Tulumbululei Manwa Etu mu Mwingilo—Na Kuta Muntu ne Muntu Mutyima

Kyo Kwikadile na Mvubu: Yesu wādi umona muntu ne muntu kadi wādi ulombola na buswe’mba utēle muntu ne muntu mutyima. Kimfwa difuku dimo nenki Yesu wādi ubwanya kusūla muntu umo wa kitwi, inoko Yesu wāmundapila pafula kwampikwa kumonwa na kibumbo. (Mako 7:31-35) Wālombwele’mba wādi ulēmekele bandi bana ba bwanga na kuyuka pafudile mikalo yabo ne na kuleka kwibafundija bintu bipite kipimo. (Yoa. 16:12) Yesu nansha ke pano padi mūlu, ulombolanga’mba utēle muntu ne muntu mutyima. (2 Tm. 4:17) Byotudi balondi ba Kidishitu tusakanga kumwiula. (1 Pe. 2:21; 1 Yo. 3:16, 18) Kadi tukalumbulula senene mwingilo wetu shi tulombola’mba tulēmekele mwinē njibo ne amba tutēle mutyima ku ngikadilo yadi’mo, ku byasakanga ne ku bine byatēle’ko mutyima. Shi amone’mba ketwiidilepo’tu enka kumusapwila ne kumushīla mabuku kete; inoko tumutēle ne aye mwine mutyima, nabya ukasangela mpata musapu wetu.

Mwa Kulongela:

Witeakanye senene. Ikala mutūkanye, umungamunga kadi bya bulunda.
Yuka kubandila. Le kudi byowamona bilombola’mba muntu udi na bana? Le usenswe kudima’ni nansha kumuna? Le ubamone’mba udi na nkulupilo kampanda ya mutōtelo? Padi ukakwatañanya ntwelelo yobe na ngikadilo yadi’mo.
Mwipangule byalanga, kadi muteje na katentekeji pambulwa kumutyibakanya. Kitatyi kyanena, mutale mwanda wa kulombola’mba umutejanga. Lombola’mba ulēmekele milangwe yandi, kadi mufwije’ko bya binebine shi bibwanika. Epuka bya kwipatanyapatanya.
Yuka kukwatañanya. Shi bibwanika, shinta ntwelelo yobe, wiikwatañanye na bitele’ko muntu mutyima. Kulonga namino kukakupēlela mwanda matrakte etu, maboloshile ne mapepala esambilanga pa myanda mishileshile. Shi ubatana muntu mu kitatyi kibi, padi udi na bivule bya kulonga, nabya mwivwane kadi ipipija mīsambo.

Tompa Kulonga Namino uno Kweji:

Ku kupwila kwa kutambila mu busapudi, tutu wendeja ubwanya kwisambila, nansha kulongeja kya kumwena’ko kilombola miswelo ya mwa kutēla muntu ne muntu mutyima.