Shapita 3
Leza wabine lelo i ani?
PO BANDILANGA diūlu ditōka tōo bufuku, kutulumukangapo pa kumona buvule bwa ñenyenye idimo? Unenanga’mba yātambile kwepi? Lelo bintu byūmi bya pano panshi nabyo—maluba a misombelo, tonyi twa ñimbo ya mulenga, mishipa mikatakata yenda ikila pa mema? Tufudile bidi pano. Bino byonso kebyālupukilepo mu kitulumukila mhm. Ke kya kutulumukapo, bavule i betabije bino bishima bya Bible bya kuñanjilo: “Mu Ngalwilo Leza wapangile diulu ne ntanda”!—Ngalwilo 1:1.
2 Muzo wa muntu i mwiabanye bininge pa mwanda wa Leza. Bamo-bamo balañanga’mba Leza ke muntu po wabine i bukomo bitupu. Tununu twa bantu batōtanga bankambo babo bāfwile kala, na kulanga’mba Leza udi kulampe kakokejapo kwibetaba. Ino Bible witulombolanga’mba Leza i muntu wabine witutele mutyima bininge batwe bantu. Omwanda witukankamika ‘tukimbekimbe Leza na kumusakasaka’ amba: “Kadipo ne kulampe kwine na batwe bonso, mhm.”—Bilongwa 17:27.
3 Lelo Leza udi namani? Bengidi bandi batyetye bāmwene bimonwa bya ntumbo yandi. Mu bino bimonwa, wēlombwele mu kyelekejo pamo bwa ushikete pa lupona, mikejima ilenga-moyo ilupuka kwadi. Inoko, bano bonso bāmwene bino bimonwa kebāshintulwilepo nansha dimo kilungi kampanda kipotoloke mhm. (Danyele 7:9, 10; Kusokwelwa 4:2, 3) Kino i pamwanda “Leza i Mushipiditu”; kadipo na umbidi wa bungitu. (Yoano 4:24) Bine, kebibwanikapo kuleta kyelekejo nansha kimo kibwaninine kya mwikadile Umpangi wetu, mwanda kekudipo muntu “nansha umo wamwenepo Leza.” (Yoano 1:18; Divilu 33:20) Inoko, Bible witufundijanga bivule bitala padi Leza.
LEZA WABINE UDI NA DIJINA
4 Mu Bible, Leza wabine usasulwanga na bishima pamo bwa bino “Leza Mwinebukomobonso,” “Mwine-Mukatakata-Mwine,” “Umpangi Mukatampe,” “Mufundiji Mukatakata,” “Mfumwandya Balopwe,” ne bu “Mulopwe wa nyeke.” (Ngalwilo 17:1; Mitōto 50:14; Musapudi 12:1; Isaya 30:20; Bilongwa 4:24; 1 Temote 1:17) Kulanguluka pa bino bitenta kuketukwasha tutame mu buyuki butala padi Leza.
5 Inoko, Leza udi na dijina dyandi dya kikasuku ditanwa kubwipi kwa misunsa 7 000 mu Bisonekwa bya Kihebelu kete—kutabuka bino bitenta byandi byonso. Kubwipi kwa myaka 1 900 kunyuma, Bayuda bālekele kutela dijina dya Leza pamwanda wa kabutyi-butyi kobādi nako. Kihebelu kya mu Bible kyādi kisonekwa na masomo a tumama bitupu pakubulwa mawi. Omwanda kekudipo muswelo wa kuyuka senene mwādi mutelela ba Mosesa, Davida, ne bantu bakwabo bapakala tumama tuná (יהוה) twa masomo ādi asonekwa nao dijina dya Leza. Babandaudi bamo-bamo bañeni bafwatakanya’mba padi dijina dya Leza dyādi ditangwa bu “Yahweh,” ino kebekiyukilepo senene. Muswelo oditelwa mu Kiluba bu “Yehova” i mukwatañane na ndimi mivule ne wingidijibwanga tamba umbula bwa tutwa twa myaka mivule kunyuma.—Tala Divilu 6:3 ne Mako 12:29, 30.
MWANDA’KA UFWANINWE KWINGIDIJA DIJINA DYA LEZA
6 Dijina dya Leza dya kikasuku, Yehova, dimushiyañanyanga na baleza bakwabo bonso. Omwanda dino dijina ditanwanga misunsa mivule mu Bible, nakampata mu kipindi kyandi kya Kihebelu. Balamuni bavule kebengidijangapo dijina dya Leza, ino Mitōto 83:18 unena patōka’mba: “Bayuke’mba, abe enka, wa dijina dya bu-Yehova, wi Mwinemukatakatamwine panopantanda ponsololo.” Shi kepano, i kyendelemo ku wetu mutamba kwingidija dijina dya Leza dyandi dyabunka kitatyi kyotwisambila padi aye.
7 Dijina Yehova i mutelelo wa kyubwa kya mu Kihebelu kishintulula “kwikala ke.” Shi kepano, dijina dya Leza dishintulula’mba i “Yewa Wikadijanga ke.” Omwanda Yehova witelanga aye mwine bu Leza Mukatakata Wampango. Ufikidijanga nyeke mpango yandi yaikala ke bubinebine. Enka Leza wabine ye ufwaninwe kwikala na dino dijina, mwanda bantu ke bakokejapo kuyuka na bubinebine shi mpango yabo ikokeja kukatubuluka. (Yakoba 4:13, 14) Yehova kete ye aye ukokeja kunena’mba: “Kinenwa kyami kyalupuka mu kyakanwa kyami . . . kikalonga kyoki kyo nswele, kabidi kikafikijija biyampe’tu kintu kyo nekitumine.”—Isaya 55:11.
8 Bakulutuba Bahebelu ba Abalahama, Isake, ne Yakoba abo bonso ‘bādi beta Yehova pa dijina dyandi,’ ino kebāyukilepo buluji bubwaninine bwa dijina dya Leza. (Ngalwilo 21:33; 26:25; 32:9; Divilu 6:3) Kunyuma, pālombwele Yehova mpango yandi ya kunyongolola lukunwa lwabo, Isalela, mu bupika bwa bene Edipito ne kwibapa “ntanda ikuka mabele mulungu ne būki,” kino kyādi kikokeja kumweka bu kekibwanikapo. (Divilu 3:17) Ino Leza wāimanine pa buluji bwanyeke ne nyeke-ke bwa dijina dyandi na kusapwila Mupolofeto Mosesa’mba: “I namino mokanenena bana ba Isalela wa’mba: Yehova Leza wa bashenu, Leza wa Abalahama, Leza wa Isake, ne Leza wa Yakoba, wantume ko mudi; dine dino’di dyo dijina dyami dya nyeke ne nyeke-ke, kadi kino kyo kivulukilo kyami kya ku nkongo yonsololo.”—Divilu 3:15.
9 Mosesa wālombele Felo, mulopwe wa Edipito, lupusa lwa kuleka bene Isalela bende kukatōta Yehova mu ntanda mutuputupu. Ino Felo, byādi umwenwe aye mwine bu leza ne byādi utōta baleza bakwabo ba mu Edipito, wālondolola’mba: “Lelo Yehova i ani le? O ñivwana diwi dyandi amba ndekelele Isalela ende, a? Nkimuyukilepo Yehova, pakwabo napo nkikebalekelelapo bende, mhm.”—Divilu 5:1, 2.
10 Penepo Yehova wāshilula kulonga kilongwa kikatampe mwanda wa kufikidija mpango yandi, kukwatañana na buluji bwa dijina dyandi. Wāponeneja bimpengele dikumi pa bene Edipito wakala. Kimpengele kyamfulo kyāipaile bana babubedi bonso bana-balume ba mu Edipito ne mwana Felo mwine, mulopwe wa kibengo. Penepo bene Edipito byebatonda kebasake bene Isalela bende. Inoko, bene Edipito bamo-bamo bātenekelwe bininge na bukomo bwa Yehova, bēlunga ku bene Isalela pa kutamba mu Edipito.—Divilu 12:35-38.
11 Felo mulopwe wa mutwe mūmu ne bashidika bandi, wāshilula kwibalonda na tutwa twa makalo a divita mwanda wa akwate bapika bandi monka. Bene Edipito pa kufwena, Leza wākalañanya Kalunga Katyila na kingelengele mwanda wa bene Isalela babuke panshi myūmu. Balwana nabo pa kutwela mu lubumbu lwa mema, Yehova “wāfundula matonto a ku makalo abo, penepa nao akola pa kwiakoka.” Bashidika bene Edipito kebela ñanji’mba: “Tunyeme ku meso a Isalela mwanda Yehova webalwila pa bene Edipito.” Ino kyaba kyādi kekipite. Lubumbu lwa mema lwāpomoka, “mema āluka ke atokenya makalo ne bapatubalwe, ne divita dine dya Felo dyatwela monka mu kalunga-kamema.” (Divilu 14:22-25, 28) Yehova wēlongela aye mwine dijina dikatampe, ne dyalelo uno mwanda kebewidilwe.—Yoshua 2:9-11.
12 Dino dijina dyēlongēle Leza didi na buluji bukatampe kudi batwe dyalelo. Dijina dyandi, Yehova, didi pamo bwa kyeya kilombola’mba mpango yandi yonso ukeifikidijanga. Kwelamo ne mpango yandi imbajinji ya kukālamuna ntanda yetu ke paladisa. (Ngalwilo 1:28; 2:8) Pa kino, Leza ukonakanyanga balwana nandi bonso balwa na bubikadi bwandi dyalelo, mwanda wānene’mba: “E po bakayukila’mba ami ne Yehova.” (Ezekyele 38:23) Penepo, Leza ukafikidija mulao wandi wa kukanyongolola batōtyi bandi mu ntanda impya ya boloke.—2 Petelo 3:13.
13 Bonso basaka buntu bwa Leza bafwaninwe kwifunda kwita pa dijina dyandi na lwitabijo. Bible witulaya’mba: “Bonso bakwita pa dijina dya Yehova bakapandanga.” (Loma 10:13) Eyo, dijina Yehova didi na buluji bukatampe. Kwita pa dijina dya Yehova bu Leza obe ne Munyongolodi obe kukokeja kukakutwala ku būmi bwa nsangaji ya kubulwa mfulo.
NGIKADILO YA LEZA WABINE
14 Bwifundi bwa bunyongolodi bwa Isalela mu Edipito bulombola ngikadilo iná ya Leza ya pakitako yadi nayo na ndiñamano mibwaninine. Milongelo yandi na Felo ilombola bukomo bwandi bulengeja-moyo. (Divilu 9:16) Muswelo wāpwijije Leza uno mwanda mukomo na ñeni ulombola tunangu twandi twakubulwa kwenzankanibwa. (Loma 11:33) Wālombwele boloke bwandi na kupa mfuto bantu bakapuni bādi bamunine muzo wandi ne kwiujikila mashinda. (Kupituluka 32:4) Ngikadilo ya Leza imbajinji i buswe. Yehova wālombwele buswe butulumukwa na kufikidija mulao wandi utala pa lukunwa lwa Abalahama. (Kupituluka 7:8) Kadi wālombwele buswe na kupa bamo-bamo ba mu bene Edipito muswelo wa kwinyongolola mu baleza babubela ne kutana byabuyabuya bivule na kulamata ku mutamba wa Leza umo wabine.
15 Mu kutanga Bible, ukajingulula’mba bine buswe ye ngikadilo ya Leza imbajinji, ne wiilombolanga mu miswelo mishileshile. Kimfwa, pamwanda wa buswe, wāikele ke Umpangi ne kwiabila nsangaji ya būmi dibajinji na bipangwa bya kumushipiditu. Tuno tutwa twa tununu twa bamwikeulu basenswe Leza ne bamutendelanga. (Yoba 38:4, 7; Danyele 7:10) Kadi Leza wālombwele buswe na kupanga ntanda ne na kwiilongolola mwanda wa ikalwe na bantu mu nsangaji.—Ngalwilo 1:1, 26-28; Mitōto 115:16.
16 Tumwenanga mu buswe bwa Leza mu miswelo mivule keibadika. Kimfwa, Leza wālongele imbidi yetu na buswe ne mu muswelo utulumukwa mwanda wa tusepelele būmi. (Mitōto 139:14) Wālombwele buswe bwandi na kwitupa “mvula ya mūlu, ne myaka ya kupa bipa, ne kuyuja mityima ne bidibwa, ne tusepo.” (Bilongwa 14:17) Kadi Leza “utemejanga dyuba dyandi ku babi ne ku bayampe bene kumo, kadi unokeja ne mvula ku bakoloka ne ku bampikwa koloka bene.” (Mateo 5:45) Kadi buswe bwātonwene Umpangi wetu etukwashe tutambule buyuki bwa Leza ne kumwingidila na nsangaji bu batōtyi bandi. Bine, “Leza i buswe.” (1 Yoano 4:8, NW) Ino kudi ngikadilo mikwabo mivule ya bu-muntu bwandi.
“LEZA MUYULE LUSA NE BUNTU”
17 Bene Isalela pa kupwa kwabuka Kalunga Katyila, bādi bakisakilwa kuyukidija Leza senene. Mosesa wāivwene kino kyaka, wāshilula kulomba’mba: “Nakwisashilapo, shi namone biyampe mu meso obe undaije panopano mashinda obe, nabya nkuyuke amba namone biyampe mu meso obe.” (Divilu 33:13) Mosesa wāyukile Leza senene pa kumwivwana unena aye mwine’mba: “Yehova! Yehova Leza! muyule lusa ne buntu, wija pakufuna bulobo, kadi i wa kanye ka ntanda ne ntanda, ne binebinepo; ulamine kanye ka tununu ne tununu, ulekela bukondame ne kujilula, ne bupola-mambo bwine; kadi kakatombolapo bapone; ne [kuleka, NW] kulubwila bukondame.” (Divilu 34:6, 7) Leza uyukile kudingamanya buswe bwandi ne boloke bwandi, inoko kakingengapo banonga-bibi ku byamalwa bikokeja kwibafikila pamwanda wa bubi bwabo.
18 Nka na mwēfundile’kyo Mosesa, Yehova ulombolanga mutyima walusa-lusa. Muntu wa mutyima walusa-lusa ukwatyilwanga boba basusuka lusa ne kupima kwibanyongolola mu masusu abo. Leza wālombwele mutyima wa kwitūla pa kyetu kyaba na kuteakanya mpangiko ya kunyongolola bantu lonso mu masusu, mu misongo ne mu lufu. (Kusokwelwa 21:3-5) Batōtyi ba Leza bakokeja kutanwa na tusuwa pamwanda wa ngikadilo ya mu ino ntanda imbi, nansha kadi bakokeja kwiendeja pakubulwa tunangu ne kutanwa na makambakano. Ino shi bavundamukile kudi Yehova na kwityepeja na kumulomba bwangudi, ukebakwasha ne kwibasenga pa mityima. Mwanda waka? Mwanda udi na katentekeji ne mutyima walusa-lusa ku batōtyi bandi.—Mitōto 86:15; 1 Petelo 5:6, 7.
19 Bantu bavule badi na lupusa basusulanga bakwabo. Yehova aye udi na mutyima unekena ku bengidi bandi bakwityepeja! Nansha byadi na lupusa lukatampe bininge mūlu ne pano panshi, ulombolanga kanye katulumukwa bininge ku bantu bonso. (Mitōto 8:3, 4; Luka 6:35) Kadi Yehova udi na mutyima unekena, ulondololanga ku mitompwe ya boba basaka buntu bwandi. (Divilu 22:26, 27; Luka 18:13, 14) Eyo, Leza kaningilangapo bantu poso’nka ebalombole buntu bwandi nansha mutyima walusa-lusa mhm. (Divilu 33:19) Omwanda nanshi tufwaninwe kulombola buleme bukatampe butala pa lusa lwa Leza ne buntu bwandi.—Mitōto 145:1, 8.
WIJA PA KULOBA, WAKUBULWA MBOLOJI NE MOLOKE
20 Yehova wijanga pa kufuna bulobo. Inoko kino kekishintululapo’mba kaloñangapo kintu, mwanda wēkilongele wāipaile Felo muntu wa mutyima mūmu ne bashidika bandi mu Kalunga Katyila. Kadi Yehova kadipo na mboloji. Nansha ke muzo wandi muswe, bene Isalela, kumfulo bājimije buntu bwandi mwanda bāendelele na kulonga bibi. Leza witabijanga bantu ba mu mizo yonso bu batōtyi bandi, inoko i enka boba balamata ku mashinda andi moloke kete.—Bilongwa 10:34, 35.
21 Mukanda wa Kusokwelwa witulombola kamweno ka kwifunda ‘kutyiba-nsambu kwa Leza kwa boloke.’ Witusapwila’mba bipangwa bya momwa mūlu bimbanga’mba: “Abe Yehova Leza Mwinebukomobonso, bilongwa byobe i bikatakata byakutendelwa; mashinda obe i moloke malumbuluke, abe Mulopwe wa mizo. Abe Yehova, lelo i ani kakakutyina, ne kutumbija dijina dyobe? Ke-wi-muntu abe enka ye ukola; ke-mintu mizo yonso nayo ikāyanga kutōta pa mpala yobe; ke-bintu bilongwa byobe byoloke [kutyiba-nsambu, NW] bibapu kusokolwa.” (Kusokwelwa 15:2-4) Tukalombola kwakamwa Yehova kwetu ne kumwifukwila na kulamata ku byobya byatela bu byoloke. Tukapēlelwa kwibilonda na kuvuluka buswe bwa Leza ne tunangu twandi. Mbila yandi yonso i ya kamweno ketu.—Isaya 48:17, 18.
“YEHOVA WETU LEZA I YEHOVA KASUKWA”
22 Bene Edipito wakala bādi batōta baleza bangi-bangi, ino Yehova i “Leza wa mukao.” (Divilu 20:5) Mosesa wāvulwije bene Isalela’mba “Yehova wetu Leza i Yehova kasukwa.” (Kupituluka 6:4) Yesu Kristu wāpitulukile mu bino bishima. (Mako 12:28, 29) Shi kepano, boba betabije Bible bu Kinenwa kya Leza kebatōtangapo Busatu bunena’mba kudi bantu nansha baleza basatu mu umo. Na bubine, kishima “Busatu” kekidipo nansha mu Bible mwine. Leza wabine i Muntu umo kete, mwishile na Yesu Kristu. (Yoano 14:28; 1 Kodinda 15:28) Mushipiditu sandu wa Leza ke muntu po. I bukomo bwa Yehova bwingila, bwingidija Mwinebukomobonso mwanda wa kufikidija mpango yandi.—Ngalwilo 1:2; Bilongwa 2:1-4, 32, 33; 2 Petelo 1:20, 21.
23 Pano byowajingulula’mba bine Yehova i Leza wa kutendelwa, lelo kwitabijepo’mba bine ufwaninwe kumutōta? Byowifunda Kinenwa kyandi, Bible, ukamuyukanga senene ne kukefunda i kika kyakusakila ulonge mwanda wa ukamone būmi bwanyeke mu ngikadilo milumbuluke ne ya nsangaji. (Mateo 5:3, 6) Pakwabo kadi, buswe bobe butala padi Leza bukabaya. Ye akyo kifwaninwe, mwanda Yesu wānene’mba: “Ukasanswa Yehova Leza obe ne mutyima obe onso, ne muya obe onso, ne ñeni yobe yonso, ne bukomo bobe bonso.” (Mako 12:30) I kimweke patōka’mba Yesu wādi na buswe bwa uno muswelo padi Leza. Ino i kika kinena Bible kitala padi Yesu Kristu? Udi na mwingilo’ka mu mpango ya Yehova?
[Bipangujo]
1. Mwanda’ka bavule i betabije bishima bya Bible bya kuñanjilo?
2. I kika kinena Bible kitala padi Leza, ne witukankamikanga tulonge kika?
3. Mwanda’ka kebibwanikapo kulonga kyelekejo kya mwikadile Leza?
4. I bitenta’ka bimo-bimo byamvubu bitelelwa Leza mu Bible?
5. Dijina dya Leza i ani, ne iditelwe misunsa inga mu Bisonekwa bya Kihebelu?
6. Mitōto 83:18 wisambanga kika kitala padi Yehova, ne mwanda’ka tufwaninwe kwingidija dijina dyandi?
7. Buluji bwa dijina Yehova bwitufundijanga kika kitala padi Leza?
8. I mpango’ka yālombwele Yehova kupityila mudi Mosesa?
9. Felo wādi umwene Yehova muswelo’ka?
10. I kika kyālongele Yehova mu Edipito wakala mwanda wa kufikidija mpango yandi itala pa bene Isalela?
11. I kingelengele’ka kyālongele Yehova pa Kalunga Katyila, ne balwana nandi bāfudile ku kwitabija kika?
12, 13. (a) Dijina dya Leza didi na buluji’ka kotudi dyalelo? (b) I kika kifwaninwe kwifunda bantu nakampeja-bukidi, ne mwanda waka?
14. I ngikadilo’ka ya Leza ya pa kitako ilombwelwe patōka mu Bible?
15, 16. I muswelo’ka wālombwele Leza buswe bwandi?
17. I kika kyotwifunda mu Divilu 34:6, 7 kitala padi Leza?
18. I muswelo’ka wēlombwele Yehova bu Leza muyule mutyima wa lusa-lusa?
19. Mwanda’ka tukokeja kunena’mba Leza udi na mutyima unekena?
20. I kika kilombola’mba Yehova wijanga pa kufuna bulobo ne kadipo na mboloji?
21. (a) I kika kitufundija Kusokwelwa 15:2-4 kitala padi Leza? (b) I kika kiketukwasha tupēlelwe kulonga byobya bitusoñanya Leza bu byoloke?
22. Mwanda’ka boba betabije Bible kebatōtangapo Busatu?
23. (a) I muswelo’ka ukokeja kutama buswe bobe mudi Leza? (b) I kika kyānene Yesu kitala padi Leza wabuswe, ne i kika kyotufwaninwe kwifunda kitala padi Kristu?
[Kapango pa paje 29]
I muswelo’ka oyukile senene Umpangi wa bintu byonso?
TOMPA BUYUKI BOBE
Dijina dya Leza i ani, ne iditelwe misunsa inga mu Bisonekwa bya Kihebelu?
Mwanda’ka ufwaninwe kwingidija dijina dya Leza?
I ngikadilo’ka ya Yehova Leza ikukoka nakampata?