Le Usa Kukwatakanya Uno Mukenga?
Kivulukilo Kisa Kwitukwasha Tulombole Kufwija’ko
1. Le i mukenga’ka wa pa bula usa kwituletela Kivulukilo?
1 Kivulukilo kisa kulongeka mu mafuku 14 Kweji 4, i mukenga wa pa bula wa kutamija ne kulombola kufwija’ko kwetu pa buyampe bwa Yehova. Nsekununi idi mu Luka 17:11-18 ilombola muswelo umona ba Yehova ne Yesu kufwija’ko. I kya bulanda mwanda mu ba dikumi bāpwijibwe makopo, umo kete ye wākwatakenye uno mukenga wa kulombola kufwija’ko. Mu mafuku āya kumeso, kyabuntu kya kinkūlwa kisa kupwija lonso misongo yonso ne kulengeja būmi bwa nyeke bufikidile! Ne kutatana kwine mpika, tukafwija’ko Yehova difuku ne difuku pa ano madyese. Ino, le i muswelo’ka otukalombola kufwija’ko kwetu mu mayenga āya’ko?
2. Le i muswelo’ka otukatamija mutyima wetu wa kufwija’ko pa kinkūlwa?
2 Tamija Mutyima wa Kufwija’ko: Mutyima wa kufwija’ko ulupukanga mu milangwe. Pa kwitukwasha tutamije mutyima wetu wa kufwija’ko pa kinkūlwa, i kulupulwe mpangiko ya butangi bwa Bible bwa pa bula mu kitatyi kya Kivulukilo ibwanya kutanwa mu bifuko bivule, pamo bwa mu mbwejo B12 ya mu Bushintuludi bwa Ntanda Mipya bushintululwe dipya, mu kalandadiye ne mu Tubandaulei Bisonekwa Difuku ne Difuku. Le mwabulwa’po kubandaula ino myanda mu kyenu kisaka? Kulonga namino, kukatamija mutyima wetu wa kufwija’ko pa kinkūlwa. Kadi kino kiketukwasha twikale na mwiendelejo muyampe.—2 Ko. 5:14, 15; 1 Yo. 4:11.
3. Le i mu miswelo’ka motukalombola mutyima wa kufwija’ko kitatyi kya Kivulukilo?
3 Lombola Mutyima wa Kufwija’ko: Mutyima wa kufwija’ko umwekelanga ku bilongwa. (Kol. 3:15) Muntu wa makopo wa mutyima wa kufwija’ko, wālongele bukomo bwa kutana Yesu ne kumufwija’ko. Kadi ne kutatana kwine mpika, wākalombwele’mo bakwabo na buzanzamuke pa bitala kundapibwa kwandi kwa mu kingelengele. (Luka 6:45) Le mutyima wetu wa kufwija’ko pa kinkūlwa ubulwe kwitutonona tusapule na bukankamane mu kampanye ka Kivulukilo? Kwingila bupania mukwashi nansha kusapula bininge mu kitatyi kya Kivulukilo i muswelo mukwabo muyampe wa kulombola kufwija’ko kwetu. Mutyima wa kufwija’ko uketutonona mu kyolwa kya Kivulukilo tutundaile beni bāya kadi twikale beadije mwanda wa kulondolola bipangujo byabo.
4. Le i muswelo’ka otubwanya kulonga kino Kivulukilo pampikwa kwialakanya?
4 Le kino Kivulukilo kyo kyetu kya mfulo? (1 Kod. 11:26) Ketuyukilepo bidi. Inoko kyotuyukile i kino amba, kulongeka’tu kwakyo i mukenga wetu wa pa bula wa kulombola kufwija’ko. Lelo ukakwatakanya’o? Bine, tulekei binenwa bya kufwija’ko bitamba mu kyakanwa kyetu ne kulanguluka kwetu kutamba ku mutyima kusangaje Yehova, mwine Upēne kinkūlwa na mutyima tō.—Ñim. 19:14.