I Kika Kyotukalonga Ku Balongo Betu?

¹ Bavule umbukata mwetu badi na balongo bakubulwa kwikala mu bubinebine. Tuloelelwa mpata kumona bano balongo botusenswe bāye belunge netu mu dishinda dya būmi! Kwapukwa kwa mityima yetu pamwanda wa būmi bwabo bwanyeke bwa mu mafuku akāya kumeso kwikalanga kukatampe, nakampata shi i betu ba musuku wa munda. Bine, nansha shi ketudi kala batompe kwibasombela ku bubinebine umbula bwa myaka mivule, ino ketufwaninwepo kukōka kala amba kekukidipo kikulupiji.

² Nansha ke Yesu pādi usapula, ‘ne banababo bene kebadipo bamwitabija.’ (Yoa. 7:⁠5) Difuku dimo, banababo bāfwatakenye’mba wabela bulubi. (Mako 3:21) Inoko, Yesu kēbamwenepo bu bantu bajimine, mhm. Omwanda banababo bāfudile ku kwitabija bubinebine. (Bil. 1:14) Yakoba, mwanabo wa munda mwa inandi kete, wāikele ke kipanda mu kipwilo kya bwine-kristu. (Ngat. 1:​18, 19; 2:⁠9) Shi tusaka kwikala na nsangaji ya kumona banabetu betabija bubinebine, ketwakilekai kutompa kwibasapwila myanda miyampe ya Bulopwe.

³ Twikalei Bakankamika, Ketwakikalai Basanshija: Bantu bādi basapwilwa na Yesu bādi bemvwana kusengibwa, kebādipo banyoñama pa mityima. (Mat. 11:​28, 29) Mwanda kādipo wibatwika biselwa na kwibapa bufundiji bwibakomena kwivwanija. Shi tusaka kusenga banabetu na mema a bubinebine, twibatomejei’o bityebitye na katubo, ke na mbeketyipo muyule bāa! Mutadi umo wendakana wānene’mba: “Boba batananga bipa bilumbuluke ku babo balongo i boba balangulanga kyaka kyabo na kwibapa bukamoni bityebitye.” Mu uno muswelo, kikokejika kufikija ne boba bapelanga kusapwilwa ku kushilula kwipangula bipangujo, kumfulo baivwana ne kyumwa kya bubinebine.​—⁠1 Pet. 2:2; tala ne 1 Kodinda 3:​1, 2.

⁴ Bakristu bavule basonge bapānanga bukamoni bulumbuluke ku bene-pabo na kwibashila dibuku dipūtule pa paje kampanda ukokeja kusamuna kusepelela kwabo. Kaka umo wādi ulonga uno muswelo, wādi wifunda na bandi bana mu muswelo ukokeja kwibateja wandi mulume, uleta bushintuludi bukokeja kumukwasha. Dimo-dimo, wādi umwipangula’mba: “Dyalelo nadi nefunde nenki ne nenki mu kifundwa kyami. Ulanga’po namani?” Kumfulo mulumyandi wāitabija bubinebine.

⁵ Twikalei na Bulēme, Ketwakikalai Bampikwa Kitūkijetyima: Musapudi umo mwana-mukaji wānene’mba “nansha ke banababo badi na bubinga bwa kumona bintu mu muswelo wabo.” Nanshi tufwaninwe kulombola bulēme shi abaleta milangwe yabo, nansha shi abetunena patōkelela’mba kemukitusapwilai bubinebine. (Mus. 3:7; 1 Pet. 3:15) Tufwaninwe kwikala na kampeja-bukidi ka kwibasapwidila na bwino kitatyi kyonso kimweka mukenga, ino na kitūkijetyima, na buswe ne na kuyuka kwibateja. Kitūkijetyima kya uno muswelo i kya kamweno, pamo na mwikilombwela kyokya kyāfikile mukristu umo wātyumwinine mu manwi na kitūkijetyima masusu onso ādi amususula mukajandi wakubulwa kwitabija umbula bwa myaka 20. Pāshilwile kwalamuka, mulume wānene’mba: “Nafwijako Yehova pa kunkwasha ntamije kitūkijetyima, mwanda dyalelo namone bipa bilupuka’ko: mukajami washilula kunanga mu dishinda dya būmi!”

⁶ Lelo nobe i kika kyokalonga ku balongo bobe? Padi kupityila ku mwiendelejo obe mulumbuluke wa bwine-kristu ne ku milombelo yobe yolombela pa mwanda wabo, ukokeja ‘kwibanekenya, bekale kulamata ku mutamba wa Yehova.’​—⁠1 Petelo 3:​1, 2, kunshi kwa dyani.