Majende ne Maleñanya I Mabi

Satana ukusakilanga wikale na majende. Bantu bavule balambulanga milambu ku bankambo babo nansha ku mishipiditu amba bebakinge ku bibi. Baloñanga namino mwanda batyinanga bipangwa bya bukomo bidi mu kikalo kya mishipiditu. Bavwala lumpete lwa majende nansha nkano ya majende. Bamina bimino, bakwabo besala “manga” mu ngitu, balanga amba adi na bukomo bwa majende. Bantu bamobamo bafyanga bipako bya bijolongo mu mobo nansha kwibikolela panshi, amba i bya kwishīka. Bakwabo bapaka “manga” amba o a kwibapa kīto mu bya busunga, a kwibabingija ekizame ku masomo, na- nsha a buswe bwa kusakañana nabo.

Kukingwa kulumbuluke nakampata ku bingojila bya Satana i kwikala mulunda na Yehova. Yehova Leza ne bamwikeulu bandi i bakomo byabinebine kutabuka Satana ne bademona bandi. (Yakoba 2:19; Kusokwelwa 12:9) Yehova utengele nyeke kulombola bwandi bukomo mwanda wa kulwila balunda nandi—bantu bamukōkele mu byonso.—2 Bilongwa 16:9.

Kinenwa kya Leza kinena’mba: “Kemukajendulapo bya majende.” Yehova i mujidike majende ne maleñanya, mwanda bino bintu bifikijanga muntu ku kubikalwa na Satana Dyabola.—Levi 19:26.