Yoshua

16 Kadi ntanda ya lutundu lwa Yosefa+ yaponēnwe na bubale*+ yadi tamba ku Yodano ku Yediko kufika ne ku mema dya kutunduka kwa Yediko, yapita mu ntanda mutuputupu yatamba ku Yediko yakanda mu ntanda ya ngulu ya Betele.+ 2 Yatamba ku Betele udi kubwipi na Luzi yaenda kufika ne ku mukalo wa bene Aleke ku Atalote, 3 kupwa yatūkila dya kushika keyenda dya ku mukalo wa bene Yafeleta yafika ne ku mukalo wa Bete-Holone+ wa Kunshi ne Ngezele,+ yakafula ku dijiba.

4 Ebiya lutundu lwa Yosefa,+ ba Manase ne Efelaimi, bapyana ntanda yabo.+ 5 Mukalo wa lutundu lwa Efelaimi mungya mafu abo i uno: Mukalo wa bupyani bwabo dya kutunduka wadi Atalote-Adale,+ kutūla ne ku Bete-Holone wa Kungala,+ 6 kadi mukalo walungulukīle dya ku dijiba. Mikemeta+ wadi kungala, ne mukalo waendele wajokoloka kutunduka dya ku Tanata-Shilo, kadi wapita kutunduka dya ku Yanoa. 7 Kupwa watūka tamba ku Yanoa kufika ne ku Atalote ne ku Naala, wapita ku Yediko+ walunguluka kufika ne ku Yodano. 8 Mukalo watambile ku Tapua+ waenda dya kushika kufika ne ku Kinekaneka kya Kāna, wakafula ku dijiba.+ Buno bo bupyani bwa kisaka kya Efelaimi mungya mafu abo; 9 lutundu lwa Efelaimi lwadi ne na bibundi bikwabo mu bukata mwa bupyani bwa Manase,+ bibundi byonso ne bīkalo byabyo.

10 Inoko kebapangilepo bene Kenani badi bashikete mu Ngezele,+ kadi bene Kenani bakishikete mu bukata mwa Efelaimi kufika ne dyalelo,+ ino bebatūdile ke ba kwingila mingilo ya kuningilwa.+