Bipangujo bya Batangi . . .

Lelo ino Ntanda Ikonakanibwa?

▪ Bamo badi bakulupile amba ntanda yadi ya konakanibwa mu mafuku 21, Kweji 10, 2011. Ino kebyaikelepo uno muswelo. Mu uno muswelo, bupolofeto bwa Harold Camping, mwisambi wa ku Ladiyo ya mu États-Unis kebwafikidilepo. Walaile amba Difuku dya Butyibi dyadi dya kufika mu mafuku 21, Kweji 5, 2011—kintenshi kikatampe kyadi kya kutenkanya umbuo, kadi myeji itano pa kupita’po, mu mafuku 21, Kweji 10, ino ntanda yadi ya konakanibwa fututu.

Inoko ino ntanda, keikonakanibwapo nansha dimo. Umpangi wa ntanda kakeyonakanyapo. Kinenwa kyandi kinena amba: “Abe waningije ntanda kwikala, yaikadidila ponka.”—Mitōto 119:90.

Inoko batangi bamo ba Bible bakokeja padi kunena amba uno umbuo wa ntanda ukonakanibwa ku mudilo. Pa kukwatakanya mumweno wabo, baletanga kisonekwa kya 2 Petelo 3:7, 10 kinena amba: “Madiulu akidipo ne pano, ne ntanda mīne kumo, ku kinenwa kimo kyonka, nabyo i bibīkilwe mudilo, bilaminwe ku difuku dya kidye kya konakanya bantu bakubulwa bwine-Leza. Nanshi difuku dya Yehova dikāyanga bwa ngivi; monka mo mukapityila madiulu ne mikungulo mikatampe mīne, ne byamūlu bīne bikasunguluka ku kyanga kikatampe, ne ntanda mīne ne bilongwa byao bidi monka bikasokelelwanga.” Lelo binenwa bya mutumibwa Petelo bifwaninwe kwivwanwa enka mobisonekelwe?

Mhm, ke amopo. Mwanda waka? Mwanda shintulwilo ya ano mavese ifwaninwe kudingakanibwa na myanda mikwabo ya mu mukanda wa Petelo ne na mikanda mikwabo ya mu Bible. Shi twivwane ano mavese enka moasonekelwe alombola amba, madiulu nansha umbuo wa diulu ne ntanda—midiyala ne midiyala ya ñenyenye ne bintu bikwabo—bikasungululwa ku mudilo mwanda bidi pamo bwa kakintu katyetye kadi’mo bantu babi bavule. Lelo ukasōka mufuko mutuntulu wa nyumu mwanda’tu wa lunyumu lumo lubole? Nansha dimo. Bino kebikekalapo na buluji! Ne Yehova nandi mo monka, kakonakanyapo nansha dimo bupangi bwandi bonso bwa diulu ne ntanda mwanda’tu wa butomboki bwāshilwile muntu umo kete wa mu mingilo ya bupangi bwandi.

Kadi uno mumweno ulwanga patōkelela na binenwa bya Yesu Kidishitu byaānene amba: “Dyese dyo dyabo bakōkele, ke-bantu boba bakapyana ntanda yonso.” (Mateo 5:5; Mitōto 37:29) Lelo shabana wa buswe ukōbakila kisaka kyandi njibo miyampe mwanda’tu wa kusoka’yo? (Mitōto 115:16) Bino kebibwanikapo! Yehova ke Umpangipo’tu, ino kadi i Tata wa buswe.​—Mitōto 103:13; 1 Yoano 4:8.

Petelo i mwingidije kishima “ntanda” mu buluji bwa kyelekejo pa kufunkila pa kisaka kya bantu—pano kifunkila pa kisaka kya bantu babi. Yuka amba Petelo udingakenye’yo na Dilobe dya mu mafuku a Noa. (2 Petelo 3:5, 6) Mu kine kitatyi’kya, enka bantu babi bo bāonakanibwe, ino ayo ntanda yāpandile pamo ne Noa muntu moloke ne kyandi kisaka. Mo monka ne Petelo pa kwingidija “madiulu,” wādi wisambila mu buluji bwa kyelekejo. Pano “madiulu” afunkila pa umbikalo wa bantu ubikele pa ntanda yakubulwa bwine Leza. Shi ke pano babi bampikwa kwalamuka bakapityidila, pamo ne imbikalo yonso mibi, mine ikasungululwa ne kupingakanibwa na umbikalo wa momwa mūlu, nansha Bulopwe bwa Leza.—Danyele 2:44.

Lelo penepa, umbuo wa ntanda ukonakanibwa? Mhm. Byobya bikonakanibwa i ntanda ya kyelekejo, ko kunena amba kisaka kya bantu babi. Ayo ntanda ikaladila nyeke pamo ne kisaka kya bantu bakekala’ko ba bwine Leza.—Nkindi 2:21, 22.