Yesu Wabutwilwa mu Kipombo

UYUKILE yeu mwana? Eyo, i Yesu. Wabutwilwa mu kipombo. Mu kipombo i momwa mutulwanga banyema. Pano, Madia usa kulādika Yesu mu kidīlo mutūlwanga bidibwa bya bampunda ne banyema bakwabo. Ino, mwanda waka Madia ne Yosefa abashikata kuno pamo na banyema? Kuno ke ku kifukopo kubutwilwanga bana, mwene i amo?

I amo. Kyobekadile kuno i kino: Kesala Akutusa, mbikavu wa Loma, waletele kijila’mba muntu yense ajokele ku kibundi kyabo kwābutwidilwe mwanda wa kwilembeja ku buku. Yosefa wābutwidilwe mu Betelema. Aye pa kufika’ko pamo ne Madia, kekwadipo njibo nansha imo ya abo kufikila’mo. Penepo abaenda kushikata na banyema pamo. Ino mu dine difuku’dyo Madia wabutula Yesu! Inoko mwana i mukomo, enka na momwena’mu.

Ubamone bakumbi bāya kutala Yesu? Badi bakakumbe mikōko mu ntanda bufuku, penepo kike kibebamunikila pobadi. Nanshi i mwikeulu! Bakumbi abakwatwa moyo bininge. Ino mwikeulu webanena’mba: ‘Kemukikwatwa moyo! Ndi na mwanda muyampe wa kwimusapwila. Dyalelo dino, mu Betelema mubabutulwa Kidishitu Mfumwetu. Ukakūla bantu! Mukamumona mupambwe bisandi mu kidīlo.’ Ponka’po bamwikeulu bavule abaiya kebatendela Leza. Penepo bakumbi abapeja kukatala Yesu, na pano abamutana.

Uyukile kishidile Yesu na bantu bonso? Le umuyukile amba i ani na bubine? Vuluka mu mānga imbajinji ya dino dibuku, twesambīle pa Mwanā Leza umbajinji. Uno Mwana wāingile na Yehova pa kupanga diulu ne ntanda ne bintu byonso. Bine uno ye Yesu!

Eyo, Yehova wayete būmi bwa wandi Mwana momwa mūlu, webutūla munda mwa Madia. Ponka’po, mwana waanza kutamina munda mwandi’nka na mutaminanga bana bonso munda mwa bainabo. Ino uno mwana i Mwanā Leza. Ku mfulo Yesu wabutwilwa mu kino kipombo kya mu Betelema. Mwene pano ubamone kyadi kisangedile bamwikeulu pa kusapwila bantu’mba Yesu wabutulwa?