Mu Lukela ku Ba Batu ba Mufuta Mañi?
1 Nako ya ku ikalabela kwa mufuta wa mutu kaufela ya sutelela. Bibele i biza yona nako yeo “lizazi la Jehova.” Ki nako yeo katulo ya bumulimu i ka wela ba ba maswe; hape ki nako ya tukuluho ya ba ba lukile. Batu kaufela ba ba ka be ba pila ka nako yeo ba ka ba ni ku ikalabela ka mo ba sebeliselize bupilo bwa bona. Ka ku ba ni seo mwa munahano, Pitrosi u buza puzo ye batisisa ye li: ‘Mu lukela ku ba batu ba mufuta mañi’? U koñomeka butokwa bwa ‘mizamao ye kenile hahulu, bulapeli, ni ku libelela ni ku akufisa lizazi la Jehova,’ hamohocwalo ni tokwahalo ya ku ba ni ‘kozo ni ku sa ba ni litiba kamba se si nyazahala.’—2 Pit. 3:11-14, NW.
2 Mizamao ye Kenile Hahulu ni Bulapeli: Mizamao ye kenile i kopanyeleza misebezi ye li mutala o munde ye bonisa likute kwa likuka za Bibele. (Tite 2:7, 8) Mukreste u lukela ku ambuka mizamao ya lifasi ye susuezwa ki litakazo za buitati, ili za nama.—Maro. 13:11, 14.
3 “Bulapeli” bu talusiwa ku ba “swalisano ya ka butu ku Mulimu, ye zwelela kwa pilu ili ye tiswa ki buitebuho bo bu tiile bwa tulemeno twa hae to tunde.” Tukufalelo ya luna mwa bukombwa ki nzila ye zwile mubano yeo lu bonisa ka yona kona kalemeno kao. Mulelo wa luna ha u feleli fela fa k’u nga kuli ku kutaza ki buikalabelo bwa luna; u zwelela mwa lilato le li tungile la Jehova. (Mare. 12:29, 30) Ka ku susuezwa ki lilato le li cwalo, l’u nga bukombwa bwa luna ku ba ponahazo ye na ni taluso ya buipeyo bwa luna. Kabakala kuli buipeyo bwa luna bu lukela ku ba bwa kamita, kabelo ya luna mwa musebezi wa ku kutaza i swanela ku ba ya kamita. I swanela ku ba kalulo ye butokwa ya tomahanyo ya misebezi ya luna ya viki ni viki.—Maheb. 13:15.
4 “Ku akufisa” lizazi la Jehova ku talusa ku li beya mwa sibaka sa pili mwa mihupulo ya luna ya ka zazi ni zazi, ili ku sa li kasheza kwahule mwa minahano ya luna. Ku talusa ku beya milelo ya Mubuso mwa sibaka sa pili mwa bupilo bwa luna.—Mat. 6:33.
5 Ku Ba ni Kozo ni Ku Sa Ba ni Litiba Kamba Se Si Nyazahala: Ka ku ba ba bañwi ba buñata bo butuna, lu ‘tapisize liapalo za luna, lu li sweufalize mwa mali a ngunyana.’ (Sin. 7:14) Ku sa ba ni “litiba” kacwalo ku talusa kuli lu swanela ku itibelela ka ku tiya kuli bupilo bwa luna bo bu kenile, ili bo bu neezwi bu si ke bwa sasiwa masila a lifasi. Lu ipuluka lu si na se si “nyazahala” ka ku hana ku tuhelela lindongwamo za sifumu ili ze si za silumeli ku ponganya butu bwa luna bwa Sikreste. (Jak. 1:27; 1 Joa. 2:15-17) Lu bonisa kuli lu pila ka “kozo” ka ku bonahaza “kozo ya Mulimu” mwa likezo za luna kaufela ni ba bañwi.—Mafil. 4:7; Maro. 12:18; 14:19.
6 Haiba lu kona ku itibelela kwa ku silafazwa ki lifasi, ni kamuta ha lu na ku “likanyisa lifasi le,” le li nyazizwe ki Jehova. Kono misebezi ya luna ye minde i ka tusa ba bañwi ku bona fapano ye mwahal’a “ya sebeleza Mulimu, ni ya sa mu sebelezi.”—Maro. 12:2; Mala. 3:18.
7 Buñata bwa luna ne lu fumanehile kwa Mukopano wa Sikiliti wa “Tumelo mwa Linzwi la Mulimu,” mi lico za kwa moya ze wetulusa fo ku si na ku kakanya li tiisize takazo ya luna ya ku bonisa buipeyo bwa luna bwa silumeli. Ba bañata ba banca ni bona ba na ni yona takazo yeo. Lu kona ku ba mbuyoti ka ku ba tusa ku abana mwa sebelezo ya mwa simu mwa October ni November.
8 Libizo la Jehova la tunafazwa, puteho ya tiiswa, mi ba bañwi ba fumana tuso ha lu zwelapili ka tokomelo mwa ku eza ‘misebezi ye minde.’ (1 Pit. 2:12) Haike ka nako kaufela lu be batu ba ba cwalo.