Kivulukilo —mwanda Wa Mvubu Mikatampe
1 Dyayenga mafuku 23 kweji 3, kupwa kwa dyuba kupona, tukavuluka Kivulukilo kya lufu lwa Kristu. (Luka 22:19) Byabine, uno mwanda udi na mvubu mikatampe! Yesu byālamine bululame bwandi bwa kudi Yehova kufika’nka ne ku lufu, wālombwele’mba bantu bakokeja kushala balamatyidile ku mutamba wa Leza nansha shi bekale kufikilwa na makambakano a muswelo’ka, kadi wābingije bubikadi bwa Yehova. (Bah. 5:8) Kupityila ku lufu lwandi, Kristu wāletele kitapwa kibwaninine kya bu muntu kifikile pa kunyongolola muzo wa muntu, wāshitwila boba balombola lwitabijo mudi aye dishinda dya kukamona būmi bwanyeke. (Yoa. 3:16) Kutanwa ku Kivulukilo i kilomboji kya kufwijako kwetu kukatampe pa buswe bwa Yehova ne pa kitapwa kya Yesu kyāelelwe mwanda wa batwe.
2 Twi bakankamikwe batwe bonso kulonda mpangiko ya butangi bwa Bible buteakanibwe tamba mu mafuku 18 kutūla ku 23 kweji 3, budi pa Kalandadiye ka ba Tumoni twa Yehova 1997. Pakwabo kadi, bubandaudi bwa mashapita 112-116 a dibuku Yule Mtu Mkuu Zaidi Aliyepata Kuishi mu kisaka bukokeja kwitukwasha tute milangwe pa uno yenga wa mvubu mikatampe mu Mānga yonsololo.
3 Lelo mwene tukokeja kulonga buninge bwa kutambila mu busapudi mu kino kitatyi kya Kivulukilo? Kweji 3 byadi na madyayenga atano, basapudi bavule bakamwena’mo byabinebine na kwikala bapania bakwashi. Le abe nobe? Batwe bonso tukokeja kwielela’ko mwanda wa kulombola bantu mvubu ya kutanwa ku Kivulukilo. Byokikaponena mu dyayenga, kikekala kipēla ku bantu bavule kwiya kutanwa’ko. Tutei mutyima ku kwita boba bonso botwifundanga nabo Bible ne boba basenswe kwenda kukatanwa’ko. Twisambilei nabo pa byobya bilombwelwe pa paje 127, mu dibuku Buyuki, mu musāngo 18, bitala pa ano masobo anenwe kuvulukwa ku mwaka ne mwaka.
4 Tusepelelei uno mwanda mukatampe, wa mvubu, mu mwaka 1997, koku mityima tutele ku byobya byonso bishintulula lufu lwa Yesu kotudi. Tutanwei’ko batwe bonso mu kyolwa kya 23 kweji 3, difuku dikebunga bakristu bonso babine ntanda mituntulu mwanda wa kuvuluka na kikōkeji kino Kivulukilo.