Shi Ntwelelo Kampanda Ilupulanga Bipa, Ingidija’yo!
1 Mwingilo Wetu wa Bulopwe witupanga kitatyi ne kitatyi ntwelelo mishileshile yotushilulanga nayo mīsambo mu busapudi. Kino kitupanga milangwe impya ya kusamuna nayo kusepelela kusepelelanga bantu musapu wa Bulopwe. Kepabulwe padi nobe uloñanga buninge bwa kwifunda ntwelelo imo nansha mivule ku kweji ne kweji. Ino basapudi bamobamo bakokeja kumona namino, abo bakikatakata na kupotolola mwa kwingidijija ntwelelo imo, kitatyi kityetye kyonka kwalupuka ntwelelo mikwabo mipya mu Mwingilo Wetu wa Bulopwe mukwabo. Kunena na bubine, ke bantu bonsopo babwanya kwifunda ntwelelo impya kumeso kwa kupotolola senene imbajinji.
2 Ku mutamba mukwabo, bapania tununu ne tununu pamo ne basapudi bakwabo bapityijanga kitatyi kilampe mu mwingilo wa busapudi. Kadi bipwilo bivule bisambakanyanga mwaba wabyo onso mutuntulu mu mayenga matyetye onka. Mu uno muswelo, basapudi badi na dyese pa kupebwa ntwelelo impya ya kuyuka mwa kobolwela bantu, ne milangwe mipya ilombola mwa kupānina musapu. Kino kibapanga manwa a kutamija bwino bwabo. O mwanda ne mwingilo wabo usangaja, ulupula bipa bya ntanda ne ntanda, bamona ne mwa kunekenyenya bikambija bibafikilanga.
3 Nanshi, shi twi bateakanye ntwelelo ilangula kusepelela, nankyo twendelelei na kwingidija’yo! Ke biyampepo kuleka kwingidija ntwelelo mishikate ilupula bipa bilumbuluke. Kikatampe kine kisakwa i kukwatañanya’yo na dibuku dipānwa mu mwine kweji’wa. Kitatyi kyopituluka mu madingi aletelwe mu Mwingilo Wetu wa Bulopwe, kimba myanda isangaja yosaka kutweja mu ntwelelo yobe.
4 Shi ke pano, ponso potutambula Mwingilo Wetu wa Bulopwe mupya, tuvulukei’mba ntwelelo idi’mo i bulombodi’tu bwa kulondela’po. Shi ukokeja kwibwingidija, i biyampe. Ino shi udi kala na ntwelelo ilupulanga bipa mu wenu mwaba, kokileka kwingidija’yo! Kidi na mvubu i ‘kufikidija biyampe mwingilo wetu’ senene shē, kutana bantu bafwaninwe’o ne kwibakwasha bekale bana-babwanga.—2 Tem. 4:5.