Le Tufwaninwe Kulombela Kudi Basanto?

LELO i ani kazumbije mutyima ne kusaka kukwashibwa na muntu mukwabo? Kukwatañana na bintu bilengeja kuzumbazumba kwetu, tukatonga padi mulunda wa lusa ne ke mufikilwe na makambakano etutene. Lusa ne bino bintu ke bimufikile bimwikadijanga bu mulunda muyampe.

Bamo babwanya kwiivwana uno muswelo kitatyi kyobalombela. Pa kyaba kya kufwena Leza​—ubwanya kumweka bu udi peulu ne ulenga nzuba kobadi​—beivwananga biyampe kufwena ku musanto. Balañanga’mba basanto bakekala na lusa bininge mwanda bātenwe na matompo ne masusu avudile kutana bantu. Kimfwa, bantu bajimije kintu kya mvubu mpata kobadi, babwanya kulomba “Musanto” Anthony wa mu Padua​—mukwatakani wa lufundijo lutala kujimija ne kwibwa bintu. Shi i pa mwanda utala nyema ubela, balombelanga “Musanto” Francis wa mu Assisi nansha kudi “Musanto” Jude Thaddeus shi i batyumukwe mutyima mwanda wa kintu kyobajimija.

Penepa, tubwanya kuyuka namani shi i biyampe kulombela ku basanto kukwatañana na Bisonekwa? Byotulombelanga kudi Leza, tukasaka bine kuyuka shi wivwananga milombelo yetu. Tufwaninwe ne kwiipangula amba: Le Leza umonanga namani kulombela kudi basanto?

KULOMBELA KUDI BASANTO​—BINENA’PO BISONEKWA

Kibidiji kya kulombela kudi basanto kimanine pa lufundijo lwa kusengelwa na basanto lufundija Kipwilo kya Katolika. Kukwatañana na Ansikolopedi Mipya ya Katolika (Angele), mulangwe mwine udi’po i wa “kulombelwa na muntu udi na lupusa lwa kulombela ku meso a Leza, mwanda wa muntu usakilwa bukwashi afwilwe lusa.” Nanshi, muntu ulombela kudi basanto ulombelanga na lukulupilo lwa amba ubwanya kwitabijibwa mu muswelo wa pa bula kupityila kobadi, mwanda wa kyepelo kyabo kya dyese kumeso a Leza.

Lelo Bible ufundijanga luno lufundijo? Bamo banenanga’mba mutumibwa Polo waādile kyālwilo kya kulombela kudi basanto mu bilembwa byandi. Kimfwa wāsonekēle bene Kidishitu ba mu Loma amba: “Penepo kadi, nemwisashilapo, bānwe bāna betu, pa mwanda wa Mfumwetu Yesu Kidishitu, ne pa mwanda wa lusa lwa aye mushipiditu’mba, mukankamane byamwiko, pamo’nka na ami, monka mu milombelo yenu kudi Leza pa uno mwanda wami.” (Loma 15:30) Le Polo wānene banababo bene Kidishitu bamusengele kemeso a Leza? Nansha dimo. Bine, abo’ko ye bādi bakunena Polo mutumibwa wa Kidishitu ebasengele. Polo wālombwele amba, i biyampe kunena mwanetu mwine Kidishitu etulombele kudi Leza. Ino, i bishile kulampe na mwanda utala kulombela kudi muntu kampanda udi na lukulupilo lwa kwenda mūlu ayukije kulomba kwetu kudi Leza. Mwanda waka?

Yesu unena mu Evanjile ya mutumibwa Yoano amba: “Ami enka ne dishinda, ne bīne, ne būmi, kekudi nansha umo wakukafikila kudi Tata poso ponka pa ami.” (Yoano 14:6) Unena kadi amba: “Kyonso kyo mukalomba kudi Tata mu dijina dyami, nandi emupe’kyo.” (Yoano 15:16, Dibuku Dijila) Yesu kānenepo amba tufwaninwe kulombela kwadi, kupwa nandi kasapwila Leza pa mwanda wetu. Inoko, pa kusaka’mba milombelo yetu ivwanwe, tufwaninwe kulombela kudi Leza kupityila kudi Yesu, ke kupityilapo kudi muntu mukwabo.

Bana ba bwanga ba Yesu pobāmunene ebafundije muswelo wa kulombela, Yesu wālondolwele amba: “Pa kulombela mulombela’mba: Abe Tata wetu wa Mūlu dijina dyobe dijile kijila.” (Luka 11:2) Bine, kitatyi ‘kyonso,’ kyotulombela, ketufwaninwepo kulombela kudi Yesu nansha kudi muntu mukwabo, ino i kudi Leza aye mwine. Kukwatañana na buno bufundiji bwivwanike bwa Yesu, le ke biyampepo tufule ku kunena’mba tufwaninwe kulombela kudi Leza kupityila kudi Yesu Kidishitu, ino ke kupityilapo kudi bansenga bo-bonso nansha “basanto”?

Milombelo idi na mvubu mikatampe mu butōtyi bwetu, kadi kutōta muntu mukwabo pa kyaba kya kutōta Leza kekukwatañenepo na bufundiji bwa mu Bible. (Yoano 4:23, 24; Kusokwelwa 19:9, 10) O mwanda tufwaninwe kulomba’nka kudi Leza kete.

LE UFWANINWE KUTYINA KUFWENA LEZA?

Mu Busapudi bwandi bwa ku Lūlu, Yesu wāletele kimfwa kya mwana ulomba shandi kya kudya. Le shabana wādi wakupa wandi mwana dibwe pa kyaba kya mukate? Nansha nyoka wa bulembe pa kyaba kya mwita? (Mateo 7:9, 10) Mbutwile wa buswe kabwanyapo kulonga kino kintu!

Langulukila bidi pa kyelekejo kidi pamo bwa kino kya mumweno wa mbutwile. Langa’po bidi shi obe mwana ukimba kukulomba kintu kampanda. Utele mutyima bininge ku kulumbulula kipwano kyopwene nandi ne kwikala nyeke muntu ulumbwa. Inoko, pa mwanda wa moyo wa bituputupu wa kutyina byokalonga’po, wanena muntu mukwabo amulombele kintu kodi. Le ukeivwana namani? Le bikekala namani shi kadi na kibidiji kya kwisamba nobe’nka kupityila kudi uno muntu ne kadi kudi kintu kilombola’mba ukendelela kulonga namino? Le ukasangela ino mpangiko? Nansha dimo! Bambutwile ba buswe basakanga bana bebafwene abo bene ne kulomba byobasakilwa pampikwa kukambakanibwa.

Yesu pa kwingidija kyelekejo kya mwana ulomba bidibwa, wānene kibumbo amba: “I binebine le bānwe babiko muyūkile mwakupānina binengele ku bāna benu, lelo Shenu wa mūlu i namani, kakidilepo mu kupana binengele ku bakumulomba?” (Mateo 7:11) Na bubine, mbutwile usakanga kupa wandi mwana kintu kiyampe. Tata wetu wa mūlu ye mwine usakanga kwivwana ne kulondolola milombelo yetu.

Leza usaka tumufwene batwe bene mu milombelo nansha shi twibalēmenenwe na kutupatupa kwetu. Katongelepo bantu bakwabo ba kwivwana milombelo yetu. Bible witusoñanya amba: “Ela kiselwa kyobe padi Yehova, nandi ukakulelanga.” (Mitōto 55:22) Pa kyaba kya kwimanina pa kusengelwa na basanto nansha na muntu mukwabo, i biyampe kutamija mumweno muyampe padi Yehova Leza.

Tata wetu mūlu witutele mutyima batwe bonso. Usakanga kwitukwasha mu makambakano etu, kadi witwita tumufwene. (Yakoba 4:8) Twi basangale’po kashā pa kwikala na mukenga wa kufwena Tata, Leza wetu mwine “wivwananga kulombela”!​—Mitōto 65:2.

[Kifwatulo pa paje 12]

[Kifwatulo pa paje 13]

Pamo bwa shabana wa buswe udi na wandi mwana, Leza usakanga twisambe nandi