບາຍຄວາມຮູ້ສຶກໃຫ້ເຈົ້າຟັງ (ເບິ່ງຂໍ້ 15)
15. ພໍ່ແມ່ຈະເຮັດຫຍັງໄດ້ແດ່ເພື່ອຊ່ວຍລູກໃຫ້ລະບາຍຄວາມຮູ້ສຶກອອກມາ? (ສຸພາສິດ 20:5) (ເບິ່ງຮູບພາບ)
15 ບາງເທື່ອພໍ່ແມ່ຮູ້ສຶກວ່າຍາກທີ່ຈະເຮັດໃຫ້ລູກເວົ້າເຖິງບັນຫາທີ່ເຂົາເຈົ້າເຈິຢູ່. (ອ່ານສຸພາສິດ 20:5) ສຳລັບພໍ່ແມ່ບາງຄົນຮູ້ສຶກວ່າ ຖ້າພາລູກໄປທ່ຽວຊົມທຳມະຊາດກໍຈະຊ່ວຍໃຫ້ງ່າຍຂຶ້ນທີ່ລູກຈະລະບາຍຄວາມຮູ້ສຶກອອກມາ. ຍ້ອນຫຍັງ? ເຫດຜົນໜຶ່ງກໍຄື ຕອນທີ່ໄປທ່ຽວນຳກັນເປັນຄອບຄົວ ສ່ວນຫຼາຍຈະບໍ່ຄ່ອຍມີຫຍັງມາລົບກວນເວລາທີ່ພໍ່ແມ່ຢູ່ກັບລູກ. ພໍ່ຄົນໜຶ່ງຢູ່ໄຕ້ຫວັນທີ່ຊື່ມາຊະຮິໂກະເວົ້າເຖິງອີກເຫດຜົນໜຶ່ງວ່າ: “ຕອນທີ່ພວກເຮົາໃຊ້ເວລານຳກັນກັບລູກພາລູກໄປປີນພູຫຼືຍ່າງຢູ່ແຄມທະເລ ຈະຊ່ວຍໃຫ້ເຂົາເຈົ້າຮູ້ສຶກຜ່ອນຄາຍແລະງ່າຍຂຶ້ນທີ່ຈະລະບາຍຄວາມຮູ້ສຶກໃຫ້ເຮົາຟັງ.” ຄັດຢາທີ່ເວົ້າເຖິງກ່ອນໜ້ານີ້ບອກວ່າ: “ຫຼັງຈາກເລີກໂຮງຮຽນ ແມ່ມັກຈະພາຂ້ອຍໄປຫຼິ້ນຢູ່ສວນສາທາລະນະທີ່ງາມໆ. ໃນບັນຍາກາດທີ່ສະຫງົບງຽບແບບນັ້ນເຮັດໃຫ້ງ່າຍຂຶ້ນທີ່ຂ້ອຍຈະບອກໃຫ້ແມ່ຮູ້ວ່າ ຂ້ອຍກັງວົນເລື່ອງຫຍັງ ແລະເຈິຫຍັງແດ່ຢູ່ໂຮງຮຽນ.”
16. ຄອບຄົວຈະຮູ້ສຶກມ່ວນແລະຜ່ອນຄາຍໄດ້ແນວໃດຕອນທີ່ໄປທ່ຽວຊົມທຳມະຊາດນຳກັນ?
16 ເມື່ອຄອບຄົວໄປທ່ຽວຊົມທຳມະຊາດນຳກັນຈະເຮັດໃຫ້ທຸກຄົນຮູ້ສຶກມ່ວນແລະຜ່ອນຄາຍແລະຈະເຮັດໃຫ້ຄອບຄົວສະໜິດກັນຫຼາຍຂຶ້ນ. ຄຳພີໄບເບິນບອກວ່າ “ມີເວລາຫົວ” ແລະ “ມີເວລາກະໂດດໂລດເຕັ້ນ.” (ຜູ້ປ. 3:1, 4, ລ.ມ.) ພະເຢໂຫວາສ້າງບ່ອນທີ່ງາມໆຫຼາຍບ່ອນເພື່ອໃຫ້ເຮົາເຮັດຫຼາຍຢ່າງທີ່ເຮັດໃຫ້ເຮົາມີຄວາມສຸກ. ຫຼາຍຄອບຄົວມັກຈະໄປທ່ຽວຊົມທຳມະຊາດນຳກັນ ເຊັ່ນ: ໄປຫຼິ້ນນ້ຳຕົກຕາດແລະໄປທ່ຽວທະເລ. ເດັກນ້ອຍບາງຄົນກໍມັກແລ່ນຫຼິ້ນຢູ່ສວນສາທາລະນະ ເບິ່ງສັດ ຫຼືໄປລອຍນ້ຳ. ເຮົາເຫັນວ່າມີຫຼາຍໂອກາດແທ້ໆທີ່ເຮົາຈະມີຄວາມສຸກກັບທຳມະຊາດແລະສິ່ງທີ່ພະເຢໂຫວາສ້າງທີ່ຢູ່ອ້ອມໂຕເຮົາ!
17. ເປັນຫຍັງພໍ່ແມ່ຄວນຈະຊ່ວຍລູກໃຫ້ມີຄວາມສຸກກັບສິ່ງທີ່ພະເຢໂຫວາສ້າງ?
17 ໃນໂລກໃໝ່ ພໍ່ແມ່ກັບລູກຈະມີຄວາມສຸກຫຼາຍທີ່ສຸດກັບສິ່ງທີ່ພະເຢໂຫວາສ້າງ. ໃນຕອນນັ້ນ ເຮົາຈະບໍ່ຕ້ອງຢ້ານສັດແລະສັດກໍບໍ່ຕ້ອງຢ້ານເຮົາ. (ອຊຢ. 11:6-9) ນອກຈາກນັ້ນ ເຮົາຈະມີຄວາມສຸກກັບສິ່ງທີ່ພະເຢໂຫວາສ້າງຕໍ່ໄປເລື້ອຍໆບໍ່ມີມື້ສິ້ນສຸດ. (ເພງ. 22:26) ແຕ່ຜູ້ທີ່ເປັນພໍ່ແມ່ ເຈົ້າບໍ່ຕ້ອງລໍຖ້າໃຫ້ຮອດມື້ນັ້ນກ່ອນຈຶ່ງຈະຊ່ວຍລູກໃຫ້ມີຄວາມສຸກກັບສິ່ງທີ່ພະເຢໂຫວາສ້າງ. ຖ້າເຈົ້າໃຊ້ສິ່ງທີ່ພະເຢໂຫວາສ້າງເພື່ອສອນລູກກ່ຽວກັບເພິ່ນຕັ້ງແຕ່ຕອນນີ້ ລູກກໍຈະຮູ້ສຶກຄືກັບກະສັດດາວິດທີ່ບອກວ່າ: “ພະເຢໂຫວາເອີ້ຍ . . . ສິ່ງທີ່ພະອົງເຮັດບໍ່ເຄີຍມີໃຜເຮັດໄດ້ເລີຍ.”—ເພງ. 86:8, ລ.ມ.
ເພງ 134 ລູກເປັນຂອງຂວັນຈາກພະເຈົ້າ
a ພີ່ນ້ອງຫຼາຍຄົນຍັງຈື່ໄດ້ດີວ່າຕອນທີ່ເຂົາເຈົ້າຍັງນ້ອຍ ເຂົາເຈົ້າມີຄວາມສຸກຫຼາຍຂະໜາດໃດທີ່ພໍ່ແມ່ພາໄປທ່ຽວຊົມທຳມະຊາດທີ່ສວຍງາມ. ເຂົາເຈົ້າຈື່ວ່າໃນຕອນນັ້ນພໍ່ແມ່ໃຊ້ສິ່ງທີ່ຢູ່ໃນທຳມະຊາດເພື່ອສອນເຂົາເຈົ້າເລື່ອງພະເຢໂຫວາ. ຖ້າເຈົ້າມີລູກ ເຈົ້າຈະໃຊ້ສິ່ງທີ່ຢູ່ໃນທຳມະຊາດເພື່ອສອນລູກແນວໃດກ່ຽວກັບຄຸນລັກສະນະຕ່າງໆຂອງພະເຢໂຫວາ? ເຮົາຈະມາເບິ່ງຄຳຕອບໃນບົດຄວາມນີ້.