Banwe Bana—Mwi Nsangaji Yetu!
1 Banwe bankasampe bana-balume ne bana-bakaji, lelo mwi bapotolole ndudi ya Yehova isoñanya kwimutweja mu mingilo ya pa kipwilo? (Kup. 31:12; Mit. 127:3) Tudi na nsangaji pa kwikala nenu pamo mu butōtyi botutōta Yehova. Mwitusangamunanga mityima pomushikatanga nyā ku kupwila muteja na katentekeji. Kitupanga nsangaji mpata pomutompanga kulondolola mu bishima bya banwe bene. Kipwilo kyonso kituntulu kisangalanga pomupityijanga bipindi bimupebwanga ku Masomo a Mwingilo wa Kiteokratike, pomutambilanga netu pamo mu mwingilo wa budimi na bupyasakane, ne potwivwananga’mba mulombolanga bukamoni pampikwa moyo ku balunda nenu ba ku masomo ne ku badimu benu.—Mit. 148:12, 13.
2 Tusaka muyuke’mba twimwitembanga bininge kitatyi kyotumona mikadilo yenu ya bulēmantu, mumwekelo wenu mufwaninwe, mwiendelejo wenu muyampe, ne bulēme bomulēmekele batame. Twikalanga na nsangaji mikatampe nakampata pomulombolanga’mba ‘muvulukanga Umpangi wenu Mukatampe’ na kwitungila bitungo bya Kiteokratike.—Mus. 12:1; Mit. 110:3.
3 Mwitulombolei Bitungo Byenu: Nkasampe umo mwana-mulume wa myaka mwanda wālombwele mutadi wa distrike amba: ‘Nsakanga bidi kubatyijibwa, kadi nsenswe kwingila mu kipwilo ku mingilo ya binanda ne kukwatyila banabetu mikro, kwikala utundaila bāya, kukwasha ku mabuku, kutanga ku kifundwa kya kitabo ne kya Kiteba kya Mulami. Kupwa nsenswe kwikala mwingidi wa mingilo, kupwa ke bu mukulumpe. Kadi nsenswe kwikala pania ne kukafunda ku Masomo a bapania. Kupwa nsenswe kwenda ku Betele, kwikala mutadi wa kipindi nansha wa distrike.’ Bine, uno mwanuke walombwele binebine amba utendelanga madyese a kwingidila Leza!
4 Mu matanda onso asatu atalwa na musambo wetu, tukimba’mo bankasampe bavule ba mutyima wa kwipāna, na munenena Isaya 6:8. Mavita alwilwe mu wetu mwaba aleta bukamoni bulombola’mba kulondalonda byabupeta ke dishindapo dya tunangu. (Mus. 2:17-19) Bine, i kyatunangu kukimba byabupeta bya kumushipiditu na kwingidila Yehova na muya wetu onso mu kino kitatyi kityetye kyashadila’ko ino ngikadilo mikulu ibikelwe na Satana! (Mat. 6:19-21, 33) Masomo a Bufundiji bwa Mingilo i mashitule bibelo byao ku bankasampe bankungulume bengila bu bengidi ba mingilo nansha bu bakulumpe. Boba babinga ku ano masomo batumwanga konso kukengila bu bapania balonso, bapania ba pa bula, mu bipindi nansha mu madistrike. Kushintulula ko kunena’mba, bankasampe botumwene dyalelo, kesha bakekala ke bapania ne batadi bendakana!
5 Pomwenda mutama kungitu ne kumushipiditu, tusangalanga kwimumona mufikila pa bitungo byenu. (Tala Luka 2:52.) Mwaka ne mwaka, bavule umbukata mwenu bekalanga basapudi bakubulwa kubatyijibwa, kupwa babwanya bisakibwa bya kwikala bengidi ba Yehova babatyijibwe. Nsangaji yetu ilundilanga’ko potwimumonanga mushilula mwingilo wa bu pania mukwashi, kupityididila, mwingilo wa kitatyi kyonso. Ke kya kutatanapo, banwe bana, mwi nsangaji yetu ne nsulo ya ntumbo ya Tata wetu wa mūlu. Yehova emwesele madyese a ntanda ne miseke!—Nk. 23:24, 25.