KALABO 48
Kele-Ɣele Kulo Ya Ɣɛna Numaa Ɣɛɛzu Ga Ya Ziɛ-Pulua
Siɛ-pulu vagɔitiɛ ta kɛ kuuzu nɛɛ ɣɛ de ya. Na ɣa ɣɛɛna ta ɓɔ de va ani faa ɓaa ka laana de ma. Kɛ Gala Kɔlɔi de lɛnɛga ga nu ɓɔgapɛ taale te ga siɛ-pulu vagɔ. Ya leve sa ɣɛ le e siɛ-pulu vagɔ zɔlɔwo? Ɣi-gaa-ziɛ gaa-zaɣa-kɛɛ niitiɛ ma.
1. Taitiɛ ya te ɣɛ ga ya ziɛ-pulua ta faa vɛɛ e va ɣɛ le?
Na lɛ ɓaani ga de ɣɛ ga numai niitiɛ ɣavele da tiɛni da siɛ tamaa ziɣi kii-ma. Ta kɛ tanisu de luɓo-velei va ɔɔ e yowũ. Nii ɣa ga gaama ani ɓalaa a da tiɛni a da siɛ siɣina kii-ma ŋada gila ɔɔ fãga-wɔlɔi ma. Gala Kɔlɔi ɣɛ, “nui ta kele-ɣele nu ta ziɛ towa ɣele-ɣele kɛ nui ya titi nu ɣɛ ga na siɛ-pulu [nui wõila lɛ zeea Jehova ʋaa ma] towa zii zuuli maa zɔlɔwo.” (Proverbs 13:20) Siɛ-pului niitiɛ wõila te ya Jehova ʋaa ma tiɛ zii-mai ɣɛ ta ɓɔ e va e lɔtɔ ba e deʋe vagɔ wo. Kɛ taitiɛ tɛ lɛ Jehova ʋelizu ani da te ɣɛɛna ga da ziɛ-pulua ta kɛ de maa wooza Jehova va. Nii ɣa e kɛɛ Gala Kɔlɔi boga ga, de kele-ɣele kulo ani da ɣɛna nu ɣɛɛzu ga da siɛ-pulu. Ani wõila ɣa da siɛ-puluitiɛ ya Gala faa ma da wulo su-nu-ma, ta ɓalaa ta wulo su-nu-ma. Gala Kɔlɔi ɣɛ “a wiɛ ɣiini zii lɔ wiɛ ɣiini maʋaa li ga zee luo vele ŋeteai zu.”—1 Tɛsɛlonaikaitiɛ 5:11.
2. Jehova ɣa ɣi-gaa-ziɛ ɣɛ le e vile niitiɛ va yà te ɣɛ ga ya ziɛ-pulua?
Jehova kwɛ̃ni taitiɛ yá te ɣɛ ga na siɛ-pulua. “Tele-bo tuo veaitiɛ ka te ga na siɛ-pulua.” (Proverbs 3:32) Jehova ɣa ɣi-gaa-ziɛ ɣɛ le ani da numaa ɣɛɛna ga da ziɛ-pulua tɔwɔ wõila lɛ te ya faa ma? Zii ɣa zuuli ɓɔɔ ga ʋikee! (Jĩi 4:4 lodo.) Kɛ taitiɛ wõila te ya Jehova ʋaa ma da te ɣɛɛna ga da ziɛ-pulua diɛ wulu ɣaa ʋe niitiɛ va wõila lɛ te ya faa ma kuuzu ɣa nɛɛ. Na ɣa ɣɛɛna towa de ɣɛ ga na siɛ-pulu.—Psalm 15:1-4.
FAA LAMAA MAA WOLI
Taitiɛ wõila te ya Jehova ʋaa ma wɛlɛ zaɓui va e kɛɛ manɛɛ de te ɣɛ ga da ziɛ-pulua. Wɛlɛ wɔnɔ velei va da ɣaa-ɓaa la ga de da ziɛ-pului zu-ɓaa de yɔɔzu da tiɛni e vɛɛ kulo su-nu-mai va da maa zɔlɔwo.
3. Mɛlɛ vile siɛ-pulu yowũ wulu
Taitiɛ wõila lɛ te ya Gala faa ma tɛ lɛ ziɛzu wɔnɔ ga na tɔgitiɛ ta ga siɛ-pulu yowũa. ƲILIOGI nii lɛ ga. Yá wolona, wo gaa-zaɣa-kɛɛ niitiɛ ɣaa wote.
Ani dɛ lɛ daani ma da vile siɛ-pulu yowũ wulu ɣɛ le?
A 1 Kɔlĩitiɛ 15:33 lodo, wo gaa-zaɣa-kɛɛ niitiɛ ɣaa wote:
Ɓɛɛ ɣa e ga siɛ-pulu yowũ? Zɛɓɛi e kɛɛ yiɛ na wo?
A Psalms 119:63 lodo, wo gaa-zaɣa-kɛɛ nii ɣaa wote:
Tuɓo-veleitiɛ ta ga zɛɓɛ manɛɛ e ɣɛ ya ziɛ-puluitiɛ ya?
Siɛ-pulu yowũi ɣa siɛ-pulu vagɔi ŋala-ŋala. Siɛ-pulu yowũ gila ɣa faa vɛɛ e va ɣɛ le?
4. Taitiɛ ɓalaa da tiɛni dɛ lɛ ga tii ta ɣɛ ga siɛ-pulu vagɔ de ʋaa ma
Gala Kɔlɔi yɛpɛvɛ e vile Deeve ɓɔga Jɔnitɔ̃ va. Zinaa felegɔi niitiɛ te ɣɛni Yezɔi wɔlɔ-wɔlɔi zu. Velei ɓalaa tɛ lɛ ɣɛni la ga tii, ta ziɛ-pului zu-ɓai ɓɔɔ e ɣɛni. A 1 Samuel 18:1 lodo, wo gaa-zaɣa-kɛɛ nii ɣaa wote:
Zɛɓɛi e kɛɛ maa lɛ nɛɛni da ziɛ-puluitiɛ te ɣɛ nɔ ga niitiɛ da tiɛni de ga tii ɔɔ de wuloai ga vɛ?
A Loomɛitiɛ 1:11, 12 lodo, wo gaa-zaɣa-kɛɛ nii ɣaa wote:
Siɛ-pului niitiɛ wõila te ya Jehova ʋaa ma ta leve ɣɛ le te ɣiini zii-lɔɔ?
Ʋiliogi nii zu wɛlɛ velei de ɣaa yɔwɔ̃i siɛ-pulu maa zɔlɔwoni la vɛ ki gɛ lɛ ɣɛni na va. ƲILIOGI nii lɛ ga. Yá wolona, wo gaa-zaɣa-kɛɛ nii ɣaa wote.
Ʋiliogi nii zu, zɛɓɛi e kɛɛ Akil ɣaa veaitiɛ te ɣɛni ɣi-gaa-ziɛzu e vile siɛ-pului nii va e ɣɛni zeea kɔlɔ vɛlɛi la?
Zɛɓɛi e kɛɛni e ɣɛni wõini ɓɔɔ ga siɛ-pului natiɛ?
Zɛɓɛi e ɓɔni ba ga maa mɛlɛ wõi?
5. Velei ya siɛ-pulu vagɔ maa zɔlɔwo la
Kwɛ̃ɛ velei ya siɛ-pulu vagɔ maa zɔlɔwo la ta velei ya ɓɔɔ ya ɣɛɛ la ga siɛ-pulu vagɔ. ƲILIOGI nii lɛ ga.
A Proverbs 18:24 ɓɔga 27:17 lodo, wo gaa-zaɣa-kɛɛ niitiɛ ɣa wote:
Siɛ-pulu vagɔitiɛ ta ɓɔ ɣiini ba ɣɛ le?
Siɛ-pulu vagɔi nii ta ɣa e ya? Ani ta lɛ e ya, ya leve ɣɛ le e ta maa zɔlɔwo?
A Felepaitiɛ 2:4 lodo, wo gaa-zaɣa-kɛɛ nii ɣaa wote:
Ani e wõini e siɛ-pulu vagɔ maa zɔlɔwo manɛɛ ya ɓalaa e ɣɛ ga siɛ-pulu vagɔ. Ya leve ɣɛ le e nii ɣɛ?
Ani e wõini e siɛ-pulu vagɔ maa zɔlɔwo manɛɛ e ɣaa-ɓaa e ɣɛ ga siɛ-pulu vagɔ
NUMAA TANIGA TA ƔƐ TEA: “Ani siɛ-pulu lɛ e ya manɛɛ e nu ta nɛpɛ ɣɛ ga ya ziɛ-pulu.”
Zɛɓɛi e ga yɛdɔ ɣi-gaa-ziɛi?
NII SA È MAA WOLIA
Ani da tuɓo-vele vagɔ vea ɣɛɛna ga da ziɛ-pulua, da Jehova wuuzu nɛɛ na ɣa ɣɛɛna da wulo su-nu-ma.
Ma-ɓigitiɛ
Taitiɛ da te ɣɛ ga da ziɛ-pulua zɛɓɛi e kɛɛ e ga faa ɓi Jehova ɣaazu?
Ɓɛɛni ka dɛ lɛ ga dɔ te ɣɛ ga da ziɛ-pulua?
Da leve ɣɛ le de tuɓo-vele vagɔ veaitiɛ ɣɛ ga da ziɛ-pulua?
WƐLƐ FAA LAMAA VA
Wɛlɛ velei siɛ-pulu vagɔitiɛ ta ɓɔ la de va ani faa ɓaa ka laana de ma.
Wɛlɛ faa taniga va yà kɛ ga e siɛ-pulu vagɔ maa zɔlɔwo.
Zɛɓɛi manɛɛ e kwɛ̃ɛ e vile fãga-wɔlɔi ma ziɛ-puluitiɛ va?
Po-kɔ̃ɔ-mai nii zu “Ge Ɣɛni Keea Wõi Wulozu,” wɛlɛ nii va e ɓɔni zunu gila ba ga e na siɛ-puluitiɛ maa ʋeli.
“Gala Kɔlɔi Ɣa Da Ŋeteai Maa Ʋeli Bo” (The Watchtower, April 1, 2012)