Tusapulei Myanda Miyampe Mu Bifuko Byonso

¹ Bakristu babajinji bāsapwile myanda miyampe mu bifuko byonso. Bupyasakane bwabo bwalengeje, myaka 30 kupwa kwa lusangukilo lwa Yesu Kristu, musapu wa Bulopwe wikale kusapulwa “mu bipangwa byonso bya muno munshi.”​—⁠Kol. 1:⁠23.

² Ne dyalelo, bengidi bapyasakane ba Yehova balondanga kitungo kimo kyonka: Kuyukanya myanda miyampe ya Bulopwe ku kibalwa kya bantu kikatampe kine. I kika kikokeja kwitukwasha tufikile pa kino kitungo? Bantu bangi bengilanga mingilo ya kashinde dyuba, omwanda pavule ketwibatanangapo potwendanga kukebatala. Kadi shi kebengilepo, batalukanga’po, bakakimba twibabudilwe, nansha bakeolola. I muswelo’ka otukokeja kusapula musapu wa Bulopwe ku boba bafwaninwe badi umbukata mwabo?​—⁠Mat. 10:⁠11.

³ Tukokeja kufikila bamo-bamo ku bifuko byabo bya mingilo. Nansha mu tubundi twa ku nja, mudi bifuko bya mingilo, mupityijanga bantu bavule kitatyi kyabo kya mu dyuba. Mu bizungu, bantu bengila mu makumpanyi nansha mu mabilo, ne boba bashikete mu mobo adi mu lupango, betabijanga musapu, bavule musunsa wabo umbajinji. Kumfulo kwa yenga, bangi umbukata mwa boba basapwilwanga kitatyi kyobeolola mu biwanza, mu bifuko bya kwipwija mukose, mu kitūlo nansha mu mobo abo a kifikilo, nansha bamo-bamo umbukata mwa boba batengēle mu bifuko mushīkwa byendwa nabyo nansha mu mukenza wa bansunga, batambulanga myanda miyampe na nsangaji.

⁴ Kibalwa kivule kya basapudi kiloñanga bukomo bwapabula mwanda wa kupāna bukamoni mu bifuko mungwidile bantu, momwa mōbatanwa. Dibajinji bano ba Tumoni bādi bekaka kadi na mutyima munda uzumbazumba, mwanda bādi bebidile’nka kusapula mu muswelo umo onka, kimfwa wa ku njibo ne njibo. Lelo pano beteleka muswelo’ka?

⁵ Tutu umo wa bwino unena’mba: “Mwingilo wami wāikele kulangulwa monka!” Tutu mukwabo ubweja’ko’mba: “Kino i kinkwashe nshale mutakamane mu mwingilo.” Pania umo mununu walombwele’mba: “Kino kyaumpele bukomo mu ñeni, mu ngitu, ne kumushipiditu, . . . ne ñendelela nyeke kumeso!” Musapudi umo wamwene’mba pano kanenanga na bantu bavule kebaikele kusapwilwa na ba Tumoni twa Yehova nansha dimo. Bankasampe nabo i basepelele kwingila uno mwingilo uleta nsangaji. Umo umbukata mwabo unena’mba: “I kilumbuluke kutabuka ke-pantu uno mwingilo upana mukenga wa kwisamba na bantu bavule.” Mukwabo nandi’mba: “Kashāa, nadi nkyaponeje mabuku mangi uno muswelo!” Ino i mitelekelo itenwe mu mwaba usapulwanga’mo kitatyi ne kitatyi.

⁶ Batadi Bendakana Badi ku Mulongo Umbajinji: Biyukile Sosiete’mba ‘mwikadilo wa ino ntanda wenda walamuka,’ walombele pano-pano batadi bendakana baleulule mpangiko yabo ya busapudi bwa ku yenga ne yenga mwanda wa kusapwila bantu bavule kutabuka, myanda miyampe ya Bulopwe. (1 Kod. 7:31) Myaka ya kunyuma, batadi ba bipindi bādi na mpangiko ya kwenda lubanga lonso mu busapudi bwa ku njibo ne njibo, kyolwa nakyo ye kyādi kitatyi kya bifundwa bya Bible ne kujokelamo kupya. Eyo, kimweka bu ino mpangiko ikidi na mvubu mu bifuko bimo-bimo. Mu bifuko bikwabo, shi mutambila mu busapudi bwa ku njibo ne njibo mu bitatyi bimo-bimo bya mu lubanga, i kutupu kintu kikatampe kyomulonga. Shi kidi uno muswelo, padi mutadi wendakana ukatyiba mbila ya kutambila lubanga mu busapudi bwa ku mangajini ne mangajini nansha bwa mu bipito. Ukokeja kadi kutūla’ko bisumpi bityetye mwanda wa bikapāne bukamoni mu mabilo, mu mikenza ya bansunga, mu bifuko mushikwa byendwa nabyo, nansha mu bifuko bikwabo mungwidile bantu. Shi basapudi bekale kwingidija senene kitatyi kyabo kyobapityijanga mu buno busapudi, nankyo bantu bavule bakasapwilwa.

⁷ Malapolo alombolanga’mba batadi bendakana ne basapudi ibasepelele bininge kuno kwalamuka. Bitango bya bakulumpe byalombele batadi ba bipindi bekale kufundija basapudi bamo-bamo miswelo ya mwa kwingidila ikwatañene na byabo bifuko. I kya kamweno ku bano basapudi kutambila pamo na mutadi wendakana mu ino mingilo. Penepo nabo kebashala kufundija bakwabo. (2 Tem. 2:⁠2) Mu uno muswelo, bantu bavule bakemvwana myanda miyampe.

⁸ Padi kukasakepo kwilaija enka mu bupempudi bwa mutadi wa kipindi mwanda wa kutompa ino miswelo mikwabo imo-imo ya kusapula. Tala milangwe imo-imo yokokeja kumona bu ya kamweno mu wenu mwaba:

⁹ Busapudi bwa mu Bipito: Ukokeja kusapula pa bukata bwa yenga ku mobo a bantu mu lubanga, ino kutupu kwibatana’ko, penepa weipangula’mba: ‘Lelo bantu bene badi kwepi?’ Bamo ukokeja kwibatana kobenda bapota twa kupota. Lelo kodi mutompe ne kwibasapwila mu bipito? Uno mwingidilo ukokeja kulupula bipa shi wiwingidije mu muswelo mulumbuluke. I kiyampe kobolola bantu ne kushilula nabo mīsambo ya bulunda, kupita’ko kushikata’nka pa kifuko kimo na mapepala ku makasa. Ke kunenapo’mba ukapāna bukamoni ku bapityeshinda bonso. Wisambe na boba kebepangilapo kwenda bukidi-bukidi, na boba benda bemanaimana mu kipito, kimfwa, boba bemikile myotoka ne kushikata monka nansha boba batengele kuselwa mu byendwa nabyo. Dibajinji, ufwaninwe kwimuna muntu’wa lwimu lwa bulunda ne kuteja mwasaka kukulondolwela. Shi waitabija kwisamba nandi, mwipangule milangwe yandi pa mwanda kampanda umusangaja.

¹⁰ Mu bupempudi bwa mutadi wendakana pa kipwilo kimo, waityile basapudi basamba batambile nandi mu busapudi bwa mu kipito, pamo ne wandi mukaji. Kwalupukile kika? Usekununa’mba: “Twapityije kitatyi kilumbuluke mu lwine lubanga’lwa. Kekudipo otwatene kutupu’ye. Twaponeje mapepala 80 ne matrakte mavule. Twaikele kwisamba mīsambo mivule isangaja. Musapudi umo, wadi usapula musunsa wandi umbajinji mu kipito, watulumukile’mba: ‘Ndi mu bubinebine pano ke myaka mivule, ino nkyadipo mfwatakenya nenki bano bantu bompitanga!’ Kumfulo kwa yenga, mapepala onso a musubu adi pa kipwilo apwa.”

¹¹ Pafikile uno mutadi wendakana mu kipwilo kilonda’ko, waivwene’mba basapudi bamo badi bakasapwile mu kipito lubanga na bwēe, ino kebadipo basapwile’tu busapudi buyampe. Kaka umo i mwisambe’nka na bantu babidi mu busapudi bwandi bonso, mwanda bonso baadi utana badi bepangila kwenda ku mingilo. Mutadi wendakana webapa abo bonso madingi a kwalukila enka mu kipito’kya, shi dyuba dibakanda’ko bityetye. Nabo balongela monka, basapula kufikija ne midi. Kaka wāikele kwisamba na bantu babidi mu lubanga bininge, walonga bilumbuluke mu uno musunsa wabubidi. Wapāna mapepala 31 ne mikanda 15, wasoneka majina ne maadrese asamba-abidi a bantu bakukapempula, kadi washilula ne bifundwa bibidi bya Bible! Basapudi bakwabo ba mu kine kisumpi’kya batene nabo bipa byonka bikankamika.

¹² Shi ubatana muntu ulombola kusepelela, longa bukomo uyuke dyandi dijina, adrese ne nimero yandi ya telefone. Pa kyaba kya kumwipangula byonso bino kya pamo, ukokeja kunena’mba: “Nasepelela bininge ino mīsambo yetu. Lelo ketukokejapo kwendeleja’yo kitatyi kikwabo?” Nansha kumwipangula’mba: “Le nkibwanyapo kwiya kukutana ku yobe njibo?” Bantu bavule betabijanga kupempulwa dipya mu uno muswelo. Ikala mwilamije mapapye mavule a lwito okokeja kupa boba basaka kwiya kutanwa ku kupwila.

¹³ Shi wadi ubesambe na muntu wikalanga mu mwaba wa kipwilo kikwabo, ino walombola kusepelela, nankyo ufwaninwe kutuma mawi ku banabetu ba mu kine kipwilo’kya, mwanda wa bendelele kushinsakanya kusepelela kwandi. Busapudi bwa mu bipito, lelo bukokeja kwimupa muswelo wa kusambakanya senene myanda miyampe mu kifuko kyenu? Shi i amo, mwilongololei mwikale kutambila mu busapudi bwa mu bipito mu nsāa mifwaninwe ne ikemukwasha kwitana na kibalwa kikatampe kya bantu.

¹⁴ Busapudi bwa mu Ñendo: Difuku dimo lubanga, bapania bakwete mpangiko ya kukapāna bukamoni ku bantu badi batengele motoka bukila bukwabo na masomo a bana-bakaji. Baikele kwisamba mīsambo milumbuluke na bantu, ino kwaikala kikoleja. Mīsambo pa kufika poitobelanga, motoka nao wafika, ne mīsambo mine yakadika. Pa kusaka kupwija kino kikambija, bapania bakandile mu motoka mwanda wa kwendelela na kupāna bukamoni ku bantu badi’mo, papo motoka wenda mu vile. Abo pakufika pa kifuko powimaninanga kewaluka, bapania nabo bajoka nao monka, benda basapula. Kupwa kwa ñendo mivule ya kwenda ne kujoka, balombwele bipa byobatene: Baponeje mapepala 200 ne kupita kadi bashilwile ne bifundwa bya Bible bisamba! Bantu bavule badi bakanda mu motoka baikele kwitabija kuleta maadrese abo ne manimero a telefone mwanda wa bekale kukapempulwa kwabo. Yenga ulonda’po, bapania bajokela monka pemananga myotoka, balonga muswelo umo onka na mobalongele. Baponeja mapepala 164 ne kushilula kifundwa kimo kipya! Pobafikile pakwabo pemananga myotoka, muntu mukwabo wakandile mu motoka, washikata pa kyaba kimo kyadi kishele pululu: ku lubavu lwa pania umo. Waela meso kudi mwanetu, kamunena koku usepa’mba: “Ndyukile, udi na Kiteba kya Mulami kyosaka kumpa!”

¹⁵ Basapudi bavule bapānanga bukamoni bulumbuluke kitatyi kyobendanga mu myotoka, mu masua nansha mu amvyo. I muswelo’ka otukokeja kushilula mīsambo na muntu otulondakene nandi? Musapudi wa myaka 12 washilwile na kutanga Amkeni! paadi wenda mu motoka, na kikulupiji kya kusamuna milangwe ya nsongwakaji wadi ushikete ku lubavu lwandi. Ne ye akyo kyalongekele! Nsongwakaji wamwipangula byaadi utanga, nandi wamulondolola’mba i kishinte kisambila pa muswelo wa kupwija makambakano ekonda nao bansongwanzele. Watentekela’po amba kino kishinte kyamuyukije bintu bivule ne kyadi kikokeja kukwasha ne nsongwakaji nandi amwene’mo kamweno. Nsongwakaji waitabija mapepala na nsangaji. Bankasampe babidi bakwabo badi bateja mīsambo yabo, nabo balomba mapepala. Ebiya, shofele waimika motoka kufula kwa dishinda, kaipangula kine kyadi kibasangeje mu oa mapepala. Pa kupwa kwikimvwana, nandi weatambula. I bine, byonso bino kebyaswilepo kubwanika shi musapudi nkasampe kadipo na mapepala mavule a kupāna ku bano bantu bonso beasepelele!

¹⁶ Busapudi mu Biwanza Byendanga ku Kananga’mo Bantu ne mu Bifuko Bishīkwanga’mo Byendwa Nabyo: Shi difuku’dya kūlu kudi senene, busapudi mu biwanza byendanga kukananga’mo bantu ne mu bifuko bishīkwanga’mo, i muswelo mulumbuluke wa kwitana na bantu. Lelo kodi mutompe kusapula mu bifuko bishīkwanga’mo bidi mu mukenza wa bansunga? Shi ubafika’mo, ela bidi meso koku ne koku kitatyi kityetye. Kimba muntu kepangilapo kwenda bukidi-bukidi, nansha yewa ukunga, koku ushikete mu motoka washīkile, shilula nandi mīsambo ya bulunda. Shi mīsambo ibaendelela, pāna musapu wa Bulopwe. Mufwaninwe kwikala wa pandi, wa pandi, inoko mwimwene musapudi umo ne mukwabo. Mufwaninwe kwepuka kusela masakoshi mayule bāa nansha kukokela milangwe ya bantu mu muswelo kampanda pa mwingilo wenu. Ikalai na bunwa. Kikekala kiyampe kushinta bifuko bishīkwa’po, kuleka kwikala kitatyi kilampe’nka pa kifuko kimo kyonka. Shi muntu kasakilepo kwisamba nenu, mufundukei na bulēme ne kupima kwisamba na mukwabo. Tutu umo, walongele uno muswelo, waponeje mapepala 90 mu kweji umo kitatyi kyaadi usapula mu bifuko bishīkwanga’mo byendwa nabyo!

¹⁷ Bantu bavule bendanga bakeolola mu biwanza, mwanda wa kukakaya nansha kukepwija mukose na babo bana. Kimba mukenga okokeja kupāna bukamoni pakubulwa kuvutakanya bininge mingilo yabo. Tutu umo washilwile kwisamba na kalama wa kiwanza, wamona’mba uno muntu wadi utompola pangala pa kutoma dyamba ne pa kikafikila bandi bana mu mafuku akāya kumeso. Kifundwa kya Bible kyashilwile, ne bendelelanga nyeke na kwifunda kitatyi ne kitatyi monka mu kiwanza.

¹⁸ Busapudi bwa Kiponka na Ponka mu Mikenza ya Bansunga: Nansha byokikalanga nyeke kikomo kusapula busapudi buteakanye senene bwa ku mangajini ne mangajini mu mikenza ya bansunga pa mwanda wa bijika bya mu bine bifuko’bya, basapudi bamo-bamo i basokole muswelo wa kusapula busapudi bwa kiponka na ponka. Bashikatanga pa mulamba, bashilula mīsambo ya bulunda na boba bemananga’po mwanda wa kukokolokwa. Shi bantu abalombola kusepelela, bebapānanga na manwa trakte nansha dipepala ne kwikankila kukwata mpangiko ya kukebamona. Pa kupwa kupityija minite kampanda mu mukenza umo wa busunga, batalukanga baenda mu kifuko kikwabo kukesamba na bakwabo. Tufwaninwe kuta mutyima kitatyi kyotusapula busapudi bwa kiponka na ponka bwa uno muswelo, ketufwaninwepo kukokela milangwe ya bantu potudi.

¹⁹ Kitatyi kyoimuna muntu, shilula enka penepa mīsambo ya bulunda. Shi mwisambi nobe wakulondolola, mwipangule kipangujo ne kumuteja na katentekeji kitatyi kyakulondolola. Ta mutyima ku byanena. Lombola bu upele milangwe yandi mutyika mukatampe. Ikala kwitabija binenwa byandi, shi bikokejika.

²⁰ Kaka umo wesambile na mwana-mukaji mununu pa mwanda utala kukoma kwa būmi kwenda kwilundila’ko. Ponka’po uno mwana-mukaji pa kwitabija, mīsambo yaloa ne kuloa. Kaka wasoneka ne dijina ne adrese yandi ne umbula bwa yenga yenka’wa wajokela kukamumona.

²¹ Busapudi bwa ku Mangajini ne Mangajini: Mu myaba ya bipwilo bimo-bimo mutanwanga ne mikenza mituntulu ya mangajini onka. Mwanetu upelwe kiselwa kya kupāna myaba, ukokeja kuteakanya tulata twapabula twa bino bifuko bityityile’mo myanda ya busunga. Ufwaninwe kulombola patōkelela myaba yonso idi na ino mikenza’mba bansunga bakapempulwa bwapala. Mu myaba mikwabo, mobo a busunga apempulwanga kitatyi kimo kyonka kyenda kipempulwa mobo makwabo. Bakulumpe bafwaninwe kunena basapudi ba bwino bekale kukapempula kitatyi ne kitatyi myaba ya busunga, kutyina’mba busapudi bwa ku mangajini ne mangajini bwakatūlwa pafula.

²² Shi abakulombe kwingila uno mwingilo musunsa obe umbajinji, muswelo mulumbuluke wa ‘kwikala na bukankamane’ i kubadikila bidi kutwela mu mangajini matyematye; kupwa, pokamona bu pano kibakupēlela, ebiya kotandabula mwingilo obe ne mu makatampe. (1 Tes. 2:⁠2) Shi kokasapula ku mangajini ne mangajini, ufwaninwe kuvwala pamo’nka na abe wenda ku kupwila ku Njibo ya Bulopwe. Twela mu mangajini, shi bikokejika, kitatyi kyokemudipo mpotyi ukunga bamupe bintu byapotele. Lomba kwisamba na kapita-mangajini nansha na mukulumpe wa mingilo. Ikala na muneneno wa kyanga, ne nakampata ipipija binenwa. Kekidipo na mvubu kulomba kufwilwa lusa. Bansunga bavule basenswe kwingidila bampotyi ne kadi betabijanga kwisamba na yense usaka kupota.

²³ Pa kupwa kwimuna nsunga, ukokeja kunena’mba: “Tuyukile bu bansunga bekalanga na mingilo mivule bininge, mu uno muswelo kikalanga kikomo kwibatana ku mobo abo; omwanda tubaiya kukupempula kuno ku kifuko kyobe kya mingilo mwanda wa kukupa kishinte kyakutanga kyotufwaninwe kulanguluka’po.” Nena mulangwe umo nansha ibidi itala pa mapepala atambwilwe pano-pano.

²⁴ Shi ubatana kapita-mangajini, ukokeja kadi kutompa kunena namino: “Twi bamone’mba bansunga basakanga kuyuka myanda ipita. Kino Kiteba kya Mulami kyotwatambula pano-pano (nansha Amkeni!) kidi na kishinte kitala umo ne umo umbukata mwetu.” Shintulula i kishinte’ka ne fudija na kunena’mba: “Tukulupile bu ukasepelela butangi bwakyo.”

²⁵ Shi mudi bengidi ne umwene’mba batele’ko mutyima, ukokeja kubweja’ko amba: “Lelo ke kiyampepo nombole’kyo mu kīpi ne ku bengidi bobe nabo?” Shi wakupe kishima, kokelwa’ko amba wadi ubamulaya kunena mu kīpi, ne kapita-mangajini utengele amba ukalēmeka kinenwa kyobe. Shi bengidi abaloelelwa kwisamba nabo kitatyi kilampe, kikekala kilumbuluke ukebamone ku mobo abo.

²⁶ Mafuku kunyuma, mu kibundi kimo kityetye, basapudi baendele pamo na mutadi wa kipindi mu mwingilo wa ku mangajini ne mangajini. Pa kushilula, bamo-bamo badi na luzakalo, mwanda badi kebaikele kwiwingila kashāa; ino bukidi bonka beivwana’tu senene ne kuloelelwa’o. Umbula bwa nsāa imo, besamba kala na bantu 37 ne kuponeja mapepala 24 ne mikanda 4. Tutu umo unena’mba kunena na bubine, kekikokejikapo kutana bantu bavule uno muswelo mu busapudi bwa ku njibo ne njibo umbula bwa kweji na motwebatanina mu kitatyi kityetye mu busapudi bwa ku mangajini ne mangajini.

²⁷ Tukimbei Mikenga ya Kusapula: Yesu kāimaninepo enka busapudi bwa kukungila lwendo, mhm. Wāsapwile myanda miyampe kitatyi kyonso kyadi kifwaninwe kwiisapula. (Mat. 9:9; Luka 19:​1-10; Yoano 4:​6-15) Tala muswelo ukimbanga basapudi mikenga ya kusapula.

²⁸ Bamo-bamo badi na kibidiji kya kupāna bukamoni ku bambutwile belaijanga babo bana batambe ku masomo. Bikalanga bambutwile bamo-bamo bafika minite 20 kumeso kwa kitatyi, basapudi bamonanga kyaba kya kushilula nabo mīsambo ikankamika itala pa kishinte kimo kya mu Bible.

²⁹ Bapania bavule bekankilanga kufikila bantu batalwa bininge na bishinte bimo-bimo bisambilwe mu mapepala etu. Kimfwa, kaka umo watene bipa biyampe kitatyi kyaakafikile ku masomo asamba adi mu mwaba wa kipwilo kyabo, mwanda wa kwibapāna kishinte kyadi na mutwe wa mwanda unena’mba: “Masomo Abapone,” kyalupukile mu Réveillez-vous! wa 22 kweji 12, 1995. Kadi waendele na mapepala atala pa būmi bwa kisaka ne pa bukalabale bufikila bankasampe, kukamona boba bengilanga mu bitango bikwasha mu myanda itala mushikatyilo wa bantu, bamulomba kwiya dikwabo na mapepala makwabo anena uno muswelo. Kadi utela bu ‘kintu kyapabula’ muswelo waamwene kusepelela kwalombwele kitango kitweja bantu pa twaji pa mwanda utala Réveillez-vous! wa 8 kweji 3, 1996 wadi wisambila pa bulofwa.

³⁰ Mutadi umo wa distrike uleta lapolo’mba usapulanga busapudi bwa kiponka na ponka pamo na wandi mukaji kitatyi kyobakapotanga bintu. Batoñanga nsāa ikalanga bantu bavule kebakidipo mu mangajini ne kitatyi kikalanga bampotyi bavule kebetūkija bapitakana mu mashinda. Mu uno muswelo bekalanga na mīsambo mivule milumbuluke.

³¹ Basapudi bavule batananga bipa bilumbuluke na kupāna bukamoni mu mobo adi na mashini akenda bisandi ao mene. Kebemaninangapo enka pa kushiya mapepala bitupu shi kebatene’mopo muntu, mhm. Kitungo kyabo i kusapula myanda miyampe ku bantu; omwanda bekankilanga’ko kwisamba na umo ne umo wa umbukata mwa boba bayanga kukendeja bisandi.

³² Mu bifuko bikwabo, basapudi bapebwanga lupusa lwa kukapāna bukamoni mu biwanza bya ma amvyo. Pakwabo bekala na nsangaji ya kusapwila bantu benda umbula bwa ntanda, bekalanga mu matanda akubulwa’mo ba Tumoni twa Yehova bavule. Kitatyi kyobalombolanga kusepelela, bebapānanga matrakte nansha mapepala.

³³ Shi kekibwanikapo kupāna bukamoni ku bantu bashikete mu mobo akufutyila ajokolokelwe na mpango ilamibwa pa bibelo, basapudi bamo-bamo badi na kibidiji kya kusapwila na manwa banzamu bengila’ko nansha batupita badi mu mabilo. Baloñanga muswelo umo onka ne mu bifuko byonso bilamibwe ne bya kikasuku. Mutadi umo wa kipindi wasapwile busapudi bwa uno muswelo pamo na basapudi bamo-bamo mu bīkalo bisamba-bibidi. Misunsa yonso, badi bashintulwila kapita’mba shi uwapele kwitupa lupusa lwa kumona bantu badi’mo pamo bwa motwikilongelanga nyeke, ino ketusenswepo kukusumwa bufundiji butanwa mu mapepala etu alupukile pano-pano. Batupita ba bino bīkalo byonso bisamba-bibidi baitabije mapepala na nsangaji, kadi balomba ne makwabo akalonda’ko!

³⁴ Twielelei’ko Kusapula mu Bifuko Byonso: Pa kusaka būmi bwetu bwikale bukwatañane na kwipāna kwetu kudi Leza, tufwaninwe kwitabija ne mutyima wetu wa munda-munda amba musapu wa Bulopwe otupelwe i wa kampeja-bukidi. Tufwaninwe kwibudija masakila etu shi tusaka kusapwila bantu pa kitatyi kifwaninwe ku wabo mutamba, mwanda ‘kepabulwe, konso konso kupande bamo.’ Bengidi bonso ba Yehova bepāne ne babatyijibwe nabo babilanga kupituluka mu binenwa bya Polo, wānene’mba: “Nongela bintu byonso pa mwanda wa myanda-miyampe, na’mba ngikale kumwena monka pamo na bānwe.”​—⁠1 Kod. 9:​22, 23.

³⁵ Kupwa Polo wāsonekele’mba: “Penepo nanshi, nkētumbika ne mutyima tō mu bukōkekōke bwami, e nabyako, amba bukomo bwa Kidishitu bungikale po ndi. . . . Ke-ne-muntu popa po ndi mukōkekōke popo nkomene.” (2 Kod. 12:​9, 10) Mu muneneno mukwabo, i kutupu muntu nansha umo umbukata mwetu ukokeja kuvuija uno mwingilo na bukomo bwa aye mwine. Tufwaninwe kulomba Yehova etupe bukomo bwa mushipiditu sandu wandi. Potulomba bukomo kudi Leza, tufwaninwe kukulupila’mba ukalondolola ku milombelo yetu. Buswe botudi nabo padi bantu buketutonona tukimbe miswelo yonso ya mwa kusapwila myanda miyampe popa ponso pobatanwa. Lelo kyotulekele kukapima umbula bwa yenga wiya’ko muswelo nansha umo ulombwelwe mu dino dyani dyantentekelo i kika?