Kifundwa 11

Nkulupilo ne Bisela Bifityija Leza Mutyima

I nkulupilo’ka ne i bisela bya muswelo’ka bya bubela? (1)

Lelo bene Kidishitu bafwaninwe kukulupila amba Leza i Busatu Busantu? (2)

Mwanda waka bene Kidishitu babine kebasobangapo masobo a Noele, a Pasaka, nansha a mafuku a kubutulwa? (3, 4)

Lelo bafwe bakokeja kususula bōmi? (5)

Lelo Yesu wāfwidile pa musalaba? (6)

I kika kinenenwa amba kusangaja Leza ko kudi na mvubu? (7)

1. Ke nkulupilo yonsopo nansha bisela byonso bibipile. Ino Leza kebitabijangapo shi bitambile mu mutōtelo wa bubela ne shi kebikwatañenepo na mfundijo ya mu Bible.​—Mateo 15:6.

2. Busatu Busantu: Lelo Yehova i Busatu Busantu​—bantu basatu mu Leza umo? Mhm! Yehova, Tata wetu, i ‘Leza umo kete wabine.’ (Yoano 17:3; Mako 12:29) Yesu i Wandi Mwana umbedi, ukōkele kudi Leza. (1 Kodinda 11:3) Tata i mukatampe kutabuka Mwana. (Yoano 14:28) Mushipiditu sandu ke muntupo; i bukomo bwa Leza bwingila.​—Ngalwilo 1:2; Bilongwa 2:18.

3. Noele ne Pasaka: Yesu kābutwilwepo mu mafuku 25 Kweji wa 12. Bimweka bu wābutwilwe mu difuku 1 Kweji wa 10, kitatyi kikalanga bakumbi balādika luombe lwabo panja, bufuku. (Luka 2:8-12) Yesu kāsoñenyepo bandi bana ba bwanga nansha dimo kusoba masobo a kuvuluka kubutulwa kwandi. Ino wāsapwidile bandi bana ba bwanga kuvuluka lufu lwandi. (Luka 22:19, 20) Noele ne bisela byandi i bitambe ku mitōtelo ya bubela ya pa kala. Ne bisela bya Pasaka nabyo monka na monka, kifwa kwingidija maí ne tululu, na mulongelwa mu matanda makwabo. Bene Kidishitu babajinji kebādipo basoba masobo a Noele nansha a Pasaka, monka kemusobelanga’opo bene Kidishitu babine dyalelo.

4. Mafuku a Kubutulwa: Mafuku a kubutulwa esambilwe’po mu Bible i abidi kete a masobo āsobele bantu bakubulwa kutōta Yehova. (Ngalwilo 40:20-22; Mako 6:21, 22, 24-27) Bene Kidishitu babajinji kebādipo basoba masobo a mafuku a kubutulwa. Bisela bya kusoba masobo a mafuku a kubutulwa byātambile ku mitōtelo ya bubela ya pa kala. Bene Kidishitu babine bekalanga bepa byabuntu ne kwisangaja pamo mu bitatyi bikwabo mu bula bwa mwaka.

5. Moyo wa Kutyina Bafu: Bafu kebakokejapo kulonga kintu nansha kimo nansha kwivwana kwine. Ketukokejapo kwibakwasha, kadi nabo kebakokejapo kwitususula. (Mitōto 146:4; Musapudi 9:5, 10) Muya ufwanga; kewendelelangapo na būmi kupwa kwa kufwa. (Ezekyele 18:4) Inoko, kyaba kimo, bamwikeulu babi, batelwa bu bademona, bekalanga belombola bu mishipiditu ya bafu. Bisela byonso bimanine pa moyo wa kutyina bafu nansha pa kutōta bafu i bibi.​—Isaya 8:19.

6. Musalaba: Yesu kāfwidilepo pa musalaba. Wāfwidile pa mutyi, nansha pa kipingo. Kishima kya mu Kingidiki kyalamwinwe bu “musalaba” mu Mabible mavule kyādi kishintulula kipingu kya mutyi. Kayukeno ka musalaba i katambe ku mitōtelo ya bubela ya pa kala. Bene Kidishitu babajinji kebādipo bengidija musalaba nansha kwiutōta. Shi ke pano, lelo ulanga amba i kyendele’mo kwingidija musalaba mu butōtyi?​—Kupituluka 7:26; 1 Kodinda 10:14.

7. Kuleka nkulupilo ne bisela bimobimo mu bino kukokeja kumweka bu kukomo. Bantu bomubutulwa nabo ne balunda nobe babwanya kukimba kukunekenya mutyima uleke kushinta nkulupilo yobe. Inoko, yuka amba kusangaja Leza ko kudi na mvubu kupita kusangaja bantu.​—Nkindi 29:25; Mateo 10:36, 37.

[Kifwatulo pa paje 22]

Leza ke Busatu Busantupo

[Kifwatulo pa paje 23]

Noele ne Pasaka i bitambe ku mitōtelo ya bubela ya pa kala

[Kifwatulo pa paje 23]

Kekudipo buluji nansha bumo bwa kutōtela bafu nansha kwibatyina