Kufwija’ko pa Kyabuntu Kikatakata kya Leza
1. Mwanda waka tufwija’ko Yehova nakampata?
1 Mu “byakupanwa bilumbuluke” bitupele Yehova, kikūlwa kya wandi Mwana muswe kyo kya kupānwa kitabukile bukata. (Yak. 1:17) I kituletele madyese mavule, kubadila’mo ne kulekelwa kwa bubi bwetu. (Ef. 1:7) O mwanda tufwijanga’ko nyeke pa kino. Twilamijanga’ko kitatyi kya kulangulukila pa kino kyabuntu kya mvubu mu mafuku a Kivulukilo.
2. Lelo i muswelo’ka otukokeja kutamija kufwija’ko kwetu ne kwa kisaka pangala pa kikūlwa?
2 Tamija Kufwija’ko: Ubulwe’po kushiya’ko mu Butōtyi bwa Kisaka bwa kyolwa, kitatyi kya kupituluka mu myanda isambila pa kikūlwa mu mayenga abadikile Kivulukilo kya mu mafuku 30 Kweji 3, mwanda wa kutamija kufwija’ko kwa kyobe kisaka? Londai difuku ne difuku mu kisaka butangi bwa pa bula bwa Bible bwa mu kitatyi kya Kivulukilo. Langulukila pa muswelo omwenine mu kikūlwa ne mokishintyile momwena Yehova, abe mwine, bakwabo, ne būmi bwa kumeso. Ukamona amba, i biyampe mwiibidije kwimba ñimbo ibidi ikembwa ku Kivulukilo, ya mu dibuku dipya dya ñimbo shi kemudi batambule’dyo.—Mit. 77:12.
3. Le tukafwija’ko namani?
3 Kufwija’ko: Kufwija’ko pangala pa kikūlwa kwitutonona tusapwile bakwetu myanda ya Yehova ne buswe bwandi bukatampe pa kwitutumina wandi Mwana. (Mit. 145:2-7) Mu Kweji 3, 4, ne 5, bisaka bimo bifwijanga’ko na kukwata’ko mpangiko amba kwikale muntu nansha’tu umo wa kwingila bu pania mukwashi. Shi kebibwanikapo, mubulwe’po ‘kumwena’ mu kitatyi kyenu na kutambila bininge mu mwingilo? (Ef. 5:16) Kufwija’ko kuketutonona kadi tukwashe bakwabo batanwe netu pamo ku Kivulukilo. (Kus. 22:17) Alwila’ko kusoneka pa papye kujokela’mo kupya, bifundwa bya Bible, babutule, bomwingila nabo, ne balondakani ba kwita, ne kutambila ne pa mfulo mu kampanye ka pa bula ka kupāna lwito lwa ku Kivulukilo.
4. Lelo tukengidija kitatyi kya Kivulukilo na tunangu namani?
4 Kitatyi kya Kivulukilo kitupanga mikenga ya kulombola Yehova amba tusangedile kyabuntu kyandi kyaetupele. Twingidijei kino kitatyi mwanda wa kutamija ne kulombola mutyima wetu wa kufwija’ko pangala pa kikūlwa ne pa byonso “bya bupeta bwa Kidishitu bwampikwa kukōkejamo kulonda.”—Ef. 3:8.