Wifunde mu Kinenwa kya Leza

Mwanda Waka Leza udi na Bulongolodi?

Kino kishinte kisambila pa bipangujo byokodi padi mwiipangule ne kukulombola kwine kokokeja kutanga malondololo mu obe Bible. Batumoni ba Yehova bakasangela kwisambila nobe pa ano malondololo.

1. Mwanda waka Leza wālongolwele Bene Isalela?

Leza wālongolwele lukunwa lwa mukulutuba Abalahama ke muzo ne kwiupa bijila. Wāityile uno muzo bu Isalela ne kwiulonga ke kitūlo kya mutōtelo wa bine ne kya Kinenwa kyandi, ke Bisonekwa Bikola kadi. (Mitōto 147:19, 20) Mu uno muswelo, bantu ba mizo yonso bāmwenine’mo.—Tanga Ngalwilo 22:18.

Leza wātongele Bene Isalela ke batumoni bandi. Kitatyi kyobādi bakōkela bādi bamwena mu bijila bya Leza. (Kupituluka 4:6) Tubwanya kuyuka bivule bitala padi Leza wa bine na kwifunda mānga ya Bene Isalela.—Tanga Isaya 43:10, 12.

2. Mwanda waka Bene Kidishitu ba bine i balongololwe?

Kitatyi kimo, Isalela wājimije buntu bwa Leza, Yehova nandi wapingakanya uno muzo na kipwilo kya bwine Kidishitu. (Mateo 21:43; 23:37, 38) Pa kala, Bene Isalela bādi batumoni ba Leza. Dyalelo nadyo Bene Kidishitu ba bine bengilanga bu batumoni ba Yehova.—Tanga Bilongwa 15:14, 17.

Yesu wālongolwele balondi bandi mwa kusapwila bukamoni butala padi Yehova ne kulonga bana ba bwanga mu mizo yonso. (Mateo 10:7, 11; 24:14; 28:19, 20) Uno mwingilo wendanga ufika ku mfulo yao. Musunsa mubajinji, Yehova wākongakenye pamo mu mutōtelo wa bine midiyo ne midiyo ya bantu batambile mu mizo yonso. (Kusokwelwa 7:9, 10) Bene Kidishitu ba bine nabo i balongololwe mwanda wa babwanye kwikankamika ne kwikwasha umo ku mukwabo. Kujokoloka ntanda yonso, badi na mpangiko imo ya bufundiji bwa Bible ku kupwila kwabo.—Tanga Bahebelu 10:24, 25.

3. I muswelo’ka washilwile Batumoni ba Yehova mu ano etu mafuku?

Bulongolodi bwa Batumoni ba Yehova ba mu ano etu mafuku bwāshilwile mu myaka ya 1870. Kabumbo katyetye ka befundi ba Bible kāshilwile kusokola bubinebine bwa mu Bible bwājimine mu bula bwa myaka. Bādi bayukile amba Yesu wālongolwele kipwilo kya bwine Kidishitu mwa kusapwila. O mwanda bāshilwile kampanye ka kusapula Bulopwe kujokoloka ntanda yonso. Mu 1931 bātongele dijina dya bu Batumoni ba Yehova.—Tanga Bilongwa 1:8; 2:1, 4; 5:42.

4. Le Batumoni ba Yehova i balongololwe namani dyalelo?

Mu myaka katwa kabajinji, bipwilo bivule bya bwine Kidishitu bya mu matanda mavule byāmwenine mu kitango kyendeji, kine kyādi kiyukile Yesu bu Mutwe wa kipwilo. (Bilongwa 16:4, 5) Mo monka ne dyalelo, Batumoni ba Yehova bayukile Yesu bu Mwendeji wabo. (Mateo 23:9, 10) Kadi bamwenanga mu buludiki bwa Kitango Kyendeji kya bakulumpe ba bwino, bene bakankamika kupityila ku Bisonekwa ne kuludika bipwilo 100 000 ne musubu. Mu kipwilo ne kipwilo mudi bana-balume babwenye bisakibwa bengila bu bakulumpe nansha bu batadi. Bano bana-balume balelele luombe lwa Leza na buswe.—Tanga 1 Petelo 5:2, 3.

Batumoni ba Yehova i balongololwe mwa kusapwila myanda miyampe ne kulonga bana ba bwanga. Pa kukwasha bantu konso-konso, balamunanga, kutampa ne kwabanya mabuku a kwifunda nao Bible mu ndimi 500 ne kupita. Pamo bwa batumibwa, nabo basapulanga ku njibo ne njibo. (Bilongwa 20:20) Bakimbanga kwifunda Bible na bantu basenswe bubinebine pampikwa budimbidimbi. Bantu ba Yehova byobemanine pa kusangaja Leza ne kukwasha bakwabo, i babunde bulongolodi bwa bantu ba nsangaji.—Tanga Mitōto 33:12; Bilongwa 20:35.

Shi usaka kuyukila’ko bivule, tala shapita 19 wa dino dibuku, dilupwilwe na Batumoni ba Yehova, Lelo i Bika Bine Bifundija Bible?