Kupwila Kwa Mingilo Kwa Mu Kweji Wadikumi-natubidi
Yenga Ushilula 2 Kweji 12
Min 10: Misapu imutala ne Misapu itala Mwingilo Wetu wa Bulopwe. Lombola lapolo wa mwingilo wa mu yenu ntanda (shi mudi nayo) ne wa mu kyenu kipwilo wa kweji wapityile.
Min 15: “Lelo Tusapulanga Kinenwa kya Leza Monka Mokyendele?” Na bipangujo ne malondololo. Nenena kadi ne pa myanda imo-imo itala pa dibuku Kutoa Sababu, pa kamutwe kamwanda “Sababu za Kutufanya Tuichunguze Biblia,” pa paje 40-41.
Min 20: ‘Buno bo Būmi Bwanyeke.’ (Mus. 1-5) Kupwa kwa binenwa bīpi bya ntwelelo bimanine pa mus. 1, ita basapudi babidi babwino balonge kyakumwenako kukwatañana na musāngo 2-5. Imanina pa mulangwe wa’mba kitungo kyetu i kushilula bifundwa bya Bible.
Lwimbo 128 ne milombelo yamfulo.
Yenga Ushilula 9 Kweji 12
Min 10: Misapu imutala. Lapolo wa mukōlo wa pa kipwilo.
Min 20: Mwanda Waka Tufwaninwe Kupa Yehova? Mīsambo ya bakulumpe babidi, ilombola myanda mikatampe ya kishinte kidi pa paje 28-31 mu Kiteba kya Mulami wa 1 kweji 11, 1996, Falanse. Ino myanda ikokejika nansha kupityijibwa na mukulumpe umo bu dishikulu.
Min 15: ‘Buno bo Būmi Bwanyeke.’ (Mus. 6-8) Wisambile pa kamweno ka musapwilo wa kusabididila’tu mwanda, mwanda wa kushilula bifundwa. Byakumwenako bilonda musapwilo udi mu musāngo 6-7, bikalongwa na basapudi babwino. Nena bevwaniki basekunune myanda itala pa muswelo obashilwile kifundwa mu kupita kubajinji. Muntu umo obālombele kwifunda nandi wālondolwele’mba: “Biyampe. Twela. Nsenswe nami kwifunda.” Ponkapo bāshilula kwifunda nandi; yenga wālondele’po, kisaka kyandi kituntulu kyātanwa’po, ke pākabilepo ne impafu mine, bonso bāshilula kutanwa ku kupwila ne kwingila mwingilo wa kupāna bukamoni. Kankamika bemvwaniki bakelamije dyani dyantentekelo dya Mwingilo Wetu wa Bulopwe wa kweji 7, 1996 ku kupwila kwa mingilo kulonda’ko.
Lwimbo 129 ne milombelo yamfulo.
Yenga Ushilula 16 Kweji 12
Min 5: Misapu imutala.
Min 20: “Tudi na Mwingilo Otupelwe.” Na Bipangujo ne malondololo. Sekununa mu kīpi misāngo 13-16 idi mu Kiteba kya Mulami kya 1 kweji 1, 1988, paje 28-29, Falanse.
Min 20: Twendejei Bifundwa bya Bible Byendelela Kumeso. Kishinte na mutadi wa mingilo. Pano ke mwaka mutuntulu tamba potwashilwile kwingidija dibuku Buyuki mu kwendeja kwa bifundwa bya Bible. Padi befundi ke bapwe’dyo kala, bakwabo nabo kebendelele kumeso bininge mu kwifunda. Twakankamikilwe kwendeja bifundwa bya Bible bikwasha bapya befunde bukidi-bukidi bubinebine, bebwingidije umbūmi bwabo ne kwikala bamo ba mu kipwilo. Dyani dyantentekelo dya Mwingilo Wetu wa Bulopwe wa kweji 7, 1996, dyetupele madingi malumbuluke mwanda wa kwitukwasha twikale bafundiji bafwaninwe. Pituluka mu kīpi bintu bimo-bimo bikokeja kulongwa mwanda wa kwikala bafundiji balupula bipa bitendelwa, kukwatañana na mis. 3-13. Kupwa imanina bininge pa kintu kifwaninwe kulonga mwanda wa kukwasha befundi bekale ku mutamba wa bubinebine, pamo na mwikinenena mis. 14-22. Tanga mis. 15, 17, 20-21. Bandaula myanda imo-imo isangaja ilombola bipa bilumbuluke byalupwilwe na basapudi ba pa kipwilo. Ikala kukankamika mu muswelo ukatonona banabetu bekale kwendeja bifundwa bya Bible.
Lwimbo 85 ne milombelo yamfulo.
Yenga Ushilula 23 Kweji 12
Min 5: Misapu imutala. Lombola mpangiko ikwetwe pa mwanda utala busapudi bwa mu difuku dya kukōkolokwa dya 25 kweji 12.
Min 15: “Kwendelela Kwenu Kumweke ku Bonso!” Kishinte na mukulumpe.
Min 10: Malondololo ku Bipangujo Byenu. Mīsambo na bemvwaniki.
Min 15: Mabuku otukapāna mu kweji wakwanza. Tukapāna Traduction du monde nouveau ne dibuku Biblia—Neno la Mungu au la Binadamu? Na bukwashi bwa dibuku “Toute Écriture,” pa paje 319-324, lombola muswelo utabukile Traduction du monde nouveau bwalamuni bukwabo: ukwatakenye ne kutumbija dijina dya Leza (mis. 1-2); bwalamuni bwandi bupye bwivwanija senene bilembwa (mus. 6); i mwilombole bu kingidilwa kikomokomo mu mwingilo (mis. 22-23). Na milangwe idi pa paje 189 mu dibuku Biblia—Neno la Mungu au la Binadamu? leta kimfwa kya mwa kupānina’dyo kadi teakanya ne kyakumwenako. Mpangiko mipotoloke ifwaninwe kukwatwa mwanda wa kukamona bantu baikele kusepelela.
Lwimbo 180 ne milombelo yamfulo.
Yenga Ushilula 30 Kweji 12
Kipwilo kikateakanya mpangiko yakyo, mwendele bisakibwa bya pa kipwilo.