MAA WOLI WƆLƆ ZƐVƐI 43
GUI 41 Please Hear My Prayer
Yiɛ Gala Feli Numaa Ɓalaaga Ʋaa Ma
“ A wiɛ Gala feli ɣiini faa ma. . . Tele-bo tuo-wo nui na Gala-feliai wala ɣaa ɣa su-ʋai-ɣɛɛ ʋai zu.”—JĨI 5:16.
MA-ƁIGITIƐ
Da vaazu yɛpɛzu e vile zaɓui va e kɛɛ e ga faa vagɔ ga de Gala feli numaa ɓalaaga ʋaa ma, ta velei da kɛɛ la.
1. De levegɛ ɣɛ le de kwɛ̃ɛ ga da Ɣala-feliai ɣa ga faa ɓi Jehova ɣaazu?
GALA-FELIAI ɣa ga faa nɛɛ kuloai Jehova ya. Ɣi-gaa-ziɛ nɔ, Jehova tii taniga ʋeevɛ na keelaitiɛ ya. (Ps. 91:11) Na ɣa ɣɛɛna, e tii ʋeevɛ wɔnɔ dui ya maa viiyai (Maf. 28:18) Kɛ, ɓɛɛ ɣa ya wuito da Ɣala-feliai ma? Jehova nɔ ɣa ya wuito da Ɣala-felaitiɛ ma. Towa, “ya wuito Gala feli woitiɛ ma,” tɔ ɣagi ɣa ya wuito da Ɣala-feliai ma.—Ps. 65:2.
2. Po-kɔ̃ɔ-ma zɛɓɛi Pɔɔ seini e vile Gala feli ʋaa va?
2 Velei ɓalaa da yɛpɛ la Jehova wɔ e vile niitiɛ ɓɔgapɛ ba te de ɣigii zu, maa nɛɛ diɛ Gala feli numaa ɓalaaga ʋaa ma. Na ɣa Pɔɔ kɛɛni. Ma wo-kɔ̃ɔ-mai ta ɣa ga, e kɔlɔ wonɛni de ɣaa yɔwɔ̃itiɛ wɔ te ɣɛni Ɛfɛsɔ: “Gɛ̀ lɛ ɓɔlɔga Gala mamaga va wo ʋaa ma.” (Ɛfɛ. 1:16) Pɔɔ Gala felini ɓalaa numaa taniga ʋaa ma. Ma wo-kɔ̃ɔ-mai ta ɣa ga, e ɣɛni Temete ma: “È laa ɣi ka ɣɛ na loozu gà ti-ti nà Gala-feliai zu, nà Galagi nii gè tii ɣɛɛzu bɛ́ ga yii zu wodoa è ɣɛ velei màma gwɔlɔni te kɛɛni la, . .gà mama fe bɛ́ .” (2 Tem. 1:3) Pɔɔ ɣɛni levesu faa ɓaasu ga ɔ Gala feli e vile ba . (2 Kɔl. 11:23; 12:7, 8) Kɛ, e siɛ siɣini ba dɛ ga e Gala feli numaa ɓalaaga ʋaa ma.
3. Zɛɓɛi e kɛɛ tanisu na ɣa ɓaa ga de Gala feli numaa ɓalaaga ʋaa ma?
3 Tanisu da yeema ga de Gala feli numaa ɓalaaga ʋaa ma. Zɛɓɛi e kɛɛ na ɣa ɣɛ? De ɣaa yɔwɔ̃i nii da ga Sabrinaa e zaɓu gila lɛɛvɛ. E ɣɛni tea: “Ŋetea ɣaa ɓelagi nii zu, tii wala lamagɛ de ma. Da ɣaazu ɓado niitiɛ va te ɣɛɛzu ga diɛ e kɛ na ɓaa ga de Gala feli numaa ɓalaaga ʋaa ma.” Na ɣavele ʋai ta ɣɛɛ dɛ ga yiɛ? Ani vele ɣana e la, kɔlɔ zɛvɛi nii ɣa ɓɔ e va. Tɔ vaazu (1) zaɓui lɛɛzu e kɛɛ e ga faa ɓi ga diɛ Gala feli numaa ʋaa ma, na ɣa ɣɛɛna e (2) yɛpɛ e vile velei va ya kɛɛ la.
ZƐƁƐI E KƐƐ MAA NƐƐ DIƐ GALA FELI NUMAA ƲAA MA?
4-5. Ani da Gala felina numaa ʋaa ma gwala ɣaa ɣa ɓaa ɣɛ le? (Jĩi 5:16)
4 Da ɣɛna Gala felizu numaa ʋaa ma gwala ɣaa ɣa ɓaa. (Jĩi 5:16 lodo.) Ani da ɣɛna Gala felizu numaa ʋaa ma, naa ɣa ɓɔ te va? Ooi, towa ɓɔ te va. Ziizɛ ɣɛni kwɛ̃ni ga na kala dopoi Pite ɣɛni sa vaazu sakpɛ su, na ma e ɣɛni tea: “Kɛ̀ gè Gala felia è maʋaa ma ga è mɛ lɛ ɣale ná wu.” (Luki 22:32) Pɔɔ ɣɛni kwɛ̃ni ga Gala-feliai ɣa ɓɔ nu va. Tei te zɛɛ ʋaa vɛɛni ma te pili kpidi vɛlɛ wu Loomɛ, e Kɔlɔ wonɛni Failimɔ wɔ e ɣɛ maa: “kì ka ba ga wa Ɣala-feliai zaala zu Gala ka ʋa bu wiɛ ga gè va wo wɔ.” (Fai. 22; wɛlɛ study note “for I am hoping that through your prayers.”) Na nɔ ɣa e ɣɛɛni, te Pɔɔ wuloni kpidi vɛlɛ wu na ɣa ɣɛɛna e na Gala Goo wogai lɔɔ-zei wɔnɔ.
5 Nii lɛ dɛɛzu ga da Jehova ʋelina, kɛni nɔ e nii ɣɛ de bosu ma. Jehova kwɛ̃ni nii feli veaitiɛ te felizu ma, na ɣa ɣɛɛna ma ziɛ vagɔi ma towa deʋe ga e gaa wote. Tei de nii wɛ̃ɛga towa ɓɔ de va de Jehova ʋeli e vile faa nɛpɛ ba. Na ɣa ɣɛɛna de laala ga towa fai na ɣaa wulo ba ma ziɛ vagɔi ma.—Ps. 37:5; wɛlɛ 2 Kɔlĩitiɛ 1:11 e vɛɛ nii va, study notes.
6. Ani da ɣɛna Gala felizu numaa ʋaa ma, na ɣa ɓɔ de va ɣɛ le? (1 Pite 3:8)
6 Da ɣɛna Gala felizu numaa ʋaa ma na ɣa kɛ nu “ maa-wõi ɣɛ de ma.” (1 Pite 3:8 lodo.) Nu maa-wõi ɣɛɛ, zu-wulo zu ɣa ga e wɛlɛ daa-nɔwɔ-wogi va nui ta levesu su na ɣa ɣɛɛna e wõi ga e ɓɔ manui va. (Maki 1:40, 41) Michael nii e ga kuuwu wũ-tuo nu e ɣɛni tea: “Ani ga Gala felina e vile niitiɛ va numaa ɓalaaga te levesu su, na ɣa ɓɔ ba ge kwɛ̃ɛ nii te levesu su, tɔwɔ na ɣa kɛ wõilai e zeea te ʋaa ma su wɔɔlɔ. Ga lɔtɔ te va velei ɓalaa tɛ lɛ zaɓui wɛ̃ɛ ga la.” Richard nii e ga kuuwu wũ-tuo nui ta e yɛpɛvɛ e vile maa wulo-nu-mai ta va wɔnɔ. E ɣɛ: “Ani da Gala feli na nu ʋaa ma, da wõi ga de faa ɣɛ ga de ɓɔ manui va.” E ɣɛni wɔnɔ tea: “Ani da pele ɣaa ziɛna ga de ɓɔ nui nii va de Gala felia maʋaa ma, a kɛti kpɔbai de feezu tɔ sa da Ɣala-feliai ɣaa wotesu manui ʋaa ma.”
7. Ani da ɣɛna Gala felizu numaa ʋaa ma, towa ɓɔ de va ɣɛ le? (Felepaitiɛ 2:3, 4) (Wɛlɛ ɓalaa footeitiɛ va.)
7 Ani da ɣɛna Gala felizu numaa ʋaa ma towa kɛ dɛ lɛ ɣaazu ɓadoga nɔ nii va de levesu su. (Felepaitiɛ 2:3, 4 lodo.) De ɓɔgapɛ da leve faa ɓaa tamaa zu, zaɓui ɣa ga Dɛvelei ɣa e zui nii leʋezu. (1 Jɔ̃ 5:19; Faa. 12:12) Ani da ɣaa ɓaana diɛ Gala feli numaa ʋaa ma, da kwɛ̃ɛ ga “de vaitiɛ te zui wɔlɔ-kɔlɔ ma ɣaali ta daa-nɔwɔ-wo sii ɣilagi nii wosu.” (1 Pite. 5:9) Katherine nii e ga panɛ̃itiɛ te ta, e ɣɛni tea: “Ga ɣɛna Gala felizu numaa ʋaa ma, towa ɓɔ ba ge kwɛ̃ɛ ga ta ɓalaa ta levesu faa baa su. Tɔwɔ, na ɓɔga ba ge kwɛ̃ɛ ga ge mɛ lɛ ɣi-gaa-ziɛ ga ʋike e vile faa ɓaagitiɛ va ge levesu su.”
Ani da ɣɛna Gala feli zu numaa ɓalaaga ʋaa ma, towa kɛ dɛ lɛ ɣi-gaa-ziɛa ga ʋike nii ma de levesu su (Wɛlɛ palega 7 va)d
MAA NƐƐ DE GALA FELI TE ƲAA MA
8. Ɓɛɛni ka wɔnɔ da Gala feli te ʋaa ma?
8 Ɓɛɛni ka maa nɛɛ wɔnɔ da Gala feli te ʋaa ma? A da Gala feli nu lamaa ʋaa ma—te taniga ta ga, taitiɛ te zeeɓɛzu, nu niinɛitiɛ ta ŋɛɛ te ma na ɣa ɣɛɛna tiɛ ɓoei te la kɔlɔ vɛlɛi la, ɔɔ niitiɛ te wɔlɔ-zaɣagɛi. De ɣaa yɔwɔ̃ lamaa ta te laa-nɔwɔ-wosu ga tei te ga Jehova ʋeli vea, tanisu tɔwa ɣɛ ga ta ɣaalai zu ɔɔ gɔmɛtitiɛ. (Maf. 10:18, 36; Te Ɣɛɛ Ʋaitiɛ 12:5) De ɣaa yɔwɔ̃ taniga te wuloa ta vɛlɛitiɛ la ga te li ŋada ɓalaa, zaɓui ɣa ga ta ŋapi wɔɔzu ta yui zu. Faa yowũi niitiɛ ta ɣɛ ɓɔɔ yee ma te kɛɛ de ɣaa yɔwɔ̃ lamaa tiɛ laa-nɔwɔ-wo. Tanisu dɛ lɛ de ɣaa yɔwɔ̃ nii ɣile-giledaitiɛ wɛ̃ɛga, kɛ ani da Gala feli na te ʋaa ma, da dɛ ga da ziɛ zu ga nii Ziizɛ boni ga “wõila ɣɛ de ya ɣiini faa ma.”—Jɔ̃ 13:34.
9. Wũ-tuo veaitiɛ te Jehova na ɓulugi zu, zɛɓɛi e kɛɛ maa nɛɛ de Gala feli te ʋaa ma e vɛɛ te ŋazaitiɛ va?
9 Da Gala feli wɔnɔ wũ-tuo veaitiɛ faa ma Jehova na ɓulugi zu. Natiɛ ta ga, Gala Goo Wotii Maazu Vɛtɛ Veaitiɛ e vɛɛ ta ɓɔ ba veaitiɛ va, Ofisii Maazu Vɛtɛ Veaitiɛ, niitiɛ te tii taniga wũ-tuo ofisii la, Sakiu Owɔsiɛitiɛ, kuuwu wũ-tuo veaitiɛ, e vɛɛ kuuwu wũ-tuo veaitiɛ ta ɓɔ ba veaitiɛ va. De ɣaa yɔwɔ̃i niitiɛ te lamaa ta levesu faa ɓaa tamaa zu, velei ɓalaa te ɓɔsu la de va. (2 Kɔl. 12:15) Ma wo-kɔ̃ɔ-mai ta ɣa ga, Sakiu Owɔsiɛ nii daa ga Maki e ɣɛni tea: “Fai nii ɓɔɔ e ɓaani zee ma e ɣɛni ga tei ge maa woozani kaa veai niitiɛ va te wɔlɔ-zaɣagɛi e ɣɛni. Na ɣa ɣɛɛna, te nu felegɔ pɛ ta zeeɓɛzu. Velei ɓalaa na seelai ɓɔga pɔɔ nu te ɣaa ɓaazu la te ma, tanisu towa zii zuuli ga velei gɛ lɛ te woba la ga gɔ ɓɔ te va.” Ani ɓalaa dɛ lɛ niitiɛ ɓɔgapɛ kwɛ̃ni de ɣaa yɔwɔ̃i niitiɛ te levesu su, towa ɣɛ ga faa vagɔ ga diɛ Gala feli te vɛ. (1 Tɛsɛ. 5:12, 13) Maa nɛɛ ɓalaa diɛ Gala feli de ɣaa yɔwɔ̃i niitiɛ te ŋazaitiɛ ʋaa ma, zaɓui ɣa ga ta ɓɔsu te zinaitiɛ va ga natiɛ te ɣaa-ɓaa ta lii ma.
10-11. Da ɣɛna Gala felizu de ɣaa yɔwɔ̃itiɛ ɓɔgapɛ faa ma, towa Jehova yii-la? Yɛpɛ e vile ba.
10 E ɣɛ velei de maa wolia la, da Gala feli de ɣaa yɔwɔ̃ lamaa vɛ. Ma wo-kɔ̃ɔ-mai ta ɣa ga, ani ɓalaa dɛ lɛ manui wɛ̃ɛni, da Jehova ʋeli ga e ɓɔ de ɣaa yɔwɔ̃i niitiɛ va te kpidi vɛlɛ wu ɔ ga e niitiɛ ɣaa-nɛkpɛ te wõila nu zaa. Kuuwu wũ-tuo nui nii daa ga Donald e ɣɛ, “De kwɛ̃ni ga de ɣaa yɔwɔ̃ lamaa ta levesu faa ɓaa tamaa zu tɔwɔ na ɣa kɛ de Gala feli te ɓɔgapɛ faa ma e vɛɛ niitiɛ va te laa-nɔwɔ-wozu.”
11 E ɣisu Jehova ɣa yee zei Gala-feliai nii mazii ta wu? Ooi! Zaɓui ɣa ga dɛ lɛ niitiɛ ɓɔgapɛ kwɛ̃ni de ɣaa yɔwɔ̃itiɛ te ɓɛdɛɛ ma. Na ma, towa ɣɛ ga faa vagɔ ga e Gala feli de ɣaa yɔwɔ̃tiɛ ɓɔgapɛ faa ma (Jɔ̃ 17:20; Ɛfɛ. 6:18) Gala-feliai niitiɛ ta dɛ ga wõila ɣa de ya de vaitiɛ faa ma.—1 Pite 2:17.
ƔA ƔƐƐNA GALA FELI ZU NU ƲAA MA
12. Ani da ɣɛna ga nu maa ɓɛɛ nu na ɣa ɓɔ de va ɣɛ le de kwɛ̃ɛ nii da bo da Ɣala-feliai zu?
12 Ɣɛ ga nu maa ɓɛɛ nu. E wulo velei wulu da Gala feli la de ɣaa yɔwɔ̃itiɛ ʋaa ma, tɔ ga faa vagɔ ga diɛ ta laa-zeigitiɛ lili da ɣɛna Gala felizu te vɛ. Nui ta ɣa ya wuuwui zu e zɛɛɓɛzu ga ʋike? Nu niinɛi ta ɣa ya wuuwui zu zii yɛ zuuli ga tei baitiɛ tiɛ ɓoei da kɔlɔ vɛlɛi la? Duu keea ɔɔ duu dee ta ɣa ya wuuwui zu yiɛ ɣaa-ɓaa ga e dui wulosu Jehova na tuoi zu? (Ɛfɛ. 6:4) Ani ya ɣɛna ga nu maa ɓɛɛ nu, na ɣa kɛ wõila ɣɛ e ya te ʋaa ma, tɔwɔ na ɣa kɛ e wõi ga yiɛ Gala feli te vɛ.b—Loo. 12:15.
13. Da Gala feli niitiɛ vɛ ɣɛ le dɛ lɛ te wɛ̃ni?
13 Ya ɣɛna Gala felizu numaa vɛ, yiɛ ta laa-zeigitiɛ tili. Da Gala feli ɓalaa niitiɛ ʋaa ma dɛ lɛ dɛ te vɛtɛni. Ma wo-kɔ̃ɔ-mai ta ɣa ga, ɣi-gaa-ziɛ nɔ de ɣaa yɔwɔ̃i niitiɛ ma te kpidi vɛlɛ wu Crimea, Eritrea, Russia, e vɛɛ Singapore va. Ya liina jw.org ʋãga wɔlɔi ma, de ɣaa yɔwɔ̃i niitiɛ te kpidi vɛlɛ wu, ya ta laa-zeigitiɛ vɛtɛ.cBrian nii e ga Sakiu Owɔsiɛ e ɣɛ: “Ge wɛlɛɛ na va ga, ga de ɣaa yɔwɔ̃i ta na daa-zeigi wonɛ na e kpidi vɛlɛ wu, na ɣa ɣɛɛna giɛ tili ga wo wala, towa kɛ ga ɣɛna Gala feli zu gɛ lɛ yeema manui ma.”
14-15. Da leve ɣɛ le de kwɛ̃ɛ nii da Gala feli e vile ba?
14 Kwɛ̃ɛ nii ya Gala feli e vile ba. Michael nii nɔ de yɛpɛi e vile ba boga ga: “Ga kɔlɔ lodo jw.org ʋãga wɔlɔi ma e vile de ɣaa yɔwɔ̃itiɛ va te kpidi vɛlɛ wu. Na ɣa ɣɛɛna ga ɣaa-ɓaa sa ge ɣi-gaa-ziɛ ga ani na ɣa ge ɣɛni fai nii zu gɔ ɣi gaa-ziɛ ɣɛ le. Ge kwɛ̃ni ga gɔ ɣi-gaa-ziɛ e vile ŋazai va, na ɣa ɣɛɛna gɔ ɣaa-ɓaa ga ge niitiɛ maa zɔlɔwo wõi ŋazai ma. Na ɣa ɓɔ ba ge kwɛ̃ɛ nii ga bo na Gala-feliai zu e vile de ɣaa yɔwɔ̃i niitiɛ va te kpidi vɛlɛ wu te ga ʋulu vea.”—Hii. 13:3, ftn.
15 Ani da ɣi-gaa-ziɛ na niitiɛ ma de ɣaa yɔwɔ̃itiɛ ta levesu kpidi vɛlɛi wu, na ɣa ɓɔ de va wɔnɔ de kwɛ̃ɛ nii da Gala feli e vile ba. Ma wo-kɔ̃ɔ-mai ta ɣa ga, da Gala feli ga niitiɛ te kpidi vɛlɛi maazu vɛtɛ su te de ɣaa yɔwɔ̃itiɛ zo ga pagɔ. Na ɣa ɣɛɛna niitiɛ te ga gɔmɛti wũ-tuo vea te ɓe de ɣaa yɔwɔ̃itiɛ va te Jehova ʋeli zii-laa zu. (1 Tem. 2:1, 2) Da Gala feli ga de ɣaa yɔwɔ̃itiɛ te kpidi vɛlɛ wu ta wo-kɔ̃ɔ-mai ɓɔ kuuwuitiɛ va ɔ ga te luɓo-velei vagɔi ɓɔ niitiɛ va tɛ lɛ Jehova ʋelizu ga te wuito keela woo vagɔi ma. (1 Pite 2:12) Da zoo de fai nii mazii ta ɣɛ ani da ɣɛna Gala felizu de ɣaa yɔwɔ̃i niitiɛ ʋaa ma te levesu faa ɓaasu. Ani da ɣɛna ga nu maa ɓɛɛ vea, diɛ Gala feli de ɣaa yɔwɔ̃itiɛ ʋaa ma, diɛ ta laa-zeigitiɛ lili, na ɣa ɣɛɛna de kwɛ̃ɛ niitiɛ da Gala feli e vile ba, a kɛti da “wɔɔlɔ zu wõila zu é de ya ɣiini faa má.”—1 Tɛsɛ. 3:12.
KI-GAA-ZIƐ VAGƆ ƔƐ E YA E VILE GALA FELI ƲAA VA
16. Da leve ɣɛ le ki-gaa-ziɛ vagɔ ɣɛ de ya e vile Gala feli vaa va? (Mafiyu 6:8)
16 E ɣɛ velei de maa wolia la, ani da Gala feli na numaa ʋaa ma towa ɓɔ te va. Na ɓalaa ɣɛɛvɛ, maa nɛɛ ki-gaa-ziɛ vagɔ ɣɛ de ya e vile Gala feli ʋaa va. Da ɣɛna Gala felizu, ɛ lɛ ga da ɣɛ Jehova ɣi-daa-wodo zu e vile fai ta va lɛ kwɛ̃ni; ɔ nɔ ɣɛ ga da tɛnɛ feezu zeea ga velei maa nɛɛ e fai na ɣaa wulo la ba. Jehova ɣa nii wɛ̃ɛ ma ɓɛdɛ feli veaitiɛ ma—to mu—tɔ vɛɛ bo su ma. (Mafiyu 6:8 lodo.) Zɛɓɛi sa e kɛɛ maa nɛɛ de Gala feli numaa ʋaa ma? E wulo zaɓuitiɛ wulu de yɛpɛi e vile ba kɔlɔ zɛvɛi nii zu, towa dɛ ga de ɓɛdɛvɛ numaa ʋaa ma. Wõilai ɣa kɛ de Gala feli ɣiini faa ma. Tɔwɔ, Jehova wuuzu ɣa nɛɛ ani towa de vɛtɛ na diɛ vile kɔwɔ wogi zu.
17-18. Da Ɣala-feliai de ɣaa yɔwɔ̃itiɛ faa ma, maʋaa wulo vɛ ɣɛ le?
17 Ani ɓalaa da Ɣala-feliai maʋaa ɣa wulona e ɣɛ lɛ ɓɔsu de ɣaa yɔwɔ̃itiɛ va, towa dɛ ga wõila ɣa de ya de ɣaa yɔwɔ̃itiɛ ʋaa ma. Tɔwɔ, Jehova wuuzu ɣa nɛɛ na ʋaa ma. De wɛlɛ po-kɔ̃ɔ-mai nii va: Ɣi-gaa-ziɛ kaalai nii ma lopaa ge te ya—zunu lui e vɛɛ na seelai va. Zunu lui zeeɓɛɛ e laani. Na seelai li yiɛ peeʋe te ɣeea vɛ, yiɛ ɣɛ ma: “e veevɛ ɓɔ diɛ va, tɔ zeeɓɛzu ga ʋike!” Te ɣeea faa ɣɛɛ sa ga e ɓɔ dui va; wõila ɣa zeea dui ʋaa ma na ɣa ɣɛɛna tɔ na zosu ga pagɔ. Te ɣeea wuuzu ɣa nɛɛ ani towa wɛlɛna velei va lopoi na dɛɛzu la ga wõila ɣa zeea diɛ ʋaa ma.
18 Na ɣa Jehova bosu de ma ga de kɛ—ga de ɣaa-ɓaa ɣiini ma na ɣa ɣɛɛna diɛ Gala feli ɣiini faa ma. Ani da na ɣɛɛna, da dɛ ga dɛ lɛ nɔ ɓɛdɛni ɓɔɔ ʋaa ma kɛ wõila ɣa de ya de ɣaa yɔwɔ̃itiɛ ʋaa ma. Tɔwɔ, Jehova ɣi ka yɛsu. (2 Tɛsɛ. 1:3; Hii. 6:10) Na ɣa ɣɛɛna, e ɣɛ velei nɔ de maa wolia la ani da Gala feli na numaa ʋaa ma tanisu towa ɓɔ te va. Zaɓui niitiɛ ʋaa ma de ɣaa-ɓaa diɛ Gala feli ɣiini faa ma.
GUI 101 Working Together in Unity
a Te daa-zeigi taniga maa ʋeli boga.
b Li jw.org ʋãga wɔlɔi ma e wɛlɛ ʋiliogi nii va Takeshi Shimizu: Jehovah Is the “Hearer of Prayer.”
c De ɣaa yɔwɔ̃itiɛ te kpidi vɛlɛ wu ga e wɛlɛ ta laa-zeigitiɛ va li jw.org ʋãga wɔlɔi ma“Jehovah’s Witnesses Imprisoned for Their Faith—By Location.”
d NIITIƐ PONƐƐ E VILE FOOTEI VA: De ɣaa yɔwɔ̃i niitiɛ ta levesu faa ɓaa tamaa zu, kɛ ta dɛ Gala feli zu numaa ɓalaaga ʋaa ma.