Shapita 34
Utonga Batumibwa Bandi
KEPADI kubwipi kwa mwaka umo ne kipindi, tamba Yoano Mubatyiji uyukanya Yesu bu Mukōko wa Leza, pashilwile Yesu mwingilo wandi patōka. Mu kino kitatyi, ba Andele, Shimona Petelo, Yoano, pakwabo ne Yakoba (mwanabo na Yoano), pamo ne Fidipa ne Natanela (witwa ne bu Batolomyu) abaikala ke bandi bana-babwanga babajinji. Mwenda mafuku, bakwabo bavule abelunga kobadi, kebalonda Kidishitu.
Pano Yesu kasake kutonga batumibwa bandi. Bano bo bakekala bapwani nandi, basaka kupa bufundiji bwa pa bula. Ino kumeso kwa kwibatonga, Yesu wakanda ku lūlu, walombela bufuku bonso butuntulu, kekubulwe padi ulomba tunangu ne madyese kudi Leza. Bubaki lubanga, waite bandi bana-babwanga, watonge’mo 12. Inoko bakitelwa monka bu bana-babwanga ba Yesu, mwanda ukyendelela na kwibeija mingilo.
Bano basamba batongelwe na Yesu, batelelwe kungala’ku, bo baikele ke bandi bana-babwanga babajinji. Mateo, waityilwe na Yesu ku bilo bya musonko, nandi watongwe. Batano bakwabo batongelwe i bano, Yudasa (witwa ne bu Fadeusa), Yudasa Isakadiota, Shimona mwine Kenani, Tomase, ne Yakoba mwana Afesa. Uno Yakoba witwa ne bu Yakoba Mwepele, kekubulwe padi ye mutyetye ku kīmano, pakwabo i mwanuke kwa Yakoba mutumibwa mukwabo.
Pano, bano 12 abaikala na Yesu kitatyi kampanda, webayuka biyampe. Bavule umbukata mwabo i balongo bandi. Ba Yakoba ne mwanabo Yoano i banababo na Yesu babajinji ba munda mungi. Kadi kimweka bu Afesa i mwanabo na Yosefa, shandya Yesu wabulelwa. Nanshi mutumibwa Yakoba, mwanā Afesa, nandi i mwanabo na Yesu, wa shandi mukwabo.
Kyabine, Yesu kakolelwapo pa kuvuluka majina a batumibwa bandi. Ino lelo nobe ukokeja kwiavuluka? Eyo, vuluka’tu amba kudi babidi betwa bu Shimona, babidi betwa bu Yakoba, ne babidi betwa bu Yudasa, ne amba Shimona udi na mwanabo Andele, Yakoba nandi na mwanabo Yoano. Luno lo lufungulo lwa kuvulukila’po majina a batumibwa mwanda. Baná bashala’ko i bano, umo i musonkeji wa musonko (Mateo), au wapatenye mwenda mafuku (Tomase), mukwabo waityilwe munshi mwa mutyi (Natanela), au ke mulunda nandi Fidipa.
Batumibwa dikumi ne umo i bene Ngadilea, ba kumo na Yesu. Natanela i mwine Kena. Ba Fidipa, Petelo ne Andele, i bene Beseda, mwenda mafuku, ba Petelo ne Andele abaenda ku Kapanama, kwikalanga Mateo. Yakoba ne Yoano badi babiluwe ba mishipa, ne kadi padi bashikatanga mu Kapanama nansha kubwipi. Bimweka bu Yudasa Isakadiota, waabile Yesu mwenda mafuku, wadi mutumibwa mwine Yudea kasuku kandi. Mako 3:13-19; Luka 6:12-16.
▪ I batumibwa’ka babutulwa na Yesu?
▪ Batumibwa ba Yesu i bāni, ne i muswelo’ka okokeja kuvuluka majina abo?
▪ Batumibwa batambile ku myaba’ka?