Tutei Bakwetu Mutyima—Na Kutadija
1 Yehova Leza ne Kidishitu Yesu bo bapityile bonso mu kujingulula bisakibwa binebine bya bantu ne mu kwibapa bukwashi bobasakilwa. (2 Bil. 16:9; Mako 6:34) Kitatyi kyotujingulula bintu bisangaja bantu ne byobya byobatele mutyima kudi boba botutana mu mwingilo wetu, tukokeja kukwatañanya musapwilo wetu wa myanda miyampe na ngikadilo’ya.
2 Ta Mutyima ku Kantu ne Kantu: Yesu wādi muntu utadija. (Mako 12:41-43; Luka 19:1-6) Mu muswelo umo onka, kitatyi kyotufwena ku kibelo kya mwisambi netu ne kujingulula bifwatulo bya mutōtelo, bilembwa bilembelwe ku myotoka, nansha bikaibwa nabyo bidi mu lubanza, tubwanya kusaula mikenga ya kupāna bukamoni bufike’po bwa myanda miyampe.
3 Mumwekelo wa mpala ya muntu ne mwikadilo wandi bikokeja kulombola kintu kampanda pa byalanga. (Nk. 15:13) Kepabulwe padi i mujimije muntu waswele nansha udi mu ngikadilo mikwabo kampanda ya njia imusakila busengi. Kumutangila bisonekwa bifwaninwe kukokeja kumusangaja. (Nk. 16:24) Le shi mwisambi netu wiyumbila kutaluka pa kibelo nansha shi unyunya mwana udila napo? Nabya, kikekala padi kiyampe kukwata mpangiko ya kujokela’ko kitatyi kikwabo. Shi tubanga mukwetu ne kulombola “kanye,” nabya tukatonona muntu’wa aketwivwane kitatyi kyotukajoka.—1 Pet. 3:8.
4 Kwatañanya Nshintulwilo Yobe: Mutumibwa Polo wājingulwile amba kibundi kya Atene kyādi na madabahu obādi balambwila’po “Leza wampikwa kuyūkwa.” Kino kyāmukweshe ayuke muswelo wa kusapula myanda miyampe, pa kino wānena’mba: “Nanshi uno o mutōtanga bitupu, ñeni ya kumuyūka nayo mpika, ye uno o nemusapwila ami uno.” Uno musapwilo wa bunwa wa Polo wātonwene bavule bādi’po bekale kulēmeka musapu wa Bulopwe ne kwitabija bāitabija.—Bil. 17:23, 34.
5 Mu muswelo umo onka, kutadija kwetu kuketukwasha tujingulule bitele’ko muntu mutyima ne biketukwasha tusendulule musapwilo wetu. Ipangula bipangujo bikokeja kuloba mwisambi nobe tudi mu kanwa. Langulukila pa bisonekwa bibwanya kwingidijibwa mwanda wa kushinsakanya kusepelela kwandi. (Nk. 20:5) Kutadija kwetu ne kuta bakwetu mutyima bya binebine kuketukwasha tusapule myanda miyampe na bwino.