Ki Kabakalañi Lipaki za Jehova Habakutazanga Kwa Batu Babakile Babulela Kuli Habatabeli?

Lipaki za Jehova balata Mulimu ni batu, ki lona libaka habashaela lushango lwa mwa Bibele kwa batu kaufela, hamohocwalo ni batu babakile babulela kuli habatabeli. (Mateu 22:37-39) Lilato laluna ku Mulimu lilususueza kumamela taelo ya Mwanaa hae ya “kupaka ka kutala.” (Likezo 10:42; 1 Joani 5:3) Kuli lueze cwalo, lukutazanga lushango lwa Mulimu hañata, sina feela mone baezezanga bapolofita ba Mulimu ba kwaikale. (Jeremia 25:4) Mi bakeñisa kuli lwalata babañwi, lulikanga molukonela kaufela kueza musebezi opilisa wa kukutaza “taba yende ye ya Mubuso” kwa batu kaufela, kukopanyeleza cwalo ni batu bane basatabeli sapili.​—Mateu 24:14.

Hañata, lufumananga batu babatabela halukutela kwa batu bane basatabeli sapili. Halunyakisiseñi mabaka amalaalu a:

• Batu batutanga.

• Batu babañwi fa lapa leo batabelanga lushango lwaluna.

• Batu bacincanga. Lika zeezahala mwa lifasi kamba miinelo yemiñwi yebakopana ni yona batu mwa bupilo itahisanga kuli ‘balemuhe kuli batokwa za Mulimu’ mi batabelanga lushango lwa mwa Bibele. (Mateu 5:3) Mane nihaiba batu babañwi baba lulwanisa bakona kucinca, sina feela mone kubezi ku muapositola Paulusi.​—1 Timotea 1:13.

Nihakulicwalo, haluhapelezangi batu kuamuhela lushango lwaluna. (1 Pitrosi 3:15) Lulumela kuli mañi ni mañi uswanela kuiketela bulapeli bwakaswalisana ni bona.​—Deuteronoma 30:19, 20.