Mwa Ku Fumanela Bulapeli Bwa Niti

Haiba mu bata ku ba mulikan’a Mulimu, mu lukela ku latelela bulapeli bw’a lumeleza Mulimu. Jesu n’a ize “balapeli ba niti” ne ba ka lapela Mulimu “ka niti.” (Joani 4:23, 24) Nzila ya ku lapela Mulimu ka yona ki i liñwi fela. (Maefese 4:4-6) Bulapeli bwa niti bu libisa kwa bupilo bo bu sa feli, mi bulapeli bwa buhata bu libisa kwa sinyeho.—Mateu 7:13, 14.

Mwa kona ku ziba bulapeli bwa niti ka ku bonisisa batu ba ba bu latelela. Bakeñisa kuli Jehova ki yo munde, balapeli ba hae ba niti ba lukela ku ba batu ba bande. Sina kota ye nde ya olonji ha i beya liolonji ze nde, ni bulapeli bwa niti bu beya miselo ya batu ba bande.—Mateu 7:15-20.

Balikani ba Jehova ba kuteka hahulu Bibele. Ba ziba kuli Bibele i zwelezi ku Mulimu. Ze i bulela ba li tuhelela ku zamaisa bupilo bwa bona, ku tatulula butata bwa bona, ni ku ba tusa ku ituta za Mulimu. (2 Timotea 3:16) Ba lika ku eza lika ze ba kutaza.

Balikani ba Jehova ba latana. Jesu n’a bonisize kuli wa lata batu ka ku ba luta za Mulimu, ni ka ku folisa be ne ba kula. Ba ba latelela bulapeli bwa niti ni bona ba latana. Sina Jesu, ha ba kendi babotana kamba ba mushobo u sili. Jesu n’a bulezi kuli batu ne ba ka ziba balutiwa ba hae ka lilato le ba bonisana.—Joani 13:35.

Balikani ba Mulimu ba kuteka libizo la Mulimu, la Jehova. Mutu ha n’a ka hana ku mi bizisa libizo la mina, mutu y’o kana n’a ka ba mulikan’a mina yo mutuna? Kutokwa! Ha lu na ni mulikani, lu mu bizisa libizo la hae ni ku mu bulela hande ku ba bañwi. Kacwalo ba ba itakaleza ku itama bulikani ni Mulimu ba swanela ku mu bizisa libizo la hae ni ku bulelela ba bañwi za hae. Jehova u bata kuli lu eze cwalo.—Mateu 6:9; Maroma 10:13, 14.

Sina Jesu, balikani ba Mulimu ba luta batu za Mubuso wa Mulimu. Mubuso wa Mulimu ki ona mulonga wa kwa lihalimu o ka tisa kuli lifasi-mubu le li be paradaisi. Balikani ba Mulimu ba taluseza ba bañwi taba ye nde yeo ye ama Mubuso wa Mulimu.—Mateu 24:14.

Lipaki za Jehova ba lika ku ba balikani ba Mulimu. Ba kuteka Bibele mi ba latana. Hape ba kuteka libizo la Mulimu ni ku mu bizisa lona mi ba luta ba bañwi za Mubuso wa Mulimu. Lipaki za Jehova ba latelela bulapeli bwa niti fa lifasi kacenu.