“Kana Batu Kaufela Ba Ka Latana Muta O Muñwi?”

¹ Lushango lo lunde, lo lu nyangumuna, ili lo lu mufutumala lu ka zibahazwa mwa bupala bwa lifasi mwa lipuo ze 169. Ki lushango mañi lona l’o? Mi lu ka zibahazwa cwañi?

² Lushango l’o ki lwa za lilato la bomuyahwa ni bona. Lu ka fumaneha mwa Taba ya Mubuso No. 35, ye na ni toho ya taba ye li “Kana Batu Kaufela Ba Ka Latana Muta O Muñwi?” Yona Taba ya Mubuso ye ka bukuswani i nyakisisa muinelo wa linto o mwa lifasi kaufela nako ye, ili ku bonisa kuli ki ku sa latana kwa batu ko ku tisa buñata bwa matomola ni butuku. I bonisa libaka, sihulu mwa lizazi la luna, lilato la bomuyahwa ni bona ha li felile ni kuli seo si talusañi ka za nako ya kwapili.

³ Ka nako ye swana, Taba ya Mubuso No. 35 i bonisa kuli lilato la bomuyahwa ni bona la niti la fumaneha mwahal’a likiti-kiti za batu ba ba pila mwa lifasi kacenu. I zibahaza bao ba ba abana mwa ku zusulusa Bukreste bwa kwa makalelo luli—bulapeli bwa mwa lilimo za mwanda wa pili, ili bo ne bu zibahala ka lilato la bomuyahwa ni bona sina ka mwa n’a lutezi Jesu Kreste.—Lu. 10:25-37.

⁴ Taba ya Mubuso No. 35 i fela ka ku talusa ka m’o lifasi kamukana la mufuta wa mutu cwale-cwale fa li ka kala ku ba ni lilato la bomuyahwa ni bona mwatas’a tamaiso ya Mubuso wa Mulimu ka Kreste. Ba ba bala lona lushango lo ba susuezwa ku ba ni broshuwa ya Ki Sifi Seo Mulimu A Tokwa ku Luna? ni ku ituta mwa ku bela ba bañwi ba yona tukiso ye lilato ye ya lifasi kaufela ili ye talusizwe ka butungi mwa Linzwi la Mulimu.

⁵ Ki Bomañi Ba ba Ka Zibahaza Lona Lushango Lo? Lipaki za Jehova mwa bupala bwa lifasi ba ka abana lona lushango lo lwa lilato la bomuyahwa ni bona ni be ba zibana ni bona, bomuyahwa ni bona, ni banabahabo bona mwa likweli za October ni November. Ba ba fitile ku ze konisa kaufela ba lukela ku abana mwa ku abela kwa nyangela kwa Taba ya Mubuso No. 35.

⁶ Mulelo o mutuna ka ku fitisisa wa ona muhato wo ki ku zusa cisehelo ya batu mwa ku ba ni tuto ya Bibele mwa broshuwa ya Seo A Tokwa kamba mwa buka ya Zibo. Fahalimu a seo, buikatazo bwa ka pilu kaufela kwa neku la batanga ba Jehova bu ka tisa bupaki bo butuna bwa Mulimu ya lilato, Jehova, ni Mwan’a hae, Jesu Kreste.