Tulombolei Bulēme Ku Kifuko Kya Mutōtelo Wa Yehova
1 Potwendelwanga na muntu kampanda kwandi, tulēmekanga bintu byandi, kutyina’mba kwakoneka kantu nansha kamo. Kadi ketuvutakanyangapo bibidiji bilumbuluke bya kisaka’kya. Shi kidi namino, lelo kitatyi kyotwikalanga beni ba Yehova ke pepi? Tufwaninwe kuyuka muswelo wa kwiendeja mu njibo yandi. (Mit. 15:1; 1 Tem. 3:15) Nansha shi kupwila kwetu kwa bwine Kidishitu kulongelwa ku Njibo ya Bulopwe, ku njibo ya kampanda, nansha mu njibo yo-yonso, batwe bonso tufwaninwe kulombola nyeke bulēme ku kifuko kyetu kya mutōtelo, bulēme bufwaninwe njibo ya Yehova, ke-muntu “ntumbo yandi īdi peulu pa ntanda ne diulu dīne kumo.”—Mit. 148:13.
2 Dimodimo banabetu bamo kebekalangapo na bulēme bwabinebine kitatyi kya kupwila; wibevwana balenga lunwa, pakwabo balonga bintu ulanga’mba myanda isambwa ku kupwila keidipo na mvubu. Bantu batame bamobamo bendelelanga na kwisambila pa bintu byakubulwa kwendela’mo abo pa kibelo, pa bibidi patundailwa bāya, ku misalani nansha panja pa Njibo ya Bulopwe, ako kupwila papo ke kushilule kala. Shi nkasampe walekwa’mba atale mwanabo mwanuke, utala dimodimo bonso babidi bashilula kukaya, koku bintu bivule bya mu mpangiko bibapita. Tumonanga banuke bakaila panja pa Njibo ya Bulopwe kupwa kwa kupwila, balenga lungwe lukatampe, pakwabo kebeenge bikoni ne bikonono. Dimodimo bakambijanga balondakani netu nansha kujingija banabetu mu Njibo ya Bulopwe na kukanda ku lukala nansha na kupitakana lubilo mu bibasa ne kutakika banabetu banunu.
3 Ketukikalai Monka Bakubulwa Bulēme: Shi binebine twi bevwane senene mvubu ne bu-ujila bwa mutōtelo wetu, nankyo ketukatompapo nansha dimo kulabika bemvwaniki na kwisongola, kudya, kutankunya mabazoka, kulenga misalakato na kukonya mapapye, kuselakana ku musalani nansha kulondelalondela nyeke ku kupwila. Bambutwile babulēme ne badi na mutyima wa kufwija’ko bapelejanga babo bana kufityija tapi, tusandi tuneñenya munda nansha mumbu ya Njibo ya Bulopwe ne ya njibo mulongelwanga kifundwa kya kitabo. Pakwabo kadi, batwe bonso tuyukile biyampe’mba mwikadilo uleta bumvu, mibotakanya ne mizaulo ya bintu bya bukobakane, kebifwaninwepo kutelwa nansha dimo ku kupwila kwetu.—Ef. 5:4.
4 Ekale shi tulame nyeke mu ñeni kitungo kilongelwa kupwila kwetu kwa bwine Kidishitu, nankyo betu bana ne batwe bene tukalombola bulēme bufwaninwe mutōtelo wa Yehova mu kifuko ‘motutongele kwikala.’—Mit. 84:10.