“Mukaloñanga Enka Namino”—Kivulukilo Kikalongeka mu Mafuku 5 Kweji 4
1. Mwanda waka kuvuluka lufu lwa Yesu kudi na mvubu mpata?
1 “Mukaloñanga enka namino pa kumvuluka.” (Luka 22:19) Yesu wasoñenye balondi bandi na bino binenwa bavuluke lufu lwandi lwa kitapwa. I kutupu difuku dya mvubu mu mwaka kutabuka difuku dya Kivulukilo ku Bene Kidishitu, mwanda dyo dyāpenwe kikūlwa. Mo monka ne Kivulukilo kya uno mwaka byokyafwena mu mafuku 5 Kweji 4, i muswelo’ka otukokeja kufwija’ko Yehova?—Kol. 3:15.
2. I muswelo’ka otukokeja kulombola kufwija’ko pa Kivulukilo kupityila ku kwifunda ne kulanguluka?
2 Witeakanye: Twiteakanyanga nyeke ku bintu byotumona bu bya mvubu. Tukokeja kuteakanya mityima yetu ku Kivulukilo na kubandaula binkumenkume byālongekele mu mafuku a mfulo a Yesu pano pa ntanda ne kulangulukila’byo. (Eza. 7:10) Bisonekwa bimobimo bisambila’po bitanwa mu kalandadiye ne mu Tubandaulei Bisonekwa Difuku ne Difuku, nansha nabya, bisonekwa bivule bikwatañene na mashapita adi mu dibuku Muntu Mukatakata bitanwa pa mapaje 23-24 mu Kiteba kya Mulami kya difuku 1 Kweji 2, 2011 mu Falanse.
3. I muswelo’ka otukalombola kufwija’ko kwetu pa Kivulukilo na kutambila kitatyi ne kitatyi mu mwingilo?
3 Sapula: Tukokeja kadi kulombola kufwija’ko na kutambila kitatyi ne kitatyi mu mwingilo. (Luka 6:45) Kushilula Dya Mposo 17 Kweji 3, tukekala ne kampanye ntanda yonso ka kwita bantu ku Kivulukilo. Le ubwanya kujadika mpangiko yobe mwanda wa kutambila kitatyi ne kitatyi mu mwingilo, pakwabo nansha kwingila bu pania mukwashi? Ubulwe’po kwisambila’po na kisaka kyobe mu Butōtyi bwenu bwa Kisaka bwa ku kyolwa?
4. I byabuyabuya’ka byotukamwena mu kutanwa ku Kivulukilo?
4 Bine tumwenanga mpata mu kutanwa ku Kivulukilo mwaka ne mwaka! Nsangaji ne buswe bwetu kudi Leza bivudilanga’ko kitatyi kyotulangulukila pa buntu bwa Yehova pa kupāna wandi Mwana wa bunka bu kikūlwa. (Yoa. 3:16; 1 Yoa. 4:9, 10) Kino kitulengeja tuleke kwiikadila na būmi bwa batwe bene. (2 Kod. 5:14, 15) Kadi kino kitukunka ku mutyima tutumbije Yehova mu kitango kya bantu. (Mit. 102:19-21) Na bubine bengidi ba Yehova badi na mutyima wa kufwija’ko batengele na kipyupyu mukenga otukekala nao pa Kivulukilo kikalongwa mu mafuku 5 Kweji 4 wa ‘kusapula lufu lwa mfumwetu.’—1 Kod. 11:26.