Kipwilo “Kyaikala mu Kitatyi kya Ndoe”

1, 2. Le i bika byendela Solo ku Damakasa?

BAÑENDA bakalabale abafwena ku Damakasa, mwine mobasa kufikidija nkuku yabo imbi. Basa kubulwila panja pa mobo bana ba bwanga ba Yesu bashikibwe , kwibakuta, kwibamwesha malwa, ne kukebatwala ku Yelusalema kobākemwena bukalabale bwa Sanedini.

² Mwendeji wa kino kibumbo, witwa bu Solo, kemumwange kala mashi.a Panopano ponka, wadi ubandila ne kwitabija padi pasa balunda nandi bapyasakane Shitevani mwanā bwanga mwipāne wa Yesu mabwe kufika ne byafwa. (Bil. 7:57–8:1) Solo kasangedilepo’tu kumwesha malwa enka balondi ba Yesu ba mu Yelusalema, pano au utangidile kumeso ukākija mudilo wa kupangwapangwa kwa malwa. Kyandi’tu i kubija nyā katangotango kabi ketwa bu “Dishinda.”—Bil. 9:1, 2; tala kapango “Lupusa Lwadi na Solo mu Damakasa.”

3, 4. (a) I bika byātene Solo? (b) Le i bipangujo’ka byotusa kubandaula?

³ Na mu kitulumukila, kiké kikelema kibajokoloka Solo. Bendi nandi abamone kino kiké , ino abashala mu kanwa pululu. Solo wapone panshi, ke mpofu. Kumona mpika, waivwana diwi ditamba mūlu dinena’mba: “Solo, Solo, le i kika kyoumpangilapangila?” Mubozokelwe, Solo waipangula amba: “A Mfumwetu, le wi ani?” Malondololo atambula Solo abamuteneka bininge ku mutyima, amba: “I ami Yesu, mwine opangapanga.”—Bil. 9:3-5; 22:9.

⁴ I ñeni’ka yotuboila ku binenwa bibajinji bya Yesu kudi Solo? Le i bika byotukamwena mu kubandaula byālongekele paālamukile Solo? Ne i bufundiji’ka botwifunda ku byālongele kipwilo mu kitatyi kya ndoe kyālondele’po pa kupwa kwa Solo kwalamuka?

“Le I Kika Kyoumpangilapangila?” (Bil. 9:1-5)

5, 6. Le i ñeni’ka yotuboila ku binenwa bya Yesu kudi Solo?

⁵ Yesu pa kukala Solo mu dishinda dyenda ku Damakasa, kāmwipangwilepo amba: “Le i kika kyopangilapangila bami bana ba bwanga?” Monka motwamwena, wānenene amba: “Le i kika kyoumpangilapangila?” (Bil. 9:4) Bine, matompo a balondi bandi asense Yesu aye mwine.—Mat. 25:34-40, 45.

⁶ Shi ususulwa pangala pa lwitabijo lobe mudi Kidishitu, kulupila amba Yehova ne Yesu bayukile masusu obe. (Mat. 10:22, 28-31) Pano’ko bidi, matompo padi keatalukilepo. Ino kokilwa, Yesu wāmwene Solo paālungile kuboko ku lufu lwa Shitevani, kadi wāmumwene paādi ubulula bana bandi ba bwanga mu mobo abo mu Yelusalema. (Bil. 8:3) Ino pa kitatyi’kya, Yesu kālongele’popo kintu. Shako, Yehova kupityila kudi Kidishitu, wāpele Shitevani ne bana ba bwanga bakwabo bukomo bwa kulama kikōkeji kyabo.

7. Le ukalonga bika pa kusaka ūminine kupangwapangwa?

⁷ Nobe ubwanya kūminina kupangwapangwa shi ulonge bino bintu: (1) Sumininwa kulama lulamato lobe, pampikilwa kubanga bikalupuka’ko. (2) Lomba Yehova akukwashe. (Fid. 4:6, 7) (3) Leka Yehova mwine ajokeje kinongo. (Loma 12:17-21) (4) Kulupila amba Yehova ukakukomeja ūminine matompo kufika ne pakatalula’o.—Fid. 4:12, 13.

“A Solo, Mwanetu, Mfumwetu . . . Wantume” (Bil. 9:6-17)

8, 9. Le i muswelo’ka wēivwene Ananaisa pa mwingilo waāpelwe?

⁸ Pa kupwa’tu kulondolola kipangujo kyāipangwile Solo amba, “A Mfumwetu, le wi ani?” Yesu wāmunena amba: “Imana, katwele mu kibundi, kadi bakakulombola byofwaninwe kulonga.” (Bil. 9:6) Solo aye kumona mpika, wātwalwa ku kifikilo kyandi mu Damakasa, kwine kwaājikilwe na nzala koku ulombela mafuku asatu. Mu kine kitatyi’kyo, Yesu wesamba myanda ya Solo na mwanā bwanga wa mu kibundi’kya, dyandi i Ananaisa, wādi “unenenwa biyampe na Bayuda bonso” ba mu Damakasa.—Bil. 22:12.

⁹ Fwatakanya mobyāikele kuvutakenya ñeni Ananaisa! Mutwe wa kipwilo, Yesu Kidishitu musanguke, wesambe nandi aye mwine, wamusañuna engile mwingilo wa pa bula. Bine i dyese, inoko i mwingilo mukomo! Pa kulombolwa amba ende akesambe na Solo, Ananaisa watentulula amba: “A Mfumwami, kendi mwivwane ku bavule myanda ya yao muntu, bintu bibi byonso byalonga bajila bobe ba mu Yelusalema. Kadi aye udi muno na lupusa lwa babitobo bakulu mwanda wa kukwata boba bonso beta dijina dyobe.”—Bil. 9:13, 14.

10. Le tubefunde bika pa byalonga Yesu kudi Ananaisa?

¹⁰ Yesu kātopekelepo Ananaisa pa kulombola mwawiivwanina. Inoko Yesu aye, wāmupele buludiki budi padi tō. Kadi Yesu wāmutele mutyima pa kumusapwila bubinga bwine bwasakila engile uno mwingilo wa pa bula. Yesu wēsambila padi Solo amba: “Uno muntu i kingidilwa kyonatonga mwanda wa kuselela dijina dyami ku mizo enka ne ku balopwe ne ku bana ba Isalela bene. Mwanda nkamulombola patōkelela bintu byonso byafwaninwe kususuka nabyo pa mwanda wa dijina dyami.” (Bil. 9:15, 16) Ananaisa wakōkela Yesu lubilo lonka. Wasokola Solo wadi upangapanga bantu, kamunena amba: “A Solo, mwanetu, Mfumwetu Yesu, yewa wakumwekēle mu dishinda powadi wiya, wantume mwanda wa meso obe amone kadi uyulwe mushipiditu ujila.”—Bil. 9:17.

11, 12. Le i ñeni’ka yotwaboila ku byālongele ba Yesu, Ananaisa, ne Solo?

¹¹ Myanda mivule i mimweke patōka mu byālongele ba Yesu, Ananaisa, ne Solo. Kimfwa, Yesu wingilanga mwingilo mukatampe na kutangidila mwingilo wa kusapula, monka mwaālaile’kyo. (Mat. 28:20) Nansha byakakisambengapo na muntu ne muntu dyalelo, Yesu uludikanga mwingilo wa busapudi kupityila kudi umpika mukōkele, mwine waatongele kwendeja bengidi bandi ba mu njibo. (Mat. 24:45-47) Mu buludiki bwa Kitango Kyendeji, basapudi ne bapania batumwanga kukasokola boba bakimba kuyuka myanda ya Kidishitu. Monka mwekinenenanga shapita ushele kunyuma, bavule mu bano bantu balombanga bwendeji ne kwibusokola pobetana na Batumoni ba Yehova.—Bil. 9:11.

¹² Ananaisa wāitabije na kikōkeji mwingilo ne kweselwa wāeselwa. Le nobe ukōkelanga ku lubila lwa kusapula ne pa mfulo bukamoni, nansha shi mwingilo obe ukukwatyijanga moyo? Bamo bekalanga na bumvu bwa kwenda ku njibo ne njibo kuketana na bantu bokebayukile. Bakwabo nabo bakomenwanga kusapwila bantu mu bifuko byabo bya busunga, mu bipito, ku telefone nansha ku mikanda. Ananaisa wānekenye moyo, wāikala na dyese dya kukwasha Solo atambule mushipiditu ujila.b Ananaisa wābwenye mwanda wākulupile mudi Yesu ne kumona Solo bu mwanabo. Netu, pamo bwa Ananaisa tukokeja kunekenya moyo shi tukulupile amba Yesu ye wendeja mwingilo wa busapudi, shi twivwanine bantu lusa, ne shi tubadikile kala kwibamona bu banabetu enka ne boba batyinwa.—Mat. 9:36.

“Waanza Kusapula . . . Myanda ya Yesu” (Bil. 9:18-30)

13, 14. Shi wifundanga Bible ino kwabatyijibwe, i ñeni’ka yokokeja kuboila ku kimfwa kya Solo?

¹³ Solo wapeja bukidi kwingidija byaefunda. Upwa’tu kundapwa, wabatyijibwa ne kushilula kwilunga na bana ba bwanga ba mu Damakasa. Kadi walonga bivule. “Ponka na ponka waanza kusapula mu mashinankonka myanda ya Yesu, amba uno’u i Mwanā Leza.”—Bil. 9:20.

¹⁴ Shi wifundanga Bible ino kwabatyijibwe, ubulwe’po kwikala bwa Solo wāpejeje bukidi kwingidija byaefunda? Na bya dyese, Solo wēmwenine kingelengele kyāmulongēle Kidishitu ne e kyo kyāmukweshe alonge’po kintu. Ino kudi bakwabo nabo bēmwenine bingelengele bya Yesu. Kimfwa, kisumpi kimo kya Bafadiseo kyāmwene Yesu undapa muntu wa kuboko kūmu, kadi kibalwa kivule kya Bayuda kyāyukile amba Yesu wasangula Lazalasa mu bafwe. Ino bavule mobadi kebāitabijepo, pakwabo bāpatanya’byo. (Mako 3:1-6; Yoa. 12:9, 10) Ino kwishila nabo, Solo waālamukile. Mwanda waka Solo wāitabije, ino bakwabo bātunya kwitabija? Mwanda wādi wakaminwe Leza kupita’ko bantu ne wādi ufwija’ko bikatampe pa lusa lwāmufwidile Kidishitu. (Fid. 3:8) Nobe shi witabije uno muswelo, kukalekapo kintu nansha kimo kikukankaje kwilunga ku mwingilo wa busapudi ne kubwanya bisakibwa bya kubatyijibwa.

15, 16. Polo wādi ulonga bika mu mashinankonka, ne Bayuda ba mu Damakasa bālongele’po namani?

¹⁵ Ubulwe’po kumona bibumbo mobyāshintyile malango; kutulumuka, mutyima kusansa, ne bulobo, pobyāmwene Solo ushilula kusapula Yesu mu mashinankonka? Badi beipangula’mba: “Mwene uno ye muntu wadi usala boba ba mu Yelusalema beta dino dijina? Mwene kyaidile muno i kwibakwata ne kukebatūla kudi babitobo bakulu?” (Bil. 9:21) Pa kushintulula mwāalamukile mutyima wandi kudi Yesu, Solo wadi “ubingija mungya buluji amba uno’u ye Kidishitu.” (Bil. 9:22) Ino buluji ke alopo lufungulo ku bonso. Mwanda kebukokejapo kufungula ñeni ya yewa ubikelwe na bishekulu nansha yewa utādilwe na mitatulo. Nansha namino, Solo kalekele’byopo.

¹⁶ Myaka isatu pa kupita’po, Bayuda ba mu Damakasa bādi bakikokanya na Solo. Ku mfulo bakimba kumwipaya. (Bil. 9:23; 2 Ko. 11:32, 33; Ngt. 1:13-18) Nkuku pa kusokoka, Solo watonga kulonga bintu na budyumuku, wanyema mu kibundi na kutūkijibwa mu kitunga pa kipunzu kya lubumbu lwa kibundi. Luka utela boba bakweshe Solo anyeme bufuku amba i “bana ba bwanga [ba Solo].” (Bil. 9:25) Uno muneneno ulombola amba bantu bamo bātejeje Solo mu Damakasa ne kwitabija busapudi bwandi baikala balondi ba Kidishitu.

17. (a) Bantu baketaba namani ku bubine bwa mu Bible? (b) Ino batwe tukendelela na kulonga bika, ne mwanda waka?

¹⁷ Poshilula kusapwila kisaka kyobe, balunda, ne bantu bakwabo bintu bilumbuluke byowifunda, padi usa kulanga amba baketabija buluji bwa bubine bwa mu Bible. Eyo, bamo baketabija, ino bakwabo nabo bakapela. Bine, padi bantu ba mu njibo yenu basa kukumona ne bu walwana. (Mat. 10:32-38) Inoko shi wendelele kulumbulula bwino bobe bwa kulangulukila pa Bisonekwa, ne shi ulame mwiendelejo wa bwine Kidishitu, enka ne boba bakulwa babwanya kushinta mityima mwenda mafuku.—Bil. 17:2; 1 Pe. 2:12; 3:1, 2, 7.

18, 19. (a) Banabasa pa kunenena Solo byāikala namani? (b) Lelo i muswelo’ka otubwanya kwiula Banabasa ne Solo?

¹⁸ Solo pa kutwela mu Yelusalema, bana ba bwanga kebaitabijepo amba bine pano ke mwanā bwanga. Penepa Banabasa wamunenena Solo, batumibwa bamwitabija, nandi washikatanabo kitatyi kampanda. (Bil. 9:26-28) Solo wādi na manwa, ino kādipo ukwatwa myanda miyampe bumvu. (Loma 1:16) Pakubulwa moyo wadi usapula mu Yelusalema, mwine mwaāshilwile kupangapanga byamalwa bana ba bwanga ba Yesu Kidishitu. Bayuda ba mu Yelusalema pa kwivwana nzuba, mwanda obadi besumbidile pano waalamuka, bashilula kukimba kumwipaya. “Banabetu pa kujingulula nabya, bamuselela [Solo] ku Kesalea kupwa bamutuma ku Tasusa.” (Bil. 9:30) Solo wākōkelele buludiki bwa Yesu bwaāletele kupityila ku kipwilo. Ne Solo ne kipwilo, abo bonso bamwena’mo.

¹⁹ Tala Banabasa ye wakwete milangwe ya kukwasha Solo. Ne kutatana kwine mpika, buno bukwashi bwāningije kipwano kya bano bengidi ba Yehova bapyasakane. Le nobe, pamo bwa Banabasa, le nobe udi na mutyima wa kukwasha bapya mu kipwilo, na kwingila nabo mu mwingilo wa budimi ne kwibakwasha bendelele ku mushipiditu? Ukeselwa bikata shi ulonge namino. Shi wi musapudi mupya wa myanda miyampe, le uketabija, pamo bwa Solo, bukwashi bukupebwa? Na kwingila pamo na basapudi ba bwino, ukalumbulula bwino bobe mu busapudi, nsangaji yobe mu mwingilo ikavudila’ko, ne kadi ukapwana na banabenu kipwano kiladila nyeke.

“Bavule Baitabija Mfumwetu” (Bil. 9:31-43)

20, 21. Le bengidi ba Leza ba pa kala ne ba dyalelo bamwenanga namani mu “kitatyi kya ndoe”?

²⁰ Solo pa kupwa kwalamuka ne kutaluka senene, “kipwilo kya mu Yudea, mu Ngadilea, ne mu Samadia monso kyaikala mu kitatyi kya ndoe.” (Bil. 9:31) I muswelo’ka wāingidije bana ba bwanga bino “bitatyi biyampe”? (2 Tm. 4:2) Nsekununi inena’mba kyadi “kyenda kitama.” Batumibwa ne batutu bakwabo bādi na biselwa bākomeje lwitabijo lwa bana ba bwanga ne kutangidila kipwilo kyādi kyenda “kinangila mu kutyina Yehova ne mu kusengibwa na mushipiditu ujila.” Kimfwa, Petelo wāingidije kino kitatyi mu kukomeja bana ba bwanga ba mu kibundi kya Dida mu Dilungu dya Shalone. Bukomo bwaālongele bwālengeje bavule ba mu kifuko’kya “baalamukila kudi Mfumwetu.” (Bil. 9:32-35) Bana ba bwanga kebalabikilwepo na kulondalonda bintu bikwabo, ino bētele mutyima abo bene ne kuta’o ku kusapula myanda miyampe. Bipa byalupukile’ko i kipwilo “kyadi kivudija’nka kwivudija.”

²¹ Dya ku mfulo kwa myaka ya katwa ka 20, Batumoni ba Yehova mu matanda mavule baikele nabo mu “kitatyi kya ndoe.” Imbikalo yadi isusula bantu ba Leza mu makumi a myaka yafudile mu kitulumukila, ne kukankajibwa kwa mwingilo wa busapudi nako kwalekelwe nansha kutalulwa’ko. Tununu makumi a Batumoni ba Yehova baboile uno mukenga basapwila bantu bavule, ne bipa byalupukile’ko i bisangaja bininge.

22. I muswelo’ka okokeja kwingidija senene bwanapabo bodi nabo?

²² Le nobe wingidijanga senene bwanapabo bodi nabo? Shi udi mu ntanda mudi bwanapabo bwa kutōta, Satana ukasangela ku kukokela mu kulondalonda byabupeta, pa kyaba kya tumweno twa Bulopwe. (Mat. 13:22) Kokapuakanibwa. Ingidija biyampe ndoe yo-yonso ya kakitatyi yobwanya kwikala nayo. Mona kino bu mukenga wa kusapula ne pa mfulo bukamoni ne wa kutamija kipwilo. Vuluka, ngikadilo yodi’mo ikokeja kushinta na mu kukopa kwa diso.

23, 24. (a) Lelo i ñeni’ka yowaboila ku nsekununi ya Tabita? (b) Le tufwaninwe kusumininwe kulonga bika?

²³ Tala byālongele mwanā bwanga utelwa bu Tabita, nansha bu Dokasa. Wādi ushikata mu Yopa, kibundi kidi kubwipi na Dida. Uno kaka wa kikōkeji wāingidije kitatyi ne bwino bwandi na tunangu, na kulonga “bilongwa biyampe bivule ne kupāna byabuntu bingi bya ku lusa.” Na mukitulumukila, wābela ne kufwa wāfwa.c Lufu lwandi lwāletela bana ba bwanga ba mu Yopa bulanda bukata, kutabukidila bakaji ba kishala bātengelwe na kanye kandi. Petelo pa kufika ku njibo kwādi kuteakanibwa umbidi mwa kwiujikila, wālonga kingelengele ke kyamwekele kashā mu batumibwa ba Yesu Kidishitu. Petelo wālombela kupwa wāsangula Tabita mu lufu! Le ubwanya kufwatakanya nsangaji yāikele na bakaji ba kishala ne bana ba bwanga bakwabo pēbetyile Petelo bāye mu kyumba ne kwibalombola Tabita mūmi? Bino binkumenkume kebyābudilwepo kwibakomeja ku matompo ādi ebatengēle kumeso! Kadi kino kingelengele i mwanda wāendele nkuo “wayukana mu Yopa monso, kadi bavule baitabija Mfumwetu.”—Bil. 9:36-42.

²⁴ Kudi ñeni ibidi mikatampe yotuboila ku ino mānga isenga ya Tabita. (1) Būmi i bwīpi. Nanshi i kya kamweno kwilongela dijina diyampe kudi Leza ponso pakidi’ko mukenga wa kulonga namino! (Mus. 7:1) (2) Lusangukilo i lukulupilo lwa bine. Yehova wāmwene bilongwa bivule bya kanye bya Tabita, wāmupala ne mpalo. Ukavuluka yetu mingilo mikomo kadi uketusangula shi tubafu kumeso kwa Amakedona kufika. (Bah. 6:10) O mwanda shi tutyumwinanga mu manwi “bitatyi bya makambakano” nansha potudi mu “kitatyi kya ndoe,” tusumininwei batwe bonso kusapula ne pa mfulo bukamoni bwa Kidishitu.—2 Tm. 4:2.