Kokolwa ‘Kujingwa Mutyima Padi Yehova’
“Bulembakane bwa muntu bukobakanya dishinda dyandi; kadi mutyima wandi ujingwa padi.”—NK. 19:3.
USA KULONDOLOLA NAMANI?
Le i bika bibwanya kwitulengeja ‘tujingwe mutyima padi Yehova’?
Le i bintu’ka bitano bibwanya kwitukwasha tuleke kujingila Leza mutyima?
Le i bika byotufwaninwe kuvuluka kitatyi kyotutanwa na makambakano makomo?
1, 2. Mwanda waka ketufwaninwepo kutopeka Yehova pa makambakano a bantu? Leta kimfwa.
TUNENE’PO bidi shi mudi mu busongi bwa nsangaji mu bula bwa myaka mivule. Ino difuku dimo amba ujokele kwinjibo, ubamone bintu byonso mu yobe njibo bisalakane. Bityi ne mameza bityumuke, masani makusankane, mumbu nayo myoneke byoikoma kulongolola. Njibo yobe ya bulēme ke masala onka-onka. Lelo ukadila amba, “mwanda waka wami mukaji walonga kino kintu?” Nansha ukepangula amba, “i ani walonga kino?” Na bubine, kipangujo kya bubidi kikakwiya mu ñeni kiponka na ponka. Mwanda waka? Mwanda uyukile amba mwinē pobe osenswe kabwanyapo kulonga kino kilongwa kya butomboki.
2 Dyalelo, tumwene ntanda idi pamo bwa njibo ya batwe bantu yoneka pa mwanda wa koneka kwa luvula, bukalabale ne busekese. Batwe befundi ba Bible, tuyukile amba Yehova kabwanyapo kulengeja ano makambakano onso. Wāpangile uno umbuo wa ntanda wikale bu paladisa ya nsangaji. (Ngal. 2:8, 15) Yehova i Leza wa buswe. (1 Yoa. 4:8) Kwifunda kwetu kwa Bisonekwa kwetukweshe tuyuke mwine ulengeja makambakano mavule a ino ntanda. Aye mwine i Satana Dyabola, “mulopwe wa ino ntanda.”—Yoa. 14:30; 2 Kod. 4:4, Bisonekwa Bitokele.
3. Le milangwe yetu ibwanya kunyengakana muswelo’ka?
3 Inoko, ketubwanyapo kutopeka Satana pa byamalwa byetu byonso. Mwanda waka? Mwanda makambakano etu amo alupukanga ku bilubo bya batwe bene. (Tanga Kupituluka 32:4-6.) Nansha byotubwanya kwitabija uno mwanda, kubulwa kubwaninina kwetu kubwanya kunyengakanya milangwe yetu ne kwitulengeja tutwele mu kashinda katwala ku musala. (Nk. 14:12) Mu muswelo’ka? Pa kyaba kya kwitopeka batwe bene pa makambakano etu, tubwanya kushilula kutopeka Yehova. Tubwanya’nka ne ‘kujingwa mutyima padi Yehova.’—Nk. 19:3.
4, 5. Le mwine Kidishitu ubwanya ‘kujingwa mutyima padi Yehova’ namani?
4 Le bibwanika bine ‘kujingwa mutyima padi Yehova’? Na bubine, kulonga namino i kwa bitupu. (Is. 41:11) Le i bika byotukakulupila kumwena’mo? Musasudi umo wanene amba: “Kuboko kobe i kwīpi pa kukupila Leza kikoni.” Ketubwanyapo kufula’nka ne ku kwivwana mawi a bantu batompwela Yehova. Inoko Nkindi 19:3 unena’mba, bulembakane bwa muntu “bukobakanya dishinda dyandi; kadi mutyima wandi ujingwa padi Yehova.” Bine, muntu ubwanya kujingwa mutyima padi Leza mu mutyima wandi. Ino ngikadila ibwanya kumweka ayo mine bityebitye. Muntu ubwanya kujingwa mutyima padi Yehova. Mfulo mfulō, uno muntu ubwanya kupaluka ku kipwilo nansha kuleka kukwatakanya ne pa mfulo mpangiko ya kutōta Yehova.
5 Le i bika bibwanya kwitulengeja ‘tujingwe mutyima padi Yehova’? I muswelo’ka otukokeja kwepuka dino dikinga? I biyampe tuyuke malondololo a bino bipangujo. Na bubine, uno mwanda utala kipwano kyetu kyotupwene na Yehova Leza!
LE I BIKA BIBWANYA KWITULENGEJA ‘TUJINGWE MUTYIMA PADI YEHOVA’?
6, 7. Mwanda waka bene Isalela ba mu mafuku a Mosesa bāshilwile kutompwela Yehova?
6 Le i bika bikokeja kulengeja mutyima wa mwingidi wa kikōkeji wa Yehova ushilule kutompwela Leza wandi? Twisambilei bidi pa bintu bitano ne kubandaula bimfwa bya mu Bible bilombola muswelo wāponēne bantu bamo ba pa kala mu dino dikinga.—1 Kod. 10:11, 12.
7 Muneneno mubi wa bakwetu ukokeja kwikala na lupusa lubi potudi. (Tanga Kupituluka 1:26-28.) Bene Isalela bānyongolwelwe mu bupika bwa mu Edipito. Yehova wāletele mu kingelengele mpupo dikumi pa uno muzo mutomboke, kupwa waonakanya Felo ne basola bandi pa Kalunga Katyila. (Div. 12:29-32, 51; 14:29-31; Mit. 136:15) Bantu ba Leza bātūdile kitūlo mwa kutwelela mu Ntanda ya Mulao. Inoko, mu kino kitatyi kikomo bene Isalela bāshilwile kutompwela Yehova. Le i kika kyēbalengeje kuno kubulwa lwitabijo? Mityima yabo yēbasense pa mwanda wa bintu bibi byobāivwene pa bantu bātuminwe kukabela ntanda. (Umb. 14:1-4) Le byafula namani? Nkongo yonso keyātwelelepo mu “ntanda milumbuluke.” (Kup. 1:34, 35) Le tubwanya kyaba kimo kuleka muneneno mubi wa bakwetu uzozeje lwitabijo ne kwitulengeja tutompole pa muswelo wikele netu Yehova?
8. Le i bika byālengeje bantu ba mu mafuku a Isaya bashilule kutopeka Yehova pa ngikadilo yobādi’mo?
8 Masusu ne makambakano, bibwanya kwitutyumuna mutyima. (Tanga Isaya 8:21, 22.) Mu mafuku a Isaya, muzo wa Yuda wāikele mu ngikadilo mikomo. Bājokolokelwe na balwana. Bidibwa nabyo byasakana. Bavule bādi na nzala. Ino kibi kutabuka i kino, bādi mu nzala ya ku mushipiditu. (Am. 8:11) Ino pa kyaba kyakulomba Yehova ebakwashe banekenye ano masusu, bāshilula “kufinga” mulopwe wabo ne Leza wabo. Bine, bātopekele Yehova pa makambakano abo. Shi tubatanwa na kinkumbulu nansha na makambakano, le tukanena mu mityima yetu amba, ‘le Yehova wadi kwepi ponadi nandi buya?’
9. Mwanda waka bene Isalela ba mu mafuku a Ezekyele bātamije mumweno mubi?
9 Ketuyukilepo myanda yonso. Pa mwanda wakubulwa kuyuka myanda yonso, bene Isalela ba mu mafuku a Ezekyele bālangile’mba mashinda a Yehova “keadingakenepo.” (Ezek. 18:29) Bādi pamo bwa abo bētūdile bu batyibi ba Leza, kutūla misoñanya yabo ya boloke pangala pa ya Yehova ne kumutyibila mambo kukwatañana na kubulwa kwivwanija kwabo kwa myanda. Shi kyaba kimo ketwivwanijepo ne pa mfulo nsekununi ya mu Bible nansha muswelo ulongekele myanda mu bwetu būmi, tubulwe’po padi kulanga mu mutyima wetu amba mashinda a Yehova i mabi ne “keadingakenepo”?—Yoba 35:2.
10. Lelo muntu ubwanya kulonda kimfwa kibi kya Adama namani?
10 Kwitopeka batwe bene pangala pa bubi ne bilubo byetu. Ku ngalwilo’tu kwa mānga ya muzo wa muntu, Adama wātopekele Leza pa mwanda wa bubi bwandi. (Ngal. 3:12) Adama wātopekele Yehova, nansha byaātyumwine kijila kya Leza ku kusaka koku uyukile bipa bibi byādi bya kulupuka’ko. Na bubine, wānene’amba Yehova wāmupele mukaji mubi. Tamba mu kine kitatyi’kya, bantu bakwabo bālondele kimfwa kya Adama kya kutopeka Leza pa mwanda wa bilubo byabo. I biyampe twiipangule’mba, ‘lelo kutyumukwa mutyima ne kufitwa pa bilubo byami nkunengejanga ndeke kusangela misoñanya ya Yehova?’
11. Le i ñeni’ka yotuboila kudi Yona?
11 Kwisakila bipitepite. Mupolofeto Yona kēivwenepo biyampe pa butyibi bwa Yehova bwa kufwila Nineva lusa. (Yona 4:1-3) Mwanda waka? Mobimwekela wātele mutyima bininge ku bulēme bwandi kitatyi kekyāfikilepo bonakani bwaādi usapula. Yona wātele mutyima ku bulēme bwandi pa kyaba kya kwivwanina bene Nineva bādi na mutyima wa kwisāsa lusa. Lelo netu tubwanya kwisakila kufika ne ku ‘kujingwa mutyima padi Yehova’ pa kuleka kwalekele kuleta mfulo bukidibukidi? Shi ketudi basapule mu bula bwa makumi a myaka amba difuku dya Yehova ke didi pabwipi, le tukashilula kuleka kutūkijija Yehova mutyima mwanda wa bakwetu betufutulula pa kusapula kotusapula byobya binena Bible?—2 Pet. 3:3, 4, 9.
LE TUKEPUKA NAMANI ‘KUJINGWA MUTYIMA PADI YEHOVA’?
12, 13. Le i bika byoketufwaninwepo kwilwa shi tubashilula kutatana mingilo imo ya Yehova mu mutyima wetu?
12 Le tukalonga namani shi mutyima wetu wabubi ubashilula kutatana mingilo imo ya Yehova? Tuvulukei amba kulonga namino i kubulwa ñeni. Bwalamuni bukwabo bwalamwine Nkindi 19:3 amba: “Buvila bwa muntu bulembakanya wandi mwikadilo, ino wandi mucima wakalabela [Yehova].” (BB) Na kino mu ñeni, tubandaulei pano bintu bitano biketukwasha tubulwe kuleka makambakano a mu būmi etufikije ku kutopeka Yehova.
13 Kokasūla kipwano kyobe na Yehova. Tubwanya kwepuka milangwe yampikwa kubwaninina ya kujingwa mutyima padi Leza shi enka tulamine kipwano kyotupwene nandi. (Tanga Nkindi 3:5, 6.) Tufwaninwe kukulupila mudi Yehova. Kadi tufwaninwe kwepuka kwimona bu ba ñeni nansha kwisakila batwe bene. (Nk. 3:7; Mus. 7:16) Nabya ketukatopekapo Yehova kitatyi kitufikila bintu bibi.
14, 15. Le i bika biketukwasha tuleke kuta mutyima ku muneneno mubi wa bakwetu?
14 Kokaleka muneneno mubi wikale na lupusa podi. Bene Isalela ba mu mafuku a Mosesa bādi na bubinga bwinebwine bwa kukulupidila mba Yehova wādi ubwanya kwibatweja mu Ntanda ya Mulao. (Mit. 78:43-53) Ino kitatyi kyobāivwene bintu bibi pa tubedibedi dikumi twampikwa kikōkeji, kebāvulukilepo “byalongele kwandi kuboko.” (Mit. 78:42) Shi tulangulukila pa mingilo ya Yehova ne kuvuluka bintu byonso biyampe byaetulongele, tukaningija kipwano kyotupwene nandi. Mfulo mfulō, ketukalekapo milangwe mibi ya bakwetu itūle mukalo pa bukata bwetu na Yehova.—Mit. 77:11, 12.
15 Le bikekala namani shi tudi na milangwe mibi pa batōtyi-netu? Mu ngikadilo ya uno muswelo, kipwano kyetu na Yehova kibwanya koneka. (1 Yoa. 4:20) Kitatyi kyātatene bene Isalela kutongwa kwa Alone ne kyepelo kyandi, Yehova wāmwene kino kilongwa bu Kumwiuningila. (Umb. 17:10) Mu muswelo umo onka, shi tubashilula kutopeka ne kwiuningila boba batongele Yehova mwanda wa kuludika kipindi kya pano panshi kya bulongolodi bwandi, tudi na batwe batompwela Yehova.—Bah. 13:7, 17.
16, 17. Le i bika byotufwaninwe kuvuluka kitatyi kyotutanwa na makambakano?
16 Tuvulukei amba ke Yehovapo ulengeja makambakano etu. Nansha bene Isalela ba mu mafuku a Isaya byobāpalukile kudi Yehova, ino Aye wādi usaka’nka kwibakwasha. (Is. 1:16-19) Nansha shi tubatanwa na makambakano’ka, tubwanya kusengibwa pa kuyuka’mba Yehova witutele mutyima ne amba usakanga kwitukwasha. (1 Pet. 5:7) Na bubine, i mwitulaye kwitupa bukomo botusakilwa mwanda wa kūminina.—1 Kod. 10:13.
17 Shi tususukanga na bukondame kampanda—na bwālwile na Yoba muntu moloke—tufwaninwe kuvuluka amba Yehova kalengejangapo masusu. Yehova ushikilwe bukondame; kadi usenswe boloke. (Mit. 33:5) Le tubulwepo kunena na mwānene Edihu mulunda na Yoba amba: “Leka! Leka! Leka! kulampe kwine, Leza kalongapo bibi; Kadi ku Mwinebukomobonso alonge bukondame.” (Yoba 34:10) Pa kyaba kya kulengeja makambakano etu, Yehova witupanga “bintu byonso byakupanwa bilumbuluke, ne byabuntu bibwane.”—Yak. 1:13, 17.
18, 19. Mwanda waka ketufwaninwepo kutatana Yehova? Leta kimfwa.
18 Kokatatana Yehova. Leza i mubwaninine, kadi milangwe yandi itabukile milangwe yetu. (Is. 55:8, 9) O mwanda kwityepeja ne butūkanye bifwaninwe kwitukwasha tuyuke amba, kwivwanija kwetu kudi na mikalo. (Loma 9:20) Divule dine ketuyukangapo myanda yonso pa ngikadilo kasangwa. Na bubine, kodi mwimwene bubinebine bwa luno lukindi lwa amba: “Yewa ubadikila kusamba umweka bu mubinge, ino pa kufika obasamba nandi’wa, ukamujingulula.”—Nk. 18:17, Dibuku Dijila.
19 Shi mulunda netu mukulupilwe walonga kilongwa kyoketwivwanijepo dibajinji nansha kyotumona’mba kalongele’kyo kashā, le tukeyumbila kumunena’mba walonga kilongwa kibi? Le tukashilula kumutatana, nansha shi twi beyuke nandi ke padi myaka mivule? Shi twikele na balunda netu bakubulwa kubwaninina mu uno muswelo wa buswe, mwene tufwaninwe kukulupila Tata wetu wa mūlu, mwine wa mashinda ne milangwe itabukile yetu kulampe!
20, 21. Mwanda waka i biyampe tutopeke mwine ufwaninwe kutopekwa?
20 Topeka mwine ufwaninwe kutopekwa. Mwanda waka tufwaninwe kulonga namino? Mwanda, tubwanya kulengeja makambakano etu batwe bene. Shi bibaikala uno muswelo, tufwaninwe kwitabija kwitopeka batwe bene. (Ngat. 6:7) Kokakolwa kutopeka Yehova pa makambakano. Mwanda waka kumutopeka i kubulwa ñeni? Langulukila pa kino kimfwa: Motoka ubwanya kwikala na bukomo bwa kwenda lubilo bininge. Ino langa’po shi shofele wabweja’ko lubilo kupita mu kitonto, ebiya walonga akishida. Lelo i muntu weupungile ufwaninwe kutopekwa pa ino akishida? Mhm! Mu muswelo umo onka, Yehova wētupangile na bwanapabo bwa kwitongela. Ino kadi i mwitupe bulombodi bwa mwa kukwatyila butyibi bwa tunangu. Penepa, kine kyotutopekela Umpangi wetu mwanda wa bilubo byetu i kika?
21 Na bubine, makambakano etu onso keatambangapo ku bilubo byetu ne bilongwa byetu bibi. Bintu bimo bilongekanga mwanda wa “kyaba ne mwikadilo wa bu-muntu.” (Mus. 9:11) Ino shi ke pano, ketwakelwai amba Satana Dyabola ye kalenga byanzwe mubajinji wa bintu bibi. (1 Yoa. 5:19; Kus. 12:9) Aye ye walwana—ke Yehovapo!—1 Pet. 5:8.
SANSWA KIPWANO KILUMBULUKE KYOPWENE NA YEHOVA
22, 23. Le i bika byotufwaninwe kuvuluka shi tubatyumukwa mutyima mwanda wa makambakano etu?
22 Shi wendelela kususuka ne kutanwa na makambakano, vuluka kimfwa kya ba Yoshua ne Kalebu. Kwishila na tubedibedi tukwabo dikumi, bano bana-balume babidi ba kikōkeji bāletele lapolo miyampe. (Umb. 14:6-9) Bālombwele lwitabijo mudi Yehova. Nansha nabya, bālumbakene mu ntanda mutuputupu mu bula bwa myaka 40 pamo na bene Isalela bakwabo. Le ba Yoshua ne Kalebu bātompwele nansha kukalabala, na kulanga’mba kuno i kubulwa boloke? Mhm. Bādi bakulupile mudi Yehova. Le nandi wēbesele? Bine wēbesele! Nansha lukongo lwabo lonso byolwāfwile mu ntanda mutuputupu, bano bana-balume babidi bātwelele mu Ntanda ya Mulao mwenda mafuku. (Umb. 14:30) Mo monka ne batwe netu, tukatambula madyese a Yehova shi ‘ketupungilepo’ kulonga kiswa-mutyima kyandi.—Ngat. 6:9; Bah. 6:10.
23 Shi wi mutyumukwe mutyima mwanda wa makambakano, kubulwa kubwaninina kwa bakwenu nansha kobe, le ukalonga namani? Ta mutyima ku ngikadilo ya kutendelwa ya Yehova. Mona mu ñeni lukulupilo lukupele Yehova. Wiipangule’mba, ‘shi ke Yehova, nadi wa kwikala namani?’ Ikala nyeke pabwipi nandi, kadi kokakolwa kumujingila mutyima obe!
[Kifwatulo pa paje 10]
[Kifwatulo pa paje 12]
Kwivwana binenwa bibi kukokeja kwitona (Tala musango 7)
[Kifwatulo pa paje 14]
Ba Yoshua ne Kalebu bāeselwe mwanda wa kikulupiji kyabo mudi Yehova (Tala musango 22)