Ya Ɣɛ Ga Jehova Na Siɛ-Pulu

Jehova wõini e kwɛ̃ɛ ɓɔɔ ga pagɔ. Zɛɓɛ ʋaa ma? É kwɛ̃ni ga ya faa lamaa maa wolina e vile na tuɓo-veleitiɛ va e vɛɛ na deʋei va nu ɓuse ʋaa ma, ya ɣɛ wõini ɓɔɔ e ɣɛ ga na siɛ-pulu. Ya zoo ɓɔɔ e ɣɛ ga Gala na siɛ-pulu? (Psalms 25:14 lodo.) Zɛɓɛi ɓɔɔ yà kɛ ga e ɣɛ ga na siɛ-pulu? Gala Kɔlɔi zaɓui lɛɛvɛ e kɛɛ da na ga Jehova na siɛ-pulu tevegɛ siɛ-pulu nɛpɛ ba da maa zɔlɔwo.

1. Zɛɓɛi Jehova wõini e kɛ?

“A lɔtɔ Gala ba. Wa na ɣɛɛ na towa lɔtɔ wo va.” (Jĩi 4:8) Nii zu-wulo-zu ɣa ga zɛɓɛ? Jehova wõini è ɣɛ ga na siɛ-pulu. Numaa taniga ta ɣɛ tea tɛ lɛ zooga tɔ ɣɛ ga Gala na siɛ-pulu ɓɔvɛlaale tɛ lɛ pɛtɛga. Niitiɛ ɓɔgapɛ manɛɛ de kwɛ̃ɛ e vile Jehova va ga de ɣɛ ga na siɛ-pulu, e dɛɛvɛ ga diɛ Gala Kɔlɔi zu. Ani da Gala na keela woitiɛ lodona Gala Kɔlɔi zu, siɛ-pului e de yɔɔzu da Jehova su ɣa ɓaa velei ɓalaa dɛ lɛ pɛtɛga la.

2. Zɛɓɛi e kɛɛ Jehova ga siɛ-pulu vagɔ e ʋaa ma?

Wõilai e Jehova ya e ʋaa ma tevegɛ wõilai nii va e numaa ya e ʋaa ma. É wõini kuuzu nɛɛ ɓɔɔɓɔɔ ge ɣɛ e ya. Na ɣa ɣɛɛna ya na faa ɓaasu e feli ga e ɓɔ e va. Ya “yii-zɛlɛ fai ɣaazɔ wu Gala ma, ɓɔvɛlaale [kpɛdɛvɛ é] ʋaa ma.” (1 Pite 5:7) Jehova ɣa na wɔ ga e ɓɔ na siɛ-puluitiɛ va, e te ɣaa-nɛkpɛ. Jehova ɣa wuito na siɛ-puluitiɛ ma.—Psalms 94:18, 19 lodo.

3. Zɛɓɛi Jehova wõini na siɛ-puluitiɛ te kɛ?

Wõila ɣa Jehova ya nu ɓɔgapɛ faa ma, “kɛ tele-bo tuo veaitiɛ ɣa te ga na siɛ-pulu.” (Proverbs 3:32) Jehova wõini na siɛ-puluitiɛ te ɣaa-ɓaa te niitiɛ ɣɛ e gaazu ga faa vagɔ. Na ɣa ɣɛɛna te wulu ɣaa ʋe niitiɛ va e gaazu ga faa yowũ. Numaa taniga ta ɣɛ tea, tɛ lɛ wɔlɔ-wɔlɔ zooga tɔ ziɛ ga Jehova na tɔgitiɛ e vile faa vagɔ ɓɔga faa yowũ va. Jehova ɣa nu maa wõi zo. Jehova ɣa yee zei niitiɛ wu wõila ɓɔɔɓɔɔ ge te ya faa ma, tiɛ ɣaa-ɓaa ga te zii-mai ɣɛ.—Psalms 147:11; Te Ɣɛɛ Ʋaitiɛ 10:34, 35.

FAA LAMAA MAA WOLI

4. Eeɓɔlɔhɛ̃ɛ ɣɛni ga Jehova na siɛ-pulu

Nii Gala Kɔlɔi boga e vile Eeɓɔlɔhɛ̃ɛ va (nii tɔ tili wɔnɔ ga Eeɓɔlɔ) towa ɓɔ de va de faa wɛ̃ɛ e vile nu ɣɛɛ ʋaa va ga Gala na siɛ-pulu. A Genesis 12:1-4 lodo, ga wo faa maa woli e vile Eeɓɔlɔhɛ̃ɛ va. Na ɣa ɣɛɛna wo gaa-zaɣa-kɛɛ niitiɛ ɣaa wote:

• Zɛɓɛi Jehova boni Eeɓɔlɔhɛ̃ɛ ma ga e kɛ?

• Zɛɓɛi Jehova ki-toni la?

• Zɛɓɛi Eeɓɔlɔhɛ̃ɛ kɛɛni tei Jehova faa taniga woni ma ga e kɛ?

5. Zɛɓɛi Jehova wõini na siɛ-puluitiɛ te kɛ

Da ɣɛ wõini da ziɛ-puluitiɛ te faa taniga ɣɛ.

• Faa taniga ta ga zɛɓɛ e wõini ya ziɛ-puluitiɛ te kɛ e vɛ?

A 1 Jɔ̃ 5:3 lodo, wo gaa-zaɣa-kɛɛ nii ɣaa wote:

• Zɛɓɛi Jehova wõini na siɛ-puluitiɛ te kɛ?

Ani de wõini de Jehova yii-mai ɣɛ, kɛni da luɓo-veleitiɛ maa ʋeli bo. A Isaiah 48:17, 18 lodo, wo gaa-zaɣa-kɛɛ nii ɣaa wote:

• Zɛɓɛi e kɛɛ Jehova ɣa bo na siɛ-puluitiɛ ma ga te luɓo-veleitiɛ maa ʋeli bo?

6. Zɛɓɛi Jehova ɣa kɛ na siɛ-puluitiɛ ʋaa ma?

ƲILIOGI: Jehova Faa Lamaa Ɣɛɛ Faa Ma (3:20)

• Jehova ɓɔni ɣɛ le ŋaza nui nii va ga e na ki-gaa-ziɛi maa ʋeli bo?

A Isaiah 41:10, 13 lodo, wo gaa-zaɣa-kɛɛ niitiɛ ɣaa wote:

• Zɛɓɛi Jehova na siɛ-puluitiɛ ɣi-toga la?

• E ɣisu Jehova ɣa ga siɛ-pulu vagɔ? Zɛɓɛi e kɛɛ yiɛ na wo?

7. Ga de ɣɛ ga Jehova na siɛ-pulu manɛɛ diɛ yɛpɛ pɔ diɛ wuito goi ma

Ani siɛ-pulu vea ta na yɛpɛzu ɣiini pɔ, towa ta ziɛ-pului zu-ɓaa. A Psalms 86:6, 11 lodo, wo gaa-zaɣa-kɛɛ niitiɛ ɣaa wote:

• Da leve ɣɛ le de yɛpɛ Jehova wɔ?

• Jehova ɣa yɛpɛ de wɔ ɣɛ le?

NII SA È MAA WOLIA

Jehova wõini e ɣɛ ga ya ziɛ-pulu, na ɣa ɣɛɛna tɔ vaazu ɓɔsu yiɛ.

Ma-ɓigitiɛ

• Jehova ɣa ɓɔ na siɛ-puluitiɛ va ɣɛ le?

• Zɛɓɛi e kɛɛ Jehova ɣa bo na siɛ-puluitiɛ ma ga te luɓo-veleitiɛ maa ʋeli bo?

• E ɣisu na ɓaavɛ ga de ɣɛ ga Jehova na siɛ-pulu? Zɛɓɛi e kɛɛ yiɛ na wo?

WƐLƐ FAA LAMAA VA

Ya ɣɛɛna ga Gala na siɛ-pulu, kulo su-nu-ma zɛɓɛi ya sɔlɔwo ya ŋeteai zu?

“Manɛɛ De Ɣaa-Ɓaa De —Jehova Wɛ̃ɛ” (The Watchtower, February 15, 2003)

Kwɛ̃ɛ velei ya ɣɛɛ la ga Gala na siɛ-pulu.

“Ga Leve Ɣɛ Le Ge Ɣɛ Ga Gala Na Siɛ-Pulu?” (Gaa-Zaɣa-Kɛɛ Nu Niinɛitiɛ Ta Bo—Gaa Wotegitiɛ Ya Ɓɔ Te Va, Fele kelei, toso 35)

Kwɛ̃ɛ velei ŋaza nui nii na ŋeteai maa ʋeli boni la ɓɔvɛlaale siɛ-pulu ɣa te yɔɔzu ta Jehova.

“Gɛlɛ Ɣɛni Wõini Gɔ Za!” (The Watchtower No. 1 2017)

Wuito nu niinɛi taniga ma te yɛpɛ e vile velei te ɣi-gaa-ziɛ zu la, e vile Jehova va.

Ga De Ɣɛ Ga Jehova Na Siɛ-Pulu, Su-Wulo-Zu Ɣa Ga Zɛɓɛ? (1:46)