Tulombolei Kufwija’ko Kwetu
Kivulukilo Kikavulukwa mu Mafuku 17 Kweji 4
1. I mutyima wa muswelo’ka wādi na mulembi wa mitōto otufwaninwe kwikala nao mu kitatyi kya Kivulukilo?
1 Mulembi wa mitōto pa kutengwa na bilongwa bivule bya Yehova bya lusa ne bya bunyongolodi, wāipangwile amba: “Lelo kyo nkamupa Yehova, Mwanda wa byabuntu byandi byonso kudi ami, i kika?” (Mit. 116:12) Dyalelo, bengidi ba Leza badi na bubinga buvule bwa kufwijija’ko. Myaka tutwa pa kupwa kwa bino binenwa bya ku bukomo bwa mushipiditu kusonekwa, Yehova wāpele bantu kyabuntu kyandi kikatakata—ke kikūlwa kadi. Pano potwiteakanya kuvuluka lufu lwa Kidishitu mu mafuku 17 Kweji 4, tudi na bubinga bwinebwine bwa kulombwela kufwija’ko.—Kol. 3:15.
2. Le i bubinga’ka bumo botufwijija’ko pangala pa kikūlwa?
2 Madyese Amwenwa mu Kikūlwa: Kupityila ku kikūlwa, tukokeja ‘kulekelwa mambo etu.’ (Kol. 1:13, 14) Kino kitukwashanga tutōte Yehova na mutyima wa munda-munda utōka. (Bah. 9:13, 14) Tubwanya kwikala na bukankamane bukatampe bwa kwisamba na Yehova kitatyi kyo tumufwena mu milombelo. (Bah. 4:14-16) Boba bonso betabije mu kikūlwa badi na kyepelo kikatampe kya būmi bwa nyeke!—Yoa. 3:16.
3. Le i muswelo’ka otubwanya kulombola’mba tufwijanga’ko Yehova pangala pa kikūlwa?
3 Lombola Kufwija’ko: Muswelo umo wa kulombola kufwija’ko kwetu kukatampe i kutanga Bible difuku ne difuku mu kitatyi kya Kivulukilo ne kulangulukila’po. Kishinte kidi mu Kiteba kya Mulami kya 1 Kweji 2, 2011 kya Falanse kinena amba “Êtes-vous prêt pour le jour le plus important de l’année ?” (Le wimwiteakanye ku Difuku dya Mvubu Mikatampe Kupita Onso mu Mwaka?), kyalupwilwe mwanda wa kwitukwasha tulonge uno muswelo. Tukokeja kadi kulombola Yehova mu milombelo itamba ku mutyima muswelo otumwene kikūlwa na mvubu. (1 Tes. 5:17, 18) Kutanwa kotutanwa ku Kivulukilo na kukōkela ku musoñanya wa Yesu kulombolanga’mba tufwijanga’ko. (1 Kod. 11:24, 25) Pakwabo kadi, tukeula buswe bukatampe bwa Yehova ne kwita bantu bavule batanwe netu pamo.—Isa. 55:1-3.
4. Lelo tukasumininwa kulonga bika?
4 Bengidi ba Yehova ba mutyima wa kufwija’ko kebakamonepo Kivulukilo pamo bwa kupwila kukwabo. I kupwila kwa mvubu mpata kupita konso mu mwaka! Nanshi pano pafwena Kivulukilo, tusumininwei pamo’nka bwa mulembi wa mitōto wāsonekele amba: “Tōta Yehova, abe muya wami, Kokavulaminwa byabuntu byandi byonso.”—Mit. 103:2.