Kwingidila Leza Bo Bwandi Bwanga!
Kitatyi kyobaityile bapania babidi ku njibo ya mu Kenya, batulumukile pa kumona muntu mwikonye pa butanda. Wadi na kakyadi katyetye ne tumakasa twipi. Abo pa kumusapwila mulao wa Leza wa amba, “usunkuta ukatumbuka’nka bwa kasha kalume,” uno muntu wamungamunga.—Is. 35:6.
Bapania bayukile amba Onesmus, wadi pano na myaka isenselela ku 40, wabutwilwe na misongo ya mikupa (ostéogenèse imparfaite), nansha misongo ya kuzoza kwa mikupa. Mikupa yandi yadi inekena bininge—ebiya yamulengeja atyumukile panshi. Byokekwadipo bundapi nansha mundapilo muyampe wa ino misongo, Onesmus wadi ukulupile kupityija būmi bwandi bonso na misanshi kadi kashā ushikata mu kakinga ka bisheta.
Onesmus wāitabija kwifunda Bible. Inoko, inandi wāmupeleja kukatanwa ku kupwila kwa bwine Kidishitu, na kulanga’mba kino kikamuletela bilonda ne kubweja’ko misanshi. O mwanda banabetu badi bakwata kupwila ku bande, kupwa Onesmus kaekulondela kwinjibo. Pa kupwa kwifunda myeji itano, Onesmus wakwata butyibi bwa kutanwa ku kupwila nansha byokwadi na byaka.
Le kutanwa ku kupwila kwa bwine Kidishitu kwabwejeje’ko misanshi ya Onesmus? Mhm, ino kwāpele bipa biyampe. Onesmus uvuluka’mba, “misanshi yami ya kitatyi kyonso yadi ityepa mu kitatyi kya kupwila.” Kalanga’mba lwitabijo lwandi lupya lo lwalengeje eivwane biyampe. Inandya Onesmus wāmona ngikadilo ya wandi mwana yashinta, kadi wāsangala ne kwitabija kwifunda Bible. Wanene’mba “kwingidila Leza bo bwanga bwa wami mwana.”
Mwenda mafuku, Onesmus waikala bu musapudi wakubulwa kubatyijibwa. Mafuku pa kupita’po, wabatyijibwa kadi pano wingilanga bu mwingidi wa mingilo. Nansha byakabwanyapo kwingidija maulu andi ne kwandi kuboko kumo, Onesmus udi na mutyima wa kulonga byonso byabwanya kulonga mu mwingilo wa Yehova. Wadi usaka kwingila bu pania mukwashi ino weshisa kudinga fomu. Mwanda waka? Mwanda wadi uyukile amba, unenwe kukwashibwa na muntu mukwabo wa kumusukuma mu kakinga. Aye pa kupityila’mo banababo bene Kidishitu, bamulaya’mba bakamukwatakanya. Abo pa kulonga namino, bakwasha Onesmus engile bu pania mukwashi.
Nansha byadi bisaka Onesmus kwingila bu pania wa lonso, wadi na makambakano amo onka. Inoko, kyaba kimo kisonekwa kya difuku kyamupele bukankamane bwaadi usakilwa. I kisonekwa kya Mitōto 34:8 kinena amba: “Tompai mumone’mba Yehova i muyampe.” Pa kupwa kulangulukila pa kino kisonekwa, Onesmus wakwata butyibi bwa kwikala bu pania wa lonso. Pano usapulanga mafuku aná ku yenga, kadi udi na bifundwa bivule bya Bible byendelela biyampe ku mushipiditu. Mu 2010, watenwe ku Masomo a Bapania. Bine, Onesmus wasangele bininge pa kufundijibwa na tutu umo mu batutu babidi badi bamupempula!
Bambutwile ba Onesmus ke bafwe, ino batutu ne bakaka ba mu kipwilo bavuijanga bisakibwa byandi bya difuku ne difuku. Ufwijanga’ko pangala pa madyese adi nao dyalelo, kadi utengele difuku ‘kedikanenapo mwikadi’mba: Nabela.’—Is. 33:24.