Mwanda Waka Tufwanga?
“Pa mitenta yonso ya mikuna kepadi talala nyā, mu mityi monso kukivwanapo kadi luvula lupukuma; toni tulēle mu mityi: ilaija; panopano ponka nobe usa kukōkolokwa pamo’nka bwa ato.”—JOHANN WOLFGANG VON GOETHE, MUSASUDI MWINE ALEMANYE.
LEZA wāpangile bantu na mutyima wabila kwikala bōmi nyeke. O mwanda Bible unena’mba Leza watūdile “mwiivwanino wa [kusaka kwikala’ko] nyeke mu mityima yabo.” (Musapudi 3:11, Beck) Inoko Leza kāpēlepo bantu enka mutyima wa kwabila kwikala bōmi nyeke. Wēbapēle ne muswelo wa mwa kwikadila bōmi nyeke.
2 Bambutwile betu babajinji, ba Adama ne Eva, bāpangilwe babwaninine, bambulwa kabulema mu ñeni nansha ku ngitu. (Kupituluka 32:4) Langa’po bidi—kwādi kutupu misongo ya zenzeka nansha bisanso, kutupu moyo umbi nansha kuzumbijazumbija mityima! Kadi Leza wēbatūdile mu paladisa, mwabo mwa dyangi shē. Mpango ya Leza yādi ya amba muntu ekale na būmi nyeke ne kadi amba mwenda mafuku, pano pantanda ponso pasambakane lutundu lwa muntu lubwaninine. (Ngalwilo 1:31; 2:15) Penepo mwanda waka tufwanga?
Kubulwa Kikōkeji Kuletanga Lufu
3 Leza wāsoñenye Adama amba: “Ku mityi yonso ya budimi kudya udyako bitupu kekudipo mwanda. Nanshi ku mutyi wakuyukanya buya ne bubi, kokadyako i kijila; mwanda difuku dyokadyako mwiko, kufwa ukafwanga.” (Ngalwilo 2:16, 17) Nanshi kwikala bōmi nyeke kwa ba Adama ne Eva kwādi ne na pokwādi kwimanine, i pa kukōkela kwabo kudi Leza.
4 I kyabulanda, ba Adama ne Eva kebākōkelepo ku kijila kya Leza. (Ngalwilo 3:1-6) Enka nankyo, bāikala ke babipya-mambo, pa mwanda “bubi ko kujilula kwa bijila.” (1 Yoano 3:4) Ebiya ba Adama ne Eva bājimija lonso kyepelo kyabo kya kwikala na būmi bwanyeke. Mwanda waka? Mwanda “mpalo ya bubi i lufu.” (Loma 6:23) O mwanda Leza, paātyibīle ba Adama ne Eva nsambu, wānene amba: “Wi biloba, kabidi i kubiloba konka kokajokela.” Ponka’po, bambutwile betu babajinji bāpangwa mu kīkalo kyabo, ke mu Paladisa kadi. Tamba’nka mu dyodya difuku dyālubile ba Adama ne Eva, bāshilwile kushetemukila ku lufu bityebitye ino pambulwa kushisabala.—Ngalwilo 3:19, 23, 24.
‘Lufu Lwāsambakene ku Bantu Bonso’
5 Pano ba Adama ne Eva bādi kebadi na bubi bwibalamete pototo mu misanga yabo. O mwanda kebādipo bakokeja kubutula lutundu lubwaninine, i pamo bwa kikombola kisendame, kekikokejapo kulupula kintu kibwaninine. (Yoba 14:4) I bine, kubutulwa kwa muntu yense kubingijanga buno bubine, bambutwile betu babajinji bājimije bukomo bwa ngitu bubwaninine ne būmi bwanyeke bwabo ne bwa lutundu lwabo. Polo mutumibwa mwine Kidishitu wāsonekele amba: “Monka mwatwelele bubi panopantanda ku muntu umo, ne lufu nalo ponka pa bubi, mo monka mwasambakanine lufu ku bantu bonso, mwanda abo bonso bapīle mambo.”—Loma 5:12; enzankanya na Mitōto 51:5.
6 Dyalelo, bafundi ba sianse kebayukilepo mwanda waka bantu banunupanga ku mfulo bafwa. Inoko Bible aye witushintulwila’mba tufwanga pa mwanda twabutwilwe na bubi botwāpyene ku bambutwile betu babajinji. Ino i kika kitufikilanga potufwanga?
[Questions]
1, 2. (a) Bantu bāpangilwe na mutyima wa kwabila’ka? (b) Ba mulume ne mukaji babajinji bādi na būmi bwa muswelo’ka?
3. Kwikala na būmi bwanyeke kwa ba Adama ne Eva kwādi kwimanine pa kika?
4. Pālubile ba Adama ne Eva, mwanda waka bājimije kyepelo kya kwikala nyeke mu Paladisa?
5. I muswelo’ka wāsambakene lufu ku muzo wa muntu onso mutuntulu?
6. Lelo tufwanga mwanda waka?