Twikalei Bimfwa Bilumbuluke Mu Binenwa Ne Mu Mwiendelejo
1 Mutumibwa Polo wāsoñenye Temote ekale kimfwa kilumbuluke mu binenwa ne mu mwiendelejo. (1 Tem. 4:12) Netu, tufwaninwe kwikala na muneneno ne mwiendelejo uleta kimfwa kilumbuluke, nakampata kitatyi kyotwingila mwingilo wetu, mwanda bikokeja kuyukanya shi tukatenga nansha shi tukakankalwa kutenga mityima ya bantu botuketana nabo.
2 Mikadilo yetu miyampe ifwaninwe kumweka mu myanda yonso, nakampata mu bulēme bwetu, mu kabango kotudi nako, mu buyampe bwetu, mu kalemo ketu, ne mu bunwa bwetu. Shi tudi na ino ngikadilo umbūmi bwetu, nankyo tulombolanga’mba tuyukile lupusa ludi na bilongwa byetu pa milangilo ya bakwetu. Tukokeja kudingakanya mikadilo miyampe mu mwingilo pamo na mutobajijanga bisombelwa mu kisamba. Shi kisamba i kyampikwa kusombelwa, nansha kikale kilumbuluke namani, kikekala kitalala mu kyakanwa, kadi kyakubulwa munsonso. Kubulwa mikadilo miyampe mu kipwano na bakwetu nako i muswelo umo onka.—Kol. 4:6.
3 Twikalei Bimfwa Bilumbuluke mu Binenwa: Mimungomungo ya bulunda ne lwimu lwa nsangaji i bintu bya kamweno mu busapudi bwetu bwa myanda miyampe. Kitatyi ‘kyotusombela’ mu kitwelelo kya mwanda na kyanga ne na kunena na mutyima umo, mwisambi netu ukajingulula’mba tumutele mutyima byabinebine. Shi nandi kanena, tufwaninwe kumuteja ne kulēmeka milangwe yandi mokifwaninwe. Kitatyi kyotunena, tufwaninwe kunena na tunangu ne na buya bonso.—Tala Bilongwa 6:8.
4 Dimo-dimo tukokeja kwitāna na muntu wa mutyima mūmu, nansha mukalabale. Le tukalonga kika? Petelo wētusoñenye kunena na “butuukanye ne [buleme] ponka.” (1 Petelo 3:15, MB; Loma 12:17, 18) Yesu wānene’mba shi muntu upela musapu wa Bulopwe na kafutululo, tufwaninwe ‘kukula enka luvumbi ku maulu etu.’ (Mat. 10:14) Na kulama mwikadilo wakubulwa kutopekwa mu bitatyi bya uno muswelo, kekubulwe padi twakanekenye mityima myūmu ya bantu bapela kusapwilwa.
5 Twikalei Bimfwa Bilumbuluke mu Mwiendelejo: Kusapula myanda miyampe mu bipito mupita bantu ne mu bifuko mudi bantu bavule kulombanga, ku wetu mutamba, kwikala na kabango, kwikala na bunwa kitatyi kyonso, kuleka kuningila muntu nansha kukambakanya bapityeshinda. Kitatyi kyotudi ku njibo ya muntu ulombola kusepelela, tufwaninwe kulama bibidiji bya bulēmantu ne kwikala bu batambulwa badi na bulēme, balombola kufwija’ko kwabo pa mwanda wa kizaji kyobatundailwe nakyo. Mwana yense otwendele nandi pamo ufwaninwe kulēmeka bene njibo ne bintu byabo, ne ufwaninwe kuteja mīsambo na bulēme. Bana bapupakane bashianga museku mutyani.—Nk. 29:15.
6 Kekifwaninwepo muntu ekale kutatana, bu twi basapudi ba Kinenwa kya Leza, pa kumona mumwekelo wetu. Muvwadilo wetu ne mwikadilo wetu kebifwaninwepo kwikala bya busala, nansha byakubulwa kwendelamo, nansha byakatūtu ne bipite kipimo. Mumwekelo wetu wikale nyeke mufwaninwe myanda miyampe! (tala Fidipai 1:27.) Shi tutele mutyima na katentekeji ku mumwekelo wetu ne ku tubintu tukwabo, ketukakukajapo bakwabo nansha kufutulwija mwingilo wetu. (2 Kod. 6:3, 4) Binenwa byetu ne mwiendelejo wetu bilumbulukijanga musapu wa Bulopwe, ne kuletela Yehova bulēme.—1 Petelo 2:12.