Mpango Ya Leza Yendanga Ifwena pa Mutwe Wayo

Pa kupanga ntanda, Leza wādi usaka’mba pekale bantu bashikete umbūmi, mu nsangaji ne mu ngikadilo ya boloke. Pa kusaka’mba bantu bendelele nyeke na būmi, bādi bafwaninwe kukōkela ku mbila ya Leza, ino bantu babidi babajinji bāpelele kukōkela, baikala ke bipyamambo, batyibilwe lufu. Kino kyāletele lutundu lwabo lonso bubi.​—⁠Ngalwilo 1:​27, 28; 2:​16, 17; 3:​1-19; Loma 5:12.

Leza, wa dijina dya bu Yehova, wātyiba mbila ya kufundula pano pantanda byamalwa byonso byālupwilwe na butomboki ne bubi. Ebiya wātala pano panshi mu muzo wa muntu, wāmona’mo muntu umo wakikōkeji, Abalama, Wāmwalamuna dijina bu Abalahama. Leza wālaile Abalahama’mba lutundu lwandi lukekalanga ke muzo mukatakatamwine, ebiya kadi ku uno muzo ko kwādi kufwaninwe kulupuka lukunwa, kadi bisaka byonso bya pano pantanda byādi bifwaninwe kweselwa na Leza kupityila ku luno lukunwa.​—⁠Ngalwilo 12:​1-3; 18:​18, 19; 22:18; Mitōto 83:18; Bahebelu 11:​8-16.

Kubwipi na kumfulo kwa myaka 16 K.K.K., lutundu lwa Yakoba, witwa ne bu Isalela, munkanā Abalahama, lwādi na bisaka 12 byāmuninwe bupika mu Edipito. Yehova wānyongola bano bene Isalela mu bupika bwa bene Edipito kadi wēbalongolola ke muzo. Wēbapa ne mbila kupityila kudi Mosesa ku Lūlu lwa Shinai amba ikale ke Mukanda-wabijila wa yabo ntanda. Yehova wādi Mulopwe wabo, Mutyibi wabo, ne Mujidiki wabo. Muzo wa Isalela wāikala ke muzo mutongwe wa bantu ba Leza, ba tumoni twandi, balongololwe mwanda wa kufikidija mpango yandi. Meshiasa wādi ufwaninwe kulupuka ku lukunwa lwabo, wādi wa kushimika bulopwe bwanyeke ne nyeke ne bwa kamweno ku mizo yonso.​—⁠Divilu 19:​5, 6; 1 Bilongwa 17:​7-14; 1 Balopwe 4:​20, 25; Isaya 33:22; 43:​10-12; Loma 9:​4, 5.

Myaka tutwa 15 pa kupita’po, kubwipi kwa myaka 2 000 kunyuma, Leza wātuma wandi Mwana wabunka tamba momwa mūlu, abutulwe pano pantanda na nsongwakaji Muyuda mujike: Madia. Wāinikwa bu Yesu kadi ye aye wādi wa kupyana Bulopwe bwa Davida, nkambulula wandi, bwālailwe na Leza. Pa kupwa kubwanya myaka 30, Yesu wābatyijibwa na Yoano Mubatyiji, ebiya wāshilula kusapula Bulopwe bwa Leza. Wābelwile ne babela mwanda wa kulombola muswelo ukeselwa bantu na buno Bulopwe. Wādi wingidija byelekejo mwanda wa kushintulula bisakibwa byādi bifwaninwe kubwanya boba bonso basaka būmi bwanyeke. Kupwa, Yesu wāipaibwa pa mutyi, būmi bwandi bwa bu muntu mubwaninine ye akyo kitapwa kya kukūla muzo wa muntu.​—⁠Mateo 1:​18-24; 3:13-16; 4:​17-23; 6:​9, 10; shapita 13; 20:28; Luka 1:​26-37; 2:14; 4:​43, 44; 8:1; Yoano 3:16; Bilongwa 10:​37-39.

Yesu wāshintulwile amba Bulopwe bwa Kimeshiasa bwādi bwa kukabikikwa kitatyi kilampe kumeso, kumfulo kwa ngikadilo ya bintu. Kitatyi pokyādi kya kubwana, wādi wa kwikala’po bu Mulopwe ubikele momwa mūlu inoko pakubulwa kumweka na meso pano pantanda, wādi wa kuyukanya kwikala’po kwandi na kuta mutyima pano pantanda. Myanda ilongeka pano pantanda ilombola’mba tudi mu kino kitatyi tamba mu 1914. Myanda miyampe ya Bulopwe, isapulwanga kujokoloka ntanda yonso bu bukamoni ku mizo yonso, pamo’nka na mwātobele’kyo Yesu. I kilupule bipa bivule, pano bantu ba mu mizo yonso bendanga babungilwa pamo ku mutamba wa Bulopwe bwa Leza. Bakapandanga kumfulo ya ino ngikadilo ya bintu ne kukamona būmi bwanyeke pano pantanda munshi mwa Bulopwe bwa Kimeshiasa.​—⁠Mateo, shapita 24 ne 25; Kusokwelwa 7:9-17.

Bipwilo bivule dyalelo bītelanga bu biloñanga kiswamutyima kya Leza. Ino lelo i muswelo’ka okokeja kujingulula kipwilo kya bwine-kristu kyabinebine? I na kubandaula Bisonekwa bitala pa kipwilo kya bwine-kristu kya mu myaka katwa imbajinji, kupwa ne na kutadija i bāni dyalelo balondanga kino kimfwa.

• I kika kyāfikile Abalahama ne i mwingilo’ka wādi na Isalela mu kufikidija mpango ya Leza?

• I kika kyāfikijije Yesu na mingilo yandi ne na lufu lwandi?

• I butobo’ka bwātobelwe butala pa kino kyetu kitatyi?