Malondololo Ku Bipangujo Byenu
◼ Lelo i kika kifwaninwe kulongwa shi kubaikala kimpengele kampanda kyaponena banabetu?
Shi Kimpengele Kampanda Kibalongeka mu Wenu Mwaba: Kemwakazumbazumbai. Komejai mityima ne kulonga bukomo bwa kupandija kintu kya mvubu: būmi, ke bintupo bya kungitu. Pāna bukidi-bukidi bukwashi bwa kungitu ku kyobe kisaka. Kupwa yukija bakulumpe momwikadile ne i kwepi komudi.
Bakulumpe ne bengidi ba mingilo badi na kiselwa kikatampe mu kulongolola muswelo wa kuleta bukwashi. Shi mubabadikila kudyumunwa amba kukekala kimpengele, pamo na mokilongelwanga shi kudi bimpumpu bikatampe, bano banabetu ye bakakimba kuyuka shi boba bonso batenwe na kyamalwa badi mu bifuko byakubulwa kyaka, shi kudi kitatyi, bakebakimbila bidibwa ne kwibabanya’byo.
Kupwa, bendeji ba bifundwa bya kitabo bafwaninwe kuyuka i pepi padi kisaka ne kisaka, kadi ne kuyuka būmi bwabo budi namani. Kifwaninwe kuyukija mutadi mwimaniji nansha mukulumpe mukwabo mwikadile būmi bwa kisaka ne kisaka, nansha shi byonso bidi biyampe. Shi kudi umo utapilwe bilonda, bakulumpe bakalonga buninge bwa kukwata mpangiko ya kundapibwa’ye. Bakakimba kadi ne bintu bya kungitu bya kumukwasha, kimfwa: bidibwa, bisandi, njibo ne bingidilwa bya mpishi. (Yoa. 13:35; Ngat. 6:10) Shi ngikadilo ilomba kufunduka mu kine kifuko’kyo, na mokyaikadile kutunduka kwa Zaïre mu mafuku a kunyuma, i kiyampe banabetu bakekale kyapamo, nabya kikapēla kwikala’bo mu bwendeji ne mu bulami bwa mukulumpe umo. I kyakubulwa tunangu shi bisaka bikekale kukusankana nansha kupalankana. Bakulumpe ba mu kine kipindi’kyo bakakankamika kipwilo kumushipiditu ne mu ñeni, kadi ne kulongolola dikwabo mpangiko ya kupwila, shi bibwanika. Shi abapu kubandaula kamo ne kamo myanda yonso moikadile, mukulumpe umo uketana na mutadi wa kipindi mu dijina dya kitango kya bakulumpe, mwanda wa kumuyukija shi kudi batapilwe bilonda, shi kudi byonekele ku Njibo ya Bulopwe nansha ku mobo a banabetu, ne bisakibwa bikwabo bikwabo. Mutadi wa kipindi ukatuma musapu ku telefone ku musambo nansha kulonga lapolo wa mobipityile. Shi pasakilwa kukwata mpangiko mikatampe kutabuka, musambo ukakwatakanya muswelo wa kuleta bukwashi.
Shi Kimpengele i Kiponene mu Mwaba Mukwabo: Tuvulukei batutu ne bakaka mu milombelo yetu. (2 Kod. 1:8-11) Shi tusaka kwibakwasha’ko na lupeto, tukokeja kutuma byabuntu byetu ku Sosiete udi kala na kibīko kya byabuntu bya bukwashi bilongolwedilwe uno mwanda. Adrese yandi i ino: Association “Les Témoins de Jéhovah”, B.P. 634 Limete Kinshasa. (Bil. 2:44, 45; 1 Kod. 16:1-3; 2 Kod. 9:5-7; tala Kiteba kya Mulami kya 1 kweji 12, 1985, p. 20-22, Falanse) Kemwakatumai bintu nansha byabuntu mu kipindi kiponenwe na kimpengele, poso shi enka batutu badi na kiselwa kya kulongolola bukwashi abemulombe kulonga nabya. Namino bukwashi bukapebwa mu muswelo mwendelemo, ne bukekala bwabanyibwe senene. (1 Kod. 14:40) Tai mutyima wa kuleka kutumakanya misapu ku matelefone mavule ku Sosiete, mwanda kino kikapuakanya mawi mavule atambulwa ku telefone a boba badi mu kipindi kiponene’mo kimpengele.
Kupwa kwa kubandaula myanda yonso, Sosiete ukatala shi i kifwaninwe kubunda komite wa bukwashi. Banabetu bapelwe kino kiselwa bakayukijibwa. Umo ne umo ufwaninwe kwingidila umbumo na bakulumpe baludika bintu mwanda wa banabetu basakila bukwashi basambakane’bo mokifwaninwe.—Tala dibuku Les Témoins de Jéhovah: Prédicateurs du Royaume de Dieu, p. 310-315.